Jɔlɛ Difuɛ Mun

19 Blɛ sɔ’n nun mɔ famiɛn nunman Izraɛli lɔ’n,+ Levifuɛ kun m’ɔ tran Efraimun okaoka lika’n+ i bue kun m’ɔ o mmua kpa’n nun’n, ɔ fali bla kun fa yoli i yi.* Bla sɔ’n tran Bɛtleɛmun+ m’ɔ o Zida lɔ’n su. 2 Sanngɛ i yi’n* kunndɛli bian i bo, kpɛkun bla’n jasoli i bo ɔli i si i awlo Bɛtleɛmun lɔ, Zida mɛn’n nun lɔ. Ɔ dili anglo nnan lɔ. 3 I sin’n, i wun’n ɔli i sin naan ɔ́ kó sé i kɛ ɔ sɛ i sin. Kɛ ɔ́ kɔ́’n, ɔ fɛli i sufuɛ yasua’n ɔ nin aflunmun nɲɔn. Bla’n fɛ i ɔli i si i awlo lɔ. Kɛ i si wunnin i’n, ɔ sɔli i nun klanman. 4 I sia’n, yɛle kɛ talua’n i si’n seli i kɛ ɔ kɛ i wun lɛ cɛn nsan. Ɔ maan be dili like, be nɔnnin nzan, yɛ ɔ lali be awlo lɛ kɔnguɛ.

5 I cɛn nnan’n su’n, kɛ be jasoli nglɛmun ndɛ kpa naan bé kɔ́’n, talua’n i si’n seli bian’n kɛ: “Di like kan naan ɲan wunmiɛn, ka naan amun a wɔ.” 6 Ɔ maan be trannin ase, be nɲɔn’n be dili like yɛ be nɔnnin nzan. Kɛ ɔ yoli sɔ’n, talua’n i si’n seli bian’n kɛ: “Yaci, la wa kɔnguɛ naan di aklunjɔɛ.” 7 Kɛ bian’n jasoli kɛ ɔ́ kɔ́’n, i sia’n kpɛtɛli i lele, ɔ maan ɔ lali lɛ kɔnguɛ ekun.

8 I cɛn nnun’n su’n, kɛ ɔ jasoli nglɛmun ndɛ kpa kɛ ɔ́ kɔ́’n, talua’n i si’n seli i kɛ: “Yaci, di like kan naan ɲan wunmiɛn.” Ɔ maan be sisili be bo lele nnɔsua, yɛ be nɲɔn’n be dili like. 9 Kɛ bian’n jasoli kɛ ɔ nin i yi nin i sufuɛ’n bé kɔ́’n, i sia’n, yɛle kɛ talua’n i si’n seli i kɛ: “Nian! Lika’n su wa san. Yaci, la wa kɔnguɛ. Wia’n w’a wie tɔ. La wa kɔnguɛ naan di aklunjɔɛ. Ainman’n a kwla jaso nglɛmun ndɛ kpa kɔ wɔ awlo.”* 10 Sanngɛ yasua’n kunndɛman kɛ ɔ́ lá lɛ kɔnguɛ uflɛ ekun. Ɔ maan ɔ jasoli, ɔ ɔli lele juli Zebisi, yɛle kɛ Zerizalɛmun.+ Kɛ ɔ́ kɔ́’n, ɔ fɛli i aflunmun nɲɔn mun nin be su trɔ mun, ɔ nin i yi’n,* nin i sufuɛ’n.

11 Kɛ bé jú Zebisi i wun lɛ’n, nn lika’n su san. Ɔ maan bian’n i sufuɛ’n seli i kɛ: “?Sɛ e jran Zebisifuɛ’m be klɔ’n su wa naan e la wa kɔnguɛ’n, ɔ timan kpa?” 12 Sanngɛ i min’n seli i kɛ: “Ɔ fataman kɛ e jran aofuɛ mɔ be timan Izraɛlifuɛ’n be klɔ’n su. Maan e wɔ lele e ju Gibea.”+ 13 I sin’n, ɔ seli i sufuɛ’n kɛ: “Bla maan e mian e ɲin naan e ju Gibea annzɛ Rama+ lɔ. É kó lá klɔ nɲɔn sɔ’m be nun kun su.” 14 Ɔ maan be ɔli. Kɛ wia’n wá tɔ́’n, be juli Gibea m’ɔ o Bɛnzamɛn lika’n nun lɔ’n i wun lɛ.

