Avbe Ọbuohiẹn

6 Sokpan, Ivbi Izrẹl keghi werriegbe suẹn gha ru emwi nọ sọnnọ e Jehova, rhunmwuda ọni, e Jehova na viọ iran ye obọ Ivbi e Midian, vbe ọwara ukpo ihinrọn. 2 Obọ Ivbi e Midian kegha da Ivbi Izrẹl. Rhunmwuda ọni, Ivbi Izrẹl na ya mwamwa ehe ne iran khian gha lẹre yi* vbe avbe ehe ne oke ye, vbe uvun okuta, kevbe avbe ehe nọ lọghọ na sẹ. 3 Ivbi Izrẹl gha kọ emwiokọ, Ivbi e Midian, Ivbi Amalẹk, kevbe emwa ni rre odẹ Ekẹn* ghi do gha gu iran khọn. 4 Iran ghi bu agọ ye ikinkin ne otọ Izrẹl ye, ne iran mieke na ya gu iran khọn. Iran ghi vbe mu emwiokọ ni rre otọ Izrẹl hia rhia, ya sẹ e Gaza. Iran ma sẹ evbare rhọkpa rae ne Ivbi Izrẹl, iran ma vbe sẹ ohuan rae ne iran, ra ẹmila, ra ekẹtẹkẹtẹ. 5 Iran ghi viọ emwirri kevbe ibọkpọ ọghe iran gha dee, te iran wa gha bun vbe na ghee irhiso. A ma sẹtin ka iran kevbe avbe kamẹl ọghe iran; ẹghẹ ke ẹghẹ ne iran ya la otọ Izrẹl, iran ghi muẹn rhia. 6 Ivbi Izrẹl na do khian ivbiogue sẹlẹkẹ, rhunmwuda Ivbi e Midian; ẹre Ivbi Izrẹl na ghi tu tie Jehova, nọ ru iyobọ ne iran.

7 Ivbi Izrẹl ghi tu tie Jehova nọ ru iyobọ ne iran, rhunmwuda Ivbi e Midian, 8 e Jehova na gie akhasẹ ọkpa bu iran, akhasẹ nii na tama iran wẹẹ: “Ọna ọre emwi ne Jehova ne Osa ọghe Izrẹl khare, ‘Mẹ ẹre ọ viọ uwa ladian vbe otọ Igipt, nọ re ẹvbo ne uwa na gha re eviẹn. 9 I na miẹn uwa fan vbe obọ Ivbi Igipt, I na vbe miẹn uwa fan vbe obọ emwa ni ghaa ya obọ atosi mu uwa, I na khulo iran hin ehe ne uwa ye rre, iyeke ọni, I na mu otọ iran ne uwa. 10 I na vbe tama uwa wẹẹ: “Mẹ ọre Jehova ne Osanobua uwa. Wa ghẹ mu ohan avbe ẹbọ ọghe Ivbi Amọri, ni yan otọ ne uwa ye na.” Sokpan, wa ma họn ẹmwẹ mẹ.’”*

11 Ẹghẹ eso ghi gberra, odibo e Jehova keghi rre, ọ na tota ye ototọ okperhan nọ ghaa rre Ọfra. E Joash ne Ovbi Abi-iza ẹre ọ yan okperhan na. Ovbi ẹre ighẹ e Gidiọn na gha khuọn ewit vbe eke na na ru ayọn, ne Ivbi e Midian ghẹ mieke na miẹn ọnrẹn. 12 Odibo e Jehova na rhie egbe ma rẹn, ọ na tama rẹn wẹẹ: “E Jehova gu ruẹ rrọọ, wẹ ne ovbiyokuo nọ wegbe.” 13 Ẹre Gidiọn na ghi tama rẹn wẹẹ: “Enọyaẹnmwẹ, lahọ ghẹ gui, deghẹ e Jehova gele gu ima rrọọ, vbọzẹ nọ na kue ne ena hia rruan ima? Avbe erha ima tama ima wẹẹ, ‘E Jehova ẹre ọ viọ ima ladian vbe otọ Igipt.’ Avbe emwi ọyunnuan nọ ru, ne avbe erha ima tama ima ghi vbo? U ma bẹghe nian? E Jehova yangbe ima nẹ, ọ vbe viọ ima ye obọ Ivbi e Midian nẹ.” 14 E Jehova keghi ghee ẹre, ọ na tama rẹn wẹẹ: “Gha khian, ne u ya ẹtin ne u mwẹ miẹn Ivbi Izrẹl fan vbe obọ Ivbi e Midian. Ẹ i re imẹ ẹre ọ gie ruẹ?” 15 Ẹre Gidiọn na ghi wanniẹn ọnrẹn wẹẹ: “E Jehova, lahọ ghẹ gui. Vbia khian ya miẹn Izrẹl fan hẹ? Ẹgbẹe mwẹ ẹre ọ ghi kherhe sẹ vbe uniẹn e Manasẹ, mẹ ẹre ọ ghi vbe kanmwa sẹ vbe igiowa erha mwẹ.” 16 Sokpan, e Jehova na tama rẹn wẹẹ: “U gha khọn Ivbi e Midian mu otọ, vbene a miẹn wẹẹ, orhunmwu ọkpa kẹkan ẹre iran khin, rhunmwuda, I gha gu ruẹ gha rrọọ.”

