Toktong ma Jonok tu Jahowa Tikki Mambuat Pendidikan Tambahan

1-2. (a) Molo naeng dibuat ho pendidikan tambahan, aha do na ikkon toktong diulahon ho? (b) Aha do lapatan ni “toktong ma taulahon songon naung taulahon saleleng on”? (Pilippi 3:16)

ADONG do piga-piga naposo ni Jahowa na mambuat pendidikan tambahan dung tamat nasida sikkola. Dibuat nasida pe i, asa boi do nasida mandapot karejo na mendukung nasida melayani Jahowa. Jadi molo naeng dibuat ho pendidikan tambahan, aha do na porlu diulahon ho asa toktong jonok hubunganmu tu Jahowa? (Jak. 4:8a) Tikki sikkola dope ho, godang do ra naung diulahon asa marhasil mangadopi akka tantangan. Jala saonari ‘toktong ma ulahon songon naung diulahon ho saleleng on’ asa torus setia ho tu Jahowa.—Jaha Pilippi 3:16.

² Di bahasa aslina hata Junani na diterjemahon gabe “toktong ma taulahon songon naung taulahon saleleng on”, manggombarhon akka tentara na marbaris na torus maju. Jadi molo naeng dibuat ho pendidikan tambahan, ikkon torus do ho maju melayani Jahowa, unang gabe so manang gabe mundur. Di artikel on, lao tabahas ma opat prinsip ni Bibel na boi mangurupi ho. Memang nungnga diboto ho akka prinsip on jala nungnga diulahon ho i tikki sikkola dope ho. Alai saonari dung dibuat ho pendidikan tambahan, torus ma ulahon i bahkan dung sae annon pendidikanmi.

TOKTONG MA JONOK TU JAHOWA

3. Aha do tantanganna tikki dibuat ho pendidikan tambahan?

³ Tantanganna. Ala dibuat ho pendidikan tambahan, pasti gabe sibuk hian do ho jala godang na ikkon diulahon ho ganup ari. Memang, lomo do roham asa serius mangihutton pendidikanmi. Alai, unang ma gabe uppetting i sian hubunganmu tu Jahowa. Porlu do ho torus marpungu, marbarita, marsiajar Bibel, jala martangiang.—Pgk. 2:4.

4. Aha do lapatan ni ‘marsitutu mangulahon godang ulaon ni Tuhan’? (1 Korint 15:58)

⁴ Jaha 1 Korint 15:58. Dos songon sasahalak na marsepeda, ikkon digowet ibana do torus sepeda i asa unang madabu ibana. Dos songon i ma ho. Ikkon torus do ho manomba Jahowa, asa unang gabe dao ho sian Ibana. Alani i ma didok di Bibel, “Marsitutu ma [hita] mangulahon godang ulaon ni Tuhan i.” Na dimaksud di ayat on, dang holan taringot sadia godang tikki na dilehon ho mangulahon ulaon manomba Jahowa, alai sadia penting do ulaon i di ho. Unang ma gabe uppetting pendidikanmi sian ulaon lao manomba Jahowa. (Mat. 22:37) Sahalak donganta borua na margoar si Samantha mandok, “Nungnga hudok hian di rohakku, molo gabe targanggu do ulaonku manomba Jahowa alani pendidikan on, dang hulanjutton be i.”

5. Aha do na porlu diulahon ho asa torus sibuk melayani Jahowa?

⁵ Na porlu diulahon ho. Andorang so dimulai dope program pendidikan tambahan i, bahen ma Jahowa na uppetting di ngolum. Pikkirhon ma on, ‘Aha do na porlu huulahon asa torus au marpungu, marbarita, jala belajar pribadi?’ (Jos. 1:8; Mat. 28:​19, 20; Heb. 10:25) Ingot ma muse tikki sikkola dope ho, aha do na dibahen ho asa adong tikkim mangulahon ulaon manomba Jahowa? Molo adong na porlu diupayahon ho, ulahon ma i saonari. Marsitutu ma ho asa torus sibuk melayani Jahowa, nang pe dibuat ho pendidikan tambahan. Memang penting do pendidikanmi. Alai unang ma gabe i na uppetting sian hubunganmu tu Jahowa.a—Mat. 6:24.

