Avbe Ọbuohiẹn

9 Ọ ghi sẹ ẹghẹ, Abimẹlẹk ne ovbi e Jerubel na bu etẹn iyẹe nikpia vbe Shikẹm. Ọ na tama etẹn iyẹe kevbe ẹgbẹe ọghe erhae nọkhua* wẹẹ: 2 “Wa nọ avbe ọkaolotu e Shikẹm wẹẹ, ‘De nọ yẹẹ uwa sẹ vbọ? Ne ivbi e Jerubel ekigbesiyenẹ (70) gha kha yan uwa nọ ra? Ra ne orhunmwu ọkpa gha kha yan uwa? Wa ghẹ mianmian wẹẹ, esagiẹn uwa ẹre I khin.’”*

3 Ẹre etẹn iyẹe nikpia na ghi gu ẹre mu ẹmwẹ na ma avbe ọkaolotu e Shikẹm, iran na ghi kue yọ wẹẹ, iran gha lele Abimẹlẹk, iran na wẹẹ: “Ọtẹn ima nọ.” 4 Ẹre iran na viọ esiliva ekigbesiyenẹ (70) vbe owa* e Bel-birit ne Abimẹlẹk, Abimẹlẹk na yae viọ ikpia nẹi mwẹ iwinna kevbe nẹi ghee ọmwa sẹ ọmwa, ni khian gha lele ẹre khian. 5 Iyeke ọni, ọ na gha rrie owa e Jerubel ne erhae vbe Ọfra, ọ na gbele etiọnrẹn nikpia ekigbesiyenẹ (70) rua vbe uhunmwu okuta ọkpa. E Jotam ọkpa, nọ re alagbodẹ ọghe Jerubel ẹre ọ miẹn uhunmwu, rhunmwuda nọ na lẹre.

6 Ẹre avbe ọkaolotu e Shikẹm hia kevbe emwa hia ni rre Bẹt-milo na si egbe koko, iran na ma Abimẹlẹk ọba, vbe ọkpẹn erhan nọkhua ọkpa, nọ ghaa rre ọkpẹn orrẹ nọ rre Shikẹm.

7 Emwa ghi do na iyẹn na ma e Jotam, ọ na gha rrie uhunmwu Oke Gẹrizim vbobọvbobọ nii, ọ na ke evba ya urhu nọ lae tama iran wẹẹ: “Wa danmwehọ mwẹ, wa ne avbe ọkaolotu e Shikẹm, Osanobua gha vbe danmwehọ uwa.

8 “Ọ mwẹ asẹ ọkpa ne avbe erhan ya si egbe koko, ne iran zẹ enọ khian rri ọba yan iran. Ẹre iran na tama erhan oliv wẹẹ, ‘Gha kha yan ima.’ 9 Sokpan, erhan oliv na tama iran wẹẹ, ‘Te imẹ khian ghi sẹ ofigbọn na ya rhie uyi ne Osanobua kevbe emwa nagbọn ne I ru ladian rae, ne I do gha rueghe avbe abọ mwẹ yan avbe erhan nikẹre ra?’ 10 Iyeke ọni, avbe erhan nii na tama erhan efig wẹẹ: ‘Do gha kha yan ima.’ 11 Sokpan, erhan efig na tama iran wẹẹ: ‘Te imẹ khian ghi sẹ orhiẹnrhiẹn mwẹ kevbe ọmọ nọ maan ne I mọ rae, ne I do gha rueghe avbe abọ mwẹ yan avbe erhan nikẹre ra?’ 12 Iyeke ọni, avbe erhan nii na tama evaẹn* wẹẹ: ‘Do gha kha yan ima.’ 13 Ẹre evaẹn* na tama iran wẹẹ, ‘Te imẹ khian ghi sẹ ayọn ọgbọn mwẹ rae, nọ ya ẹko rhiẹnrhiẹn Osanobua kevbe emwa nagbọn, ne I do gha rueghe avbe abọ mwẹ yan avbe erhan nikẹre ra?’ 14 Vbe okiekie, erhan nii hia na ghi tama erhan igban* wẹẹ, ‘Do gha kha yan ima.’ 15 Ẹre erhan igban na ghi tama avbe erhan nikẹre wẹẹ, ‘Deghẹ uwa gele hoo ne I rri ọba yan uwa, wa do rhie uhunmwu lẹre ye ototọ irhu mwẹ. Vbe ẹ i re erriọ, we ne erhẹn ke erhan igban ladian, nọ giẹn avbe erhan esida ni rre Lẹbanọn sẹ otọ.’

