Sahalak bawa na poso jongjong sian kursi jala mulai marlojong

SUKKUN-SUKKUN NI AKKA NA POSO

Boha do Carana asa Lomo Rohakku Olahraga?

Boasa porlu au olahraga?

Godang do saonari akka na poso na jarang olahraga. Molo jarang olahraga, boi do i mambahen nasida gabe marsahit. Hape didok di Bibel, adong do “guna ni mangalatik daging”. (1 Timoteus 4:8) Pikkirhon ma piga-piga manfaatna:

Olahraga boi do mambahen lam denggan perasaanmu. Tikki olahraga ho, gabe lam godang ma hormon endorfin di dagingmu. Hormon endorfin, i ma zat di otak na boi mambahen las roha jala tenang. Adong na mandok molo olahraga i songon ubat na boi pamagohon stres.

“Molo lari pagi au, gabe semangat do au makkarejohon akka karejokku di bagasan sadari i. Jala gabe las do rohakku mangulahon akka ulaonku. Dung sae lari pagi, gabe lam denggan do perasaanku.”—Si Regina.
Olahraga boi do mambahen lam bagak penampilanmu. Molo ringgas ho olahraga, gabe lam sehat do ho jala denggan penampilanmu. Gabe percaya diri ma ho.

“Sataon na salpu, dang sanggup au mangulahon gerakan ‘pull-up’. Alai saonari boi do huulahon i sappe sappulu hali! Las hian do rohakku. Alai na uppetting, las do rohakku ala parduli au tu kesehatanku.”—Si Olivia.
Olahraga boi do mambahen lam ganjang umurmu. Olahraga denggan do tu kesehatan ni jantung dohot sistem pernapasan. Latihan aerobik boi do mambahen hamu asa terhindar sian penyakit jantung koroner. Jantung koroner ma sada sahit na mambahen jolma jotjot mate.

“Molo taratur hita olahraga, on patuduhon na taargai do dagingta na dilehon Jahowa tu hita.”—Si Jessica.

Intina: Marguna do olahraga tu kesehatanmu di masa depan. Alai sian saonari pe, gabe puas do dihilala ho molo olahraga ho. Didok sahalak borua na margoar si Tonya, sipata dilului ibana do alasan asa unang olahraga. Alai molo torus diupayahon ibana asa olahraga, dang disolsoli ibana i jala puas do dihilala.

Sahalak bawa na poso mangida mesin ni mobilna na jarang diservis — Boi do gabe sega mobil molo dang diservis. Sarupa songon i ma dagingta molo dang olahraga

Aha do na mambahen au dang olahraga?

Ra on ma piga-piga alasanna:

Ala merasa dang porlu. “Molo poso dope hita, didok rohatta sehat do hita. Jadi maol do tahilala mambayakkon molo marsahit hita. Didok rohatta holan halak naung matua do na marsahit.”—Si Sophia.
Ala dang adong tikki lao mangulahon i. “Sibuk hian do au. Holan lao boi mangallang sipanganon na bergizi jala asa unang hurang modom pe, ikkon berupaya do au mangatur tikkikku. Apalagi ma olahraga, dang adong tikkikku tusi.”—Si Clarissa.
Ala dang dohot gabe anggota di tempat fitness. “Asa boi tetap sehat, ikkon godang do habis hepengta. Alana dang gratis molo naeng olahraga di tempat fitness!”—Si Gina.

Pikkirhon ma on:

Aha do na mambahen ho gabe dang olahraga? Memang, ikkon berupaya do hita asa olahraga, alai dang marisuang molo taulahon i.

Boha do carana asa lomo rohakku olahraga?

Adong piga-piga tips na boi mangurupi ho:

Serius ma pikkirhon taringot kesehatanmu.—Galatia 6:5.
Unang ma marsidalian. (Parjamita 11:4) Misalna, didok roham ikkon dohot do ho gabe anggota di tempat fitness asa boi olahraga. Hape sebenarna, godang do olahraga na boi diulahon ho, dang pola ikkon tu fitness. Pillit ma sada olahraga na dihalomohon roham, jala taratur ma ho mangulahon i.
Molo bingung ho olahraga aha na lao dipillit ho, boi do disukkun ho donganmu olahraga aha na diihutton nasida.—Poda 20:18.
Bahen ma jadwal olahraga. Bahen ma target jala surat ma aha kemajuan naung dibahen ho asa lam semangat ho mangulahon i.—Poda 21:5.
Lului ma donganmu lao rap olahraga. Boi do donganmi mambahen ho semangat jala paingotton ho tu jadwal naung dibahen ho.—Parjamita 4:9, 10.
Unang ma gabe kecewa ho jala menyerah molo dang boi ho olahraga sesuai tu jadwal manang target naung dibahen ho.—Poda 24:10.

Unang paksahon dirim

Dipaingot Bibel do hita asa ‘boi mangarajai diritta’. (1 Timoteus 3:2, 11) Boi do tong tapakke nasehat i tikki olahraga. Molo dipaksahon sasahalak dirina tikki olahraga, olo do dang songon na diharappon ibana hasilna. Sahalak anak boru na margoar si Julia mandok, “Molo adong bawa na lebih menonjol ototna sian otakna, dang tertarik au mangida i.”

Jala ikkon manat do ho molo adong hata manang gambar na boi mambahen ho asa mangulahon na so tolap ulahononmu. Molo diihutton ho i, olo do gabe dang denggan i tu dagingmu, jala boi do ho gabe lupa tu “dia na urrikkot”.—Pilippi 1:10.

Asing ni i, hata manang gambar na seharusna mambahen ho semangat, boi do gabe mambahen metmet roham. Sahalak anak boru na margoar si Vera mandok, “Godang do anak boru na manippan gambar ni halak na gabe idola ni nasida. Dipakke nasida do akka gambar i lao mambahen nasida asa semangat olahraga. Alai ujungna, dibandingkon nasida do diri ni nasida tu gambar i. Ala dang sesuai tu na di gambar i, gabe putus asa ma nasida. Jadi, tumagon do hita olahraga lao manjaga kesehatanta, dang penampilanta.”

Na didok akka donganmu

“Lomo do rohakku olahraga lari. Tikki lari au, gabe moru do arsak ni rohakku. Jala olahraga lari mambahen gabe sehat jantung jala membakar godang kalori. Dung sae au lari, gabe lam semangat ma au jala merasa puas.”—Si Yasmine.

“Lomo hian do rohakku marbasket. Molo marbasket au, dang loja huhilala. Memang porlu do tikki asa boi lam jago jala tanikmati tikki olahraga. Alai, dang lao marisuang upayatta i.”—Si Joel.

“Lomo hian do rohakku mendaki gunung. Dang holan mambahen lam sehat dagingku, alai dohot do tong pikkiranku. Songon na dihilala godang halak, au pe olo do khawatir. Alai tikki lao au tu alam terbuka, gabe lam tenang do pikkiranku jala lam bersemangat do au. Maol do makkilala las ni roha sisongon i di portibi na sursar on.”—Si Lily.

“Godang do alasan na mambahen hita malas olahraga. Alai molo i do torus na tapikkirhon, gabe hira na borat hian do tahilala olahraga i. Jadi tikki marbasket au, tu permainan i do au fokus dang tu lojana. Jala gabe godang do donganku ala marbasket.”—Si Miles.