Taargai ma Keputusan ni Donganta

1-2. Boasa sipata berbeda keputusan na tabahen dohot keputusan ni akka donganta?

HEA do adong halak na manguhumi hamu alani keputusan na dibahen hamu? Manang, hea do diuhumi hamu keputusan ni halak na asing? Pasti godangan sian hita hea do makkilala sisongon i.

² Memang, wajar do molo dang sarupa keputusan na tabahen dohot keputusan ni akka donganta. Boasa? Alana, dang sarupa cara marpikkirta. Olo do ra ala dipengaruhi budaya, latar belakang keluarga, dohot pengalaman. Nang pe songon i, unang ma taloas perbedaan i manegai hadameon dohot sada ni roha di huria.—Eps. 4:3.

3. Molo adong donganta na mambahen keputusan na so sesuai tu lomo ni rohatta, aha do mungkin na taulahon?

³ Olo do ra adong donganta na mambahen keputusan na so sesuai tu lomo ni rohatta. Di situasi sisongon i, olo do ra tapangido tu ibana asa dipauba keputusanna i, manang tapaboa-boa tu na asing dang denggan keputusanna i. Memang, parduli do hita tu akka donganta. Holong do rohatta tu nasida jala lomo rohatta asa marlas ni roha nasida. (Poda 17:17) Alani i ma dang olo hita molo dibahen nasida keputusan na so denggan, manang na boi manegai hubungan ni nasida tu Jahowa.

4-5. Molo dang setuju hita tu keputusan ni donganta, aha do na ikkon taulahon?

⁴ Molo dang setuju hita tu keputusan ni donganta, ikkon makkatai do hita tu ibana? Dang ikkon songon i. Memang molo naeng dibahen ibana keputusan na maralo tu paretta ni Debata, ikkon tapasingot do ibana. Boasa? Ala holong rohatta tu ibana. (Poda 27:​5, 6) Boha molo keputusanna i dang maralo tu paretta ni Debata, alai dang sesuai tu lomo ni rohatta? Aha do na porlu taulahon? Alusna adong di ayat tema ni artikel on. Didok, “Unang ma uhumi hamu ibana molo asing pandapotna sian hamu.”—Rom 14:1.

⁵ Alai, dang sai mura mangargai keputusan na dibahen akka donganta. Di artikel on, lao tabahas ma boasa ikkon taargai keputusan ni nasida, jala boha do cara mangulahon i. Alai na parjolo, tabahas ma akka situasi na boi mambahen hita gabe manguhumi keputusan ni akka donganta.

NA MAMBAHEN HITA MANGUHUMI KEPUTUSAN NI DONGANTA

6-7. Paboa ma akka situasi na boi mambahen hita gabe manguhumi keputusan ni donganta.

⁶ Songon naung dipaboa nakkin, biasana cara pandangta dipengaruhi latar belakang manang pengalamanta. Olo do ra didok rohatta sarupa do cara pandang ni halak na asing songon hita. Alai, belum tentu songon i. Taida ma piga-piga situasi on. Situasi 1: Adong ma sahalak donganta bawa na parmabuk bapakna. Tikki dohot ibana tu acara ramah tamah, diida ibana ma adong akka donganta na manginum alkohol. Dang lomo rohana mangida i, jala dipasingot ibana ma nasida. Situasi 2: Adong ma sahalak donganta borua na marsahit na parah. Alai ujungna, malum do ibana. Diboto ibana ma adong donganta borua na asing na marsahit na sarupa. Lomo do rohana mangurupi donganta i. Gabe dijujui ibana ma donganta i mambuat perawatan songon na dibuat ibana. Dipaboa ibana ma akka sipanganon na so boi diallang, ubat na ikkon inumonna, dohot terapi na ikkon buatonna. Situasi 3: Adong ma sahalak donganta bawa na hea gabe anggota ni sada gareja. Dung gabe Saksi ibana, dang olo be ibana mangulahon manang aha pe na adong hubunganna tu gareja. Hape diboto ibana ma adong sahalak donganta na dohot tu acara pemakaman di gareja. Gabe kecewa do ibana alani keputusan ni donganta i.a

⁷ Taida ma akka situasi na asing. Situasi 4: Adong ma sahalak donganta bawa na merasa dang cocok molo akka donganta bawa marjenggot, jala dang cocok molo akka donganta borua marcelana panjang tikki marpungu dohot marbarita. Memang, diboto donganta i do adong petunjuk na terbaru sian naposo haposan taringot i. Alai, tetap do dijujui ibana akka donganta bawa asa unang marjenggot, jala akka donganta borua asa mamakke rok manang margaun. Situasi 5: Diboto sahalak sintua ma adong sahalak donganta bawa na mambuat pendidikan tambahan, alai ujungna maninggalhon Jahowa. Hape diboto ibana ma adong sahalak na poso di huriana na naeng mambuat pendidikan tambahan. Gabe khawatir ma sintua i. Dinasehati ibana ma donganta na poso i dohot natua-tuana asa unang saut rencanana i.