16 “Emwi nọ maan kevbe nọ gbae ẹre uwa ru ra, ne uwa na ma Abimẹlẹk ọba? Wa ru emwi nọ maan rhọkpa ne Jerubel kevbe igiowa ẹre nẹ ra? Wa vbe mu uyi nọ khẹke ye ọre egbe nẹ ra? 17 Vbe ẹghẹ ne erha mwẹ na gha gbinna ne uwa, te ọ rhie uhunmwu* mwẹ atata obọ, nọ mieke na sẹtin miẹn uwa fan vbe obọ Ivbi e Midian. 18 Sokpan, vbe ẹdẹnẹrẹ na nian, te uwa ghi gu igiowa ọghe erha mwẹ khọn, wa na vbe gbele ivbi ẹre nikpia ekigbesiyenẹ (70) rua vbe uhunmwu okuta ọkpa. Iyeke ọni, wa na ma Abimẹlẹk ne ovbi ọviẹn ọnrẹn nokhuo ọba, nọ gha kha yan avbe ọkaolotu e Shikẹm, rhunmwuda wẹẹ, ọtiẹn uwa nọ. 19 Nian, deghẹ emwi nọ maan kevbe nọ gbae, ẹre uwa ru e Jerubel kevbe igiowa ẹre re vbe ẹdẹnẹrẹ, wa gu Abimẹlẹk gha ghọghọ, ne irẹn vbe gu uwa gha ghọghọ. 20 Sokpan, vbe ẹ i re erriọ, wẹẹ ne Abimẹlẹk ya erhẹn giẹn avbe ọkaolotu e Shikẹm kevbe Bẹt-milo rua, we ne avbe ọkaolotu e Shikẹm kevbe Bẹt-milo vbe ya erhẹn giẹn Abimẹlẹk rua.”

21 Ẹre Jotam na lẹẹ, ọ na gha rrie Biyẹ, evba ẹre ọ ghi gha ye, rhunmwuda Abimẹlẹk ne ọtiọnrẹn.

22 Ukpo eha ẹre Abimẹlẹk ya khaevbisẹ yan Ivbi Izrẹl.* 23 Ẹre Osanobua na ghi ru ẹre ne Abimẹlẹk kevbe avbe ọkaolotu e Shikẹm gha ya eghian so egbe,* iran na sọtẹ daa Abimẹlẹk. 24 Te ọna sunu, na mieke na rria ikhi ne ivbi e Jerubel ekigbesiyenẹ (70) na gbelua, ne esagiẹn iran mieke na gha rre uhunmwu Abimẹlẹk ne ọtẹn iran, nọ gbele iran rua, kevbe uhunmwu avbe ọkaolotu ọghe Shikẹm ni vbe ru iyobọ nẹẹn ya gbele etiọnrẹn rua. 25 Ẹre avbe ọkaolotu ọghe Shikẹm na gie ikpia eso, ne iran ya gba khẹ ọre vbe uhunmwu oke, iran ghi gha rhaa emwa hia ni la ukpo nii gberra. Vbene ẹghẹ ya khian, a na do na iyẹn na ma Abimẹlẹk.

26 Iyeke ọni, e Ge-al ne ovbi Ibẹd kevbe etiọnrẹn na gha die Shikẹm, avbe ọkaolotu ọghe Shikẹm keghi mu ẹtin yan rẹn. 27 Iran kegha rrie ugbo evaẹn* ọghe iran, iran na ya si avbe egrep ni rrọọ koko, iran na ya owẹ mamaẹn ya ru ayọn, iran na vbe do ugie. Iyeke ọni, iran na gha rrie aro ẹbọ ọghe iran, iran na re, iran na da, iran na tie ihẹn ne Abimẹlẹk. 28 Ẹre Ge-al ne ovbi Ibẹd na wẹẹ: “Gha re Abimẹlẹk, gha vbe re Shikẹm, ne ima gha na gae? Ẹ i re irẹn ọre ovbi e Jerubel, ẹ i re Zibol ẹre ọ vbe ya zẹ ihe egbe? Wa ga ivbi e Hemọ ne erha e Shikẹm! Vbọzẹ ne ima gha na ga Abimẹlẹk? 29 Akpawẹ ototọ mwẹ ẹre iran na ye, I gha te mu Abimẹlẹk hin ukpo nọ ye rre.” Ẹre ọ na ghi tama Abimẹlẹk wẹẹ: “Viọ emwa ba ivbiyokuo ruẹ, ne u do gu ima khọn.”