6. Akka aha do na porlu dipikkirhon ho tikki mamareso dirim? (Ida gambar.)

⁶ Dung diihutton ho pendidikan tambahan i, pareso ma dirim pinomatna sahali sabulan. Pikkirhon ma on, ‘Jahowa dope na uppetting di au? Jotjot do au dang marpungu? Tarlambat do au ro tu parpunguan manang holan sian video konferensi do au marpungu? Tikki di parpunguan, akka tugashu do na sai hupikkiri? Jotjot dope au martangiang jala manjaha Bibel? Tikki marbarita na uli, sai naeng hatop do au mulak jala holan formalitas do i di au?’ Molo adong nanggo sada pe sian akka sukkun-sukkun i na pas tu situasim, ikkon muba do ho saonari. Unang ma pendidikanmi gabe na uppetting sian hubunganmu tu Jahowa.

‘IKKON MANAT DO HO MARPIKKIR’

7. Aha do pengaruh ni pendidikan tambahan tu cara marpikkirmu?

⁷ Tantanganna. Di program pendidikan tambahan, olo do ra diajarhon tu hamu “ajaran ni jolma dohot akka hata na so marguna” di portibi on. Misalna, ajaran ni halak ateis dohot teori evolusi. (Kol. 2:8) Asing ni i, olo do ra diajarhon gurumuna tu hamu asa diandalhon hamu dirimuna sandiri. Sahalak donganta bawa na poso mandok, “Dang holan keterampilan na diajarhon tu hami. Alai dohot do tong cara marpikkir na maralo tu cara marpikkir ni Jahowa. Misalna diajarhon do tu hami, bergantung tu diritta sandiri do molo naeng sukses hita. Alani i, gabe didok rohakku ma dang porlu be Jahowa di au jala dang porlu be huandalhon Ibana.”

8. Boasa ikkon “manat ho marpikkir”? (Poda 5:​1, 2)

⁸ Jaha Poda 5:​1, 2. Didok di Bibel, ‘Ikkon manat do ho marpikkir.’ Boasa? Alana berupaya do Sibolis dohot akka halak di portibi on lao manegai cara marpikkirmu. Molo dang manat ho, gabe ditiru ho ma cara marpikkir na so denggan. (1 Ptr. 5:8) Misalna sian guru manang dongan sakalasmu. Didok nasida do ra dang porlu taihutton aturan ni Debata, dang Debata na manoppa hangoluan, manang dang adong Debata. Ra berupaya do nasida patuduhon sittong do cara marpikkir ni nasida i. Hape di adopan ni Debata “haotoon” do i sude.—1 Kor. 3:​18-20.

9. Aha do na porlu diulahon ho asa manat ho marpikkir?

⁹ Na porlu diulahon ho. Andorang so dimulai dope program pendidikan tambahan i, pastihon ma nungnga benar-benar pos roham tu na diajarhon Bibel. Pikkirhon ma sukkun-sukkun on, ‘Boasa pos rohakku na tutu do adong Debata? Boasa pos rohakku Bibel i Hata ni Debata? Boasa pos rohakku na dumenggan do aturan na dipaboa di Bibel sian akka aturan na dibahen jolma?’ Dung i ingot ma muse songon dia pengalamanmu tikki sikkola dope ho. Tikki diajarhon tu ho teori evolusi, gabe ganggu do haporseaonmu? Manang targoda do ho lao maniru pangalaho ni akka donganmu? Molo songon i, porlu do dipatogu ho haporseaonmu. Jala bertekad ma asa toktong manat ho marpikkir.—2 Tim. 2:​16-18.b

10. Aha do na ikkon diulahon ho asa unang mura ho dipengaruhi?

¹⁰ Dung diihutton ho pendidikan tambahan i, torus ma pareso dirim. Pikkirhon ma akka sukkun-sukkun on, ‘Mulai do au terpengaruh tu pandangan ni akka halak na maralo tu cara marpikkir ni Jahowa? Tikki hubege akka ajaran na sala, pittor porsea do au tusi manang na dang? Pos situtu do rohakku holan Harajaon ni Debata do na boi pasaehon sude masalah di portibi on?’ Asa unang mura ho terpengaruh tu akka donganmu manang tu gurum, torus ma jaha, rimangi jala ulahon na diparsiajari ho sian Bibel. Molo diulahon ho i, gabe pos ma roham tu sude na diajarhon Bibel.—1 Tim. 4:15.

