2 Samuẹl

21 Ukhunmwu nọkhua ọkpa keghi do fi vbe ẹghẹ ne Devid na gha rre ẹkete, ukpo eha gbalaka ẹre ọ wa ya vbe otọ. Ẹre Devid na nọ otọ ẹre vbe obọ e Jehova, e Jehova keghi kha wẹẹ, “E Sọl kevbe ẹgbẹe ọre diyi izigha, ọ gbele ivbi e Gibiọn rua.” 2 Ọba keghi tie Ivbi e Gibiọn nọ gu iran guan. (Ivbi e Gibiọn i re Ivbi Izrẹl, ibozẹghẹ nikẹre vbe Ivbi e Amọri ẹre iran khin. Ivbi Izrẹl yan ma iran wẹẹ, iran gha tan ifuẹn ga iran, sokpan, e Sọl na gha hia nọ wa fuẹn iran rua, rhunmwuda izọghae nọ ghaa mwẹ nọ ya ru iyobọ ne Ivbi Izrẹl kevbe Juda.) 3 Ẹre Devid na ghi tama Ivbi e Gibiọn wẹẹ, “De emwi ne I gha ru ne uwa? I hoo ne I kpe uwa oya rhunmwuda emwi na ru uwa re, ne uwa miẹn ehe na na erhunmwu ne emwa e Jehova.” 4 Iran keghi wanniẹn wẹẹ, “A i sẹtin ya esiliva ra igoru dọlọ ẹzọ ọghe ima kevbe ẹgbẹe Sọl, erriọ vbe nọ, ma i vbe hoo na gbe Ivbi Izrẹl rhọkpa rua.” E Devid na ghi tama iran wẹẹ, “Emwi ke emwi ne uwa rhirhi nọ rẹn, I gha ru ẹre ne uwa.” 5 Iran keghi tama ọba wẹẹ: “Te Sọl te gha hoo nọ wa fuẹn ima rua fẹẹrẹ, vbe nẹi na vbe sẹ ọkpa rae ye agbọn vbe ehe rhọkpa vbe otọ Izrẹl. 6 Rhunmwuda ọni, viọ ihinrọn ne ima, vbe uwu avbe ivbi ẹre nikpia, ma ghi silo iran rrọ vbe odaro e Jehova, vbe Gibia ne ẹvbo e Sọl ne ọba ne Jehova hannọ zẹ.” Ọba keghi wanniẹn wẹẹ: “I gha viọ iran ne uwa.” 7 Sokpan, rhunmwuda eyan ne irẹn vbe Jonatan ne ovbi e Sọl ru ma egbe vbe odaro e Jehova, e Devid keghi sẹ Mẹfibosiẹt ne ovbi e Jonatan rae. 8 Ọ na rhie Amọn kevbe Mẹfibosiẹt, emọ ikpia eva ne Rizpa ne ovbi Aia nokhuo biẹlẹ ne Sọl ne iran. Ọ na vbe viọ emọ ikpia isẹn ne iran, ne Mẹrab ne ovbi e Sọl nokhuo biẹlẹ ne Adriẹl, ne ovbi Bazilai, nọ ke ẹvbo na tie ẹre Mehola rre. 9 E Devid keghi viọ iran ne ivbi e Gibiọn, iran na silo iran rrọ vbe uhunmwu oke, vbe odaro e Jehova. Iran ihinrọn nii, keghi wulo kugbe. Ẹghẹ uyunmwu, ẹre a ya gbele iran rua vbe ẹghẹ na ya suẹn ọka irhuarhua na fian. 15 Okuo ọvbehe keghi vbe sa ne avbe Filistin kevbe Ivbi Izrẹl. E Devid kevbe emwa rẹn keghi ladian, iran na ya gu avbe Filistin khọn. Egbe keghi wọ e Devid vbe ẹghẹ okuo na. 16 Arhuanran ọkpa na tie ẹre Isbibenob, ne ukhuamwẹ ọghe asoro ọghe oze ọghẹe gha sẹ 300 shekel, nọ vbe gha mwẹ umozo ọgbọn keghi te gha hoo nọ gbe Devid rua. 17 Sokpan, Abisiai ne ovbi e Zeruaia keghi rhie iyobọ ne Devid, ọ keghi dekun arhuanran na, ọ na gbe ẹre rua. Emwa e Devid keghi wẹẹ nọ do yan ighẹ irẹn i ghi dọlegbe lele iran yo okuo ẹdẹ. Iran tama rẹn wẹẹ, “Ọ ma khẹke ne u gi ukpa ọghe Izrẹl dọyọ.”