Massai Penting do di Hita Tobusan

1-2. Boasa ikkon adong na paluahon hita? (Rom 7:​22-24) (Ida gambar.)

BAYAKKON ma situasi on. Adong ma sada bangunan na maruppak jala adong sahalak bawa disi. Tarhapit ma ibana di akka batu ni bangunan i. Mangolu dope ibana alai dang boi ibana kaluar sian i. Na boi diulahon ibana, i ma holan mangido bantuan asa adong na paluahon ibana.

² Dos songon i ma situasitta. Tikki mangalo si Adam tu Jahowa gabe mardosa ma ibana. Ala pinopparna do hita gabe dohot ma hita sude mardosa. Akibatna, dos songon bawa na tarhapit di akka batu ni bangunan i do hita. Hira na tarhapit ma hita di bagasan dosa. Jala dos songon bawa i, ikkon adong do na mangurupi hita. Tikki dibahen Apostel Paulus suratna tu halak Kristen na di Rom, dipatorang ibana do songon dia keadaan ni jolma na mardosa. (Jaha Rom 7:​22-24.) Dihilala si Paulus hira na tarhapit do ibana di bagasan dosa warisan sian si Adam. Didok ibana, “Ise ma na boi paluahon au sian daging na parohon hamatean on?” (Rom 6:23) Jadi songon i ma tong situasitta. Ikkon adong do na paluahon hita sian dosa dohot hamatean.

3. Ala diparade Jahowa tobusan, aha ma manfaatna di hita?

³ Alai dipaboa si Paulus do tong adong do harapan di hita. Didok ibana do, “Ise ma na boi paluahon au sian daging na parohon hamatean on?” Dung i didok ibana, “Mauliate ma tu Debata na paluahon au marhite Jesus Kristus Tuanta!” (Rom 7:25) Na dimaksud si Paulus disi, i ma dipalua Jahowa do hita marhite tobusan ni Jesus.a Alani tobusan on gabe boi ma (1) diampuni Jahowa dosatta, (2) sempurna hita di tano na imbaru, jala (3) marale-ale hita dohot Jahowa. On ma na lao tabahas di artikel on. Jala molo tabahas on, gabe lam balga ma holongta tu Jahowa, “Debata na manjanjihon na denggan” tu hita. (Rom 15:13) Asing ni i, gabe lam taargai ma Jesus ala nungnga dipalua ibana hita “marhite tobusan”.—Kol. 1:14.

DIAMPUNI DOSATTA

4-5. Boasa massai tahaporluhon tobusan? (Parjamita 7:20)

⁴ Porlu do di hita tobusan asa adong dalan ni Jahowa lao mengampuni hita. Sude do hita hea mangulahon kesalahan manang dosa. (Jaha Parjamita 7:20.) Adong do dosa na balga, songon mangalakkup dohot mambunu. Di Patik ni si Musa, molo adong halak Israel na mangulahon i ikkon dihukum mate do ibana. (3 Mus. 20:10; 4 Mus. 35:​30, 31) Adong do tong na so termasuk dosa na balga. Misalna si Daud mandok, “Jagaokku do lakkakku asa unang mardosa au alani dilakku.” (Ps. 39:1) On patuduhon boi do hita gabe mardosa alani hata na tadokkon.—Jak. 3:2.

⁵ Rimangi ma on: Hea do manolsoli hamu ala didok hamu hata na mambahen haccit roha ni halak na asing? Manang hea do hamu mangulahon na sala? Pasti sude do hita hea sala di hata manang di parniulaon. Alana didok di Bibel, “Molo tadok, ‘Dang mardosa hita,’ na manipu diritta do hita disi jala dang adong hasittongan di bagasan diritta.”—1 Joh. 1:8.

6-7. Aha do na dibahen Jahowa asa adong dalan lao mengampuni akka dosatta? (Ida gambar.)

