Sarupa do Sude Agama? Jala Sude do Agama i Mangurupi Hita Asa Jonok tu Debata?

Na didok Bibel

Dang sarupa sude agama. Di Bibel, godang do dipaboa contoh taringot agama na so dihalomohon Debata. Adong dua alasan na mambahen agama i dang dihalomohon Debata.

Alasan 1: Manomba debata na so sittong

Didok Bibel, “dang marlapatan” jala “dang marguna” molo manomba debata na so sittong. (Jeremia 10:3-5; 16:19, 20) Didok Debata Jahowaa do tu halak Israel najolo, “Holan Au do na ikkon disomba hamu. Unang somba debata na asing.” (2 Musa 20:3, 23; 23:24) Jadi tikki disomba nasida debata na so sittong, “gabe muruk situtu ma Jahowa tu halak Israel”.​—4 Musa 25:3; 3 Musa 20:2; Panguhum 2:13, 14.

Sahat tu saonari pe, sarupa do pandangan ni Debata taringot tu akka debata sisongon i. (1 Korint 8:5, 6; Galatia 4:8) Diparettahon Ibana do tu akka halak na lao manomba Ibana, asa unang be bergabung tu akka halak na mangulahon ulaon ni agama na so sittong. Didok ibana, “Kaluar ma hamu sian tonga-tonga ni nasida jala padao hamu ma dirimuna sian nasida.” (2 Korint 6:14-17) Molo sarupa do sude agama jala diurupi do hita asa jonok tu Debata, boasa ma pola didok Debata songon i?

Alasan 2: Manomba Debata na sittong, alai dang sesuai carana manomba Debata tu na dihalomohon rohana

Najolo, olo dope halak Israel mangihutton cara dohot haporseaon ni agama na so sittong tikki manomba Debata. Ala dipadomu nasida do cara ni agama na sittong dohot tu cara ni agama na so sittong, gabe dang dijalo be ibadat ni nasida. (2 Musa 32:8; 5 Musa 12:2-4) Hea do Jesus muruk tu akka pemimpin agama ala mangida cara ni nasida manomba Debata. Didok Jesus tu nasida, “Dang diulahon hamu akka na uppetting na di Patik i. Dang diulahon hamu na tigor, dang dipatudu hamu asi ni roha, jala dang setia hamu tu Debata.”​—Mateus 23:23.

Molo idaon, songon na burju do nasida. Hape munafik do nasida. Saonari pe, holan agama na mangajarhon na sittong do na boi mangurupi halak jonok tu Debata. Ajaran na sittong i, adong di Bibel. (Johannes 4:24; 17:17; 2 Timoteus 3:16, 17) Akka agama na mangajarhon na so sesuai tu na didok Bibel, boi do mambahen halak gabe dao sian Debata. Godang do halak marpikkir, sian Bibel do akka ajaran songon Tritunggal, mangolu dope tondi ni halak naung mate, dohot api na rokko. Hape sasittongna, ajaran i ro sian akka halak na manomba debata na so sittong. Alani i, dang marguna akka agama na mangajarhon akka ajaran sisongon i. Alana, gabe digatti nasida do paretta ni Debata tu akka tradisi ni agama.​—Markus 7:7, 8.

Magigi do Debata tu akka agama na munafik. (Titus 1:16) Jadi asa boi akka halak jonok tu Debata, ikkon boi do ajaran ni agamana i mangurupi ibana mangulahon na denggan di ngoluna. Jala dang holan formalitas sambing i. Contohna didok do, “Molo adong na mandok di bagasan rohana na maragama ibana, alai dang dirajai dilana, na paoto-otohon dirina do ibana disi jala dang adong lapatanna ibana manomba Debata. On do agama na so ramun jala na ias di jolo ni Debata Ama i: Mangurus na so marama na so marina dohot na mabalu tikki marsitaonon nasida. Jala na manjaga dirina asa unang ramun dibahen portibi on.” (Jakobus 1:26, 27; surat na di toru) Di Bibel King James Version dipakke do istilah “agama na sittong” lao patuduhon na ikkon sittong do caratta manomba Debata, dang boi munafik.