DENGGAN MA PAKKE TIKKIMUNA

11. Saleleng mambuat pendidikan tambahan, boasa ikkon denggan dipakke ho tikkim?

¹¹ Tantanganna. Molo dibuat ho pendidikan tambahan, pasti gabe sibuk hian do ho, tarlumobi molo naeng ujian manang adong tugas na ikkon hatop dipasae ho. Molo dang malo ho mangatur tikkim, gabe stres ma annon ho jala gabe palojahu. Alani i, ikkon denggan do dipakke ho tikkim asa toktong sehat fisikmu dohot mentalmu.

12. Akka aha do na ikkon diulahon ho? (Epesus 5:​15, 16)

¹² Jaha Epesus 5:​15, 16. Memang dang sai mura ‘denggan mamakke tikki’, alana godang na ikkon diulahon ho. Misalna asing ni marsiajar dohot makkarejohon akka tugas, ikkon dilehon ho do tong tikkim bergaul dohot keluargam manang dohot akka dongan di huria. (Ps. 133:1; Poda 18:1) Asing ni i, adong do ra tanggung jawabmu di jabu manang karejo do ra ho. Ikkon cukup istirahat do ho jala olahraga asa toktong sehat. (Pjm. 4:6; 1 Tim. 4:8) Alai na uppetting sian i sude, ikkon diutamahon ho do hubunganmu tu Jahowa. (Mat. 6:33) Jadi asa boi diulahon ho i sude, ikkon seimbang do ho jala ikkon denggan do ho mangatur tikkim.

13. Aha do na ikkon diulahon ho asa denggan ho mamakke tikkim?

¹³ Na porlu diulahon ho. Molo dibahen ho rencana na denggan, boi do ho marhasil. (Poda 21:5) Alani i andorang so dimulai ho pendidikan tambahanmi, bahen ma jadwal na masuk akkal. Ingot ma muse songon dia ho mangatur jadwalmu tikki sikkola dope ho. Molo adong na porlu ditingkatton ho, pittor ulahon ma i. Jadi bahen ma jadwal na denggan asa unang stres ho.c

14. Akka sukkun-sukkun aha do na porlu dipikkirhon ho?

¹⁴ Dung diihutton ho pendidikan tambahan i, torus ma pareso dirim. Pikkirhon ma akka sukkun-sukkun on, ‘Adong dope tikkikku lao istirahat dohot olahraga? Sanga dope au bergaul dohot akka dongan di huria? Boi do tepat waktu hupasae akka tugashu?’ Molo dang boi diulahon ho sudena on, aha do na mambahen? Ala na pagodangku do kegiatanmu manang ala jotjot do ho menunda? Boha do pandok ni akka donganmu dohot keluargam? Adong do na porlu dipadenggan ho? Molo dihilala ho porlu disesuaihon ho jadwalmu manang asa lebih disiplin ho, pittor bahen ma perubahan. Asing ni i, boi do tong dipangido ho saran sian akka halak na denggan mangatur tikkina.—Poda 11:14.

TOKTONG “MARDONGAN TU HALAK NA MARBISUK”

15. Aha do muse tantangan na diadopi ho?

¹⁵ Tantanganna. Olo do ra ditogihon akka donganmu ho lao marmeami. Ala sarupa do umurmuna, sarupa na dihalomohon rohamuna, jala sakalas hamu, olo do didok rohamuna dang pola boha molo dohot ho. Bahkan olo do ra dihilala ho uttabo mardongan dohot akka donganmi sian akka dongan di huria. Alai ikkon manat do ho. Nang pe godang persamaanmuna, alai dang sarupa hamu. Molo ho, dipikkiri ho do Jahowa. Alai molo nasida, dang songon i. Molo jotjot ho bergaul dohot nasida, lam leleng boi do gabe sarupa cara marpikkirmu dohot nasida. (1 Kor. 15:33) I ma na dihilala si Michael. Dibuat ibana do pendidikan tambahan di bagian listrik saleleng opat taon. Didok ibana, “Godang hian do habis tikkikku dohot akka donganku, lobi sian 40 jom saminggu. Jotjot do didokkon nasida hata na so suman, dibege nasida musik na so cocok tu halak Kristen, jala dang diargai nasida akka borua. Lam leleng gabe songon nasida ma tong cara marpikkirhu.”

