1 Ọba

18 Ẹghẹ eso ghi gberra, vbe ọ ghi rre ukpo nogieha, e Jehova keghi tama Ẹlaija wẹẹ, “Ya ye egbe ne Ehab ne ọba miẹn, I gha gi amẹ rhọọ.” 3 Ẹre Ehab na tie Obedaia ne ọka ẹguae. Obedaia wa gha mu ohan e Jehova ẹsẹsẹmwẹse. 12 I gha kpa sẹ ruẹ rae, orhiọn e Jehova gha mu ruẹ gha rrie eke ne I ma rẹn. Ẹghẹ nii, I gha ghi tama Ehab, ọ ma na ghi miẹn ruẹ, ọ ghi gbe mwẹ ruan. Yerre wẹẹ, ke ẹghẹ ọvbokhan gha dee, ẹre I wa ya mu ohan e Jehova. 13 U ma he họn wẹẹ ẹghẹ ne Jezibẹl na gha gbele avbe akhasẹ e Nọyaẹnmwa, I keghi ya viọ iyisẹn vbe uwu iran lẹre, ekigbesiyeha vbe uvun ọkpọkpa, I na ye amẹ vbe evbare gha koko iran. 14 Vbua ghi na wẹẹ ne I ya tama ọba hẹ ighẹ u rre emwa? Te ọ gbe mwẹ uan.” 21 Ẹlaija keghi bu iran gha khian, ọ na kha wẹẹ, “Vbọ khian kpẹẹ sẹ hẹ yi, uwa ke ta obọ ne uwa ye vbọ. Adeghẹ e Jehova ọre Osa ọghe ẹmwata, uwa gae, adeghẹ e Bel nọ, uwa gae!” Sokpan, emwa nii ma ta ẹmwẹ rhọkpa ya zẹ ẹmwẹ wanniẹn ọnrẹn. 26 Iran keghi mu ẹmila na mu gie iran, iran na mwamwaẹn, iran na gha na erhunmwu ghee Bel ya sẹ ẹghẹ ogiavan. Iran kegha go kha wẹẹ, “E Bel zẹ ẹmwẹ wanniẹn ima!” Iran na gha ku lẹga aka ne iran gbe nii. Sokpan, ewanniẹn ma rre, a ma vbe họn urhu rhọkpa. 27 Ọ ghi sẹ ẹghẹ ogiavan, Ẹlaija keghi suẹn gha ya iran gbogiẹ wẹẹ, “Uwa kakabọ go ladian. Ẹbọ nọ. Ughaghe te ọ miẹn aro ra te ọ ra ya ghughẹ ra te ọ ra khian ladian. Ughaghe, te ọ vbiẹ ne uwa huẹn ọnrẹn!” 28 Rhunmwuda ọni, avbe akhasẹ nii keghi kakabọ tọn urhu mu gha na erhunmwu, iran na gha ya abẹ kevbe agbada giagia egbe iran, zẹvbe nọ gua ilele ọghe iran ro, sẹrriọ wẹẹ esagiẹn na ghi gha tue ladian. 29 Iran na gha vannọ, iran na gha go, ọ te ya sẹ ẹghẹ ogiavan, sokpan ewanniẹn ma rre, a ma vbe họn urhu rhọkpa. 36 Ọ ghi sẹ ẹghẹ na ya zọ ese ogiavan, Ẹlaija ne akhasẹ keghi sikẹ aka, ọ keghi na erhunmwu wẹẹ, “Eo Jehova, Osanobua Ebraham, Aizik, kevbe Jekọb, gi emwa hia rẹn nian wẹẹ, uwẹ ọre Osanobua ọghe Izrẹl kevbe wẹẹ, ọguọmwadia ruẹ ẹre imẹ khin, kevbe wẹẹ emwi ne I ru na hia, uwẹ ẹre ọ gie mwẹ. 37 Zẹ ẹmwẹ wanniẹn mwẹ Jehova, zẹ ẹmwẹ wanniẹn mwẹ, ne avbe emwa na miẹn ehe na rẹn wẹẹ, uwẹ ne Jehova ọre Osanobua kevbe wẹẹ te u viọ iran dọlegbe bu egbe ruẹ dee.” 38 E Jehova keghi gie erhẹn rre, ọ keghi giẹn ese nii hia, erhan kevbe okuta, ọ keghi ya otọ kaka, ọ na ka amẹ nọ rre uvun nii hia. 39 Emwa nii ghi miẹn emwi na, iran hia keghi dele gbotọ, iran na datu wẹẹ, “E Jehova ọre Osa ọghe ẹmwata! E Jehova ọre Osa ọghe ẹmwata!” 40 Ẹlaija keghi kha wẹẹ, “Uwa munọ avbe akhasẹ ọghe Bel, uwa ghẹ gi ọkpa lẹfua vbọ!” Iran keghi munọ iran hia, Ẹlaija keghi viọ iran gha rrie ovbi Ẹzẹ ọghe Kisiọn, ọ na gbele iran rua. 41 Ẹre Ẹlaija na tama Ehab ne ọba wẹẹ, “Banbanna nian, gha khian ne u ya rri evbare. I họn vbe amẹ khọn dee.” 42 Ehab kegha khian nọ ya rri evbare, Ẹlaija keghi hin uhunmwu Oke Kamẹl, ọ na vbokho egbe rriotọ, vbene uhunmwu ẹnrẹn na gha rre akharha ẹre vbe igbọn. 43 Ọ keghi tama ọguọmwadia ẹre wẹẹ, “Ya ghee odẹ okun ghee.” Ọguọmwadia ẹre na gha khian ya ghee ẹre, sokpan, ọ na werriegbe gha dee, ọ keghi kha wẹẹ, “I ma bẹghe emwi rhọkpa.” Igba ihinrọn ẹre Ẹlaija gie ẹre nọ ya ghee ẹre. 44 Vbe ẹghẹ nogie ihinrọn, ọ keghi werriegbe rre do kha wẹẹ, “I bẹghe okuku amẹ, ọ ma vbe sẹ atatabọ ọmwa, ọ ke uwu okun ladian dee.” Ẹlaija keghi tama ọguọmwadia ẹre wẹẹ, “Ya tama Ehab ne ọba nọ la ikẹkẹ okuo ẹre nọ gha rrie owa, ne amẹ ghẹ dae yi.” 45 Na kha na, amẹ keghi wa bi gba aro iso hia, ẹhoho keghi suẹn gha hoho, okpamẹ keghi suẹn gha da. Ehab keghi hin ikẹkẹ okuo ẹre, ọ na gha die Jezrẹl. 46 Orhiọn e Jehova keghi hin yan Ẹlaija, ọ na gba ukpọn rẹn khinkhian ẹkun gbain, ọ na rhulẹ ke aro ne Ehab rhinrin ya sẹ e Jezrẹl.