Job

2 Ọ ghi vbe dọlegbe sẹ ẹdẹ ne avbe odibosa ya gbe ẹbu vbe odaro e Jehova, Esu na vbe do deba iran. 2 E Jehova keghi nọ rẹn wẹẹ, “Vbe uwẹ a ke dee vbọ?” Esu keghi wanniẹn wẹẹ, “I hẹ yo hẹ rre zozo lele otagbọn khian.” 3 E Jehova keghi nọ rẹn wẹẹ, “U ma miẹn ọguọmwadia mwẹ ighẹ e Job? Orhiọnkpa i rrọọ vbe uhunmwu otagbọn, nọ gu obọ mwẹ kevbe nọ vbe maan zẹvbe ọre. Te ọ wa ye ga mwẹ vbe odẹ nọ khẹke, agharhemiẹn wẹẹ, u te gha hoo ne I werriẹ aro nọ khọọ daa re, kevbe ne I kuan rẹn rua, uhiẹn vbe ọ ma rẹn ọkpa rẹn eva.” 4 Esu keghi wanniẹn wẹẹ, “Ọmwa gha sẹtin ya emwi hia nọ mwẹ ya dẹ uhunmwu ẹnrẹn ye agbọn. 5 Sokpan, tobọ ruẹ kuan rẹn, deghẹ ọ ma tie ihẹn nuẹn.” 6 Ẹre Jehova na tama Esu wẹẹ, “Ọ wa maan, a rhie ẹre yọ ruẹ obọ, sokpan ghẹ gbe ẹre rua.” 7 Esu keghi kpa hin odaro e Jehova rre. Ọ na ya tue erhọn ne ighekpe ku e Job egbe hia, ke atata owẹ ya sẹ uhunmwu. 8 E Job keghi ya tota ye otiku, ọ na rhie ebunbunmwẹhẹn ya gha hia erhọn. 9 Amwẹ ọnrẹn keghi tama rẹn wẹẹ, “Te uwẹ ye sikan mu Osanobua, vbene u ka ru ẹre dee yi? Tie ihẹn ne Osanobua ne u wu!” 10 E Job keghi wanniẹn wẹẹ, “Ẹmwẹ oya ẹre ọ ke unu ruẹ ladian. Osanobua gha rhie emwi nọ maan gie omwa, ma ghi ya oghọghọ miẹn ọnrẹn yi. Vbọzẹ na gha na gha gui ẹzọ uwu unu, adeghẹ ọ gie ọlọghọmwa rre?” Vbene ọlọghọmwa na wegbe sẹ, e Job ma fi unu gie Osanobua. 11 Eha vbe uwu avbe ọse ne Job mwẹ keghi re, Ẹlifaz ne ovbi ẹvbo na tie ẹre Tẹman, e Bildad ne ovbi e Siua kevbe Zofa ne ovbi e Naama. Iran ghi họn vbene emwi ba so e Job hẹ, iran na we iran khian ya mu ẹnrẹn aro ze.