Avbe Ọbuohiẹn

8 Ẹre Ivbi Ifrem na tama e Gidiọn wẹẹ: “Vbọzẹ ne u na ru ima vbenian? Vbọzẹ ne u ma na tie ima ba egbe, vbe u khian ya gu Ivbi e Midian gbinna?” Iran na gu ẹre gui ẹsẹse. 2 Sokpan, ọ na tama iran wẹẹ: “Inu emwi mẹ he ru, vbe a gha yae taa ọghe uwa? Emwiokọ na rhọ kẹ rre vbe Ifrem ma maan sẹ egrep na da wa rhọ vbe ugbo Abi-iza ra? 3 Wa ẹre Osanobua viọ Orẹb kevbe Zi-ẹb, ni re ọkaolotu ọghe Ivbi e Midian ye ọre obọ. A gha sẹtin ya emwi ne imẹ he ru, gie ọghe uwa ra?” Ọ ghi wa ta ẹmwẹ na, ohu nọ te mu iran na wa rrie otọ.

4 E Gidiọn ghi sẹ Ẹzẹ e Jọdan, ọ na fiaẹn rra. Agharhemiẹn wẹẹ, egbe wọọ e Gidiọn kevbe ivbiyokuo iyisẹn vbe ihe eha (300) ni gue ẹre, iran na ye gha khu eghian iran khian. 5 Iran ghi sẹ e Sọkọt, e Gidiọn na tama ikpia ni rre Sọkọt wẹẹ: “Wa lahọ, wa viọ ebrẹd eso ne emwa ne ima gba khian, rhunmwuda, egbe wọọ iran nẹ. E Ziba vbe Zalmọna, ni re ọba e Midian, ẹre ima khu khian.” 6 Sokpan, avbe ọkaolotu ọghe Sọkọt keghi tama rẹn wẹẹ: “Vbọzẹ ne ima gha na viọ ebrẹd ne ivbiyokuo ruẹ, vbene obọ ruẹ ma na he vba e Ziba vbe Zalmọna?” 7 Ẹre Gidiọn na ghi tama iran wẹẹ: “Rhunmwuda ẹmwẹ ne uwa tae na, e Jehova gha ghi rhie Ziba vbe Zalmọna yọ mwẹ obọ nẹ, I gha ya erhan igban kevbe irunmwu igban na miẹn vbe ato, valọ uwa egbe.” 8 Ọ na ke evba kpa gha rrie Pẹnu-ẹl, ọ ghi sẹ evba, ọ na nọ iran emwi nọ vbe nọ ikpia ni rre Sọkọt re. Sokpan, vbene ikpia ni rre Sọkọt ya wanniẹn ọnrẹn, erriọ ẹre ikpia ni rre Pẹnu-ẹl vbe ya wanniẹn ọnrẹn. 9 Ẹre ọ na ghi tama ikpia ni rre Pẹnu-ẹl wẹẹ: “I gha rre vbe egbe hẹnnẹdẹn, te I khian guọghọ owa nọ yo na sẹ otọ.”

10 E Ziba vbe Zalmọna, kevbe ivbiyokuo ọghe iran ni re odẹ arriaisẹn ekesugie (15,000) kegha rre Kakọ. Ena ẹre ọ ghi kẹ vbe ivbiyokuo hia, ọghe iran ni rre odẹ Ekẹn,* rhunmwuda, ivbiyokuo arriaisẹn ugie yan iyisẹn (120,000) ni mwẹ umozo, wulo nẹ. 11 E Gidiọn na ye gha gbe oke khian, vbe odẹ ne emwa ni dia ibọkpọ ya lele khian, vbe odẹ ekẹn* ọghe Noba kevbe Jọg-bẹha, ọ na ya gu emwa ni rre agọ nii gbinna, sokpan, iran ma khẹ ye egbe, rhunmwuda, iran ma rẹn wẹẹ a gha do gu iran gbinna. 12 E Ziba vbe Zalmọna ni re ọba eva ọghe Ivbi e Midian ghi lẹẹ, ọ na zẹ iran khu, ọ na vbe mu iran, afianma na ghi suẹn gha fian emwa hia ni rre agọ nii.

13 E Gidiọn ne ovbi e Joash ghi ke okuo nii dee, ọ na la odẹ ne wẹnrẹn nọ rrie Hirẹs. 14 Ọ ghi khian vbe odẹ, ọ na mu okpia ọkpa nọ re igbama, nọ ke Sọkọt rre, ọ na suẹn gha zọlọ ọre ọta. Ẹre igbama nii na gbẹnnẹ eni avbe ọkaolotu kevbe ediọn ni rre Sọkọt rhie nẹẹn; ehia kegha re eha i rrọọ vbe iyenẹ (77). 15 Ẹre ọ na ghi bu ikpia ni rre Sọkọt, ọ na tama iran wẹẹ: “Wa ghee Ziba vbe Zalmọna, ne uwa rhunmwuda ẹre gha fi unu gu mwẹ, ne uwa na wẹẹ, ‘Vbọzẹ ne ima gha na viọ ebrẹd ne ivbiyokuo ruẹ ne egbe wọọ re, vbene obọ ruẹ ma na he vba e Ziba vbe Zalmọna?’” 16 Ọ na silo irunmwu igban kevbe erhan igban na miẹn vbe uwu ato, ọ na yae ru asan, iyeke ọni, ọ na yae bolo avbe ediọn kevbe ikpia ni rre Sọkọt egbe. 17 Ọ na guọghọ owa nọ yo nọ rre Pẹnu-ẹl sẹ otọ, ọ na vbe gbele ikpia ni rre ẹvbo nii rua.

