2 Samuẹl

7 I datie Jehova vbe ẹghẹ ọlọghọmwa mwẹ, l datie Osanobua wẹẹ nọ yọ mwẹ obọ, ọ họn urhu mwẹ vbe uwu ọgua Osa ẹre, ọ họẹn vbe I kpee tie ẹre nọ yọ mwẹ obọ. 14 Ẹre Jehova na davan ke iso rre, a keghi họn urhu e Nọ Yo Sẹ Ehia. 15 Ọ fi ifẹnmwẹ, ọ keghi zagha eghian rẹn kua, ọ na ya awanwan ọghe ayan zẹ ulẹ ye iran egbe. 16 Ọ keghi gia miẹn otọ emwi ni rre ototọ okun, a keghi wee ẹyotọ agbọn rua ne emwa miẹn, ẹghẹ ne Jehova na gu eghian rẹn gui, ọ keghi vannọ ọkan mu iran vbe ohu ẹre. 17 Ọ niẹn obọ ke ẹrinmwi rre, ọ na da mwẹ yi, ọ keghi si mwẹ ladian hin uwu odin amẹ rre. 18 Ọ wọlọ mwẹ hin obọ iran ni khuiwu mwẹ rre, hin obọ avbe eghian mwẹ, ni wegbe sẹ mwẹ. 26 Uwẹ keghi mwẹ ẹkoata daa emwa ni ya ẹkoata ga ruẹ. U vbe ya obọ esi mu emwa ne obọ iran huanrẹn. 30 U rhie ẹtin mẹ ya gu eghian mwẹ gbinna; vbe ẹtin Osanobua I gha sẹtin san egbekẹn. 33 Osanobua ọghe ẹmwara oọre ugue mwẹ nọ wegbe, ọ ye odẹ mwẹ khian ne ẹbe i ye. 34 Ọ ru owẹ mwẹ nọ wo yọ zẹ vbe ọghe ẹrhuẹ, ọ keghi rhie mwẹ ye uhunmwu oke! 35 Ọ ma mwẹ okuo na khọn, I gha sẹtin vbokho uhanbọ ọghe oze. 36 U rhie asa ọghe imiẹnfan ruẹ mẹ, imuegberriotọ ọghuẹ ya mwẹ khian nọ kpọlọ. 37 Uwẹ ẹre ọ ma gia mu mwẹ oghunmwu. I i khian vbe de ẹdẹ. 38 I gha zẹ avbe eghian mwẹ khu, i ghi vbe fuẹn iran ruan. I i khian dobọyi I te do khọn miẹn iran otọ. 39 I gha gbele iran fi otọ, iran i ghi sẹtin kpa, iran gha lovbiẹ yọ mwẹ akharha zẹ vbe oghunmwu. 40 Uwẹ gha rhie ẹtin mẹ ne I ya khọn okuo nii, u gha vbe rhie akhọnmiotọ mẹ vbe uhunmwu eghian mwẹ. 41 U gha ru ẹre ne avbe eghian mwẹ gha lẹẹ mẹ, I gha fuẹn iran ni khuiwu mwẹ rua. 42 Iran gualọ iyobọ, sokpan, nọ gha miẹn iran fan i rrọọ, iran tu tie Jehova, sokpan ọ ma khuẹnniẹn iran. 43 I gha dunmwu iran rua, iran ghi yevbe ebubẹ, I gha ya owẹ rrilo iran mu otọ, zẹvbe ekẹn vbe orere. 44 U gha miẹn mwẹ fan vbe obọ emwa mwẹ ni sọtẹ, u gha ya mwẹ ru enọkhaevbisẹ yan avbe agbọn ẹvbo. Avbe emwa ne I ma rẹn, gha khian ni ga gu mwẹ. 45 Avbe orhunmwuyẹn hia gha ghughẹrre mẹ, iran gha họn vbe I guan, iran ghi ru emwi ne i tae. 46 Ẹtin gha fu avbe orhunmwuyẹn. Iran ghi ke ehe ne iran lẹre yi gha guọ. 47 E Jehova rrọọ. Irẹn ọre okuta mwẹ, uwa rho ẹre. Uwa rho Osanobua, nọ re okuta nọ miẹn mwẹ fan. 48 Ọ rhie akhọnmiotọ mẹ vbe uhunmwu eghian mwẹ, ọ hie emwa nii uhunmwu rre, vbe ototọ mwẹ. 49 Ọ keghi fan mwẹ vbe obọ avbe eghian mwẹ. U gu mwẹ khọn avbe eghian mwẹ mu otọ, u keghi degue mwẹ hin obọ emwa ọkpankpan. 50 Rhunmwuda ọni, I gha rho ruẹ Jehova, vbe uwu agbọn ẹvbo, I gha so ihuan urhomwẹ ghe ruẹ. 51 Ọ rhie akhọnmiotọ nọkhua ne ọba ẹre; ọ rhie ahoẹmwẹọmwa nẹi beghe maan, ghe ọmwa nọ zẹe, ghe Devid kevbe uniẹn ọnrẹn ẹdẹdẹmwẹdẹ.