2 Samuẹl

23 Avbe ẹmwẹ ne Devid ghi ta kiekie ọre ena khin: E Devid ne ovbi e Jese kegha re ọmwa ne Osanobua ya khian enọkhua, irẹn ẹre Osanobua ọghe Jekọb hannọ zẹ, irẹn ẹre ọ vbe re ọmwa nọ gbẹnnẹ ihuan ọghe Izrẹl. 2 Orhiọn ọghe Jehova guan la unu mwẹ rre, uhunmwu nọ gie rre akhuarhamwunu mwẹ. 3 Osanobua Izrẹl guan nẹ; nọ degue Izrẹl keghi tama mwẹ wẹẹ: “Ọba nọ ya ẹmwata khaevbisẹ, nọ vbe mu ohan Osanobua, 4 te ọ yevbe ovẹn nọ yunmwu vbe ẹdẹ ne amẹ ma bi, ovẹn nọ ya ebe fi wainwain vbe amẹ a rhọọ nẹ.” 5 Erriọ ẹre Osanobua khian vbe fiangbe uniẹn mwẹ, rhunmwuda, ọ gu mwẹ ta ile ẹdẹdẹmwẹdẹ nẹ, vbene ehia na la uro, ọ vbe deziẹn. Ọni ọre emwi ne I hoo. Ọni ẹre ọ khian gha re akhọnmiotọ mwẹ, ẹi mwẹ Jehova ma gi ẹre sẹ. 6 Sokpan, emwa dan yevbe igban na hẹ kua, ọmwa rhọkpa i sẹtin ya obọ kan rẹn. 7 U ma ghi rhie ematọn, u ghi rhie asoro, te a khian giẹn ehia fẹẹrẹ. 8 Eni avbe ivbiyokuo e Devid ni hin ukhuaẹn ẹre ena khin: e Josiẹb Basiẹbet, ovbi ẹvbo ne a tie ẹre Takimon, irẹn ẹre ọ ghaa re ọkaolotu ọghe “Iran ne Eha.” Ọ keghi ya asoro ẹre gu arhunmwu uri enẹ (800) gbinna, ọ na gbele ehia rua vbe okuo ọkpa kẹkan. 9 Nọ ghi vbe lelẹe vbe uwu “Iran ne eha” ni hin Usi nii, ọre Eliaza ne ovbi e Dodo kevbe eyẹ Ahoo. Vbe ẹghẹ ọkpa, irẹn kevbe Devid keghi duẹ iran an, ighẹ ivbi e Filistia ni te si koko khẹ okuo. Ivbi Izrẹl khian te lẹẹ kua, 10 sokpan, irẹn ma vbo owẹ, ọ gu ivbi e Filistia gbinna sẹrriọ wẹẹ, te obọ ẹre ghi sigba vbene umozo ẹre ma na ghi gi ẹre rhie hin obọ rre. E Jehova keghi khọnmiotọ ẹsẹse ẹdẹ nẹdẹrriọ. Okuo ghi fo, ivbi Izrẹl keghi werriegbe gha die ehe ne Eliaza ye, ne iran do kie ẹwu igbinna vbe egbe emwa ni wulo. 11 Ne ogieha vbe “Iran eha ni hin usi” kegha re Siama ne ovbi Agii nọ ke Hara rre. Avbe ivbi e Filistia keghi si koko vbe Lẹhi, ehe ne ugbo ikpakpalọ ye, Ivbi Izrẹl keghi lẹẹ ne ivbi e Filistia. 12 Sokpan Siama ma vbo owẹ vbe ugbo nii, ọ keghi degbe odẹ ugbo nii, ọ na gbele ivbi e Filistia. E Jehova keghi khọnmiotọ ẹsẹse, vbe ẹdẹ nẹdẹrriọ. 15 E Devid keghi kha wẹẹ, “Akpawẹ I gha sẹtin wọn vbe amẹ nọ rre uhae nọ rre ọkpẹn Bẹtlẹhẹm nia.” 16 lvbiyokuo ni hin usi eha nii, na wa ya uhunmwu zẹ odẹ la uwu agọ ọghe ivbi e Filistia gberra, iran na ya sa amẹ vbe uhae nii, iran na mu gie Devid, sokpan, o ma wọn ẹẹn, ọ keghi hihiẹ ọre kua zẹvbe emwi na ya zọ ese ghee Jehova. 17 Ọ keghi kha wẹẹ, “E Jehova, mẹ i wọn ọna! Te ọ khian yevbe na wọn esagiẹn ọghe avbe ikpia na, ni rhie uhunrnwu iran mwẹ atataobọ.” Rhunmwuda ọni, ọ ma wọn ẹẹn. Enena ọrọre emwi udinmwẹ ne iran ne ivbiyokuo eha ni hin usi na ru.