Porlu Dope Halak Kristen Mangulahon Ari Sabat?

Pandapot na sala: Nungnga ditottuhon Debata ari Sabat i tikki maradi Ibana di ari papituhon.

Na sasittongna: Didok di Bibel, “Dipasu-pasu Debata ma ari papituhon i, jala dipabadia ma i. Ai di ari i do Ibana maradi sian sude ulaonna manoppa, i ma tikki manoppa sude lomo ni rohana.” (1 Musa 2:3) Di ayat on dang na lao mangalehon paretta Jahowa tu akka jolma, alai na lao paboahon aha do na diulahon Ibana di ari papituhon dung sae manoppa. Asing ni i, dang adong dipaboa di Bibel na adong halak na hea mangarayahon Sabat sebelum jaman ni si Musa.

Pandapot na sala: Nungnga diulahon halak Israel ari Sabat sebelum dilehon dope Patik ni si Musa tu nasida.

Na sasittongna: Didok si Musa do tu halak Israel, “Dibahen Jahowa Debatanta i do parjanjian dohot hita di Horeb.” Di daerah sekitar ni Dolok Sinai do Horeb i. Di parjanjian i adong do tong didok patik taringot ari Sabat. (5 Musa 5:2, 12) Menurut Bibel, sada hal na baru do di halak Israel taringot ari Sabat i. Molo naung hea do halak Israel mangulahon ari Sabat tikki di Mesir dope nasida, boasa ma didok Debata molo tujuan ni ari Sabat i lao paingotton halak Israel molo nasida nungnga dibebasson sian Mesir? (5 Musa 5:15) Boasa ikkon dipaboa Debata tu nasida asa unang papunguhon manna di ari papituhon? (2 Musa 16:25-30) Jala boasa dang diboto nasida aha na ikkon diulahon tikki adong halak na so mangihutton patik taringot Sabat i?—4 Musa 15:32-36.

Pandapot na sala: Marlakku saleleng ni lelengna do parjanjian taringot ari Sabat i. Alani i ma ikkon torus do diulahon ari Sabat.

Na sasittongna: Piga-piga terjemahan ni Bibel mandok, molo ari Sabat i, i ma parjanjian “na marlakku sahat tu saleleng ni lelengna”. (2 Musa 31:16) Alai hata Heber na diterjemahon “saleleng ni lelengna” boi do tong artina sahat tu tikki na so ditottuhon. Jala arti ni hata i dang selalu artina ikkon saleleng ni lelengna. Misalna, dipakke do di Bibel hata na sarupa lao patorakkon taringot hamalimon di Israel, jala aturan on nungnga dihapus Debata hira-hira 2.000 taon naung salpu.—2 Musa 40:15; Heber 7:11, 12.

Pandapot na sala: Ikkon diulahon halak Kristen do ari Sabat, alana Jesus pe najolo diulahon do ari Sabat.

Na sasittongna: Diulahon Jesus pe ari Sabat ala halak Jahudi do ibana. Alana ikkon diihutton halak Jahudi do Patik ni si Musa mulai sian tubu nasida. (Galatia 4:4) Alai dung mate Jesus, dang marlakku pe parjanjian Patik i, termasuk ma i ari Sabat.—Kolosse 2:13, 14.

Pandapot na sala: Toktong do diulahon si Paulus ari Sabat bahkan dung gabe halak Kristen ibana.

Na sasittongna: Memang ro do si Paulus tu sinagoga di tikki ari Sabat. Alai ro pe ibana tusi, dang na lao mangarayahon ari Sabat rap dohot halak Jahudi. (Ulaon ni Apostel 13:14; 17:1-3; 18:4) Ro pe si Paulus tu sinagoga lao marbarita na uli do. Biasana disuru do si Paulus asa ro tu sinagoga lao marjamita. (Ulaon ni Apostel 13:15, 32) Jadi, “ganup ari” do si Paulus marbarita, dang holan di tikki ari Sabat.—Ulaon ni Apostel 17:17.

Pandapot na sala: Tikki ari Minggu do ari Sabat i diulahon.

Na sasittongna: Dang adong didok di Bibel molo halak Kristen ikkon istirahat di ari Minggu jala ikkon beribadat. Di abad na parjolo, karejo do halak Kristen di ari Minggu jala sarupa do ari Minggu i songon ari na asing. The International Standard Bible Encyclopedia mandok, “Di abad na paopatton, diorai konstantin [penguasa kafir Romawi] do karejo di ari Minggu. Jadi mulai sian i ma ari Minggu i dibahen gabe ari Sabat.”a

Alai boasa do adong ayat hira na mandok molo ari Minggu i ari na istimewa? Memang adong do didok di Bibel molo si Paulus rap mangan dohot akka dongan sahaporseaonna “di ari parjolo di minggu i”, i ma di ari Minggu. Alai rap mangan pe si Paulus dohot nasida alana naeng lao do si Paulus marsogot nai. (Ulaon ni Apostel 20:7) Jala adong do muse didok di Bibel, dipangido do tu piga-piga huria asa papunguhon hepeng sumbangan “di ari na parjolo di ganup minggu”, i ma di ari Minggu. Tujuan ni sumbangan i lao mangurupi halak na asing. Alai sebenarna, holan saran do i na dilehon tu akka halak di Huria i. Alana di jabu ni nasida sandiri do dipapungu hepeng sumbangan i, dang di inganan parpunguan.—1 Korint 16:1, 2.