1 Ọba

19 Ehab ne ọba keghi na iyẹn emwi hia ne Ẹlaija ru ma e Jezibẹl ne amwẹ ọnrẹn, kevbe vbene ọ vbe gbele avbe akhasẹ e Bel hia hẹ. 2 Okhuo nii keghi gie na tama Ẹlaija wẹẹ: “Te avbe ẹbọ gha kinmwi mwẹ gbua, adeghẹ ọ te sẹ ẹghẹ na vbe akhuẹ, mẹ ma ru uwẹ zẹ vbene u ru avbe akhasẹ nii.” 3 Ohan keghi mu Ẹlaija, ọ na lẹẹ fua, ọ keghi rhie ọguọmwadia ẹre ba egbe, ọ na lẹẹ gha rrie Biẹsiẹba vbe Juda. Ọ keghi vbe sẹ ọguọmwadia ẹre rae ye evba. 4 Ẹlaija na ye vbe khian okhian ikpẹdẹ ohoho la uwu oha. Ọ na do tota ye ototọ irhu ọghe erhan, ọ na wẹẹ irẹn wu ẹre ọ ghi maan sẹ. Ọ keghi na erhunmwu wẹẹ, “Ọ sẹ mwẹ abọ nẹ Jehova. Gu mwẹ wa wu, rhunmwuda, I ma maan sẹ avbe erha mwẹ odede!” 5 Ọ keghi lovbiẹ ye ototọ erhan nii, ovbe na rhie ẹre. Vbe udemwurri, odibosa keghi ya obọ kaan rẹn, ọ wẹẹ, “Kpaegbe ne u rri evbare.” 6 Ọ ghi ghee, ududu eka ọkpa kevbe ovbi eluba amẹ rre irẹn ọkpẹn uhunmwu. Ọ keghi rri evbare, ọ na wọn amẹ, ọ na vbe dọlegbe lovbiẹ. 7 Odibo ọghe Jehova keghi vbe werriegbe bu ẹre ukpogieva, ọ huẹn ọnrẹn, ọ keghi tama rẹn wẹẹ, “Kpaegbe ne u rri evbare na ghẹ do miẹn wẹẹ, ẹtin ruẹ ma sẹ okhian na.” 8 Ẹlaija keghi kpaegbe, ọ na rri evbare, ọ na vbe wọn amẹ, evbare nii keghi rhie ẹtin nẹẹn nọ ya khian okhian ikpẹdẹ iyeva gha rrie Sainai ne oke nọhuanrẹn. 9 Ọ keghi la uwu uvun okuta vbe evba, nọ vbiẹ evba ne ẹdẹ gbe. Vbe udemwurri, e Jehova keghi gu ẹre guan wẹẹ, “Ẹlaija, vbua ru vbe emwa yi?” 10 Irẹn keghi wanniẹn wẹẹ, “E Jehova ne Osa ọghe ivbiyokuo, uwẹ ọkpa kẹkan ẹre I ga ke otọ gha dee. Sokpan, Ivbi Izrẹl ma ghi mu ile ne iran gu ruẹ ta sẹ, iran dunmwu avbe ogiukpo ruẹ sotọ, iran gbele avbe akhasẹ ruẹ hia, mẹ ọkpa ẹre ọ ghi kẹ, iran vbe hoo ne iran gbe mwẹ ruan!” 11 Sokpan, e Jehova keghi tama rẹn wẹẹ, “Ladian ne u ya mudia ye odaro mwẹ vbe uhunmwu oke.” Ẹre Jehova na do gberra, ọ na gie ẹhoho nọ wegbe, ọ na gha mu oke nii rueghe, ọ na gha rẹnkhẹn avbe okuta vbe odaro e Jehova, sokpan e Jehova ma gha rre uwu ẹhoho nii. Ẹhoho keghi dobọyi, igbohiotọ keghi suẹn. Sokpan e Jehova ma gha rre uwu igbohiotọ nii. 12 Igbohiotọ ghi vbe fo nẹ, erhẹn keghi suẹn. Sokpan e Jehova ma vbe gha rre uwu erhẹn nii. Vbe iyeke erhẹn nii, ovbi urhu ne rọkhọọ na guan ladian. 13 Ẹlaija ghi họẹn, ọ keghi mu agbada ẹwu ẹre gue aro, ọ keghi ladian ya mudia ye onurho ọghe uvun okuta nii. Urhu ọkpa keghi gu ẹre guan wẹẹ, “Ẹlaija, vbua ru mwa yi?” 14 Irẹn keghi wanniẹn wẹẹ, “E Jehova ne Osa ọghe ivbiyokuo, uwẹ ọkpa kẹkan ẹre I ga ke otọ gha dee. Sokpan, Ivbi Izrẹl ma ghi mu ile ne iran gu ruẹ ta sẹ, iran dunmwu avbe ogiukpo ruẹ sotọ, iran gbele avbe akhasẹ ruẹ hia, mẹ ọkpa ẹre ọ ghi kẹ, iran vbe hoo ne iran gbe mwẹ rua.” 15 E Jehova keghi kha wẹẹ, “Werriegbe, ne u gha rrie oha nọ rre ọkpẹn e Damaskọs. U ghi la ore ẹvbo nii, ne u ya ma e Hazaẹl ọba e Siria. 16 U ghi vbe ma e Jehu ne ovbi e Nimsi ọba Izrẹl. U ghi rhie Ẹlaisia ne ovbi e Siafat ne ovbi ẹvbo na tie ẹre Ebẹl Mehola, u ghi yae ma akhasẹ ye ihe egbe ruẹ. 17 Ọmwa ne Hazaẹl ma gbe rua, e Jehu ghi gbe ẹre rua, ọmwa nọ vbe lẹẹ fe vbe obọ e Jehu, Ẹlaisia ghi gbe ẹre rua. Sokpan, I ye mwẹ orhunmwu arriaisẹn ihinrọn (7,000) vbe Izrẹl, ni ma he vbokho iguẹ rre ne Bel, kevbe ni ma he ya unu soso amazẹ ẹre unu.” 19 Ẹlaija ghi ladian, ọ keghi vba Ẹlaisia vbe ọ ya oghẹn ẹmila iweva gua, oghẹn owọrọ keghi ke odaro nẹẹn, oghẹn nogie iweva nọ rrọọ ẹre irẹn ya gha gua. Ẹlaija keghi ban agbada ẹwu ẹre, ọ na muẹn yọ Ẹlaisia. 20 Ẹlaisia keghi sẹ oghẹn ẹmila ẹre rae, ọ keghi rhulẹ lele Ẹlaija, ọ na wẹẹ, “Gu mwẹ ya ya isosunu gbe ọ khian ẹdẹ hia ne erha mwẹ kevbe iye mwẹ nẹ, I ke do lele ruẹ gha khian.” Ẹlaija keghi tama rẹn wẹẹ, “Ọ maan, I ma da ruẹ obọ yi!” 21 Ẹlaisia kegha rrie ehe ne oghẹn ẹmila ẹre ye, ọ keghi gbele ẹre, ọ na yae zọ ese. Ọ keghi ya urọnghọn nọ rrọọ hie erhẹn, ọ na viọ emiowo nii ne emwa, iran na rriọe. Ọ keghi kpa, ọ na ya gha lele Ẹlaija khian, zẹvbe ọkpọmwa.