Ise do Antikristus i?

Na didok Bibel

Dang holan sada halak, sada kelompok, manang sada punguan antikristus i. Didok di Bibel ‘godang do antikristus’. (1 Johannes 2:18) Hata ”antikristus” dibuat sian bahasa Junani na lapatanna “mangalo (manang asing sian) Kristus”. Akka halak na termasuk antikristus:

• Dang mangakkui Jesus i Kristus (Mesias), manang dang mangakkui Jesus i Anak ni Debata.​—1 Johannes 2:22.

• Mangalo Kristus, Na Pinillit ni Debata.​—Psalmen 2:1, 2; Lukas 11:23.

• Dibahen nasida do dirina hira na sarupa songon Kristus.​—Mateus 24:24.

• Mambahen na haccit tu sisean ni Kristus. Didok Jesus molo adong halak na mambahen na haccit tu siseanna, dos songon na mambahen na haccit tu dirina do i.​—Ulaon ni Apostel 9:5.

• Didok nasida do dirina halak Kristen, hape jahat do pangalahona manang manipu.​—Mateus 7:22, 23; 2 Korint 11:13.

Akka halak na songon i ma na didok Bibel “antikristus”. (2 Johannes 7) Di jaman ni akka apostel do parjolo sahali adong antikristus. Jala songon na disurirakkon di Bibel adong do antikristus i sahat tu saonari.—1 Johannes 4:3.

Ciri-ciri ni antikristus

• Diajarhon nasida do ajaran na sala taringot Jesus. (Mateus 24:9, 11) Misalna, diajarhon nasida do Tritunggal na mandok Debata Pargogo na So Hatudosan do Jesus. On patuduhon na dialo nasida do ajaran ni Jesus na mandok, “Umbalga do Damang i sian au.”—Johannes 14:28.

• Dang sarupa na diajarhon antikristus taringot Harajaon ni Debata tu na diajarhon Jesus. Misalna piga-piga pamimpin agama mandok marhite pamarettaon ni jolma do Jesus mamaretta. Hape didok Jesus, “Dang sian portibi on Harajaonku.”—Johannes 18:36.

• Diakkui nasida do Jesus Tuan ni nasida, alai dang dioloi nasida akka parettana, termasuk ma i paretta lao paboahon barita na uli taringot Harajaon ni Debata.—Mateus 28:19, 20; Lukas 6:46; Ulaon ni Apostel 10:42.