Urupan ni Jahowa do Hamu Mangatasi Perasaan Negatif

1-2. Aha do sipata na dihilala Apostel Paulus, jala boasa boi tadok sarupa situasitta songon ibana? (Rom 7:​21-24)

MOLO didok taringot Apostel Paulus, aha do na ro tu pikkiranmuna? Ra, didok hamu do si Paulus i parbarita na uli na semangat, godang do bukku di Bibel na disurat ibana, jala malo do ibana mangajari. Tutu do i. Togu do haporseaon ni si Paulus jala barani do ibana. Nang pe songon i, sipata lungun do rohana jala marsak. Alai, berjuang do ibana lao mangadopi i. Hita pe pasti hea do songon i.

² Jaha Rom 7:​21-24. Tikki dibahen ibana surat tu halak Kristen na di Rom, dipaboa si Paulus do songon dia perasaanna. Olo do ra sarupa perasaanta songon na dihilala ibana. Setia do ibana tu Jahowa jala lomo do rohana asa torus mangoloi Jahowa. Alai ala dang sempurna dope, dang sai mura di ibana lao mangalo keinginan na sala. Asing ni i, olo do sipata merasa bersalah si Paulus alani akka pambahenanna najolo. Jala sipata lungun do rohana alani akka sitaonon na diadopi ibana.

3. Aha do na lao tabahas di artikel on? (Ida “Hata na Dipatorang”.)

³ Nang pe songon i, dang dipasombu si Paulus perasaan negatifa i torus manusai pikkiranna. Di artikel on, lao tabahas ma sukkun-sukkun on: Aha do na mambahen marsak si Paulus? Songon dia do ibana mangatasi perasaanna i? Jala aha do na ikkon taulahon asa boi mangatasi perasaan sisongon i?

NA MAMBAHEN MARSAK ROHA NI SI PAULUS

4. Aha do sipata na mambahen lungun roha ni si Paulus?

⁴ Akka pambahenanna najolo. Andorang so gabe halak Kristen si Paulus, godang do hajahaton na diulahon ibana. Misalna setuju do ibana asa dipamate si Stepanus, jala dohot do ibana mangida i. (Ul. 7:58; 8:1) Asing ni i, ibana do na menganiaya akka halak Kristen di tikki i jala kejam do ibana tu nasida.—Ul. 8:3; 26:​9-11.

5. Boha do perasaan ni si Paulus molo diingot ibana pambahenanna na uju i?

⁵ Di pudian ni ari, gabe halak Kristen do si Paulus. Alai molo diingot ibana akka pambahenanna na uju i, gabe marsak ma ibana. Ai kejam do ibana tu halak Kristen jala gabe merasa bersalah ma ibana. Sian dia taboto? Misalna di taon 55 M, dibahen si Paulus ma suratna na parjolo tu huria na di Korint. Didok ibana disi, “Dang tama au didok apostel, ai hea do hubahen na haccit tu huria ni Debata.” (1 Kor. 15:9) Hira-hira lima taon dukkon i, dibahen ibana ma surat tu huria na di Epesus. Di suratna i, didokkon ibana do dirina “na ummetmet sian sude akka na badia”. (Eps. 3:8) Dung i tikki dibahen ibana surat tu si Timoteus, didokkon si Paulus do ‘ginjang rohana najolo, dileai ibana do Debata, jala dilelei akka naposona’. (1 Tim. 1:13) Bayakkon ma perasaanna tikki ro ibana manjuppangi akka huria jala pajuppang dohot halak na hea dianiaya ibana manang keluarga ni nasida.