17 Ẹre Gidiọn na ghi tama rẹn wẹẹ: “Deghẹ ẹmwẹ mwẹ gele yẹẹ ruẹ, rhie ama mẹ ne I ya rẹn wẹẹ, wẹ ẹre ọ gele gu mwẹ guan. 18 Lahọ ghẹ he kpa, gu mwẹ ya le evbare mu guẹ.” Ẹre ọ na tama rẹn wẹẹ. “I i khian kpa, I gha mudia khẹ ruẹ.” 19 Ẹre Gidiọn na kpa, ọ na ya gbe ẹwe ọkpa nọ ma he dido, ọ na le ẹre. Ọ na vbe ya ekilo owọrọ (11)* ọghe eflawa ru ebrẹd na ma rhie eyist yi. Ọ na mu enene emiowo ye okhuae, ọ na tue amẹ ọnrẹn ye akhe na ya le evbare; iyeke ọni, ọ na viọ ọre gie ẹre, ọ na mwamwaẹn ye ototọ okperhan nii.

20 Ẹre odibo ọghe Osa ọghe ẹmwata na ghi tama rẹn wẹẹ: “Mu emiowo nii kevbe ebrẹd na ma rhie eyist yi, yan okuta nọkhua nọ rre evba, u ghi vbe tue amẹ enene emiowo yan rẹn.” Ẹre ọ na gele ru vberriọ. 21 Ẹre odibo e Jehova na niẹn ọkpọ nọ rre ọre obọ, ọ na ya ukpẹ ọre kaẹn nene emiowo kevbe ebrẹd na ma rhie eyist yi, ẹre erhẹn na ladian vbe uwu okuta nii, ọ na giẹn emiowo nii kevbe ebrẹd na ma rhie eyist yi. Ẹre odibo e Jehova nii na ghi ru gbẹnnẹ. 22 Ẹghẹ nii, ẹre Gidiọn ghi ya rẹn wẹẹ, odibo e Jehova ẹre ghaa nọ.

Vbe ọwara ọkpa nii, e Gidiọn keghi kha wẹẹ: “Eo, Enọyaẹnmwa ighẹ Jehova ne Udazi, odibo ruẹ ẹre I wa miẹn na ghee mwẹ ghee ruẹ, Eo Jehova!” 23 Sokpan, e Jehova keghi tama rẹn wẹẹ: “Ọfunmwegbe gu ruẹ rrọọ. Ghẹ gi ohan mu ruẹ; u i khian wu.” 24 Ẹre Gidiọn na ghi gbe aka ye evba ne Jehova. A na gha tie ẹre Jehova-shelọm.* Eni nii ẹre a ye tie ẹre do fi ẹdẹnẹrẹ. Ọ wa ye rre Ọfra, nọ re ẹvbo ọghe Ivbi Abi-iza.

25 Vbe asọn nii, e Jehova na tama e Gidiọn wẹẹ: “Mu ovbi ẹmila ọghe erhaa, ọni ọre ovbi ẹmila ne ukpogieva nọ rre ukpo ihinrọn, ne u guọghọ aka ọghe Bel ne erhaa bọe, u ghi vbe fian erhan ẹbọ* nọ sikẹ ọre gbe otọ. 26 U gha ghi ya avbe okuta na mwamwaẹn, gbe aka ne Jehova ne Osanobua ruẹ nẹ, vbe uhunmwu ehe ilẹre na, u ghi mu ovbi ẹmila ne ukpogieva nii, ne u yae zọ ese na giẹn ruan, vbe uhunmwu iku erhan ọghe erhan ẹbọ* ne u giagia kua.” 27 Ẹre Gidiọn na viọ ikpia igbe vbe uwu eguọmwadia ẹre, ọ na wa ru vbene Jehova tama rẹn. Sokpan, ọ kegha mu ohan igiowa ọghe erhae, kevbe ikpia ni rre ẹvbo nii sẹrriọ wẹẹ, ohan ma gi ẹre ru ẹre vbe avan, rhunmwuda ọni, ọ na ya ru ẹre vbe asọn.

