Ẹzra

8 Iran na ẹre ọ ghaa re ediọn ẹwae ni ghaa rre imu vbe Babilọn, iran na vbe lele mwẹ gha die Jerusalẹm vbe ẹghẹ ne Atakzaziz na gha re ọgbaisi: 21 I keghi wẹẹ ne ima mu awẹ vbe ima rre Ẹzẹ Ahava, na vbe mu egbe rriotọ vbe odaro Osanobua mwa, na vbe rinmwiaẹn nọ su ima vbe okhian na, kevbe nọ degue ima kevbe ivbi ima deba emwi ne ima mwẹ hia. 22 Ekhue ma gu mwẹ nọ ọgbaisi wẹẹ nọ viọ ivbiyokuo ne ima ne iran gha su ima khian, rhunmwuda mẹ tama rẹn nẹ wẹẹ te Osanobua fiangbe emwa hia ni mu ẹtin yan rẹn sokpan, ọ ghi gha mu ohu emwa hia ni fi iyeke gbẹe, ọ ghi gha rri iran oya. 23 Rhunmwuda ọni, ma keghi mu awẹ, a na na erhunmwu gie Osanobua nọ degue ima, ọ keghi họn erhunmwu ima. 24 I keghi zẹ Siẹrebia kevbe Hasiabaia vbe uwu avbe ohẹn ni sẹre, deba iran igbe ọvbehe. 25 I keghi do mwa avbe esiliva, igoru kevbe emwi na ya le evbare, ne ọgbaisi, avbe iran ni gu ẹre zẹ iro, iran ni rre ukpo vbe ehe nọ ye, kevbe ne avbe Ivbi Izrẹl hẹ rre na gha loo vbe Ọgua Osa, I na viọ ne avbe ohẹn. 26 Emwi ne I viọ ne iran ẹre na khin: etalẹnt esiliva 650, emwi na ya le evbare ọghe esiliva 100 ni sẹ etalẹnt 2, etalẹnt ọghe igoru 100, 27 ọkpan 20 na ya igoru ru ni sẹ darik 1,000, kevbe emwi na ya le evbare ọghe oze 2 ni baa, nọ wa vbe maan vbe na ghee igoru. 28 I keghi tama iran wẹẹ, “Emwa na ya fi ohan ne Jehova ẹre uwa khin, deba avbe ọkpan esiliva ra ọghe igoru ne emwa ya ekhọe obọ iran ya ru izọhẹ gie ẹre. 29 Uwa hẹko gha gbaroghe iran, uwa te do sẹ Ọgua Osa. Uwa gha sẹ ugha avbe ohẹn, uwa ghi mwa iran, uwa ghi viọ ne avbe ọkaolotu avbe ohẹn, avbe Ivbi e Livai, kevbe avbe ọkaolotu Ivbi Izrẹl ni rre Jerusalẹm.” 30 Rhunmwuda ọni, avbe ohẹn kevbe avbe Ivbi e Livai kegha gbaroghe avbe esiliva kevbe igoru kevbe avbe ọkpan, ne iran viọ gha rrie Ọgua Osa vbe Jerusalẹm. 31 Ikpẹdẹ nogie iweva ọghe uki nokaro ẹre ima na kpa vbe Ahava gha die Jerusalẹm. Osanobua ima keghi wa deba ima, ọ na degue ima, ne obọ eghian kevbe iran ni lẹre khẹ ọmwa, ghẹ mieke na vba ima, vbe ima rre okhian nii. 32 Ma ghi sẹ e Jerusalẹm, ma keghi ya ikpẹdẹ eha hẹwẹ. 33 Ọ ghi sẹ ikpẹdẹ nogienẹ, ma kegha rrie Ọgua Osa, ma keghi mwa avbe esiliva kevbe igoru kevbe avbe ọkpan, ma keghi viọ ne Meremot ne ohẹn ne ovbi Uraia. Emwa ni ghaa gue ẹre rre evba kegha re Eliaza ne ovbi Finihaz deba Ivbi e Livai eva, e Jozabad ne ovbi Jẹsua kevbe Noadaia ne ovbi e Binnui. 34 A keghi do ka emwi hia na mwa rẹn, a na wa vbe gbẹnnẹ ehia yotọ vbe ọwarọkpa nii. 35 Emwa ni ke imu rre, na te ka mu ẹre oghunmwu keghi ru izọese na giẹn ruan gie Osanobua Izrẹl, ẹmila 12 ẹre iran ya zọ ese ne Ivbi Izrẹl hia, ogho 96, oteghe ohua 77, kevbe ẹwe 12 ẹre iran ya zọ ese ye orukhọ; ena hia ẹre iran ya ru izọese na giẹn rua gie Jehova. 36 Iran keghi vbe mu ebe ne ọgbaisi gbẹn ne iran, iran na mu ne nọ khaevbisẹ kevbe iran ni rre asẹ vbe otọ orrie ọghe Yufretes, iran keghi ru iyobọ ne emwa nii kevbe iwinna ugamwẹ vbe Ọgua Osa.