6. Aha do muse na mambahen marsak roha ni si Paulus? (Ida surat na di toru.)

⁶ Suga di bagasan dagingna. Didok si Paulus, haccit hian do ditaon ibana. Dipatudos ibana ma sitaononna i songon ‘suga na masuk tu bagasan dagingna’. (2 Kor. 12:7) Memang dang dipaboa si Paulus aha sitaonon na diadopi ibana. Alai sian hatana i, olo do ra maksudna taringot sahitna, arsak ni rohana, manang akka sitaononna na asing.b

7. Boasa dang sai mura di si Paulus mangulahon na denggan? (Rom 7:​18, 19)

⁷ Hagaleonna. Berjuang do si Paulus mangalo hagaleonna. (Jaha Rom 7:​18, 19.) Memang lomo do rohana mangulahon na denggan. Alai sipata na so denggan do na diulahon ibana. Didok ibana, hira na marporang do ibana mangalo keinginan na sala jala berjuang lao mangulahon akka na denggan. (1 Kor. 9:27) Bayakkon ma songon dia perasaan ni si Paulus tikki gagal ibana mangulahon na denggan. Pasti lungun hian do rohana.

NA DIULAHON SI PAULUS LAO MANGATASI PERASAAN NEGATIF

8. Akka aha do na diulahon si Paulus lao mangatasi hagaleonna?

⁸ Diboto si Paulus do hagaleonna. Dilului ibana do nasehat sian Bibel jala berupaya do ibana mangatasi hagaleonna i. Sian dia taboto? Songon na didok si Paulus di suratna, boi do tondi parbadia ni Debata mangurupi sude halak Kristen mangalo keinginan na sala jala patuduhon akka sifat na denggan. (Rom 8:13; Gal. 5:​16, 17) Jala jotjot do dipaboa ibana akka keinginan dohot pangalaho na songon dia na ikkon dibolokkon halak Kristen. (Gal. 5:​19-21, 26) Boi pe didok si Paulus songon i, ala nungnga adong do pengalamanna mangulahon sudena i.

9-10. Aha do na mangurupi si Paulus tikki metmet rohana? (Epesus 1:7) (Ida gambar.)

⁹ Nang pe sipata lungun roha ni si Paulus, sai adong do na mambahen ibana marlas ni roha. Misalna, las do rohana mambege akka laporan na denggan sian huria na hea dijuppangi ibana. (2 Kor. 7:​6, 7) Asing ni i, las do rohana marale-ale dohot akka dongan. (2 Tim. 1:4) Las hian do roha ni si Paulus ala massai jonok hubunganna tu Jahowa jala ala ‘ias panggora ni rohana’ di jolo ni Jahowa. (2 Tim. 1:3) Bahkan tikki dipenjarahon pe ibana di Rom, dijujui si Paulus do akka dongan di tikki i asa ‘marlas ni roha alani Tuhan’. (Plp. 4:4) Jadi tikki tajaha surat ni si Paulus, taboto ma dang holan sitaononna manang kesalahanna na sai dipikkiri ibana. Tikki ro pikkiran na negatif i, pittor dirimangi ibana do akka na denggan na mambahen las rohana.

¹⁰ Aha do muse na mambahen marlas ni roha si Paulus? Ala diingot ibana tobusan. Tobusan i ma bukti na massai holong roha ni Jahowa tu ibana. (Gal. 2:20; jaha Epesus 1:7.) Ala diingot ibana i, gabe pos ma rohana olo do Jahowa mengampuni ibana marhite Jesus Kristus. (Rom 7:​24, 25) Sudena on mambahen las rohana “marhobas” tu Jahowa.—Heb. 9:​12-14.

11. Aha do manfaatna molo tarimangi pengalaman ni si Paulus?

¹¹ Songon si Paulus, hita pe ikkon sai berjuang do asa unang mamikkirhon, mandok, manang mangulahon na dihasogohon roha ni Jahowa. Olo do ra sipata tadokkon di rohatta, ‘Tung jolma na dangol do au.’ Taida ma pengalaman ni donganta borua na margoar si Elizac na marumur 20-an. Didok ibana, “Tikki huparsiajari taringot si Paulus, gabe dipatogu do rohakku. Alana gabe huboto ma dang holan au hape na ikkon berjuang. Jala gabe pos ma rohakku, diboto Jahowa do aha na diadopi naposona.” Jadi songon si Paulus nang pe sipata lungun rohatta, boi do toktong marlas ni roha hita jala tabahen las roha ni Jahowa. Alai aha ma na ikkon taulahon?