8. (a) Situasi aha do na boi mambahen sahalak natua-tua manguhumi keputusan ni natua-tua na asing? (b) Aha do na masa molo tauhumi keputusan ni akka donganta?

⁸ Taida ma situasi na boi diadopi akka natua-tua. Situasi 6: Hamu akka natua-tua, pasti lomo do rohamuna “mangajar-ajari jala mamodai [gellengmuna] hombar tu lomo ni roha ni Jahowa”. (Eps. 6:4) Alai, adong do natua-tua na so pola godang mambahen aturan tu gellengna. Misalna, dang ditottuhon nasida ikkon jam piga mulak gellengna, diloas do gellengna mar-video game, jala dilehon do HP tu gellengna nang pe dakdanak dope. Alai ala dang songon i caramuna, gabe didok gellengmuna ma na pakakuhu do hamu. Ra didok nasida, “Boasa au dang boi? Halak i diloas bapakna do!” Di situasi sisongon i, olo do ra gabe diuhumi hamu keputusan ni natua-tua na asing. Memang, olo do sipata dang setuju hita tu keputusan ni donganta jala gabe tauhumi nasida. Misalna, dang setuju hita molo adong donganta na jotjot belanja, jotjot mardalani, manang dang setuju hita tu keputusan ni nasida taringot hiburan. Alai, unang ma gabe perasaanta na uppetting jala gabe manegai hadameon dohot sada ni roha di huria.

9. Aha do tujuan ni sude naposo ni Jahowa, jala aha do na so boi taulahon? (Ida gambar.)

⁹ Olo do ra dang sarupa keputusan na tabahen dohot keputusan ni akka donganta. Alai, dang berarti adong na sala jala adong na sittong. (Rom 14:5) Memang didok di Bibel, ikkon “saroha sapikkiran” do hita. Lapatanna, ikkon taihutton do aturan na dibahen Jahowa. Alai, dang berarti ikkon sarupa pandapotta, cara pandangta, dohot keputusanta taringot sude situasi di ngolutta. (2 Kor. 13:11) Dipatudos ma i songon molo naeng lao hita tu sada inganan. Pasti godang do dalan asa boi sahat tusi. Alai, tapillit do dalan na tahilala uttabo lewat sian i. Dos songon i ma, dang sai sarupa keputusan na tabahen dohot keputusan ni akka donganta. Alai sarupa do tujuanta: Lomo do rohatta mambahen las roha ni Jahowa. Jadi, unang ma tauhumi keputusan ni akka donganta.—Mat. 7:1; 1 Tes. 4:11.

BOASA IKKON TAARGAI KEPUTUSAN NI DONGANTA?

10. Songon na dipaboa di Jakobus 4:​12, boasa dang marhak hita manguhumi halak na asing?

¹⁰ Dipaboa do di Bibel boasa ikkon taargai keputusan ni halak na asing. Alasan na parjolo, dang marhak hita mambahen hukum, aturan, jala manguhumi halak na asing. (Jaha Jakobus 4:12.) Jahowa do Silehon Patik dohot Hakim. Ibana do na marhak mambahen aturan tu hita. Jadi martanggung jawab tu Jahowa do akka donganta, dang tu hita. (Rom 14:10) Alani i, unang ma tauhumi keputusan ni donganta holan ala na so sarupa i tu keputusanta.b

11. Aha do na ikkon taulahon asa toktong marsada huria? (Ida gambar.)

¹¹ Lomo do roha ni Jahowa asa marsada akka naposona, dang asa sarupa. Marragam do dibahen Jahowa akka toppaanna. Misalna bulung-bulung. Bulung-bulung na sian sada hau pe dang sarupa bentukna. Songon i do tong hita jolma. Adong lobi sian ualu miliar jolma di tano on. Alai dang adong dua halak na sarupa bohina dohot sifatna. Sian on taboto ma, marasing-asing do hita sude ditoppa. Jala dang dipangido Jahowa asa sarupa hita tu halak na asing. Na diharappon Ibana, i ma asa marsada hita. Jadi molo pe keputusan ni halak berbeda sian hita, unang ma gabe tersinggung hita. Uppetting do hadameon dohot sada ni roha di huria sian pandapotta dohot keputusanta.—Rom 14:19.

TAARGAI MA KEPUTUSAN NI DONGANTA

12-13. Molo tahilala adong donganta na “mangulahon na sala”, aha do na ikkon taulahon? (Galatia 6:1; ida kotak “Molo Dihilala Hamu Sala Keputusan ni Donganta”.)