28 Ikpia ni rre ẹvbo nii ghi rhiọrre vbe owiẹ fioro vbe ẹdẹ nọ lele ẹre, iran na do vba wẹẹ a guọghọ aka ọghe Bel sẹ otọ, a fian erhan ẹbọ* nọ sikẹ ọre gbe otọ, a vbe ya ovbi ẹmila ne ukpogieva zọ ese, vbe uhunmwu aka na gbe ye evba. 29 Iran na do gha nọ egbe wẹẹ: “Gha do ẹki na?” Iran ghi gualọ otọ re nẹ, iran na wẹẹ: “E Gidiọn ne ovbi e Joash nọ.” 30 Ẹre ikpia ni rre ẹvbo nii na ghi tama e Joash wẹẹ: “Rhie ovbuẹ ladian na gbe ẹre rua, rhunmwuda, ọ guọghọ aka ọghe Bel sẹ otọ, ọ na vbe fian erhan ẹbọ* nọ sikẹ ọre gbe otọ.” 31 Ẹre Joash na ghi tama ikpia nii ne ohu ghaa mu wẹẹ: “Wa ẹre ọ khian sinmwi oseghe ne Bel ra? Wa ẹre ọ khian miẹn e Bel fan ra? Ọmwaikọmwa nọ sinmwi oseghe ne Bel, a ghi gbe ẹre rua vbe owiẹ na. Deghẹ osa gele nọ, we nọ gbinna ne egbe ẹre, ugbẹnvbe a miẹn wẹẹ ọmwa guọghọ aka ọghẹe sẹ otọ.” 32 Ke ẹdẹrriọ kpa, ọ na suẹn gha tie Gidiọn Jerubel,* ọ na wẹẹ: “Gi e Bel sinmwi oseghe ne egbe ẹre, rhunmwuda, ọmwa guọghọ aka ọghẹe sẹ otọ.”

33 Ivbi e Midian hia, Ivbi Amalẹk, kevbe emwa ni rre odẹ Ekẹn* keghi si uhunmwu koko; iran na fian ẹzẹ rra gha rrie Iya* Ọghe Jẹzriẹl, iran na bu agọ ye evba. 34 Orhiọn ọghe Jehova keghi hin yan e Gidiọn, ọ na kpee okpe* nọ gue ẹre, ẹre Ivbi Abi-iza na ghi rre do ru iyobọ nẹẹn. 35 Ọ keghi gie emwa bu Ivbi e Manasẹ hia, ẹre iran na gha dee do ru iyobọ nẹẹn. Ọ na vbe gie emwa bu Ivbi Asha, e Zẹbulọn kevbe Naftalai, iran na vbe* bu ẹre gha dee.

36 Ẹre Gidiọn na ghi tama Osa ọghe ẹmwata wẹẹ: “Adeghẹ imẹ ẹre u khian loo ya miẹn Ivbi Izrẹl fan, zẹvbe ne u yan rẹn, 37 I gha waa eto ohuan ye eke na na wiẹn emwiokọ. Adeghẹ evbu na tuo yan eto ohuan na ọkpa, sokpan, otọ nọ lẹga ẹre na ka, I ghi rẹn wẹẹ u gha gele loo mwẹ ya miẹn Ivbi Izrẹl fan, zẹvbe ne u yan rẹn.” 38 Erriọ ẹre ọ wa sunu zẹẹ. Ọ ghi rhiọrre vbe owiẹ fioro vbe ẹdẹ nọ lele ẹre, ọ na mi eto ohuan nii, amẹ nọ ladian vbọ rhunmwuda evbu nọ tuo yọ, keghi vuọn ọkpan nọkhua ọkpa. 39 Vbọrhirhighayehẹ, e Gidiọn keghi tama Osa ọghe ẹmwata wẹẹ: “Lahọ, ghẹ gi ohu mwẹ muẹn, gu mwẹ ye rinmwian ruẹ emwi ọkpa. Gu mwẹ werriegbe ya eto ohuan na ghee ẹre ghee, ne I mieke na rẹn deghẹ imẹ ẹre u khian gele loo ya miẹn Ivbi Izrẹl fan. Lahọ, u ghi ru ẹre ne eto ohuan na ka, sokpan, evbu ghi gha rre otọ.” 40 Erriọ ẹre Osanobua ru ẹre vbe asọn nii; eto ohuan nii ọkpa na ka, sokpan, evbu na gha rre otọ.