Boha do Carana asa Marbisuk Au Mamakke Hepeng?

“Baru-baru on, lao ma au tu sada toko. Rencanakku holan naeng mamereng-mereng do. Alai ujungna gabe hutuhor do barang na arga, hape dang adong hian rencanakku naeng manuhor i!”—Si Colin.

Didok si Colin jotjot do dang marbisuk ibana mamakke hepeng. Songon i do tong ho? Molo ido, cocok do artikel on tu ho.

• Boasa ikkon marbisuk au mamakke hepeng?

• Songon dia carana?

• Na didok akka donganmu

Boasa ikkon marbisuk au mamakke hepeng?

Na didok halak: Molo sai dipikkirhon ho taringot hepeng na lao sipakkeonmu, gabe dang bebas ho manuhor manang aha pe na dihalomohon ho.

Na sasittongna: Molo marbisuk ho mamakke hepengmu, justru godang do annon na boi diulahon ho mamakke hepeng i. Sada bukku na marjudul I’m Broke! The Money Handbook mandok, “Molo diboto ho songon dia cara na denggan mamakke hepeng, gabe boi ma dituhor ho barang na dihalomohon roham saonari dohot di ari na naeng ro.”

Pikkirhon ma on: Molo marbisuk ho mamakke hepeng . . .

• Gabe adong ma tabunganmu. Sahalak remaja na margoar si Inez mandok, “Sada tikki annon lomo rohakku naeng mardalani tu Amerika Selatan. Jadi tikki manabung, hupikkirhon do aha tujuanku mangulahon i.”

• Gabe otik ma (dang adong) utangmu. Didok di Bibel, “Gabe hatoban ni halak na mangalehon pinjaman do halak na marutang.” (Poda 22:7) Sahalak anak boru na margoar si Anna setuju do tu na didok ayat on. Didok ibana, “Boi do gabe susa ngolum molo marutang. Alai molo dang adong utangmu, gabe boi ma ho berfokus tu cita-citam.”

• Gabe boi ma dipatudu ho naung dewasa ho. Halak na marbisuk mamakke hepeng boi do marhasil molo dung dewasa. Si Jean na marumur 20 taon mandok, “Penting hian do asa marbisuk mamakke hepeng. Alana molo sian saonari marbisuk au mamakke hepeng, marlaba do i annon molo hidup mandiri au. On ma na torus huupayahon mulai sian saonari.”

Intina: Bukku The Complete Guide to Personal Finance: For Teenagers and College Students mandok, “Marsiajar carana asa marbisuk mamakke hepeng, i ma langkah na parjolo asa boi hidup mandiri. Sada keterampilan do denggan mamakke hepeng, jala marguna do i di ngolum.”

Songon dia carana?

Pikkirhon ma aha na biasana mambahen habis hepengmu. Molo jotjot habis hepengmu, pikkirhon ma tudia do dipakke ho hepengmi. Adong do piga-piga halak na gabe habis hepengna ala jotjot belanja online. Adong do muse na jotjot manuhor barang na mura, ujungna gabe habis ma hepengna di akhir bulan.

“Otik-otik do memang au belanja, alai tiap ari. Hulehon do hadiah tu piga-piga halak, hutuhor kopi, jala hutuhor akka barang na diskon. Dung akhir bulan husadari ma, nga habis hape hepengku marratus dolar!”—Si Hailey.

Bahen ma batas sadia godang hepeng na lao dipakke ho. Didok di Bibel, “Sai na saut do sakkap ni halak na ringgas.” (Poda 21:5) Molo nungnga ditottuhon ho ikkon sadia godang pengeluaranmu, gabe dang unggodang pengeluaranmu sian pemasukan.

“Molo unggodang pengeluaranta sian pemasukan, ikkon tapareso do tudia do tapakke hepeng i. Dung i, unang ma tatuhor akka na so tahaporluhon. Ikkon tabahen do batas sadia godang pengeluaranta.”—Si Danielle.

Ihutton ma akka saran on. Adong do piga-piga cara na boi diulahon ho asa boi diatur ho sadia pengeluaranmu, jala dang manuhor akka barang na so dihaporluhon ho. Adong do piga-piga na poso naung mamboto songon dia carana mangatur pengeluaran ni nasida:

• “Biasana, pittor hupamasuk do sude hepengku tu bank. Alani i, gabe dang targoda au naeng belanja.”—Si David.

• “Molo lao au belanja tu sada toko, pas-pasan do hepeng na huboan. Alani i, gabe dang hutuhor akka barang na so pola porlu.”—Si Ellen.

• “Molo adong barang na huhalomohon, dang pittor hutuhor i, alai jolo denggan do hupikkirhon. Lam leleng au mamikkirhon i, gabe huboto ma huhaporluhon do barang i manang na dang.”—Si Jesiah.

• “Molo dang adong hepengku, dang lao au tu acara ramah tamah.”—Si Jennifer.

Intina: Tanggung jawab na serius do mangatur parhepengon. Si Colin na dipaboa nakkin ujungna gabe mamboto na massai penting do mangatur parhepengon. Didok ibana, “Molo gabe kepala keluarga au haduan, dang boi au boros! Molo sian lajang au dang boi denggan mangatur parhepengon, gabe masalah do i haduan molo dung menikah au.”