⁶ Ala tigor do Jahowa, dibahen Ibana ma dalan asa boi disesa dosatta. Tobusan ma na gabe dalan di Ibana lao mangulahon i. (Eps. 1:7) Memang ala adong tobusan, olo do Jahowa mengampuni hita. Alai dang na berarti gabe lomo-lomotta. Alana sogo do roha ni Jahowa molo taulahon dosa.—Jes. 59:2.

⁷ Mangihutton Patik ni si Musa, ikkon dilehon halak Israel do pelean binatang asa boi disesa dosa ni nasida. (3 Mus. 4:​27-31; 17:11) Akka pelean binatang i manggombarhon pelean na dumenggan, i ma tobusan ni Jesus na parohon godang pasu-pasu tu akka jolma. Ala dilehon Jesus ngoluna gabe tobusan, gabe adong ma dalan di Jahowa lao mengampuni akka dosatta. Tikki dibahen si Paulus surat tu halak Kristen na di Korint, dipaboa ibana do manfaat ni tobusan tu hita jolma. Dung dipaboa ibana akka pangalaho ni nasida na so denggan najolo, didok ibana ma, “Nungnga dipaias be hamu saonari, dipabadia, jala didok mangulahon na sittong di bagasan goar ni Tuan Jesus Kristus dohot marhite tondi parbadia.”—1 Kor. 6:​9-11.

8. Aha do na porlu tarimangi andorang so ro tu Borngin Parningotan?

⁸ Andorang so ro tu Borngin Parningotan, rimangi ma manfaat pengampunan ni Jahowa tu hamu. Misalna, ala adong tobusan gabe dang sai merasa bersalah be hamu alani kesalahanmuna di tikki naung salpu. Alai boha do molo sai merasa bersalah dope hamu? Ra didok rohamuna, ‘Huboto do olo Jahowa mengampuni au, alai dang boi dope humaappon dirikku.’ Molo songon i perasaanmuna, ingot ma on: Jahowa do na marhak lao mengampuni hita jala Anakna do na dipillit lao mangadili hita. Dang dilehon tugas on tu hamu manang tu halak na asing. Didok di Bibel, “Molo mardalan hita di hatiuron songon [Jahowa] na di bagasan hatiuron, . . . ias ma hita sian sude dosa dibahen mudar ni Jesus, Anakna i.” (1 Joh. 1:​6, 7) Pos ma rohatta sittong do na didok Bibel i, songon akka ajaran na asing naung taparsiajari. Ala adong tobusan, gabe adong ma dalan ni Jahowa lao mengampuni hita. Jala didok di Bibel, ‘Rade do Jahowa manalpuhon hasalaan.’—Ps. 86:5.

GABE SEMPURNA HITA

9. Di Bibel, aha do lapatan ni hata dosa? (Psalmen 51:5)

⁹ Di Bibel hata “dosa” lapatanna dang holan akka ulaon na sala na taulahon, alai termasuk do i dosa warisan. (Jaha Psalmen 51:5.) Ala nungnga mardosa hita, sipata gabe tubu do pikkiran na sala jala taulahon na sala. Alai dang holan i, gabe sega do tong pamatangta, gabe marsahit hita, matua, jala mate. I do alana akka poso-poso pe boi do gabe marsahit bahkan mate, nang pe dang diulahon ibana na sala. Dosa i ma na mambahen sude jolma marsitaonon jala mate, dang soal burju manang jahat nasida. Jadi ala pinoppar ni si Adam do hita, gabe songon i ma situasi ni ngolutta.

10. Aha do pengaruh ni dosa i tu si Adam dohot si Hawa?

¹⁰ Dosa mambahen dang tabo perasaan ni si Adam dohot si Hawa. Boasa? Dung mardosa nasida, pittor targanggu do panggora ni roha ni nasida. (Rom 2:15) Disadari nasida do nungnga sala be nasida. Alani i ma ditutupi nasida gotting ni nasida jala martabuni sian Debata. (1 Mus. 3:​7, 8) I ma parjolo sahali dihilala si Adam dohot si Hawa perasaan bersalah, marsak, maila, jala mabiar. Songon i ma torus dihilala nasida sahat tu na mate nasida.—1 Mus. 3:​16-19.

