Avbe Ọbuohiẹn

11 Ovbiyokuo nọ wegbe ẹre Jẹfta ghaa khin, e Giliẹd ẹre ọ ghaa ye; igbiragia ẹre iyẹe ghaa khin, e Giliẹd ẹre ọ ghaa re erhae. 2 Sokpan, ọvbokhan e Giliẹd vbe biẹlẹ emọ ikpia nẹẹn. Emọ nọ biẹlẹ nẹẹn ghi waan nẹ, iran na khu e Jẹfta hin owa rre, iran na tama rẹn wẹẹ: “U i khian rri ukhu erha ima rhọkpa, rhunmwuda, ovbi okhuo ọvbehe ẹre u khin.” 3 Ẹre Jẹfta na ghi lẹẹ hin ehe ne etiọnrẹn ye rre, ọ na ya dia e Tob ya. Ikpia eso nẹi mwẹ iwinna keghi deba ẹre, iran na gha lele ẹre khian.

4 Ẹghẹ eso ghi gberra nẹ, Ivbi Amọn na suẹn gha gu Ivbi Izrẹl khọn. 5 Ivbi Amọn ghi suẹn gha gu Ivbi Izrẹl khọn, ediọn ni rre Giliẹd na zẹgiẹ gha rrie otọ e Tob, ne iran ya tie Jẹfta rre. 6 Iran na tama e Jẹfta wẹẹ: “Do gha re ọkaokuo ọghe ima, ne ima mieke na sẹtin gu Ivbi Amọn gbinna.” 7 Sokpan, e Jẹfta na tama ediọn ni rre Giliẹd wẹẹ: “Ẹ i re uwa ẹre ọ ghaa khẹko mwẹ, sẹrriọ wẹẹ, wa na khu mwẹ hin owa erha mwẹ rre? Vbọ ghi zẹ na na miẹn wẹẹ, ẹghẹ ne uwa ya rre uwu ọlọghọmwa, ẹre uwa ghi ya bu mwẹ gha dee?” 8 Ẹre ediọn ni ke Giliẹd rre na ghi tama e Jẹfta wẹẹ: “Ọni ẹre ọ si ẹre ne ima na bu ruẹ gha dee na. Deghẹ u na lele ima ya gu Ivbi Amọn khọn, u ghi do gha re ọkaolotu ọghe emwa hia ni rre Giliẹd.” 9 E Jẹfta na ghi tama ediọn ni ke Giliẹd rre wẹẹ: “Deghẹ uwa gele hoo ne I deba uwa ya gu Ivbi Amọn khọn, e Jehova na vbe viọ iran yọ mwẹ obọ, I gha gele gha re ọkaolotu ọghe uwa!” 10 Ediọn ni ke Giliẹd rre na tama e Jẹfta wẹẹ: “E Jehova ọre osẹ ọghe ima, ma gha ru vbene u khare.” 11 Ẹre Jẹfta na ghi lele ediọn ni ke Giliẹd rre. Iran na we nọ gha re ọkaolotu kevbe ọkaokuo ọghe iran. E Jẹfta keghi werriegbe ta emwi hia nọ ka ta; odaro e Jehova ẹre ọ na tae vbe Mizpa.

12 E Jẹfta na ghi gie emwa bu ọba ọghe Ivbi Amọn, ọ na we ne iran nọ rẹn wẹẹ: “Vbia ru ruẹ re?* Vbọzẹ ne u na mu okuo gha die ẹvbo mwẹ?” 13 Ẹre ọba ọghe Ivbi Amọn na tama emwa ne Jẹfta gie ẹre uhunmwu rre wẹẹ: “Te I rre do gu uwa khọn, rhunmwuda ne Ivbi Izrẹl na miẹn mwẹ otọ, vbe iran ladian vbe otọ Igipt, ke Ẹzẹ Anọn gha rrie Ẹzẹ e Jebọk, wa ya sẹ Ẹzẹ e Jọdan. Nian, wa mu otọ mwẹ mẹ, ne ọfunmwegbe mieke na gha rrọọ.” 14 Sokpan, e Jẹfta keghi werriegbe gie emwa uhunmwu bu ọba ọghe Ivbi Amọn, 15 ọ na we ne iran tama rẹn wẹẹ:

