2 Samuẹl

8 Ọba keghi wanniẹn wẹẹ, “Gha rrie owa, I gha guan ye ẹmwẹ na.” 9 Okhuo nii keghi wanniẹn wẹẹ, “Umogun, emwi ne u rhirhi ru ye ẹmwẹ na, uhunmwu imẹ kevbe ẹgbẹe mwẹ ẹre ọ ye, uwẹ vbe ẹgbẹe ọba ruẹ ma rẹn ọkpa rẹn eva.” 10 Ọba keghi wanniẹn wẹẹ, “Adeghẹ ọmwaikọmwa ye obọ sekhae nuẹn, si ẹre bu mwẹ gha dee, ẹi ghi guẹ guan ẹdẹ.” 11 Okhuo nii keghi kha wẹẹ, “Umogun, lahọ, na erhunmwu ghee Jehova ne Osanobua ruẹ, ne avbe etẹn mwẹ, ni wẹẹ iran khian rria ikhi ye uwu ovbi mwẹ, ghẹ vbe ya ru orukhọ nọ ghi sẹẹ, vbe ne iran gha na gbe ovbi mwẹ nọ ghi kẹ.” E Devid keghi kha wẹẹ, “Eni Osanobua nọ rrọọ ẹre I ya yan wẹẹ, emwi ọkpa nọ ra ru ovbuẹ, ẹi rrọọ.” 12 Okhuo nii keghi kha wẹẹ, “Umogun, ọ ye kẹ ẹmwẹ ọkpa ne I gha hoo ne I ta.” Irẹn keghi wanniẹn wẹẹ, “Ọ maan.” 13 Okhuo nii keghi kha wẹẹ, “Vbua na ru emwi vberriọ ghee emwa ọghe Osanobua hẹ yi? U ma kue ne ovbuẹ ke iwe gha die owa, ẹmwẹ ne u tae ban, ẹre u ya bu ohiẹn gbe egbuẹ. 14 Te ima khian wulo, ma ghi yevbe amẹ na rhurhẹ ku otọ nẹi ghi gia dọlegbe si koko. Emwa gha wulo, uhin ighẹ Osanobua i ghi vbe dọlegbe viọ iran gha die agbọn. Sokpan ọba sẹtin gualọ odẹ la rhie ọmwa ke iwe rre. 15 Banbanna nian, Umogun, emwi nọ si ẹre ne I na do guẹ guan ọre wẹẹ, emwa nii ya obọ sekhae mẹ, ẹre l na tobọ mwẹ tae wẹẹ, I gha do guẹ guan vbe idaehọ wẹẹ, u gha ru vbene I nọ rẹn. 16 I roro ẹre wẹẹ, u gha rhie ehọ mẹ ta yi, ne u fan mwẹ vbe obọ ọmwa nọ hoo nọ gbe mwẹ gbe mwẹ ọmọ, ọ ghi vbe yuolo ima kua hin otọ ne Osanobua mu ne emwa rẹn rre. 17 I keghi tama egbe mwẹ wẹẹ, eyan ne uwẹ yan rẹn gha degue mwẹ, enọwanrẹn, rhunmwuda, te ọba ye vbe odibo Osanobua, ọ vbe rẹn emwi nọ maan, hin nẹi maan rre. Te Jehova ne Osanobua ruẹ gha yaba ruẹ!” 18 Ọba keghi wanniẹn wẹẹ, “l khian nọ ruẹ ọta ọkpa, u ghi ta ẹmwata nọ rrọọ hia ma mwẹ.” Okhuo nii keghi wanniẹn wẹẹ, “Nọ mwẹ ọta nọ rhirhi khọn ruẹ, umogun.” 19 Ọ na nọ rẹn wẹẹ, “E Joab ẹre ọ kun ẹmwẹ na mu ye ruẹ obọ ra?” Okhuo ni wanniẹn wẹẹ, “I ya emwi ni ghi re ni huanrẹn vẹn ihẹn umogun wẹẹ, a i miẹn ehe gọgọ ẹmwẹ ruẹ na la, na ghẹ rhie ewanniẹn yọ. E Joab ne ọka iwinna ruẹ, ẹre ọ tama mwẹ emwi ne I gha ru kevbe ẹmwẹ ne I gha ta. 20 Sokpan te ọ ru ẹre nọ ya dọlọ ẹmwẹ na hia yi. Te u yevbe odibo Osanobua umogun, u vbe rẹn otọ emwi hia ni sunu.” 25 A ma vbe miẹn orhunmwu ọkpa vbe Izrẹl na gha ya gie Absalọm vbe ose, wa ke uhunmwu ya sẹ ikpihianwẹ, okan rhọkpa i vbe rrọọ ọre egbe. 26 Ọ kegha mwẹ eto nọ mu ma, uhukpa vbe ukpo ẹre ọ gbe ẹre, vbe ọ gha ghi tan gbe, ọ na gha khua. Ukhuamwẹ ọghe eto ẹre gha sẹ uwan isẹn, vbe omwa na ya mwa emwi ne ọba.