11. Aha do pengaruh ni dosa i tu hita?

¹¹ Songon si Adam dohot si Hawa, ala nungnga mardosa hita sipata merasa bersalah do hita, maila, jala marsak. Alai dang holan i, gabe sega do tong pamatangta. Manang songon dia pe tabahen lao padenggatton situasitta pasti sai adong do masalahta. Boasa? Alana didok di Bibel, sude do hita dibahen ‘tunduk tu hangoluan na so marguna’. (Rom 8:20) Jala dang holan hita na makkilala i, dohot do sude jolma. Pikkirhon ma upaya na dibahen pamaretta lao padenggatton lingkungan, mambahen asa unang adong kejahatan, mangurupi na pogos, jala mambahen dame portibi on. Manang songon dia pe upaya ni nasida, marisuang do i sude. Alai ala adong tobusan gabe adong ma harapan di hita. Harapan aha ma i?

12. Ala adong tobusan, harapan aha do na dilehon tu hita?

¹² Ala adong tobusan gabe adong ma harapanta. Didok di Bibel, “Na lao dipalua do sude toppaan ni Debata asa unang gabe hatoban ni dosa dohot hamatean be nasida.” (Rom 8:21) Lapatanna dung gabe sempurna hita di Paradeiso, dang marsahit be hita jala dang marsak. Dang adong be perasaan bersalah, maila, manang holsoan. Asing ni i mamaretta ma Jesus, naung manobus hita jala ibana do “Pamimpin ni Hadameon”. Diurupi ibana ma hita lao mangatasi akka masalah na so boi diatasi jolma saonari.—Jes. 9:​6, 7.

13. Aha do muse na porlu tarimangi andorang so ro tu Borngin Parningotan?

¹³ Pikkirhon ma songon dia ngolumuna haduan molo nungnga gabe sempurna hamu. Tiap ari disi dungo hamu, dang marsak jala dang mabiar be hamu dohot akka halak na dihaholongi hamu gabe kelaparan, marsahit, manang mate. Bahkan saonari pe, boi do dame dihilala hamu molo ‘pos rohamuna tu akka janji ni Debata. Songon jangkar ni kapal do janji i di ngolumuna, na mambahen hamu togu jala marpos ni roha’. (Heb. 6:​18, 19) Dos songon jangkar na mambahen hot sada kapal, harapanmuna pe boi do mambahen togu haporseaonmuna jala mangurupi hamu mangadopi sitaononmuna saonari. Jadi pos ma rohamuna, ‘lehonon ni Jahowa do upa tu halak na marsitutu mangalului Ibana’. (Heb. 11:6) Jala ingot ma boi pe dihilala hamu dame ni roha saonari jala adong harapanmuna, ala adong do tobusan.

DENGGAN MUSE HUBUNGATTA TU JAHOWA

14. Dung mardosa si Adam dohot si Hawa, gabe songon dia do hubungan ni jolma dohot Jahowa?

¹⁴ Dung mardosa si Adam dohot si Hawa, dang boi be jolma marale-ale dohot Debata. Bahkan didok di Bibel, gabe musu ni Debata do hita. (Rom 8:​7, 8; Kol. 1:21) Boasa? Alana sempurna do Jahowa jala sogo do rohana mangida dosa. Songon on ma didok Bibel taringot Jahowa, “Dang tahan Ho mangida ulaon na jahat, jala dang tarpaida-ida Ho masa hajahaton.” (Hab. 1:13) Gabe sega manang putus ma hubungan ni jolma dohot Jahowa alani dosa. Jadi, ikkon adong do dalan asa boi marale-ale muse hita dohot Jahowa. Tobusan ma na gabe dalan asa denggan muse hubungatta tu Jahowa.

