Job
12 Ẹre Job ghi na wanniẹn wẹẹ, 2 “Vbe ẹmwata, wa ọre unu emwa hia. Wa gha wu, ẹwaẹn gha wu lele uwa. 3 Sokpan vbene uwa waan, erriọ imẹ vbe waan. Emwi ọkpa ne uwa ya sẹ mwẹ, ẹ i rrọọ. Agbọn hia vbe rẹn emwi ne uwa he ta sin. 4 Banbanna nian, uhiẹn ighẹ te avbe ọse mwẹ ghi giẹ mwẹ, iran gha giẹ, agharhemiẹn ighẹ ọmwata ẹre I khin, I ma rri abe. Sokpan, ẹghẹ ọkpa rrọọ, ne Osanobua na họn erhunmwu mwẹ. 5 Wa i mwẹ ọlọghọmwa, sevba wa gha ya mwẹ gbogiẹ; wa na gha fi ọmwa nọ de khian emwi. 6 Avbe oyi kevbe emwa ni ma rẹn Osanobua, ghi gha rrọọ vbe ọfunmwegbe. Agharhemiẹn wẹẹ, ẹtin obọ iran ọrọre osa ọghe iran. 7 “Avbe ahianmwẹ kevbe aranmwẹ oha, wa mwẹ emwi nibun ne iran gha ma uwa ẹre. 8 Wa nọ avbe aranmwẹ oke kevbe ọghe okun ne iran ma uwa ẹwaẹn ọghe iran. 9 Iran hia rẹnrẹn ighẹ obọ e Jehova ẹre ọ yi iran. 10 Osanobua ẹre ọ dia ẹdagbọn avbe emwi nọ yi; obọ ẹtin ẹnrẹn ẹre ẹdagbọn emwa hia ye. 11 Sokpan, zẹvbe ne evbare na danmwẹ rhiẹnrhiẹn aranmwẹ ruẹ, erriọ ẹre ẹmwẹ na họn vbe rhiẹnrhiẹn ehọ ruẹ. 12 “Avbe ọmaẹn mwẹ ẹwaẹn, avbe ọmaẹn vbe rherhe bẹghe vbene emwi khian de hẹ. 13 Osanobua rẹn vbene emwi ra de hẹ kevbe ẹtin na ya ru ẹre vbene a gha ru ẹre hẹ. 14 Osanobua gha dunmwu emwi sotọ, de ọmwa nọ gha dọlegbe bọe? Osanobua gha mu ọmwa ye ẹwẹdọ, de ọmwa nọ gha sẹtin faẹn fua? 15 Osanobua gha mu amẹ, uyunmwu ghi rre. Ọ gha zẹ amẹ obọ fua, ogbigbi orogho amẹ ghi rre. 16 “Osanobua wegbe, irẹn ẹre ọ khọnmiotọ vbe ẹghẹ hia. Ke na rẹrẹ, kevbe nọ rẹrẹ ọmwa, obọ ẹtin ẹnrẹn ẹre iran hia ye. 17 Ọ ghi miẹn iran ni khaevbisẹ ẹwaẹn, ọ ghi ya iran ni dakha gha ru emwi ukọnmwẹ. 18 Ọ gha silo avbe ọba hin ẹkete iran rre, ọ ghi ya iran khian eviẹn. 19 Ọ ghi gbe avbe ohẹn kevbe emwa ẹtin uhunmwu ke otọ. 20 Ọ ya obọ gue emwa na mu ẹtin yan unu, ọ ghi vbe miẹn avbe ọmaẹn ẹwaẹn iran. 21 Ọ fa iran ni rre ukpo ẹtin rua, ọ keghi vbe dobọ ẹtin iran ni dakha yi. 22 Ọ gie uwanmwẹ gha rrie ehe nọ so ebiebi. 23 Ọ ya avbe okpẹvbo khian ni wegbe kevbe ni kpọlọ, sokpan, ọ khọn miẹn iran otọ, ọ keghi vbe fuẹn iran rua. 24 Ọ ya ọkaolotu iran khian akpa, ọ keghi gi iran gha zozo, iro han iran, iran wirua. 25 Iran baba odẹ khian vbe uwu ebiebi, iran kegha kpigogo, zẹvbe ọdayọn.