Job

13 “Ẹmwẹ ne uwa talọe hia, I ka họn ehia dee yi. I rẹn otọ ehia. 2 Mẹ vbe rẹn sẹ zẹvbe ne uwa vbe rẹn. I i re nọ ma sẹ ihe uwa. 3 Sokpan, Osanobua ẹre imẹ gu muan ẹmwẹ, ighẹ ẹ i re uwa. I hoo ne I gui ẹzọ mwẹ ma rẹn. 4 Te uwa ya ohoghe mu asa gue a ma rẹn emwi ọghe uwa. Te uwa yevbe ọbo nẹi sẹtin sinmwi ọmwa rhọkpa. 5 Wa ghẹ zẹdẹ guan, ne agbọn miẹn ehe na gha roro ighẹ umẹwaẹn ẹre uwa khin. 6 “Wa danmwehọ vbe I a gha gui ẹzọ mwẹ. 7 Vbọzẹ ne uwa na ta ohoghe yi? Wa yayi ighẹ ohoghe ọghe uwa mwẹ emwi nọ gha ru ne Osanobua ra? 8 Te uwa ra ta ene unu ẹnrẹn nẹẹn ra? Wa ẹre ọ ra gui ẹzọ ẹre vbe iko ra? 9 Osanobua gha gbarokotọ ghee uwa, ọ gha miẹn emwi nọ maan ọkpa vbọ ra? Te uwa roro ighẹ wa gha sẹtin do Osanobua ọzuọ vbene uwa do emwa nagbọn ọzuọ na ra? 10 Ọ gha khọnrẹn ne uwa gha do zẹ ọmwa ẹkpe, te Osanobua gha ye gu uwa gui. 11 Ẹtin ẹnrẹn ghi runran uwa. 12 Itan ne uwa kpa, te ehia rhiara zẹvbe emuẹn, ẹmwẹ ne uwa guan ladian ye mitanmitan zẹvbe obuẹ. 13 Wa gbẹdọ ne uwa rhie otọ mẹ ya guan, ehe nọ gha de gbe nọ de gbe. 14 “Mẹ mu egbe ne I ya rhie uhunmwu daa ẹbe. 15 Idaehọ mwẹ fo nẹ, rhunmwuda ọni, ẹ i ghi mwẹ esa adeghẹ Osanobua gbe mwẹ rua. I gha gui ene unu mwẹ ma rẹn. 16 U gha ghee, udinmwẹ na ghi do miẹn mwẹ fan, rhunmwuda, ohan i ra gi ọmwa dan mudia ye odaro Osanobua. 17 Banbanna nian, danmwehọ vbene I rhan otọ emwi hẹ. 18 I mu egbe ne I gui ene unu mwẹ, rhunmwuda I rẹnrẹn ighẹ mẹ ẹre ọ rri ase. 19 Te u ra do ba mwẹ ifiẹzọ ra Osanobua? U gha ru vberriọ, mẹ mu egbe ne I gha ya hunwan ne I wa wu. 20 Gu mwẹ nọ emwi eva, u ghi kue yọ mwẹ re. Iyeke ọni, I i ghi lẹẹ nuẹn. 21 Ghẹ ghi rriọ mwẹ oya, ghẹ ya emwi ohan fuẹn mwẹ rua. 22 Osanobua, wẹ ka guan, ne imẹ rhie ewanniẹn yọ. Ra gi imẹ ka guan ne uwẹ rhie ewanniẹn mẹ. 23 De emwi nọ re orukhọ mwẹ yi? De emwi ne I baku ru? De emwi dan na ka yọ mwẹ owẹ? 24 Vbua ghi na rhie aro lẹre mẹ hẹ yi? Vbua ghi na ya aro eghian ghee mwẹ hẹ? 25 Te u hoo ne u runran mwẹ ra? Mẹ ma vba ebe nọ kakae, irunmwu nọ kaka nẹ ẹre uwẹ gu khọn. 26 U wa ba mwẹ ifiẹzọ ọhanabe, ya sẹ egbe emwi ne I ru vbe I he ye kherhe. 27 U rrọọ ọgiọrọ yọ mwẹ owẹ, u kegha baba owẹ ne I zẹ vbe otọ, u keghi vbe gha zọ uhio ehe ne I rhie owẹ yi. 28 Rhunmwuda ọni nian, I keghi vbiolo kua zẹvbe erhan nọ kẹkẹ, kevbe zẹvbe ẹwu ne arriukpa re.