15 Be jrannin lɛ, kpɛkun be wluli Gibea klɔ’n nun lɔ naan bé lá. Kɛ be wluli klɔ’n nun’n, be ko trannin klɔ’n i gua’n su lɛ. Sanngɛ sran fi w’a faman be w’a ɔmɛn i awlo naan b’a ko la.+ 16 Kɔnguɛ sɔ’n nun’n, be o lɛ kpɛkun-ɔn, bian kpɛnngbɛn kun fin junman dilɛ fie su lɔ bali. Ɔ ti Efraimun okaoka lika’n nun lɔfuɛ,+ yɛ ɔ o Gibea lɛ w’a di le nɲɔn kun. Sanngɛ klɔ’n sufuɛ’m be ti Bɛnzamɛnfuɛ.+ 17 Kɛ bian kpɛnngbɛn’n kpɛli i ɲin m’ɔ wunnin bian ng’ɔ su tu ajalɛ’n klɔ’n i gua’n su lɛ’n, ɔ seli i kɛ: “?Nin yɛ a su kɔ-ɔ? ?Yɛ nin yɛ a fin-ɔn?” 18 Ɔ tɛli su kɛ: “E fin Bɛtleɛmun m’ɔ o Zida lɔ’n su, e su kɔ Efraimun okaoka lika’n i bue kun m’ɔ o mmua kpa’n nun, lɔ yɛ n fin-ɔn. N ɔli Bɛtleɛmun klɔ m’ɔ o Zida lɔ’n su,+ yɛ n su kɔ Zoova i sua’n nun lɔ.* Sanngɛ sran fi w’a faman min w’a wlumɛn i sua’n nun. 19 E le aliɛ kpanngban e man e aflunmun mun,+ yɛ e nin bla’n, ɔ nin min sufuɛ’n e le kpanwun+ nin duvɛn. Like fi mianman e sa.” 20 Yɛ bian kpɛnngbɛn’n seli kɛ: “Maan ɔ wun jɔ wɔ fɔuun! Ń má mán wɔ like kwlaa nga ɔ sa miɛn i wun’n. Nán la klɔ’n i gua’n su wa.” 21 Ɔ maan ɔ fali be ɔli i awlo lɔ, ɔ mannin aflunmun’m be aliɛ. I sin’n, be wunnzinnin be ja wun, kpɛkun be dili like yɛ be nɔnnin nzan.

22 Kɛ be o lɛ bé dí aklunjɔɛ’n, klɔ’n su finfinfuɛ wie’m be wa sin yiali sua’n, kpɛkun be boboli anuan’n kekle kpa. Be seli bian kpɛnngbɛn nga i liɛ yɛle sua’n kɛ: “Fa bian ng’ɔ bali ɔ sua’n nun wa’n fite naan e nin i e la.”+ 23 Kɛ ɔ yoli sɔ’n, sua’n i fuɛ’n fiteli ko seli be kɛ: “Min niaan mun, cɛcɛ, nán amun yo sa tɛ. Amun yaci, bian’n ti aofuɛ min sua’n nun. Nán amun yo tete sa nga. 24 Min wa bla m’ɔ nin-a siman bian’n, ɔ nin bian’n i yi’n* be o wa. Maan n ko fa be n fite. Sɛ amun klo’n, amun kwla yo be finfin.*+ Sanngɛ nán amun yo tete sa nga bian nga su.”

25 Sanngɛ sran sɔ’m b’a kplinman su. Ɔ maan bian’n trɛli i yi’n,*+ ɔ fɛ i fiteli ko mannin be. Be nin i lali kekle nun kɔnguɛ sɔ’n nun lele lika’n cɛnnin. Kɛ lika’n tili muaan’n, be seli i kɛ ɔ wɔ. 26 Nglɛmun ndɛ kpa’n, bla’n bali wa tɔli bian’n i sua’n i anuan’n nun lɛ, kan i min’n wo lɛ’n. Kpɛkun ɔ lali lɛ lele nglɛmun. 27 Kɛ i wun’n jasoli nglɛmun ndɛ kpa m’ɔ tikeli sua’n i anuan’n naan ɔ́ kɔ́’n, ɔ wunnin bla’n, ɔ wunnin i yi’n,* ɔ la sua’n i anuan’n nun lɛ, i sa’m be gua anuan’n i ɲrun lɛ. 28 Ɔ maan ɔ seli bla’n kɛ: “Jaso maan e wɔ.” Sanngɛ bliin! Yɛ bian’n fɛli i sieli i aflunmun’n su-ɔ, kpɛkun ɔ fɛli i awlo atin’n.

29 Kɛ ɔ juli i awlo lɔ’n, ɔ fali laliɛ,* kpɛkun ɔ trɛli i yi’n,* ɔ kpɛkpɛli i nun blu-nin-nɲɔn (12), yɛ ɔ fa ɔli Izraɛlifuɛ’m be kwlaa be lika’m be nun kunngunngun. 30 Be kwlaa nga be wunnin i’n be seli kɛ: “Kɛ ɔ fɛ i cɛn nga Izraɛlifuɛ’m be jasoli Ezipti mɛn’n nun lele mɔ w’a fa ju andɛ yɛ’n, sa kɛ nga sa nin-a juman le, yɛ e nin-a wunman wie le. Amun bu i akunndan, amun ti amun wun aniɛn,+ yɛ amun kle e like nga e ko yo’n.”