Aha do Babel na Balga i?

Na didok Bibel

Di bukku Pangungkapon, adong dipaboa taringot “sahalak borua” na gabe “boru-boru na so hasea”. Goar ni borua on, i ma “Babel na Balga”, jala sada rahasia do goarna i. (Pangungkapon 17:1, 3, 5) Boru-borua on manggombarhon akka agama na so sittong na adong di liat portibi on. Jala “dipillit nasida do makkaporseai gabus sian apala makkaporseai hasittongan taringot tu Debata”.a (Rom 1:25) Nang pe dang sarupa sude ajaran ni nasida, alai sude agama on mambahen akka jolma gabe dao sian Debata na sittong, i ma Jahowa.—5 Musa 4:35.

Na didok Bibel taringot Babel na Balga

1. Sada lambang do Babel na Balga i. Godang do hatorangan na bahen di bukku Pangungkapon mamakke “akka lambang”. (Pangungkapon 1:1) Jadi boi tasimpulhon molo Babel na Balga i dang tutu sahalak borua, holan lambang do i. Didok do muse molo borua i “hundul di atas ni aek na godang”. Akka aek na godang i, manggombarhon “akka bangso, akka jolma, dohot bahasa”. (Pangungkapon 17:1, 15) Dang mungkin boi sahalak borua mangulahon i.

2. Sada organisasi internasional do Babel na Balga i. Digoari do muse Babel na Balga i “kota na balga na mangarajai akka raja na di tano on”. (Pangungkapon 17:18) Jadi, balga do pengaruh ni Babel na Balga on tu sude liat portibi on.

3. Organisasi agama do Babel na Balga on, dang organisasi politik manang perdagangan. Najolo, adong sada kota na margoar Babel na terkenal ala godang halak di kota i na mamakke ‘ilmu sihir’ dohot ‘jampi-jampi’. (Jesaya 47:1, 12, 13; Jeremia 50:1, 2, 38) Ringgas do akka halak di kota i beribadat, alai ibadat ni nasida dang sesuai tu na dihalomohon Debata Jahowa. (1 Musa 10:8, 9; 11:2-4, 8) Ginjang do roha ni akka parhuaso na di Babel. Dianggap nasida do na untimbo nasida sian Jahowa jala dang dipasangap nasida ibadat na sittong. (Jesaya 14:4, 13, 14; Daniel 5:2-4, 23) Sarupa songon kota Babel najolo, dipakke Babel na Balga do “ilmu gaib”. On patuduhon, organisasi agama do Babel na Balga i.—Pangungkapon 18:23.

   Dang mungkin organisasi politik manang organisasi perdagangan Babel na Balga i. Alana didok di Bibel, tangis do “akka raja na di tano on” tikki dihancurhon Babel na Balga. (Pangungkapon 17:1, 2; 18:9) Jala didok do muse di Bibel, molo Babel na Balga i berbeda sian “akka partiga-tiga na di tano on”.—Pangungkapon 18:11, 15.



Photograph taken by courtesy of the British Museum

4. Babel na Balga manggombarhon agama na so sittong. Agama na so sittong mambahen akka halak manomba debata na asing, dang manomba Jahowa. Didok do di Bibel, molo agama na so sittong i ‘dang setia tu Debata songon boru-boru na so hasea’. (3 Musa 20:6, surat na di toru; 2 Musa 34:15, 16) Porsea do akka halak na tinggal di kota Babel najolo tu ajaran Tritunggal dohot tondi na so boi mate. Dipakke nasida do tong akka patung di ibadat ni nasida. Sahat tu saonari pe, godang do agama na so sittong na mangihutton i. Dicampur nasida do ajaran ni nasida tu akka ulaon na so denggan na diulahon akka halak di portibi on. Alani i ma didok Bibel nasida akka pangalakkup.—Jakobus 4:4, surat na di toru.

   Mamora do akka agama palsu on jala mewah. Sesuai do i tu na didok Bibel taringot Babel na Balga na mamakke “abit na piolet dohot na merah songon api. Dipakke do muse akka perhiasan na sian mas, akka batu permata, dohot mutiara”. (Pangungkapon 17:4) Babel na Balga on ma na gabe sumber ni “akka ulaon na dihagigihon di tano on”. Maksudna, dileai nasida do Debata marhite ajaran dohot tindakan ni nasida. (Pangungkapon 17:5) Akka halak na mendukung Babel na Balga on ro sian marragam ‘bangso, jolma, dohot bahasa’.— Pangungkapon 17:15.

Martanggung jawab do Babel na Balga on tu “akka na tarbunu di tano on”. (Pangungkapon 18:24) Menurut sejarah, alani agama na so sittong on godang do terjadi porang dohot terorisme. Dang marhasil nasida mangajarhon taringot Jahowa, i ma Debata parholong. (1 Johannes 4:8) Alani ulaon ni nasida, gabe godang ma halak na mate tarbunu.

Songon dia do pandangan ni Debata mangida Babel na Balga?

Molo di pandangan ni Debata “nungnga martimbun” dosa ni Babel na Balga on sahat tu langit. (Pangungkapon 18:4, 5) Muruk situtu do Debata mangida agama na so sittong. Alana nungnga marlea dibahen nasida goar ni Debata jala dang parduli nasida tu akka halak na mangihutton agama ni nasida i.

Aha do na lao masa tu Babel na Balga?

Didok di Bibel, nungnga ditottuhon Debata hukuman tu Babel na Balga. (Pangungkapon 18:20) Jadi, lao dihancurhon Debata nama sude agama na so sittong. (Pangungkapon 18:8) Lao dipakke Jahowa ma binatang buas na warna merah na manggombarhon kekuasaan politik, lao menyerang jala menghancurhon agama na so sittong. (Pangungkapon 17:16, 17) Didok di Bibel, “Songon i ma hatop ni Babel, kota na balga i disappatton. Jala dang idaon be ibana.” (Pangungkapon 18:21) Alani i ma, akka halak na lomo rohana mambahen las roha ni Debata, ikkon “kaluar“ do sian Babel na Balga manang agama na so sittong.—2 Korint 6:14-17.