Avbe Ọbuohiẹn
5 Vbe ẹdẹ ne ẹdẹrriọ, e Dẹbora vbe Berak ne ovbi Abinoam keghi so ihuan na:
2 “Wa rho e Jehova
Rhunmwuda ivbiyokuo ni rre otọ Izrẹl, ni sẹ eto ọghe iran rae, vbene iran ma na ya emwi gbalọe,
Rhunmwuda ne emwa na ya ekhọe obọ iran gha rrie okuo.
3 Wa danmwehọ, wa ne avbe ọba! Wa danmwehọ, wa ni khaemwisẹ!
E Jehova ẹre I gha so ihuan gie.
I gha so ihuan urhomwẹ gie Jehova, ne Osa ọghe Izrẹl.
4 E Jehova, ẹghẹ ne u ya kpa vbe Siyẹ,
Ẹghẹ ne u vbe ya kpa vbe ikinkin ọghe Idọm,
Otọ keghi mu rueghe, amẹ na rhọọ ke iso rre,
Amẹ ni rre okuku keghi gbe kua.
5 Avbe oke keghi ranran kua* vbe odaro e Jehova,
Uhiẹn, te Sainai vbe ranran kua vbe odaro e Jehova, ne Osa ọghe Izrẹl.
6 Vbe ẹghẹ e Shamga ne ovbi Enat,
Kevbe ẹghẹ e Je-ẹl, emwa ma ghi gha khian vbe ukpo;
Emwa ni mu okhian yo ehe, na ya gha la odẹ ọvbehe.
7 A ma ghi gha miẹn emwa ni rre avbe igue ni rre otọ Izrẹl;
A ma ghi miẹn iran rhọkpa, a ghi te miẹn wẹẹ imẹ ne Dẹbora rre,
A ghi te miẹn wẹẹ, I rre zẹvbe iye ọmọ vbe otọ Izrẹl.
8 Iran na suẹn gha ga avbe ẹbọ na ma rẹn ẹdẹ;
Rhunmwuda ọni, a na do gha khọn okuo vbe avbe onurho ni rre avbe ẹvbo iran.
A ma ghi gha miẹn asa ra asoro,
Vbe obọ orhunmwu arriaisẹn iyenẹ (40,000) vbe Izrẹl.
9 I ya ekhọe hia ya egbe ba avbe ọkaokuo ọghe Izrẹl,
Ni ya ekhọe obọ iran lele emwa nii gha khian.
Wa rho e Jehova!
11 A keghi họn urhu emwa ni sa amẹ ne avbe aranmwẹ, vbe ehe na na sa amẹ;
Iran na gha guan kaẹn iwinna esiesi ne Jehova ru,
Iwinna esiesi ne emwa rẹn ni rre avbe igue ni rre otọ Izrẹl ru.
Ẹre emwa ọghe Jehova na gha rrie avbe onurho, ni rre avbe ẹvbo iran.
12 Kpaegbe, kpaegbe, Eo Dẹbora!
Kpaegbe, kpaegbe, zẹ ihuan so!
Zẹ emwi ru, e Berak! Viọ emwa ne u munọ vbe okuo gha rrie, wẹ ne ovbi Abinoam!
13 Ẹre iran ni ghi kẹ, na bu avbe ọkaolotu gha dee;
Emwa ọghe Jehova keghi bu mwẹ gha dee, ne iran mieke na ya gu eghian ọghe iran ni wegbe gbinna.
14 Ifrem ẹre iran ni rre iya* ke rre;
Iran lele ruẹ dee, Eo Bẹnjamin, iran rre uwu ẹbu emwa ruẹ.
E Mekiẹ ẹre avbe ọkaolotu ke kpa,
E Zẹbulọn ẹre iran ni viọ emwa ba ivbiyokuo, ni da ọkpọ ọdakha yi ke vbe kpa.
15 Avbe ọkaolotu ọghe uniẹn Isaka ghaa rre ehe ne Dẹbora ye,
Vbene uniẹn Isaka ghaa rre ehe ne Dẹbora ye, erriọ ẹre Berak vbe gha rre ehe nọ ye.
A keghi gie ẹre gha rrie iya.*
Uniẹn e Rubẹn kegha bọ iro eveva.
16 Vbọzẹ ne u na tota vbe na ghee aranmwẹ na kun ihẹ yan,
Ne u na gha danmwehọ avbe ọsuohuan, vbe iran kpee ẹrere?*
Nọ ne uniẹn e Rubẹn, ekhọe iran kegha bọ iro eveva.
17 Emwa ni rre Giliẹd na ye gha rre iyeke Jọdan;
Uniẹn e Dan, vbọzẹ ne uwa na ya dia avbe okọ nikhua ya?
