Avbe Ọbuohiẹn
12 Ikpia ni rre Ifrem keghi si egbe koko, iran na fian ẹzẹ rra gha rrie Zefọn,* iran na tama e Jẹfta wẹẹ: “Vbọzẹ ne u ma na tama ima ne ima lele ruẹ, vbe u khian ya gu Ivbi Amọn khọn? Te ima khian khui ruẹ ye owa ruẹ, iyeke ọni, ma ghi giẹn ọnrẹn sẹ otọ.” 2 Sokpan, e Jẹfta na tama iran wẹẹ: “Te imẹ vbe emwa mwẹ wa gha gu Ivbi Amọn khọn. I te tie uwa ne uwa do ru iyobọ mẹ, sokpan, wa ma rre do miẹn mwẹ fan vbe obọ iran. 3 I ghi bẹghe ẹre wẹẹ, wa ma rre do miẹn mwẹ fan, I na rhie uhunmwu mwẹ atata obọ ya gu Ivbi Amọn gbinna, e Jehova na vbe viọ iran yọ mwẹ obọ. Vbọ ghi zẹ ne uwa na bu mwẹ gha dee vbe ẹrẹna, ne uwa do gu mwẹ gbinna?”
4 E Jẹfta keghi si ikpia hia ni rre Giliẹd koko, iran na ya gu Ivbi Ifrem khọn; ikpia ni rre Giliẹd keghi khọnmiotọ yan Ivbi Ifrem ni ka tae wẹẹ: “Emwa ni lẹẹ fua vbe Ifrem, ẹre uwa ne Ivbi e Giliẹd ni rre ikinkin ọghe Ifrem kevbe Manasẹ khin.” 5 Ivbi e Giliẹd keghi ke odaro ne Ivbi Ifrem, iran na ya mudia lele avbe ehe ni ma dinmwi gbe vbe Ẹzẹ e Jọdan. Ovbi Ifrem rhọkpa gha ghi gha hoo nọ lẹẹ fua, ọ ghi wẹẹ, “Wa gu mwẹ gberra”; ẹghẹ nii, ikpia ni rre Giliẹd ghi nọ rẹn wẹẹ, “Ovbi Ifrem ẹre u khin ra?” Ọ gha ghi kha wẹẹ, “Ẹo!” 6 iran ghi tama rẹn wẹẹ: “Ọ maan, ta e Shibolẹt.” Sokpan, ọ ghi wẹẹ, “Sibolẹt,” rhunmwuda, ẹ i gua tae. Iyeke ọni, iran ghi muẹn, iran ghi gbe ẹre rua vbe ehe nọ ma dinmwi gbe vbe Ẹzẹ e Jọdan. Ivbi Ifrem arriaisẹn eva yan iyeva (42,000), ẹre ọ wulo vbe ẹghẹ nii.
7 Ukpo ehan ẹre Jẹfta ne Ovbi e Giliẹd ya bu ohiẹn Ivbi Izrẹl, iyeke ọni, ọ na wu, a na ya ree ẹre ye ẹvbo ẹre vbe Giliẹd.
8 E Jẹfta ghi ru ọghẹe gberra nẹ, Ibzan nọ ke Bẹtlẹhẹm rre, ẹre ọ ghi gha bu ohiẹn Ivbi Izrẹl. 9 Emọ ikpia ọgban (30) kevbe emọ ikhuo ọgban (30), ẹre ọ ghaa mwẹ. Ọ na we ne ivbi ẹre nikhuo ya rọnmwẹ ọdọ vbe ẹgbẹe ọvbehe, ọ na vbe viọ ikhuo ọgban (30) gie ivbi ẹre nikpia, ne iran rhie rọnmwẹ. Ukpo ihinrọn ẹre ọ ya bu ohiẹn Ivbi Izrẹl. 10 Iyeke ọni, Ibzan keghi wu, a na ree ẹre ye Bẹtlẹhẹm.
11 Ibzan ghi ru ọghẹe gberra nẹ, Ilọn ne Ovbi e Zẹbulọn na do gha bu ohiẹn Ivbi Izrẹl; ukpo igbe ẹre ọ ya bu ohiẹn Ivbi Izrẹl. 12 Iyeke ọni, Ilọn ne Ovbi e Zẹbulọn keghi wu, a na ree ẹre ye Aijalọn vbe otọ e Zẹbulọn.
13 Ilọn ghi ru ọghẹe gberra nẹ, Abdọn ne ovbi e Hilẹl nọ ke Piratọn rre, na do gha bu ohiẹn Ivbi Izrẹl. 14 Ọ ghaa mwẹ emọ ikpia iyeva (40) kevbe eyẹ ọgban (30); dọmwadẹ ọghẹe vbe uwu iran kegha mwẹ ekẹtẹkẹtẹ ọkpọkpa. Ukpo erẹnrẹn ẹre ọ ya bu ohiẹn Ivbi Izrẹl. 15 Iyeke ọni, Abdọn ne ovbi e Hilẹl nọ ke Piratọn rre na wu, a na ree ẹre ye Piratọn vbe otọ Ifrem, vbe ikinkin ne oke ye vbe Amalẹk.