¹² Tikki halak na asing na mambahen keputusan. Pikkirhon ma sukkun-sukkun on, ‘Memang “sala” do keputusanna i manang holan ala berbeda do i sian lomo ni rohakku?’ Molo memang mangulahon na sala donganta manang nungnga dilanggar ibana paretta ni Debata, pikkirhon ma on, ‘Memang au do na cocok pasingotton ibana? Manang adong do donganta na asing na lebih cocok?’ Molo hamu do na cocok pasingotton ibana, toktong ma lambok hamu mangulahon i. (Jaha Galatia 6:1.) Alai biasana, dang na sala keputusan ni donganta i. Holan ala berbeda do i sian pilihanta. Molo songon i situasina, unang ma tasukkun boasa songon i keputusanna manang tapaboa-boa i tu halak na asing. Tetap ma taargai keputusan ni donganta i, jala unang ma tauhumi ibana.—Rom 14:​2-4.

¹³ Pikkirhon ma tudosan on: Molo lao hamu dohot donganmuna tu restoran, ikkon sarupa do na dipesan hamu dohot na dipesan donganmuna i? Daong. Pasti diloas hamu do donganmuna i mamesan na dihalomohon rohana. Tung pe dang lomo rohamuna tu na dipesanna i, dang pola boha. Alana dang hamu na mangallang i. Jala hamu pe, pasti dang lomo rohamuna molo dipaksa hamu asa sarupa pesananmuna. Dos songon i ma, ikkon taargai do keputusan ni halak na asing. Unang ma tapaksa nasida asa mangulahon songon na di rohatta.

14. Tikki naeng mambahen keputusan, aha do na ikkon taulahon asa boi toktong mardame dohot akka dongan? (1 Korint 8:​12, 13)

¹⁴ Tikki hita na mambahen keputusan. Asa boi hita torus marsada dohot akka dongan di huria, berupaya ma hita asa unang tabahen tersinggung akka donganta. (Jaha 1 Korint 8:​12, 13.) Ra dang sala keputusan na tabahen. Alai molo gabe tersinggung do donganta alani i, “marguna” do i?c (1 Kor. 10:​23, 24) Molo songon i situasina, unang ma tapaksahon pandapotta. Alai tapikkirhon ma songon dia perasaan ni nasida. (Rom 15:1) Olo do ra didok rohatta, ‘Kan halak na asing pe ikkon mangargai keputusanku do?’ Tutu do i nian. Alai taingot ma tong na didok di Rom 12:​18, “Molo boi dope, bahen hamu ma sian nasa tolapmuna lao mardame tu sude halak.” Jadi marsitutu ma hita asa toktong mardame dohot akka dongan. Molo adong keputusanta na mambahen nasida tersinggung, unang ma taulahon i.

15. Aha do na porlu diulahon akka sintua asa marsada huria? (1 Korint 4:6)

¹⁵ Ikkon diargai akka sintua do keputusan ni dongan na asing. Unang ma dibahen akka sintua aturan taringot urusan pribadi ni akka dongan. Jala unang ma diulahon nasida “lobi sian na tarsurat” di Bibel. (Jaha 1 Korint 4:6.) Lapatanna, dang olo akka sintua mangajarhon akka na so sesuai tu prinsip ni Bibel dohot publikasitta. Asing ni i, tikki adong donganta na mangido nasehat, unang ma dilehon nasida nasehat holan mangihutton pengalaman ni nasida. Alai sian Bibel ma dilehon nasida nasehat i. Molo diulahon nasida i, gabe marsada ma huria.—Jes. 48:​17, 18.

16. Molo nungnga dibahen punguan ni akka sintua sada keputusan, aha do na ikkon diulahon sahalak sintua?

¹⁶ Ikkon diargai sahalak sintua do keputusan na dibahen punguan ni akka sintua. Andorang so dibahen keputusan, biasana jolo martangiang do akka sintua mangido tondi parbadia, jala manat do dipareso nasida akka prinsip ni Bibel. Jadi ganup sintua ikkon mendukung keputusan na dibahen, nang pe keputusan i dang sesuai tu lomo ni rohana. (Eps. 5:17) Asing ni i, ikkon manat do akka sintua mangalului petunjuk sian Bibel dohot publikasitta. Dang olo nasida mangihutton petunjuk holan lao mendukung pandapot ni nasida sandiri. Misalna, dang olo sahalak sintua mambuat sada kalimat sian publikasitta holan lao mambuktihon sittong do pandanganna.

17. Molo taargai keputusan ni donganta, aha do manfaatna?

¹⁷ Songon naung tabahas, dang sarupa cara marpikkirta dohot pandapotta tu dongan na asing. Alai, dang pola boha i. Ala marragam latar belakang dohot sifatta, gabe lam uli do huriatta. Alai unang ma gabe dang marsada huria alani perbedaan i. Ikkon taargai do keputusan ni dongan na asing jala unang ma tabahen tersinggung halak na asing alani keputusanta. Molo taulahon i, pasti dipasu-pasu Jahowa do hita. Boi ma hita marlas ni roha jala gabe marsada ma huriatta.—Ps. 133:1; Mat. 5:9.