Boha do Carana asa Unang Torus Au Mamikkirhon Taringot Seks?

“Olo do toppu ro tu pikkiranku taringot seks. Molo nga ro pikkiran sisongon i, dang boi i hupaso. Hira adong do halak na asing na mengendalihon pikkiranku.”—Si Vera.

“Dang boi hukendalihon pikkiranku molo taringot seks. Sarupa ma i songon jolma na so mungkin boi habang.”—Si John.

Songon si Vera manang si John do perasaanmu? Molo ido, cocok do artikel on tu ho.

• Boasa dang boi hamu torus mamikkirhon taringot seks?

• Boasa dang mura mengendalihon pikkiranmu?

• Na boi diulahon hamu

• Na didok akka donganmu

Boasa dang boi hamu torus mamikkirhon taringot seks?

Sahalak doli-doli na margoar si Alex mandok, “Didok tulangku, tikki ditoppa Debata jolma, dibahen do tu roha ni jolma asa lomo roha ni nasida mangulahon seks. Jadi pasti lomo do roha ni Debata molo huulahon seks.”

Memang songon na didok tulang ni si Alex, ditoppa Debata do hita dohot keinginan lao mangulahon seks, jala adong do tujuan ni i. Ala mangulahon seks, gabe boi ma jolma marpinoppari. Gabe toktong ma adong jolma di tano on sahat tu saonari. Alai, boasa dang boi torus dipikkirhon ho taringot seks? Adong dua alasanna:

• Didok di Bibel, holan bawa dohot borua naung menikah do na boi mangulahon seks dohot pasanganna.—1 Musa 1:28; 2:24.

  Jadi molo torus dipikkirhon ho taringot seks, gabe susa do ho alana dang boi dope ho mangulahon seks. Akibatna, olo do targoda ho naeng mangalo paretta ni Debata jala ujungna gabe mangulahon seks. Godang do na poso na mangulahon i na gabe manolsoli tindakanna.

• Molo dang torus dipikkirhon ho taringot seks, gabe tarlatik ma ho patuduhon sifat na penting, i ma mangarajai diri.—1 Korint 9:25.

Massai penting do sifat on tu parngoluonmu saonari sahat tu na dewasa ho annon. Menurut sada penelitian, biasana dao do ussehat dakdanak na boi mangarajai dirina, boi mangatur parhepengonna, jala unduk tu hukum ni pamaretta.a

Boasa dang mura mengendalihon pikkiranmu?

Jotjot do akka halak di portibi on mamikkirhon taringot seks. Dang holan i, hormon di dagingmu pe boi do mambahen ho gabe maol mambolokkon pikkiran sisongon i.

“Sude acara di TV patuduhon dang sala jala dang berbahaya mangulahon seks sebelum menikah. Akibatna, gabe holan taringot seks na so patut ma na tapikkiri.”—Si Ruth.

“Ala jotjot akka dongan sakarejokku makkatai taringot seks, gabe penasaran do au. Lam leleng, gabe dang terganggu be hati nuranikku mambege pakkataion sisongon i.”—Si Nicole.

“Tikki mangida media sosial, olo do targoda hita naeng mangida gambar ni halak na seksi penampilanna. Holan sahali pe i taida, maol do i tabolokkon sian pikkiranta!”—Si Maria.

Gabe sarupa do ra perasaanmuna songon Apostel Paulus na mandok, “Tikki naeng huulahon na sittong, sai na jahat i do na adong di au.”—Rom 7:21.

Na boi diulahon hamu

Na asing ma pikkirhon. Molo ro tu pikkiranmu taringot seks, olahraga ma ho manang ulahon ma hobim dohot kegiatan na asing na boi mambahen ho mamikkirhon akka na denggan. Sahalak remaja na margoar si Valerie mandok, “Lomo do rohakku manjaha Bibel. Gabe fokus ma au tu akka na boi patoguhon hubungakku tu Jahowa. Gabe dang sanga au mamikkirhon akka na so marguna.”

Memang, olo do toppu ro tu pikkiranmu taringot seks. Alai boi do dipillit ho, naeng torus i dipikkirhon ho manang dibolokkon ho.

“Molo mulai au mamikkirhon taringot seks, hupaksa do dirikku asa mamikkirhon na asing. Asing ni i, hucoba do mangalului aha na mambahen au gabe mamikkirhon taringot seks. Ra, adong do lagu manang gambar na ikkon huhapus.”—Si Helena.

Prinsip ni Bibel: “Toktong ma pikkirhon hamu akka . . . na hombar tu lomo ni roha ni Debata, na badia.”—Pilippi 4:8.

Pillit ma dongan na burju. Molo mardongan ho dohot halak na jotjot makkatai taringot seks, gabe mura ma ro tu pikkiranmu taringot seks.

“Tikki remaja au, sala do au mamillit dongan. Akibatna gabe lomo do rohakku mamikkirhon na so denggan. Molo didok akka donganta dang sala mangulahon seks na so patut, gabe lam maol ma hita mambolokkon keinginan na sala. Sarupa ma i songon maniram bensin tu api.”—Si Sarah.

Prinsip ni Bibel: “Gabe marbisuk do manang ise na mardongan tu halak na marbisuk, alai gabe marjea do manang ise pe na mardongan tu halak na oto.”—Poda 13:20.

Pasiding ma hiburan na patuduhon seks na so patut. Sude do mamboto godangan hiburan saonari patuduhon seks na so patut. Didok si Nicole, “Lomo hian do rohakku mambege musik. Alai i ma na gabe masalahna. Musik na hubege boi do mambahen au maol mengendalihon keinginan na sala.”

“Ala jotjot au manonton film dohot acara TV na patuduhon seks na so patut, gabe jotjot ma au mamikkirhon taringot seks. Jadi dung hupaso manonton acara sisongon i, gabe lam denggan ma pikkiranku. Molo manat hita mamillit hiburan, gabe lam mura ma hita mambolokkon pikkiran na so denggan.”—Si Joanne.

Prinsip ni Bibel: “Unang ma hea dihatai hamu taringot tu seks na so patut, akka ulaon na ramun, dohot hahisapon.”—Epesus 5:3.

Intina: Piga-piga halak mandok molo adong keinginanta lao mangulahon seks, unang pola ditahan-tahan i. Alai didok do di Bibel, boi do jolma mengendalihon keinginanna. Pasti las hian do roha ni Debata molo boi takendalihon diritta.

Prinsip ni Bibel: “Naeng ma dipaimbaru roha dohot pikkiranmuna.”—Epesus 4:23.