30 E Zibol ne ọkaolotu ọghe ẹvbo nii, ghi họn ẹmwẹ ne Ge-al ne ovbi Ibẹd tae, ohu keghi muẹn. 31 Ẹre ọ na gie emwa eso bu Abimẹlẹk, vbene ọmwa rhọkpa ma na rẹn,* ọ na we na tama rẹn wẹẹ: “Ghee ẹre! E Ge-al ne ovbi Ibẹd kevbe etiọnrẹn wa rre Shikẹm nian, iran gha ruẹn ẹmwẹ ye emwa ni rre ẹvbo na ẹko, ne iran sọtẹ daa ruẹ. 32 Rhunmwuda ọni, wẹ vbe emwa ruẹ ghi gha dee vbe asọn, wa ghi lẹre ye orere ẹvbo nii. 33 Ovẹn gha wa suẹn gha yan rre vbe owiẹ, wa ghi ladian ya gu emwa ni rre ẹvbo nii khọn; irẹn vbe ikpia ni gue ẹre gha ladian do gu ruẹ khọn, u ghi ru emwi ke emwi ne u gha sẹtin ru, ne obọ ruẹ mieke na ke ukhunmwu nẹẹn.”*

34 Ẹre Abimẹlẹk kevbe emwa hia ni gue ẹre na kpaegbe vbe asọn, iran na ghae egbe ye ẹbu enẹ, iran na lẹre ye ọkpẹn e Shikẹm. 35 E Ge-al ne ovbi Ibẹd ghi ladian ya mudia ye onurho ẹvbo nii, Abimẹlẹk kevbe emwa hia ni gue ẹre na ladian vbe eke ne iran lẹre yi. 36 E Ge-al ghi bẹghe iran, ọ na tama e Zibol wẹẹ: “Ghee ẹre, emwa eso ke uhunmwu oke tuorre dee.” Sokpan, e Zibol na tama rẹn wẹẹ: “Aghọnghọn ọghe avbe oke ẹre u bẹghe, ẹ i re emwa nagbọn.”

37 Ọ ghi zẹ kpẹẹ, e Ge-al na wẹẹ: “Ghee ẹre, emwa eso ke adesẹneva ọghe otọ nii tuorre dee, ẹbu ọkpa vbe ke odẹ na la yo eke ne okperhan nọ rre Miọnẹnim ye dee.” 38 Ẹre Zibol na ghi tama rẹn wẹẹ: “Ẹ i re uwẹ ẹre ọ ghaa rhuọ wẹẹ, ‘Gha re Abimẹlẹk ne ima gha na gae?’ Ẹ i re emwa ne u fi iyeke gbe na khin? Ladian nian, ne u ya gu iran gbinna.”

39 Ẹre Ge-al kevbe avbe ọkaolotu ọghe Shikẹm na ladian, iran na ya gu Abimẹlẹk gbinna. E Ge-al ẹre ọ su iran gha rrie okuo nii. 40 Abimẹlẹk keghi zẹ e Ge-al khu, ẹre Ge-al na lẹẹ fua, emwa ni wulo lele odẹ ya sẹ onurho ẹvbo nii i re avbiẹ.

