Toktong ma Kompak Hamu tu Pasanganmuna

1. Boasa tadok dongan na burju i silehon-lehon sian Jahowa?

PASTI “parohon las ni roha” do molo adong donganta na makkaholongi hita jala makkaholongi Jahowa. (Poda 27:9) Boi do nasida gabe donganta rap mekkel, rap tangis, jala rade do nasida mangalehon nasehat tu hita. Asing ni i, lomo do roha ni nasida mangurupi hita jala boi do tahaporseai nasida. Silehon-lehon sian Jahowa do dongan sisongon i.—Jak. 1:17.

2. Boasa ikkon berupaya suami dohot istri asa toktong kompak? (Mateus 19:6)

² Ikkon kompak do suami dohot istri jala ikkon berupaya do nasida asa lam togu hubungan ni nasida. Molo dang diulahon nasida i, boi ma nasida kesepian, dang marlas ni roha, bahkan gabe mura-mura muruk. Alai molo dipartahatton nasida togu hubungan ni nasida, boi ma nasida marlas ni roha jala dang boi sirangon. (Jaha Mateus 19:6.) Di artikel on, lao tabahas ma aha do na porlu diulahon akka donganta naung menikah asa togu hubungan ni nasida na dua. Alai na parjolo, tabahas ma aha na porlu diulahon akka donganta na lajang asa manat mamillit halak na lao gabe pasanganna.

CARA MAMILLIT PASANGAN NA COCOK

3-4. Aha do na porlu taulahon asa manat hita mamillit sasahalak na lao gabe dongan saripetta? (Poda 18:22)

³ Andorang so tabahen keputusan na balga, ikkon jolo tapikkiri do aha manfaat ni i di hita manang aha akibatna. Alana, massai balga do pengaruh ni keputusan sisongon i di ngolutta. Alani i andorang so tabahen sada keputusan, jolo manat ma i tapikkiri.

⁴ Misalna, tikki naeng mamillit ise na lao gabe dongan saripetta. Keputusan na massai penting do i. Ala Jahowa do na mambahen perkawinan, tapangido ma bantuan sian Ibana. Lomo do roha ni Jahowa asa boi sahalak bawa mandapot istri na burju. Jala lomo do tong rohana asa boi sahalak borua mandapot suami na burju. Diboto Jahowa do aha na terbaik tu hita. (Jaha Poda 18:22; Jes. 48:​17, 18) Alani i, boi do akka prinsip na dilehon Ibana di Bibel mangurupi hita mamillit sasahalak na cocok gabe dongan saripetta.

5. Boasa ikkon halak na manomba Jahowa na tapillit gabe dongan saripe?

⁵ Dung tardidi hita, gabe ale-ale ni Jahowa do hita. (Ps. 25:14) Alani i molo naeng menikah hamu, pillit ma tong ale-ale ni Jahowa. (1 Kor. 7:39) Molo diulahon hamu songon i, on patuduhon na dioloi hamu do Jahowa. Jala gabe songon hadiah sian Jahowa ma dongan saripemuna i. (Poda 19:14) Alai molo menikah hamu tu halak na so manomba Jahowa, gabe masalah do i annon. (2 Kor. 6:14) Jadi nang pe dang adong dope donganta na cocok gabe dongan saripemuna, unang ma gabe marhallet hamu tu halak na so Saksi. Jala unang ma didok rohamuna boi do annon diurupi hamu ibana gabe Saksi Jahowa. Sala do cara marpikkir sisongon i.

6-7. Sukkun-sukkun aha do na porlu dipikkirhon hamu andorang so menikah hamu?

⁶ Dang sude halak naung tardidi cocok gabe dongan saripe. Alani i molo lomo rohamuna tu sahalak donganta, jolo pikkirhon ma on: ‘Burju do ibana tu keluargana? Parduli do ibana tu halak na asing, jala diargai ibana do nasida? Akka ise do donganna? Aha do na diulahon ibana molo dang sarupa pandapotna tu halak na asing? Parhata sada do ibana, manang olo do ibana manangihon halak na asing molo dang maralo i tu prinsip ni Bibel? Boha do pandanganna taringot tu hepeng?’

⁷ Dung i, rimangi ma on: ‘Holong do rohana tu Jahowa? Berupaya do ibana maniru sifat ni Jahowa? Boi do ibana mangurupi au asa lam semangat manomba Jahowa? Sarupa do cita-cita rohaninami? Boi do ibana gabe ale-alekku?’ (Kol. 3:​9, 10) Molo hamu sahalak borua, boi do donganta bawa i gabe ale-alemuna jala gabe kepala keluarga na burju? (1 Kor. 11:3) Molo hamu sahalak bawa, olo do annon donganta borua i unduk tu hamu nang pe adong hahuranganmuna? Memang, porlu do tikki lao mangalusi akka sukkun-sukkun i. Alani i tikki marhallet hamu dohot ibana, berupaya ma hamu asa lam mananda ibana.

8-9. Aha do muse na porlu dipikkirhon akka na marhallet? (Ida gambar.)

