Ẹsta

3 Ọ ghi kpẹẹ fua kherhe, e Kzakzis ne ọba keghi rhie okpia ọkpa na tie ẹre Haman ye ukpo iyasẹ. E Haman na kegha re ovbi e Hamedata ne ovbi uniẹn Agag. 2 Ọba keghi tama avbe irriegie ẹre hia wẹẹ ne iran gha diguẹ vbokho uhunmwu rriotọ ya gha rhie ọghọ nẹẹn. Iran hia keghi gele gha ru vberriọ, sokpan e Modekai nọ khare wẹẹ irẹn i ru ẹre. 3 Avbe irriegie nekpa ni rre oga ọba keghi gha nọ rẹn otọ emwi nọ si ẹre nọ ma na họn ẹmwẹ ọba. 4 Iran keghi kpikpi ẹre ẹdẹgbegbe wẹẹ nọ ru vberriọ, sokpan, ọ ma zẹ ye iran re, ọ wẹẹ, “Ovbi e Ju ẹre imẹ khin, I i sẹtin ya uhunmwu rhanmwẹ otọ ne Haman.” Iran keghi ya ta ẹmwẹ na ma e Haman, iran na gha ghee adeghẹ ẹ i miẹn emwi ru e Modẹkai re yọ. 5 E Haman ghi miẹn wẹẹ e Modẹkai ma mu egbe nọ gha ya diguẹ vbokho uhunmwu rriotọ ne irẹn, ohu na kakabọ muẹn. 6 Ọ ghi họn wẹẹ Ovbi e Ju nọ, ọ na kha wẹẹ ẹ i re Modẹkai ọkpa ẹre irẹn gha rri ọre oya, ọ na ya mwamwaẹn wẹẹ ne irẹn gbele Ivbi e Ju hia ni rre otọ Arriọba e Pẹsia. 7 Ọ ghi rre ukpo nogie iweva ne Kzakzis rri ọba, vbe uki nokaro na tie ẹre Nisan, e Haman na wẹẹ na yan uta (e Pur ẹre iran tie nene emwi) ya gualọ, ẹghẹ nọ kei yi ne irẹn gha ya mu emwamwa dan ọghe irẹn sẹ. Iran keghi do bu ẹre ye ikpẹdẹ nogie iweha vbe uki nogie iweva na tie ẹre Ada. 8 E Haman keghi bu ọba ya tama rẹn wẹẹ, “Ivbi ẹvbo eso rre otọ ruẹ na, iran zagha gba otọ na hia, a i vbe miẹn iyaẹvbo ne a i na miẹn iran, ilele ẹvbo iran ma zẹdẹ gu ọghe ẹvbo ọvbehe rhọkpa ro vbe otọ na. Yevbesọni, iran i ya uhi ẹvbo na ru emwi, rhunmwuda ọni, ẹ i re emwi nọ gha fu egbe adeghẹ a sẹ iran rae. 9 Adeghẹ ọ yẹẹ ruẹ Umogun, wa tae wẹẹ, na gbele iran rua. U gha tae vberriọ, mẹ yan rẹn nian wẹẹ I gha mu etọni esiliva ekesọgban i rrọọ vbe arria eva (375) ye otọ vbe aza ẹguae na ya gha winna iwinna otọ arriọba na.” 10 Ọba keghi yuo oroka ne irẹn rhie ye obọ, na ya yi ama ye ẹmwẹ nọ tae, na miẹn ehe na tie ẹre ẹmwata, ọ na rhie ne eghian ọghe avbe Ivbi e Ju ighẹ Haman ne ovbi e Hamedata ne uniẹn Agag. 11 Ọba keghi tama rẹn wẹẹ, “Ke emwa nii, kevbe igho ne iran mwẹ, a viọ ehia yọ ruẹ obọ, emwi nọ ghi khọn ruẹ, ru iran ẹre.” 12 Ọ ghi sẹ ikpẹdẹ nogie iweha ọghe uki nokaro, e Haman keghi tie avbe ọgbenbe ọba, ọ na gha guan ne iran wa gha gbẹn ọnrẹn vbene irẹn ya tae nii, ẹmwẹ ne ọba tae, na gha vbe zedu ẹre ye ẹvbo na zẹ kevbe odẹ na ya gbẹnnẹ emwi ni rre otọ arriọba nii hia na viọ gie avbe irriegie ni khaevbisẹ, kevbe ẹwọe ọba hia. Eni e Kzakzis ẹre a ya ta ẹmwẹ na, a na ya oroka ẹre yi ama asẹ yọ.