41 Abimẹlẹk na werriegbe gha rrie Aruma; e Zibol na khu e Ge-al kevbe etiọnrẹn hin e Shikẹm rre. 42 Emwa ni rre ẹvbo nii na ladian vbe ẹvbo nii vbe ẹdẹ nọ lele ẹre, Abimẹlẹk na do họn vbekpa ẹre. 43 Ẹre ọ na ghae emwa ni gue ẹre ye ẹbu eha, iran na lẹre ye ọkpẹn ẹvbo nii. Ọ ghi miẹn emwa ni ghaa ladian vbe ẹvbo nii, ọ na ya gu iran gbinna, ọ na gbele iran rua. 44 Abimẹlẹk kevbe emwa ni gue ẹre keghi rhulẹ ghee odaro, iran na ya mudia ye onurho ẹvbo nii, vbene ẹbu eva nikẹre na ya gu emwa ni ghaa ladian vbe ẹvbo nii gbinna, iran na vbe gbele iran rua. 45 Abimẹlẹk keghi ya ẹdẹ ohoho gu emwa ni rre ẹvbo nii khọn, ọ na vbe khọnmiotọ yan iran. Ọ na gbele emwa hia ni rre ẹvbo nii rua, ọ na guọghọ ẹvbo nii sẹ otọ, ọ na vbe tue umwẹ lele otọ ọre hia.

46 Avbe ọkaolotu hia ni rre owa nọ yo nọ rre Shikẹm ghi họn emwi nọ sunu na, iran na zẹgiẹ gha rrie ehe na lẹre yi,* nọ rre owa* ọghe Ẹl-birit. 47 Abimẹlẹk ghi wa họn wẹẹ, avbe ọkaolotu hia ni rre owa nọ yo nọ rre Shikẹm si egbe koko ye ihe ọkpa, 48 Abimẹlẹk kevbe emwa hia ni gue ẹre kegha rrie Oke Zalmọn, ọ na ya ughanmwa fian abọ erhan ọkpa, ọ na muẹn yan izabọ, ọ na tama emwa ni gue ẹre wẹẹ: “Wa zẹgiẹ ru emwi ne I sirra uwa ru na!” 49 Ẹre emwa hia ni gue Abimẹlẹk na vbe giagia abọ erhan, iran na lele ẹre. Iran na viọ avbe abọ erhan nii ye ehe ne iran nii lẹre yi, iran na mu erhẹn yọ. Rhunmwuda ọni, emwa hia ni ghaa rre owa nọ yo nọ rre Shikẹm na vbe wulo; ikpia vbe ikhuo ni re odẹ arriaisẹn ọkpa (1,000) ẹre ọ wulo.

50 Abimẹlẹk na vbe gha rrie Tibẹz; ọ na gbe odin lẹga e Tibẹz, ọ na vbe khọnmiotọ yan rẹn. 51 Ọ ghaa mwẹ owa ọkpa nọ yo kevbe nọ wegbe, nọ ghaa rre adesẹneva ọghe ẹvbo nii. Ikpia hia, ikhuo hia, kevbe avbe ọkaolotu hia ni rre ẹvbo nii na lẹẹ gha rrie evba. Iran na khui urho ke egbe yi, iyeke ọni, iran na hin odukhunmwu gha rrie uhunmwu owa nọ yo nii. 52 Ẹre Abimẹlẹk na gha rrie owa nọ yo nii, nọ ya guọghọe. Ọ na gha rrie onurho ọghe nene owa, nọ mieke na mu erhẹn yọ. 53 Ẹre okhuo ọkpa na ke odukhunmwu werriẹ olọ* gbe Abimẹlẹk uhunmwu, uhunmwu ẹnrẹn na va. 54 Ẹre Abimẹlẹk na zẹgiẹ tie ọguọmwadia nọ mu emwi igbinna lele ẹre, ọ na tama rẹn wẹẹ: “Rhie umozo ruẹ ladian ne u gbe mwẹ rua, ne emwa ghẹ mieke na gha tae khian wẹẹ, okhuo ẹre ọ gbe mwẹ rua.” Ẹre ọguọmwadia ẹre na ya umozo so ẹre, ọ na wu.

55 Ikpia ni rre otọ Izrẹl ghi miẹn wẹẹ Abimẹlẹk wu nẹ, iran hia na werriegbe gha rrie owa. 56 Erriọ Osanobua ghi ya rri Abimẹlẹk oya ye emwi dan nọ ru erhae re, nọ na gbele etiọnrẹn nikpia ekigbesiyenẹ (70) rua. 57 Osanobua na vbe rri Ivbi e Shikẹm oya ye emwi dan hia ne iran ru. Ihẹn ne Jotam ne ovbi e Jerubel tie ne iran, na vbe sẹ vbe egbe iran.