“Ọna ọre emwi ne Jẹfta khare: ‘Ivbi Izrẹl ma mu otọ ọghe Ivbi e Moab kevbe ọghe Ivbi Amọn; 16 vbe Ivbi Izrẹl ladian vbe otọ Igipt, iran keghi khian la uwu ato, wa ya sẹ Okun Nọ Baa, iran na do sẹ e Kedẹsh. 17 Ẹre Ivbi Izrẹl na ghi gie uhunmwu gie ọba ọghe Idọm, iran na tama rẹn wẹẹ: “Lahọ, gi ima la otọ ruẹ gberra,” sokpan, ọba ọghe Idọm ma kue. Iran na vbe gie uhunmwu gie ọba e Moab, sokpan, ọ ma vbe kue. Rhunmwuda ọni, Ivbi Izrẹl na ye gha rre Kedẹsh. 18 Vbe iran khian vbe uwu ato, iran ma la otọ ọghe Idọm kevbe otọ e Moab. Iran keghi la odẹ ekẹn* ọghe otọ e Moab, iran na ya bu agọ ye ikinkin ọghe Anọn; iran ma la otọ e Moab, rhunmwuda, Ẹzẹ Anọn ẹre ọ ghaa re uwu ọghe Moab.

19 “‘Iyeke ọni, Ivbi Izrẹl na gie emwa gie Saihọn ne ọba ọghe Ivbi Amọri, nọ ghaa khaevbisẹ vbe Hẹshbọn. Ivbi Izrẹl na tama rẹn wẹẹ: “Lahọ, gi ima la otọ ruẹ gberra gha rrie eke ne ima rrie.” 20 Sokpan, e Saihọn ma rẹn emwi ne Ivbi Izrẹl ghaa mwẹ vbe ekhọe, nọ si ẹre ne iran khian na do la otọ ọre gberra, rhunmwuda ọni, ọ na si emwa rẹn hia koko, iran na bu agọ ye Jehaz, iran na suẹn gha gu Ivbi Izrẹl khọn. 21 Ẹre Jehova ne Osa ọghe Izrẹl na mu e Saihọn kevbe emwa rẹn hia ye Ivbi Izrẹl obọ. Ivbi Izrẹl keghi khọnmiotọ yan iran, iran na ya otọ hia ne Ivbi Amọri ghaa ye vbe ikinkin nii, khian ọghe iran. 22 Erriọ ẹre iran ghi ya ya ikinkin ne otọ ọghe Ivbi Amọri ye khian ọghe iran, ke Anọn ya sẹ e Jebọk; ke ato ya sẹ e Jọdan.

23 “‘E Jehova ne Osa ọghe Izrẹl, ẹre ọ khulo Ivbi Amọri hin otọ na rre, rhunmwuda Ivbi Izrẹl ne emwa rẹn. Nian, wa ẹre ọ khian ghi do khulo iran ladian ra? 24 Ẹ i re otọ ne Kimọsh ne ẹbọ ọghe uwa rhirhi mu ne uwa, ẹre ọ khian gha re ọghe uwa ra? Rhunmwuda ọni, emwa hia ne Jehova khulo hin otọ ọghe iran rre, ẹre ima khian vbe khulo kua. 25 Wẹ maan sẹ e Belak ne ovbi e Zipọ, ne ọba e Moab ra? Ọ mwẹ ẹghẹ nọ ya gu Ivbi Izrẹl suan, ra nọ ya gu iran khọn ra? 26 Vbe ukpo iyisẹn vbe ihe eha (300) ne Ivbi Izrẹl ya gha rre Hẹshbọn kevbe avbe ẹvbo ni lẹga ẹre, kevbe Aroa kevbe avbe ẹvbo ni lẹga ẹre, kẹ kevbe avbe ẹvbo ni rre ọkpẹn Ẹzẹ Anọn, vbọzẹ ne uwa ma na hia, ne uwa miẹn iran re vbe ẹghẹ nii? 27 I ma ru khọọ ghee ruẹ, wẹ ẹre ọ rriabe ne u na mu okuo bu mwẹ gha dee. E Jehova ọre Ọbuohiẹn, ọ gha bu ohiẹn ne Ivbi Izrẹl kevbe Ivbi Amọn vbe ẹdẹnẹrẹ.’”

