Ẹzra

9 A ghi ru avbe emwi na hia fo nẹ, eso vbe uwu avbe ọkaolotu keghi do khama mwẹ wẹẹ, emwa nii, avbe ohẹn, deba avbe Ivbi e Livai ma bi egbe ne emwa ni lẹga iran, Amọn, e Moab, Igipt, emwa e Kenan, Hiti, Pẹriz, Jebus, kevbe Amọri, emwi osọnnọ ne avbe emwa nii ru, ẹre iran vbe ru. 2 Ikpia vbe uwu avbe iran kegha viọ ikhuo nẹi re Ivbi e Ju rọnmwẹ, rhunmwuda ọni, emwa ni huanrẹn ọghe Osanobua keghi do gha re na ya iruẹn yi. Iran ni ghi rhia sẹ vbọ kegha re avbe ọkaolotu kevbe iran ni rre asẹ. 3 I ghi họn ẹmwẹ na, I keghi sọ ẹwu ye egbe mwẹ urhu, I na zanzan eto kevbe ẹtu mwẹ rua, I na de guo. 4 Evba ẹre I tota yi gha khiẹkhiẹ egbe, ọ te do sẹ ẹghẹ na ya zọ ese ota, emwa hia kegha rre, iran na gha do ga mwẹ, avbe emwa ne afianma ghaa fian rhunmwuda ẹmwẹ ne Osanobua Izrẹl tae vbekpa orukho ọghe avbe emwa ni ke imu rre. 5 Ọ ghi sẹ ẹghẹ na ya zọ ese ota, I keghi guakpa vbe ehe ne I tota yi gha khiẹkhiẹ egbe, ẹwu ne I sọlọ rua nii keghi ye gha rrọọ mwẹ urhu, I na diguẹ ne I na erhunmwu, I na viọ obọ daa odukhunmwu ghee Jehova ne Osanobua mwẹ. 6 I keghi kha wẹẹ, “Osanobua, ekhue i gu mwẹ tọn uhunmwu mu vbe ehe ne u ye. Orukhọ ọghe ima yo gberra ima uhunmwu nẹ, iran yo sẹ iso. 7 Ke ẹghẹ avbe erha ima odede gha dee do sẹ banbanna, ma ne emwa ruẹ kakabọ ru orukhọ ẹsẹse, rhunmwuda orukhọ ne ima ru, ma kevbe avbe ọba ima kevbe avbe ohẹn ima, keghi dele ye obọ avbe ọba ẹvbo ọvbehe, a keghi rẹnkhẹn ima, a rha ima, a keghi vbe do ima emwi viọ, a keghi vbe munọ ima oghunmwu. A keghi wa fa ima rua fẹfẹẹfẹ, zẹvbe ne ima ye ye ẹdẹnẹrẹ na. 8 Banbanna nian, e Jehova ne Osanobua mwa, vbe ẹghẹ kherhe, u keghi tohan ima, u keghi gi eso vbe uwu ima lẹẹ fe, ma keghi la hin ọviẹn ọmwa rre, ne ima do gha rrọọ vbe a i mwẹ ẹbe vbe otọ nọhuanrẹn na. U gi ima lahin ọviẹn rre, u na rhie arrọọ ọghe ọgbọn ne ima. 9 Eviẹn ma te khin sokpan, u ma sẹ ima rae ye ọviẹn ọmwa. U keghi gi avbe ọgbaisi e Pẹsia tohan ima, iran na sẹ ima rae ye agbọn, iran na gi ima dọlegbe bọ Ọgua Osa ruẹ nọ te rẹnkhuan, kevbe ne ima do lẹẹ fi a i ghi mwẹ ẹbe vbe Juda kevbe Jerusalẹm vbe edinran. 10 “Sokpan, banbanna nian Osanobua, de emwi ne ima khian ghi miẹn ta vbe iyeke avbe emwi ni sunu na hia? Ma ma vbe lele uhi ruẹ, 11 ne u la obọ avbe akhasẹ ne eguọmwadia ruẹ viọ ne ima. Iran tama ima wẹẹ otọ ne ima dee do yin na, otọ nọ ma huan nọ rhunmwuda, avbe emwa ni ka yin ẹnrẹn, uyinmwẹ ohọhọ kevbe osọnnọ ẹre iran ya vuọn rẹn sẹ otọ sẹ ukhunmwu. 12 Iran tama ima wẹẹ na ghẹ rhie iran rọnmwẹ ra na yi iran obọ ra na gualọ umamwẹ iran, adeghẹ ima hoo na yin otọ nii, na vbe mu ne emọ ẹdẹdẹmwẹdẹ.