Ẹsta

3 Ehe ne otọ ni lae ehe nọ rhanmwẹ, ehe na ghi na wewe ẹmwẹ na, eve orriara kegha rrọọ vbe uwu ẹbu avbe Ju. Iran kegha yo aguẹ, iran na gha viẹ, iran na gha go, nibun vbe uwu iran kegha viọ ukpọn akhiẹ ye egbe, iran na lovbiẹ ye uwu emuẹn. 7 E Modẹkai keghi talọ emwi nọ sunu vbe egbe irẹn ma rẹn kevbe inu igho ne Haman khare ighẹ irẹn gha mu ye aza ẹguae, adeghẹ a gbele Ivbi e Ju hia rua. 8 Ọ keghi rhie ọkpa ne Hatak vbe ebe na gbẹnnẹ mu ladian vbe Susa wẹẹ na wa fuẹn avbe Ivbi e Ju hia rua. E Modẹkai na tama rẹn wẹẹ nọ rhie ebe nii ne Ẹsta, nọ vbe rhan otọ vbene emwi hia ye hẹ ma rẹn, nọ tama rẹn wẹẹ nọ bu ọba gha khian, nọ ya rinmwian wẹẹ nọ tohan emwa rẹn. 12 E Modẹkai ghi họn uhunmwu ne Ẹsta gie giẹe, 13 ọ gie na tama rẹn wẹẹ, “Ghẹ gha roro ighẹ emwi rhọkpa i khian ru uwẹ vbe emwi nọ rruan avbe Ivbi e Ju na rhunmwuda ighẹ u rre uwu ẹguae. 14 U gha hunwan vbe ẹghẹ nọ ye vbenian na, iyobọ gha ke ẹrinmwi bu avbe Ivbi e Ju rre, iran ghi miẹn uhunmwu, sokpan, wẹ gha wu, deba ẹre, ẹgbẹe erhaa ghi gbẹro, sokpan, u rẹnrẹn wẹẹ ẹ i gia rẹn, ọ gha kẹ egbe ẹghẹ vbenian ẹre ọ zẹe na na ma ruẹ Oloi!” 15 Ẹsta keghi rhie ewanniẹn na gie Modẹkai wẹẹ, 16 Ya si Ivbi e Ju ni rre Susa hia koko, wa yo aguẹ ne uwa gha na erhunmwu mẹ. Wa ghẹ re, wa ghẹ da la avan eha kevbe asọn eha. Mẹ kevbe ibiẹka ikhuo ni re eguọmwadia mwẹ, gha vbe ru vberriọ. Vbe iyeke ọni, I gha bu ọba gha khian, agharhemiẹn wẹẹ uhi ma kha vberriọ. Adeghẹ te I gha ghi ya uhunmwu khiẹ ọre rhunmwuda ne I na ru vberriọ, a gu mwẹ ya uhunmwu khiẹ ọre.”