NA IKKON TAULAHON LAO MANGATASI PERASAAN NEGATIF

12. Aha do na ikkon taulahon asa boi mangatasi perasaan negatif?

¹² Taratur ma mangulahon akka ulaon na mambahen lam jonok hita tu Jahowa. Pikkirhon ma on: Molo taallang sipanganon na bergizi, taratur hita olahraga, jala cukkup modom, pasti gabe lam sehat do hita. Dos songon i ma, molo tajaha Bibel ganup ari, marbarita hita, mambahen persiapan tu parpunguan, ro marpungu, jala markomentar, pasti gabe lam dipatogu do rohatta. Molo taulahon on, gabe diurupi ma hita asa mamikkirhon akka na positif jala lam tamba ma las ni rohatta.—Rom 12:​11, 12.

13-14. Aha do manfaatna di piga-piga donganta ala diulahon nasida ulaon partondion?

¹³ Taparrohahon ma pengalaman ni donganta na margoar si John. Hona kanker do ibana tikki marumur 39 taon, jala adong anakna na marumur tolu taon dope. Di mulana, marsak hian do dihilala ibana jala mabiar. Sai didok ibana do, ‘Poso dope au, alai boasa ma nga hona kanker au?’ Aha do na mangurupi ibana asa unang sai lungun rohana? Didok si John, “Nang pe loja hian huhilala, alai sai ro do hami marpungu, marbarita, jala dibahen hami do ibadat keluarganami ganup minggu. Taratur do hami mangulahon sudena i, nang pe maol situasinami.” Didok si John muse, “Dung diboto hami na hona kanker au, lungun hian do rohanami. Alai pos do rohakku, pasti lehonon ni Jahowa do gogo na dihaporluhon hami. Jala dipapos do rohanami na holong do rohana tu hami. Jadi hamu pe, pos ma rohamuna pasti urupan ni Jahowa do hamu songon naung dibahen Ibana tu au.”

¹⁴ Si Eliza na dipaboa nakkin mandok, “Tikki marpungu au jala hubahen pelajaran pribadi, gabe pos ma rohakku ditangihon Jahowa do au jala holong do rohana tu au. Gabe marlas ni roha ma au.” Si Nolan, sahalak pengawas wilayah di Afrika dohot istrina si Diane mandok, “Tikki metmet rohanami, diupayahon hami do asa toktong martangiang, marsiajar Bibel, marpungu, jala marbarita. Sai diurupi Jahowa do hami asa unang torus metmet rohanami. Diboto hami do pasti urupan ni Jahowa do hami jala pasu-pasuonna. Memang dang diboto hami dope songon dia cara ni Ibana mangurupi hami. Alai pos rohanami, pasti diurupi do hami.”

15. Aha do muse na ikkon taulahon asa unang torus lungun rohatta? Bahen ma tudosan.

¹⁵ Asa unang torus lungun rohatta, adong do muse na ikkon taulahon. Songon on ma tudosanna: Bayakkon ma haccit tanggurungmuna. Asa unang haccit be dihilala hamu, dang cukkup holan didappol-dappol. Adong do na ikkon diulahon hamu. Aha ma i? Ikkon diboto hamu do boasa haccit tanggurungmuna i, jala ikkon lao do hamu marubat tu dokter. Dos songon i ma hita. Asa unang torus lungun rohatta, porlu do tabahen riset sian Bibel dohot akka publikasitta. Bahkan porlu do hita makkatai tu akka dongan na togu haporseaonna. Saonari, tabahas ma akka aha do muse na boi mangurupi hita.

