Songon Dia do Carakku Mamboto Dia Agama na Sittong?
Na didok Bibel
Dipaboa Bibel do songon dia carana asa boi taboto dia agama na sittong. Bibel mandok, “Na lao tandaonmuna ma nasida sian pangalahona. Ai hea huroa adong halak na mamutik parbue ni anggur dohot parbue ni hau ara sian ramba na marsuga?” (Mateus 7:16, surat na di toru) Boi do tabedahon dia pohon anggur jala dia ramba na marsuga sian parbuena. Agama pe songon i do. Boi do tabedahon agama na sittong dohot agama na so sittong sian pengikutna. On ma piga-piga ciri-cirina.
Agama na sittong mangajarhon hasittongan sian Bibel dang sian hata ni jolma. (Johannes 4:24; 17:17) Termasuk ma on hasittongan taringot aha na masa tu halak naung mate, dohot janji ni Debata taringot hangoluan salelengna di tano on. (Psalmen 37:29; Jesaya 35:5, 6; Hesekiel 18:4) Jala barani do agama na sittong paboahon na sala do na diajarhon godang agama saonari.—Mateus 15:9; 23:27, 28.
Agama na sittong mangurupi akka halak mananda Debata, termasuk ma on mangajarhon goar ni Jahowa. (Psalmen 83:18; Jesaya 42:8; Johannes 17:3, 6) Jala dang diajarhon agama na sittong molo Debata i dang parduli tu jolma. Gariada, diajarhon agama na sittong do na lomo roha ni Debata asa jonok hita tu Ibana.—Jakobus 4:8.
Agama na sittong mangajarhon, holan marhite Jesus Kristus do Debata paluahon jolma. (Ulaon ni Apostel 4:10, 12) Asing ni i, diihutton agama na sittong do paretta ni Jesus jala berupaya do nasida lao maniru ibana.—Johannes 13:15; 15:14.
Agama na sittong mangajarhon, holan Harajaon ni Debata do na boi paluahon sude jolma. Jala semangat do akka pengikutna paboahon taringot Harajaon i tu halak na asing.—Mateus 10:7; 24:14.
Agama na sittong manjujui pengikutna patuduhon holong sian ias ni roha. (Johannes 13:35) Agama na sittong manjujui akka pengikutna asa mangargai sude halak nang pe berbeda suku, budaya, bahasa, dohot latar belakang ni nasida. (Ulaon ni Apostel 10:34, 35) Jala ala holong roha ni nasida tu sude jolma, dang olo nasida marporang.—Mika 4:3; 1 Johannes 3:11, 12.
Dang adong pamimpin ni agama na sittong na digaji, jala dang adong gelar keagamaan na dilehon tu manang ise pe.—Mateus 23:8-12; 1 Petrus 5:2, 3.
Agama na sittong dang mendukung politik. (Johannes 17:16; 18:36) Nang pe songon i, akka pengikutna tetap do mangargai jala unduk tu peraturan ni pamaretta. Sesuai do on tu na didok di Bibel, “Lehon ma tu Kesar appuna ni Kesar, jala tu Debata appuna ni Debata.”—Markus 12:17; Rom 13:1, 2.
Diihutton pengikut ni agama na sittong do paretta ni Debata di ngolu ni nasida. Alai dang dianggap nasida i holan kewajiban. (Epesus 5:3-5; 1 Johannes 3:18) Dang terpaksa nasida mangulahon i. Gariada las do roha ni nasida manomba “Debata na marlas ni roha”.—1 Timoteus 1:11.
Dao do ummotik pengikut ni agama na sittong sian pengikut ni agama na asing. (Mateus 7:13, 14) Jotjot do nasida dileai, direhei, jala dianiaya ala mangulahon paretta ni Debata.—Mateus 5:10-12.
Unang ma taanggap sittong sada agama holan ala lomo rohatta tu agama i
Berbahaya do molo tapillit sada agama, holan ala lomo rohatta tu agama i. Didok do di Bibel, na lao adong do tikkina akka halak mamillit agama na holan mangajarhon ajaran na “tabo begeon”. (2 Timoteus 4:3) Alai dijujui Bibel do hita asa mamillit “agama na so ramun jala na ias di jolo ni Debata”, nang pe godang halak na so makkalomohon agama i.—Jakobus 1:27; Johannes 15:18, 19.