28 Sokpan, ọba ọghe Ivbi Amọn ma danmwehọ ẹmwẹ ne emwa ne Jẹfta gie rre tama rẹn.

29 Orhiọn e Jehova keghi hin yan e Jẹfta, ọ na la e Giliẹd kevbe Manasẹ gha rrie Mizpa nọ rre Giliẹd, ọ na vbe ke Mizpa nọ rre Giliẹd kpa, nọ ya gu Ivbi Amọn khọn.

30 Ẹre Jẹfta na ghi yan ma e Jehova wẹẹ: “Adeghẹ u na viọ Ivbi Amọn yọ mwẹ obọ, 31 ọmwaikọmwa nọ ladian vbe owa mwẹ do gbe ọbokhian mẹ, vbe I gha rre vbe egbe hẹnnẹdẹn,* vbe okuo ne I khian ya gu Ivbi Amọn khọn, ghi gha re ọghe Jehova, I ghi vbe ya ọmwa nii zọ ese na giẹn ruan.”*

32 Iyeke ọni, e Jẹfta na ya gu Ivbi Amọn khọn, e Jehova na viọ iran ye ọre obọ. 33 Ọ na gha gbele iran khian, ke Aroa gha rrie Minit, ya sẹ Ebẹl-kẹramim. Iran ni wulo i re avbiẹ; ẹvbo ugie (20) ẹre Jẹfta khọnmiotọ yan. Erriọ ẹre Ivbi Izrẹl ghi ya khọnmiotọ yan Ivbi Amọn.

34 Vbe okiekie, e Jẹfta na gha die owa ẹre vbe Mizpa, ọ ghi wa sẹ owa, ovbi ẹre nokhuo na bu ẹre gha dee, ọ na gha kpee ukusẹ, ọ na vbe gha gbe! Ovbi ẹre nokhuo na, ẹre ọ ghaa re ukpọmọkpa nọ mwẹ. Ọ ma gha mwẹ ọmọ ọvbehe, vbọ gberra ovbi ẹre nokhuo na. 35 E Jẹfta ghi wa miẹn ovbi ẹre nokhuo na, ọ na yanghan ukpọn ye egbe ẹre urhu, ọ na wẹẹ: “Eo, ovbi mwẹ! Ẹko hia wa rriara mwẹ, rhunmwuda, wẹ ọre ọmwa ne I khian ghi khu fua. I yan ma e Jehova nẹ, te ọ khẹke ne I mu eyan mwẹ sẹ.”

36 Sokpan, ọ na tama erhae wẹẹ: “E Baba, deghẹ u yan ma e Jehova nẹ, u ghi ru emwi ne u yan ma rẹn vbekpa mwẹ, ugbẹnvbe a miẹn wẹẹ, e Jehova rri Ivbi Amọn ne eghian ima oya ye emwi ne iran ru ima re nẹ.” 37 Ẹre ọ na ghi tama erhae wẹẹ: “I gha hoo ne u ru emwi ọkpa mẹ: Rhie uki eva mẹ, ne imẹ vbe avbe ọse mwẹ* gba gha rrie ehe ne avbe oke ye ne ima ya viẹ, rhunmwuda, I i khian ghi rọnmwẹ ọdọ,* I te ya wu.”

38 Erhae na ghi tama rẹn wẹẹ: “Gha khian!” Ẹre ọ na ghi rhie uki eva nẹẹn, irẹn vbe avbe ọsiọre na gha rrie ehe ne avbe oke ye, iran na ya gha viẹ, rhunmwuda, ẹ i khian ghi rọnmwẹ ọdọ, ọ te ya wu.* 39 Uki eva ghi gba nẹ, ọ na werriegbe bu erhae gha dee, iyeke ọni, erhae na ru emwi nọ yan ma Osanobua vbekpa ẹre. Ọ ma lovbiẹ ke okpia, ọ te ya wu. Ilele na ghi gha lele vbe otọ Izrẹl na khin: 40 Ukpukpo ẹre ivbialeke ni rre otọ Izrẹl ya gha mu otuẹ gie ovbi e Jẹfta* nokhuo, iran ghi ya gha rhie igiọdu nẹẹn.* Erriọ ẹre iran ghaa ru ẹre vbe ikpẹdẹ enẹ vbe ukpukpo.