18 Ọ na nọ e Ziba vbe Zalmọna wẹẹ: “De aro ikpia ne uwa gbele vbe Tebọ?” Ẹre iran na wẹẹ: “Te iran wa vbe yevbe uwẹ, te dọmwadẹ ọghẹe vbe uwu iran yevbe ovbi ọba.” 19 Ẹre ọ na ghi tama iran wẹẹ: “Etẹn mwẹ nikpia ẹre iran khin, iye mwẹ ẹre ọ biẹlẹ iran. I ya eni e Jehova ne Osa nọ rrọọ vẹn ihẹn wẹẹ, akpawẹ uwa ma gbele iran rua, I i ghẹ te vbe gbele uwa rua.” 20 Ẹre ọ na tama e Jita ne ovbi ẹre nọdiọn wẹẹ: “Gbele iran na rua.” Sokpan, ohan ma gi ẹre yuo umozo ọghẹe ladian; ohan kegha muẹn, rhunmwuda, igbama ghaa nọ. 21 Ẹre Ziba vbe Zalmọna na wẹẹ: “Wẹ tobọ ruẹ do gbele ima rua, rhunmwuda, emwi ne ọmwa ru, ẹre a ya rẹn deghẹ ọ gele mwẹ ẹtin.” Ẹre Gidiọn na ghi tobọre gbe Ziba vbe Zalmọna rua. Ọ na vbe viọ emwi itegbe nọ yevbe uki, ni ghaa rre ẹyaẹn ọghe avbe kamẹl ọghe iran.

22 Ẹghẹ eso ghi gberra, ikpia ni rre otọ Izrẹl na ghi tama e Gidiọn wẹẹ: “Do gha kha yan ima, ke uwẹ ke ivbuẹ kevbe eyẹ ruẹ, rhunmwuda, wẹ ẹre ọ miẹn ima fan vbe obọ Ivbi e Midian.” 23 Sokpan, e Gidiọn keghi tama iran wẹẹ: “I i khian kha yan uwa, ovbi mwẹ i khian vbe kha yan uwa. Sokpan, e Jehova ẹre ọ khian gha kha yan uwa.” 24 E Gidiọn na vbe kha wẹẹ: “Ọ mwẹ emwi ọkpa ne I hoo ne uwa ru mẹ: we ne dọmwadẹ ọghẹe viọ oroka ọghe ihue mẹ, vbe uwu avbe emwi nọ viọ re vbe okuo.” (Emwa ne iran khọnmiotọ yan ghaa mwẹ oroka ọghe ihue na ya igoru ru, rhunmwuda, Ivbi Ishmẹl ẹre iran ghaa khin.) 25 Ẹre iran na ghi kha wẹẹ: “Ma gha wa viọ nuẹn.” Iran na waa ukpọn ye otọ, dọmwadẹ ọghẹe na gha filo oroka ọghe ihue nọ viọ re ye nene ukpọn. 26 Ukhuamwẹ oroka ọghe ihue na viọ gie ẹre, kegha re ekilo ọkpa i rrọọ vbe ugie (19).* Na kha na, a ma ka avbe emwi itegbe ni yevbe uki ba ẹre, kẹ kevbe avbe emwi urhu, avbe ẹwu ne guọrọ nọ mwẹ ẹmu e pọpo, ne avbe ọba ọghe Midian ghaa yọ, kevbe emwi urhu ni ghaa rre ẹyaẹn ọghe avbe kamẹl ọghe iran.

27 E Gidiọn keghi yae ru ẹfọd,* ọ na muẹn ye Ọfra ne ẹvbo ẹre; ẹre Ivbi Izrẹl hia na ya gha gae* vbe evba, ọ na do gha re ifi ne Gidiọn kevbe igiowa ẹre.

28 Erriọ ẹre Ivbi Izrẹl ghi ya khọnmiotọ yan Ivbi e Midian, iran ma ghi werriegbe sẹtin gu Ivbi Izrẹl khọn; ọfunmwegbe kegha rre otọ nii vbe ọwara ukpo iyeva (40), vbe ẹghẹ ne Gidiọn ya gha rre agbọn.

29 Ẹre Jerubel ne ovbi e Joash na werriegbe gha rrie owa ẹre, ọ na gha rre evba.

30 Emọ ikpia ekigbesiyenẹ (70) ẹre Gidiọn biẹlẹ, rhunmwuda, ọ ghaa mwẹ ikhuo ni bun. 31 Egbakhian ọghẹe nọ rre Shikẹm na vbe biẹ ọmọ okpia ọkpa nẹẹn, ọ* na he ẹre Abimẹlẹk. 32 E Gidiọn ne ovbi e Joash keghi wu, te ọ wa tọ ẹse, wu ẹse; a na ya ree ẹre ye idin ọghe erhae ighẹ e Joash, vbe Ọfra ne ẹvbo ọghe Ivbi Abi-iza.

33 E Gidiọn ghi wa wu, Ivbi Izrẹl na werriegbe suẹn gha ga avbe amazẹ ọghe Bel,* iran na vbe zẹ e Bel-birit nọ gha re osa ọghe iran. 34 Ivbi Izrẹl ma ye Jehova ne Osa ọghe iran rre, nọ miẹn iran fan vbe obọ eghian iran hia ni lẹga iran; 35 iran na mianmian ẹse hia ne Gidiọn ru ne iran, iran ma vbe mwẹ ahoẹmwọmwa nẹi beghe daa igiowa ọghe Jerubel, ọni ọre Gidiọn.