Dung dipahehe Jesus, dipataridahon ibana do dirina tu si Tomas dohot tu akka siseanna na asing. Di tikki i, adong do bekas lukka na marlubang di tanganna

Mardaging Jolma Dope Jesus Dung Dipahehe?

Na didok Bibel

Dipaboa do di Bibel, dang mardaging jolma be Jesus dukkon dipahehe. Alai “dipahehe lao mangolu di banua ginjang”.—1 Petrus 3:18; Ulaon ni Apostel 13:34; 1 Korint 15:45; 2 Korint 5:16.

Jesus sandiri pe mandok, dang mardaging jolma be ibana tikki dipahehe. Alana didok ibana do, lao lehononna do “ngoluna lao manobus godang jolma”. (Johannes 6:51; Mateus 20:28) Molo mardaging jolma do Jesus dung dipahehe, dang marlakku be tobusan i. Alai dang songon i na terjadi. Alana songon na didok di Bibel, dipelehon Jesus do daging dohot mudarna “sahali ro di saleleng ni lelengna”.—Heber 9:11, 12.

Molo dang mardaging jolma be Jesus boasa ma boi diida akka siseanna ibana?

Akka suru-suruan boi do manguba dirina gabe jolma. Contohna, akka suru-suruan na manguba dirina i boi mangan jala minum rap dohot jolma. (1 Musa 18:1-8; 19:1-3) Alai nang pe songon i, tetap do suru-suruan nasida jala boi mulak tu surgo.—Panguhum 13:15-21.
Dos songon akka suru-suruan i, boi do Jesus manguba dirina gabe jolma. Alani i dung dipahehe Jesus, diuba ibana do dirina satokkin gabe jolma. Jala boi do Jesus toppu tarida jala toppu mago sian jolo ni akka halak. (Lukas 24:31; Johannes 20:19, 26) Alai tikki dipataridahon Jesus dirina piga-piga hali, dang sai sarupa rupana. Jadi boi pe ditanda akka donganna Jesus, sian aha na dihatahon dohot aha na diulahon ibana do.—Lukas 24:30, 31, 35; Johannes 20:14-16; 21:6, 7.
Tikki pataridahon dirina tu si Tomas, diuba Jesus ma dirina gabe halak na adong bekas lukka di dagingna. Dibahen Jesus pe songon i asa porsea do si Tomas naung dipahehe Jesus.—Johannes 20:24-29.