Asha tota ye ọkpẹn okun, vbe nẹi na ru emwi rhọkpa,
Ọ ma vbe kpa hin eghute ẹre* rre.
18 Ivbi e Zẹbulọn na rhie uhunmwu mwẹ atata obọ;
Erriọ ẹre Ivbi e Naftalai vbe ru ẹre vbe uhunmwu oke.
19 Avbe ọba na rre do khọn okuo;
Avbe ọba e Kenan keghi khọn okuo
Vbe Te-anak, vbe ọkpẹn ovbi ẹzẹ nọ rre Mẹgido.
Iran ma viọ esiliva rhọkpa vbe okuo ne iran yo.
20 Avbe orhọnmwẹ keghi ke ẹrinmwi gha gbinna;
Iran na ke ehe ne iran na lẹga vbe orere iso, gha gu e Sisẹra gbinna.
21 Ẹzẹ e Kaishọn keghi lẹẹ iran gha rrie,
Ọni ọre ẹzẹ nẹdẹ nii, nọ re ẹzẹ e Kaishọn.
I* keghi ya owẹ rhilo avbe olẹtin ginna otọ.
22 Idanwẹ ọghe avbe ẹsin kegha solo otọ
Zẹvbe ne avbe ẹsin ọghẹe ni wegbe ya gha lẹẹ khian.
23 Odibo e Jehova keghi kha wẹẹ, ‘Ọkhọ gha rruan e Mirọz,
Ọkhọ gha vbe rruan emwa ni rre evba,
Rhunmwuda, iran ma rre do ru iyobọ ne Jehova,
Iran ma vbe deba emwa ni wegbe ru iyobọ ne Jehova.’
24 E Je-ẹl ne amwẹ e Hiba ne Ovbi e Kẹni
Keghi re ọmwa na fiangbe ẹsẹse vbe uwu ẹbu ikhuo;
Irẹn ẹre a ghi mu uyi ye ọre egbe sẹ, vbe uwu ẹbu ikhuo hia ni dia ibọkpọ ya.
25 E Sisẹra we na sa amẹ ne irẹn wọn; ọ na sa ewẹn ẹmila nẹẹn wọn.
Ọ na ya ọkpan ne mose mose sa ewẹn ẹmila nọ kiri nẹẹn.
26 Ọ na rhie ise na ya tan ibọkpọ,
Ọ na ya obọ erha ọmwa rẹn rhie umọmọ ọghe avbe owinna.
Ọ na gbe umọmọ ye Sisẹra uhunmwu, uhunmwu ẹnrẹn na va,
Ọ na kan ise ye ọre uhunmwu, ọ na vbe guọguọe.
27 Ọ luẹluẹ ye akharha ẹre; ọ na de, ọ na gha rre otọ vba lọlọlọ;
Ọ keghi luẹluẹ ye akharha ẹre, ọ na vbe de gbe otọ;
Eke nọ de yi, ẹre ọ vbe wu yi.
28 Okhuo ọkpa keghi ke ewindo gha ghee orere,
Iye Sisẹra keghi ke ewindo yọn ghee orere,
‘Vbọzẹ ne ikẹkẹ okuo ẹre ma na he ye rre?
Vbọzẹ ne I ma na he ye họn vbe ẹsin ọghẹe rhulẹ dee?’
29 Okhuo nọ ghi mwẹ ẹwaẹn sẹ vbe ikhuo ẹrriẹ ọghẹe, ghi zẹ ẹmwẹ wanniẹn ọnrẹn;
Irẹn tobọ irẹn ghi vbe gha ta enene ẹmwẹ yan egbe yan egbe wẹẹ,
30 ‘Ughaghe te iran ghae emwi ne obọ iran vba re vbe okuo,
Ovbialeke* ọkpa, ra ivbialeke* eva, gha sẹ edọmwadẹ ivbiyokuo obọ,
Ukpọn na mu ẹmu yi gha sẹ e Sisẹra obọ, ọghe ne ẹmwata, ukpọn na mu ẹmu yi gha sẹ ọre obọ,
Ẹwu ne guọrọ na do, ukpọn na mu ẹmu yi, ẹwu ne guọrọ eva na do,
A ghi muẹn la urhu emwa ni fu emwi viọ vbe okuo.’
31 Eo Jehova, gi eghian ruẹ hia gbẹro,
Sokpan, gi emwa ni hoẹmwẹ ruẹ yevbe na ghee ovẹn nọ da yan rre kevbe nọ kakabọ yunmwu.”
A ma ghi khọn okuo vbe ẹvbo nii,* vbe ukpo iyeva (40).