TIKKI NAEK ARGA NI SITUHORON

Manat ma Mangatur Parhepengon

Molo naek arga ni situhoron pasti susa do hita. Alai unang ma mandele hamu. Alana adong dope na boi diulahon hamu asa dang lam susa situasimuna.

BOASA IKKON MANAT MANGATUR PARHEPENGON

Boi do gabe tamba masalah jala gabe lam marsak hamu molo dang marbisuk hamu mangatur parhepengonmuna. Nang pe otik penghasilanmuna, adong do piga-piga na boi diulahon hamu lao mangatur hepengmuna i.

NA BOI DIULAHON HAMU

Unang ma umbalga pengeluaran sian penghasilan. Molo dibahen hamu songon i boi ma gabe tenang perasaanmuna. Jala boi ma dipapulik hamu hepengmuna lao gabe biaya na so tarduga.

Asa boi diulahon hamu i, bahen ma catatan. Surat ma sadia godang penghasilanmuna. Surat ma akka aha do kebutuhanmuna jala sadia godang hepeng lao manuhor kebutuhanmuna i. Dung i pareso ma muse catatan kebutuhanmuna i lao mangida memang holan kebutuhan do disi manang na daong. Jala berupaya ma hamu mangihutton catatan naung dibahen hamu. Molo muba arga ni situhoron manang muba godang ni penghasilanmuna, bahen ma penyesuaian tu catatan kebutuhanmuna i. Molo nungnga menikah hamu, jolo hatai ma i dohot pasanganmuna.

Coba ma on: Tikki manuhor barang hamu molo boi unang ma mangkredit. Jala molo boi pakke uang tunai ma hamu manuhor i, unang pakke kartu manang pembayaran digital. Piga-piga halak mandok, ala dipakke nasida cara on gabe ummura ma nasida mangatur hepengna jala gabe dang marutang nasida. Bahen ma muse tikkimuna lao mamareso bukku rekeningmuna manang lao mambahen catatan pengeluaranmuna. Alana molo taboto sadia nai sisa ni hepengta, gabe boi ma taboto sadia nai hepeng na boi tapakke.

Sipata memang maol do mangorom diri. Alai godang do manfaatna molo nungnga tarencanahon hian tudia hepengta lao tapakke. Gabe dang pamarsakhu be hita alani hepeng.

“Mangetong sadia godang hepeng na lao sipakaluaron.”—Lukas 14:28.

Partahatton ma karejomuna. Asa boi hamu mampartahatton karejomuna, on ma piga-piga na boi diulahon hamu: Unang tarlambat, unang marungut-ungut, rade ma mangurupi, ringgas ma karejo, argai ma dongan sakarejomuna, ihutton ma aturan, jala berupaya ma hamu asa lam malo mangulahon karejomuna.

Unang ma mamakke hepeng tu akka na so porlu. Sukkun ma tu dirimuna, ‘Jotjot do au mamakke hepengku tu akka na so porlu manang tu akka na so denggan?’ Misalna, godang do halak na pasudahon hepengna lao manuhor narkoba, marjuji, marisap, manang mabuk. Hape hasomalan on boi do mambahen nasida marsahit manang gabe dipakaluar sian karejona.

“Marlas ni roha ma halak na dapotan bisuk . . . Dumenggan do mandapot i sian mandapot perak.”—Poda 3:13, 14.

Bahen ma biaya na so tarduga. Molo boi papulik ma deba penghasilanmuna lao gabe biaya na so tarduga. Boi do annon pakkeonmuna i tikki marsahit hamu manang keluargamuna, molo dipakaluar hamu sian karejomuna, manang molo masa kejadian na so tarduga.

“Boi do masa tu [hita] sude akka na so diharappon di tikki na so panagaman.”—Parjamita 9:11.

Asa Boi Menabung

Mangaloppa sandiri.

Ummarga do manuhor sipanganon sian apala mangaloppa sandiri. Memang porlu do tikki jala loja do molo mangaloppa sandiri. Alai lobi hemat jala lebih terjamin do i.

Manat ma tikki balanja.

Bahen ma daftar barang na lao situhoronmuna, jala ihutton ma i. Molo dang adong di daftar i, unang ma tuhor hamu.
Molo sae do hepengmuna, pittor godang ma hamu manuhor na lao situhoronmuna. Biasana ummura do molo manuhor godang. Alai pastihon ma adong ingananmuna manippan i asa unang sega.
Molo boi tuhor ma merek na mura, alai na denggan dope mutuna.
Molo belanja online hita, boi do hatop hita mambandingkon arga ni sada barang. Jala boi ma taboto sadia godang hepeng na lao tabalanjahon. Jadi molo adong do aplikasi belanja online di daerahmuna, coba ma pakke hamu i.
Molo adong, tuhor ma barang na diskon. Molo naeng manuhor sada barang hamu bandingkon ma argana, biaya listrikna, dohot biaya perawatanna.

Jolo marpikkir ma sebelum manggatti barangmuna.

Sai dibahen perusahaan handphone dohot perusahaan elektronik do model na terbaru asa godang uttungna. Jadi sebelum digatti hamu barangmuna, pikkirhon ma, ‘Aha do manfaatna molo hugatti barangkon tu model na terbaru? Memang ikkon saonari do gattion? Molo tung pe ikkon hugatti barangkon, ikkon model na terbaru do gattina?’

Padenggan jala pakke ma barang satonga pakke.

Denggan ma rawat barangmuna asa boi leleng i dipakke hamu. Molo sega barangmuna, padenggan ma i molo mura dope biayana. Boi do muse dituhor hamu barang na satonga pakke manang na seken.

Coba ma manuan-nuan.

Molo boi suan ma akka sayur dohot suan-suanan na asing na boi diallang hamu. Boi do muse i digadis hamu manang dilehon hamu tu halak na asing.

“Sai na saut do sakkap ni halak na ringgas.”—Poda 21:5.

“Jotjot do dipareso hami arga ni kebutuhannami siganup ari. Jala manat do hami tikki mamakke kartu kredit.”—Si Miles, Inggris.

“Sebelum balanja hami, jolo disurat hami do akka aha na lao dituhor hami.”—Si Jeremy, Amerika Serikat.

“Sebelum dituhor hami sada barang, jolo dipastihon hami do memang sanggup do hami manuhor i manang na dang. Jala disippan hami do deba hepengnami lao gabe biaya na so tarduga.”—Si Yael, Israel.

“Diajari hami do gellengnami padenggatton barang na sega daripada manuhor na baru. Termasuk ma i padenggatton mobil dohot akka barang na adong di jabunami. Jala dang olo au dohot istrikku manuhor barang model na terbaru.”—Si Jeffrey, Amerika Serikat.

“Ala husuan do akka sayur jala marmanuk au, gabe boi ma moru pengeluaranku. Boi do muse hulehon deba sayur na husuan i tu halak na asing.”—Si Hono, Myanmar.

Sahalak bawa na mambuat akka sayur sian ladangna.