15. Ala adong tobusan, gabe songon dia do hubunganta tu Jahowa?

¹⁵ Didok di Bibel, Jesus do na gabe “pelean pardamean tu akka dosatta”. (1 Joh. 2:2) Aha do lapatan ni i? Ala dilehon Jesus ngoluna gabe tobusan, gabe adong ma dalan di Debata lao marale-ale muse dohot jolma. (Rom 3:​23-26) Bahkan akka naposo ni Debata na mangolu andorang so ro Kristus, dianggap Jahowa do nasida halak na sittong. (1 Mus. 15:​1, 6) Boasa? Alana pos do roha ni Jahowa pasti dilehon Jesus do ngoluna gabe tobusan. (Jes. 46:10) Jadi tobusan ma na mambahen boi mardame muse jolma dohot Debata.

16. Aha dope na porlu tarimangi andorang so ro tu Borngin Parningotan? (Ida gambar.)

¹⁶ Rimangi ma aha manfaatna di hamu ala boi marale-ale dohot Jahowa. Misalna, boi dijou hamu Jahowa i “Bapak” songon na diajarhon Jesus. (Mat. 6:9) Jala boi do tong dijou hamu Ibana “Ale-ale”. Tikki dijou hamu Ibana “Bapak” manang “Ale-ale”, ikkon sangap do dibahen hamu Ibana. Jala ikkon dipatudu hamu do serep ni roha. Boasa? Alana mardosa dope hita, jala sasittongna dang tama hita marale-ale dohot Ibana. Taingot ma, boi pe hita marale-ale dohot Jahowa ala adong do tobusan. Dibahen Jahowa do mardame “saluhut na di tano on dohot na di banua ginjang tu [Ibana], i ma marhite mudar ni [Jesus] na durus di hau partinaonan”. (Kol. 1:​19, 20) Jadi mandok mauliate do hita ala boi marale-ale dohot Jahowa nang pe mardosa dope hita.

TARIDA DO ASI NI ROHA NI JAHOWA SIAN TOBUSAN

17. Sian tobusan, aha do na taboto taringot asi ni roha ni Jahowa? (Epesus 2:​4, 5)

¹⁷ Tikki mangalo si Adam dohot si Hawa tu Jahowa, didok roha ni Sibolis nungnga marhasil ibana mambahen dang saut sakkap ni Jahowa. Alai dang tutu i. Boasa? Alana diparade Jahowa do tobusan. Sian tobusan taboto ma, ‘massai balga do asi ni roha ni Jahowa’. “Dipangolu [Ibana] ma hita . . . nang pe naung mate hita alani dosatta.” (Jaha Epesus 2:​4, 5.) Saonari, adong dope akka halak “na marpangalaho na denggan na mambahen nasida tama mandapot hangoluan saleleng ni lelengna”. Sadar do nasida molo situasi ni nasida songon halak na tarhapit di akka batu ni bangunan, na porlu diurupi asa boi selamat. (Ul. 13:48) Halak sisongon i ma na diurupi Jahowa saonari asa mamboto barita na uli taringot Harajaonna. Hasilna gabe ditanda nasida ma Jahowa dohot Jesus, Anakna.—Joh. 17:3.

18. Tikki tarimangi taringot tobusan, aha do na porlu taingot?

¹⁸ Tikki tarimangi taringot tobusan, porlu do taingot aha do na mambahen Jahowa paradehon tobusan i. Dilehon Jahowa pe tobusan dang holan lao paluahon hita, alai adong do tujuan na uppetting sian i. Ala adong tobusan, gabe boi ma dialusi Jahowa tuduhan ni Sibolis tikki di Taman Eden najolo. (1 Mus. 3:​1-5, 15) Marhite tobusan, dipabadia Jahowa ma goarna jala dibuktihon Ibana ma sala do tuduhan ni Sibolis taringot Ibana. Asing ni i, dipalua do hita sian dosa dohot hamatean. On patuduhon Debata parholong do Jahowa i. Tarida do muse na massai balga asi ni rohana tu hita. Buktina nang pe mardosa dope hita, dilehon do kesempatan tu hita boi mambuktihon na sala do tuduhan ni Sibolis i. (Poda 27:11) Jadi songon dia do caratta patuduhon na taargai tobusan? Tabahas ma i di artikel na mangihut.