16. Aha do na taparsiajari sian Poda 13:20?

¹⁶ Jaha Poda 13:20. Di Bibel, dipaingot do hita aha bahayana molo mardongan tu na so denggan. Alai dipaboa do tong, “Gabe marbisuk do manang ise na mardongan tu halak na marbisuk.” Aha do parsiajaranna? Balga do pengaruh ni donganta tu hita. Boi do denggan pengaruhna, alai boi do tong dang denggan. Alani i, mardongan ma ho holan tu halak na makkaholongi Jahowa jala na parduli tu ho.—Ps. 101:​6, 7; 119:63.

17. Aha do na porlu diulahon ho asa unang mardongan ho tu akka halak na so makkaholongi Jahowa?

¹⁷ Na porlu diulahon ho. Andorang so dimulai ho pendidikan tambahan, ikkon dibahen ho do batas na jelas taringot pergaulanmu dohot akka donganmu. Sahalak donganta bawa na margoar si Trenton mandok, “Tetap do ramah au tu akka dongan sakalashu. Alai dung mulak hami, dang bergaul be au dohot halak i. Holan sebatas dongan sakalas do huanggap halak i, dang ale-alekku.” Boha do molo ho? Tikki sikkola dope ho, batasan aha do na dibahen ho tu akka donganmu? Molo adong na porlu dipadenggan ho, pittor ulahon ma i. Marsitutu ma ho asa “mardongan tu halak na marbisuk” jala dang bergaul dohot akka halak na so makkaholongi Jahowa.d

18. Sukkun-sukkun aha do na porlu dipikkirhon ho? (Ida gambar.)

¹⁸ Taratur ma ho mamareso dirim. Pikkirhon ma, ‘Gabe paakrabhu do au tu dongan sakalashu? Gabe hutiru do cara ni nasida makkatai, pangalahona, dohot cara marpikkirna? Las do roha ni Jahowa molo bergaul au dohot nasida?’ (Ps. 1:1) Molo adong na porlu dipadenggan ho, pittor ulahon ma i. Marale-ale ma ho tu akka halak na makkaholongi Jahowa. Asing ni i, lului ma kesempatan lao marbarita tu dongan sakalasmu. Unang ma maila mangulahon i. Alana boi do ho mangurupi nasida mananda Jahowa.

PERSIAPPON MA DIRIM

19. Andorang so dibuat ho pendidikan tambahan, aha do na porlu diulahon ho lao mempersiappon dirim? Bahen ma tudosan.

¹⁹ Bayakkon ma tudosan on: Molo adong sasahalak na naeng naik gunung, ikkon dipersiappon ibana do dirina. Memang dang diboto ibana akka aha na lao diadopi ibana. Alai ikkon sehat do ibana, ikkon dipillit do pakkean na cocok, jala ikkon diboto ibana do tudia tujuanna. Dos songon i ma ho. Andorang so dibuat ho pendidikan tambahan, ikkon dipersiappon ho do dirim. Ikkon togu do haporseaonmu, ikkon dipakke ho do “perlengkapan porang na sian Debata”, jala ikkon diboto ho do tujuanmu. Tujuanmu, i ma lao mambahen las roha ni Jahowa jala pasangappon goarna, dang asa gabe sukses di portibi on.—Eps. 6:​11-13; 1 Kor. 9:​26, 27; 10:31.

20. Aha do na porlu diulahon ho ‘lao mamareso dirim’?

²⁰ Didok di Bibel, “Toktong ma uji jala pareso hamu dirimuna, asa botoonmuna na diihutton hamu dope haporseaon ni halak Kristen manang na dang.” (2 Kor. 13:5) Boha do carana mangulahon i? Taratur ma ho mamareso dirim. Misalna pikkirhon ma, ‘Taratur dope au mangulahon ulaon manomba Jahowa? Hutiru do cara marpikkir ni akka halak di portibi on? Denggan do au mangatur tikkikku? Tu akka dongan di huria do akrab au manang tu akka donganku na so Saksi?’ Dang soal dibuat ho pendidikan tambahan manang nungnga karejo ho, ikkon manat do dipikkirhon ho akka sukkun-sukkun i. Marsitutu ma ho asa toktong jonok tu Jahowa dang soal songon dia situasim saonari. Pos ma roham, pasti dipasu-pasu Jahowa do sude upaya na dibahen ho.—Poda 3:​5, 6.