Jɔlɛ Difuɛ Mun
18 Blɛ sɔ’n nun’n, famiɛn nunman Izraɛli lɔ.+ Yɛ blɛ sɔ’n nun kusu’n, nn Dan akpasua’n nunfuɛ’m+ be su kunndɛ lika bé trán nun. Afin lele m’ɔ́ fá jú blɛ sɔ’n nun’n, be nin-a ɲanman aja like Izraɛli akpasua’m be afiɛn.+
2 Danfuɛ’m be sunmannin be awlo’n nun yasua nnun. Be fali Zora nin Ɛstaɔlu+ lɔ yasua kpakpa mun naan be ko kpla mɛn’n be nian, yɛ be niɛn i wafa ng’ɔ ti’n. Be seli be kɛ: “Amun ko niannian mɛn’n i wafa ng’ɔ ti’n.” Kɛ be ɔli Efraimun okaoka lika’n nun lɔ’n, mɔ be juli Mise i awlo lɔ’n,+ be lali lɛ kɔnguɛ. 3 Kɛ bé mántan Mise i awlo’n, be tili Levi gbanflɛn’n i nɛn’n.* Ɔ maan be ɔli i wun lɔ, kpɛkun be usɛli i kɛ: “?Wan yɛ ɔ fa wɔ bali wa-ɔ? ?Ngue like yɛ a su yo i lika nga nun wa-ɔ? ?Ngue ti yɛ a o wa-ɔ?” 4 Ɔ kannin like nga Mise yo mɛnnin i’n i ndɛ kleli be, kpɛkun ɔ seli be kɛ: “Ɔ fali min kɛ n yo i amuin’m be ɲrun jranfuɛ naan ɔ́ tánnin min kalɛ.”+ 5 Yɛ be seli i kɛ: “Yaci, usa Ɲanmiɛn i sa naan e nian, sɛ é nánti ye-o.” 6 Amuin ɲrun jranfuɛ’n seli kɛ: “Amun wɔ, nán srɛ kun amun. Zoova o amun sin.”
7 Ɔ maan yasua nnun sɔ’m be ɔli, be juli Laisi.+ Be wunnin kɛ lɔfuɛ’m be ti kɛ Sidɔnfuɛ mun sa, sran fi sieman be. Be tran fɔuun, be klun titiman be.+ Siefuɛ fi baman be mɛn’n nun naan w’a kle be yalɛ. Be nin Sidɔnfuɛ mun be afiɛn’n ti nun kpa, yɛ be nin sran uflɛ sanman nun.
8 Kɛ be sali be sin be niaan’m be wun Zora nin Ɛstaɔlu+ lɔ’n, be niaan’m be usali be kɛ: “?Lika’n ti sɛ?” 9 Be tɛli be su kɛ: “Maan e wɔ naan e nin be e ko kun, afin e wunnin kɛ mɛn’n ti kpa dan. ?Ngue ti yɛ amun sisi amun bo-ɔ? Amun wɔ ndɛndɛ be ko fa mɛn’n. 10 Kɛ amún wá jú lɔ’n, amún wá wún kɛ be ti nvle kun mɔ be klun titiman be-ɔ,+ yɛ mɛn’n cɛnnin kpa. Ɲanmiɛn w’a fa wla e sa nun. Like kwlaa ng’ɔ o asiɛ’n su’n i wie o lika sɔ’n nun lɔ.”+
11 Ɔ maan Dan akpasua’n su sran ya nsiɛn (600) mun, be nin be sa nun alɛ ninnge mun, be fɛli i Zora nin Ɛstaɔlu lɛ be ɔli.+ 12 Be ɔli ko boli nanmue Kiriati-Zearimun+ lɔ, Zida mɛn’n nun. I ti yɛ be tɔnnin lika sɔ m’ɔ o Kiriati-Zearimun i wia atɔliɛ lɔ’n i dunman kɛ Maane-Dan’n*+ niɔn. Andɛ nin andɛ’n, be te flɛ i sɔ. 13 Be fɛli i lɛ be ɔli Efraimun okaoka lika’n nun lɔ. Yɛ be juli Mise i awlo lɔ.+
14 Ɔ maan yasua nnun nga be ɔli Laisi mɛn’n i kpla nianlɛ’n+ be seli be niaan’m be kɛ: “?Amun si kɛ efɔdu nin awlo amuin mun,* nin amuin ba mɔ be sɛli’n, nin amuin mɔ be kloli like be fa yoli’n, be o sua nga’m be nun?+ Amun bu like nga amun ko yo’n i akunndan.” 15 Ɔ maan be jrannin lɛ, kpɛkun be ɔli Levi gbanflɛn’n+ i awlo lɔ, Mise i awlo’n i wun lɛ. Be usɛli i sɛ i wun ti kpa-o. 16 Kɛ ɔ́ yó sɔ’n, nn Dan yasua ya nsiɛn (600) mun+ be kwlaa be nin be sa nun alɛ kunlɛ ninnge mun, be jinjin anuan’n nun lɛ. 17 Yasua nnun nga be ɔli mɛn’n i kpla nianlɛ’n+ be wluli sua’n nun lɔ naan bé kó fá amuin ba mɔ be sɛli’n, nin efɔdu’n,+ nin awlo amuin mun,*+ nin amuin mɔ be kloli like be fa yoli’n.