16. Aha do na ikkon diulahon hamu asa diboto hamu boccir ni arsak ni rohamuna? (Psalmen 139:​1-4, 23, 24)

¹⁶ Martangiang ma mangido bantuan ni Jahowa. Pos do roha ni Raja Daud takkas do ditanda Jahowa ibana. Jadi dipangido si Daud ma tu Jahowa asa diurupi ibana mamboto boasa sai ‘marsak rohana’. (Jaha Psalmen 139:​1-4, 23, 24.) Hamu pe boi do songon i. Pangido ma tu Jahowa asa diurupi hamu mamboto aha boccirna umbahen na sai marsak hamu jala songon dia carana mangatasi perasaanmuna i. Asing ni i, boi do dirimangi hamu sukkun-sukkun on: ‘Aha do boccirna umbahen na sai marsak au? Molo marsak au, berupaya do au mamikkirhon akka na positif manang holan arsak ni rohakki do na sai hupikkiri?’

17. Topik aha do na porlu diparsiajari hamu asa boi dipikkirhon hamu akka na positif? (Ida gambar.)

¹⁷ Parsiajari ma akka topik na cocok tu situasimuna. Godang do manfaatna molo taparsiajari taringot akka sifat ni Jahowa. I ma na dihilala Apostel Paulus. Dirimangi ibana do taringot tobusan dohot cara ni Jahowa mengampuni ibana. Ala dirimangi ibana i, gabe pos ma rohana na holong do roha ni Jahowa tu ibana. Hamu pe boi do mangulahon i. Misalna, manfaatton ma Tudu-Tudu na Dipakke Saksi Jahowa Lao Marsiajar, Akka Ayat na Mangurupi Halak Kristen, manang akka alat bantu marsiajar na adong di bahasamuna. Parsiajari ma taringot asi ni roha ni Debata, pengampunanna, dohot holongna na manoktong i. Molo nungnga dapotmuna piga-piga artikel na cocok tu situasimuna, bahen ma daftar ni akka artikel i. Tempelhon ma i di inganan na mura diida hamu. Molo marsak muse rohamuna, parsiajari ma akka artikel i jala ulahon ma i.—Plp. 4:8.

18. Akka topik taringot aha do na diparsiajari piga-piga donganta?

¹⁸ Si Eliza na dipaboa nakkin, diparsiajari ibana do taringot si Job. Didok ibana, “Godang do sitaonon na huadopi. Jadi huparsiajari ma taringot si Job. Godang do sitaonon na diadopi ibana jala lungun hian do rohana. Alai nang pe dang diboto ibana boasa marsitaonon ibana, sai dipangido ibana do bantuan ni Jahowa.” (Job 42:​1-6) Si Diane na dipaboa nakkin mandok, “Diparsiajari hami do taringot akka sifat ni Jahowa sian bukku Mendekatlah kepada Yehuwa. Las hian do rohanami mamboto na diurupi Jahowa do hami lao maniru akka sifatna. Memang sipata lungun do rohanami alani akka kesalahan na dibahen hami. Alai diingot hami ma sai rade do Jahowa mangajari jala mangurupi hami asa lam denggan pangalahonami. On mambahen gabe lam jonok hubungannami tu Ibana.”—Jes. 64:8.

PASTI URUPAN NI JAHOWA DO HAMU

19. Sipata songon dia do perasaanta, alai aha do na porlu taingot?

¹⁹ Nang pe taulahon akka parsiajaran di artikel on, olo do sipata lungun muse rohatta. Bahkan olo do ra tahilala marsak hian rohatta. Alai taingot ma molo diurupi Jahowa hita, boi do hita marhasil mangatasi perasaan sisongon i. Pos ma rohatta unggodang do las ni roha na tahilala ala marale-ale dohot Jahowa jala ala taboto las rohana mangida hita.

20. Aha do na gabe tekadta?

²⁰ Memang lungun do rohatta tikki adong sitaonon na taadopi, jala marsak do tahilala alani hagaleotta manang alani kesalahan na hea tabahen. Alai unang ma tapasombu sudena i mambahen mago las ni rohatta. Molo lungun rohatta, boi do urupan ni Jahowa hita asa dame tahilala. (Ps. 143:10) Jala tarpaima do hita boi mangolu di tano na imbaru. Alana annon sude isi ni pikkiranta mambahen las rohatta. Bayakkon ma tiap pagi tikki dungo hita, dang adong be na mambahen marsak rohatta. Jala marlas ni roha ma torus hita manomba Jahowa Debatanta.