+ (Amuin ɲrun jranfuɛ’n+ nin yasua ya nsiɛn (600) mun, be nin be sa nun alɛ kunlɛ ninnge’m be jinjin anuan’n nun lɛ.) 18 Be wluli Mise i sua’n nun lɔ. Be fali amuin ba mɔ be sɛli’n, nin efɔdu’n, nin awlo amuin mun,* nin amuin mɔ be kloli like be fa yoli’n. Amuin ɲrun jranfuɛ’n seli be kɛ: “?Ngue yɛle nga amun su yo i lɛ’n?” 19 Be tɛli i su kɛ: “Muan ɔ nuan’n su. Nán kan ndɛ fi, su e su naan ko yo e si* nin e amuin’m be ɲrun jranfuɛ. ?Kɛ a ti sran kunngba+ i awlo’n nun amuin’m be ɲrun jranfuɛ’n, nin kɛ á kó yó Izraɛli lɔ akpasua kun annzɛ awlobo kun+ i amuin’m be ɲrun jranfuɛ’n, beninfuɛ’n yɛ ɔ ti kpa-ɔ?” 20 Ndɛ sɔ’n jɔli amuin ɲrun jranfuɛ’n i klun. Ɔ maan ɔ fali efɔdu’n nin awlo amuin mun* nin amuin mɔ be sɛli’n,+ kpɛkun ɔ nin be ɔli.
21 Kɛ bé kɔ́’n, be fali ba kanngan mun nin nnɛn mun, ɔ nin be ninnge kpakpa’m be dunnin mmua be ɲrun. 22 Kɛ be nin Mise i awlo’n be afiɛn’n tili nun kan’n, yasua nga be tran Mise i awlo’n i wun koko lɛ’n, be ti yiali kpɛkun be ɔli ko toli Danfuɛ mun atin nun. 23 Be kpan flɛli Danfuɛ mun. Yɛ Danfuɛ’m be kpɛli be ɲin be su lɔ, kpɛkun be usali Mise kɛ: “?Ngue sa-ɔ? ?Ngue ti yɛ amun kwlaa amun ba-ɔ?” 24 Ɔ tɛli be su kɛ: “Amun fali min amuin nga n yoli be’n. Yɛ amun fali min amuin’m be ɲrun jranfuɛ’n wie. N leman like fi kun. Kpɛkun amun usa min kɛ: ‘?Ngue sa-ɔ?’” 25 Danfuɛ’m be tɛli i su kɛ: “Nán kpan e su sɔ. Sɛ a yo sɔ’n, yasua wie mɔ b’a fa ya’n bé tɔ́ amun su. Ɔ maan be kwla kun wɔ nin ɔ awlofuɛ mun.” 26 Danfuɛ’m be fali be atin’n be ɔli. Kɛ Mise kusu wunnin kɛ be le wunmiɛn be trɛ i’n, ɔ sɛli i sin ɔli i awlo.
27 I sin’n, be fali amuin nga Mise yoli be’n, ɔ nin i amuin’m be ɲrun jranfuɛ’n, kpɛkun be ɔli Laisi.+ Lɔfuɛ’m be tran fɔuun yɛ be klun titiman be.+ Be fali tokofi kunnin be, yɛ be fali sin wɔli be klɔ’n nun. 28 Sran fi w’a deman klɔ’n. Afin be nin Sidɔn be afiɛn’n ti nun yɛ be nin sran uflɛ sanman nun, kpɛkun klɔ’n wo Bɛti-Reɔbu+ i kongo’n nun. I sin’n, be kplannin klɔ’n i uflɛ yɛ be trannin nun. 29 Asa ekun’n, be fali be si i dunman mɔ yɛle Dan’n+ be tɔnnin klɔ’n. Dan ti Izraɛli i wa.+ Sanngɛ laa’n, be flɛ klɔ’n kɛ Laisi.+ 30 I sin’n, Danfuɛ’m be takali amuin’n+ be fa yoli be bɔbɔ be liɛ. Kpɛkun Zonatan+ m’ɔ ti Gɛɛsɔmun i wa’n,+ mɔ i kusu ti Moizi i wa’n, ɔ nin i mma’m be yoli Danfuɛ’m be amuin’n i ɲrun jranfuɛ. Be yoli sɔ lele fa juli blɛ mɔ be trali nvlefuɛ mun ɔli nvle uflɛ nun’n. 31 Be takali amuin nga Mise sɛli’n. Blɛ kwlaa nga Ɲanmiɛn Kpli i sua’n dili i Silo lɔ’n nun’n, amuin sɔ’n kali lika sɔ’n nun lɛ.+