⁸ Tikki marhallet hamu, berupaya ma hamu mananda halletmuna i. Boi do disukkun hamu pandapot ni halak na asing taringot tu ibana. Sukkun ma songon dia pandapot ni nasida taringot pangalahona. Misalna, ditanda do ibana halak na serep marroha, burju, jala masuk akkal? Taida ma pengalaman ni donganta borua na margoar si Sarah, sian Guyana Prancis. Menikah ma ibana tu donganta bawa na margoar si Daniel. Didok si Sarah, “Gabe huboto ma taringot si Daniel sian donganta na hea sajabu dohot ibana, sian sahalak sintua, sian ale-alena, dohot sian akka donganta borua di huriana.” Asing ni i, boi do disukkun hamu tu halletmuna i taringot masa laluna manang taringot akka na asing na porlu diboto hamu. Boasa? Alana molo dang diboto hamu taringot i, boi do i gabe masalah di perkawinanmuna.

⁹ Olo do ra didok rohamuna hira dang cocok ibana gabe dongan saripemuna. Jala adong do ra donganta na paboahon adong sifat ni halletmuna i na so denggan. Molo songon i, manat ma i pikkirhon asa boi diputusson hamu menikah do hamu na dua manang na putus.a Saonari, tabahas ma aha do na porlu diulahon akka donganta naung menikah asa togu hubungan ni nasida.

LEHON MA GODANG TIKKI TU PASANGANMUNA

10. Boasa ikkon dilehon hamu tikkimuna tu pasanganmuna?

¹⁰ Nang pe sibuk hamu, alai lehon ma tikkimuna tu pasanganmuna. Molo diulahon hamu i, pasti gabe lam akrab ma hamu na dua. Misalna, rap ma hamu mangulahon ulaon na mambahen las rohamuna, patudu ma holong, paboa ma akka situasi na diadopi hamu ganup ari, jala ceritahon ma sude na di roha dohot pikkiranmuna.

11. Aha do na boi mambahen gabe dang denggan hubunganmuna tu pasanganmuna?

¹¹ Pasti lomo do rohamuna asa torus rap dohot pasanganmuna. Alai sipata alani situasi, dang sai boi hamu torus rappak. Memang molo holan satokkin, dang pola boha i. Alai molo palelengku, bahaya do i. Misalna, adong do ra sasahalak na gabe maninggalhon pasanganna ala ikkon karejo tu luar negeri. Memang, gabe denggan do ra parhepengon ni nasida. Alai molo jotjot nasida dang rap, boi do i gabe masalah di perkawinanna.

12-13. (a) Aha do na diulahon piga-piga donganta asa boi dilehon nasida tikkina tu pasanganna? (Ida gambar.) (b) Sadia penting do pasanganmuna di hamu? (Ida kotak “Sadia Penting do Pasanganmuna di Hamu?”)

¹² Taida ma pengalaman ni akka halak na berupaya mangalehon tikki tu pasanganna. Misalna, si Leah na sian Guam. Didok ibana, “Sai diupayahon hami do asa boi toktong rap hami na dua. Alani i, molo adong acara manang kegiatan na asing, biasana rappak do hami lao tusi.” Asing ni i, si Roxanne na sian Amerika Serikat mandok, “Memang, sibuk do hami na dua. Alai, dibahen hami do jadwal asa boi rappak hami.” (Bandingkon tu Amos 3:3.) Dung i muse, si Damien na sian Prancis mandok, “Berupaya do au mamboto ulaon aha na dihalomohon istrikku. Dung i, dohot ma tong au mangulahon i. Songon i ma tong istrikku tu au.” (Mat. 7:12) Si Katie pe na sian Amerika Serikat mandok, “Sipata, disippan hami do handphone-nami asa unang targanggu hami tikki makkata-hatai.”

¹³ Alai na uppetting, lehon ma tikkimuna asa rap mangulahon ulaon manomba Jahowa. Si Myriam na sian Prancis mandok, “Tiap pagi, manjaha Bibel do hami. Dung i, rap dibahas hami ma parsiajaran aha na dapotnami sian i jala songon dia hami boi mangulahon i. Las hian do rohakku tikki mangulahon on dohot suamikku.” Didok ibana muse, “Las hian do tong rohakku tikki rap martangiang hami. Gabe huboto ma na massai holong do roha ni suamikku tu Jahowa.” Si Katie na dipaboa nakkin mandok, “Las do rohakku tikki rap marbarita hami na dua. Tikki hubege songon dia suamikku pasahatton barita na uli, gabe lam holong do rohakku tu ibana. Songon i ma tong ibana tu au. Marsiajar do au sian ibana, jala ibana pe marsiajar do tong sian au.”—Poda 27:17.

UNANG PITTOR MENYERAH TIKKI ADONG MASALAH

14-15. Boasa ikkon berupaya suami dohot istri mangatasi masalah di perkawinan ni nasida? Bahen ma tudosan.

¹⁴ Ala dang sempurna dope hita, pasti sai adong do masalah na taadopi dohot pasanganta. Didok di Bibel, “Godang do hasusaan na lao masa tu halak na marhasohotan.” (1 Kor. 7:28) Hasusaan na didok disi, i ma akka masalah na jotjot diadopi halak na menikah. Attong molo masa i, aha do na porlu diulahon hamu lao mangadopi i jala asa toktong kompak?

¹⁵ Bayakkon ma adong sada bangunan na massai balga manang sada lukisan na massai bagak. Hape sega ma i. Aha do na diulahon akka halak nappunasa i? Pasti berupaya do nasida padenggatton i. Nang pe godang tikki jala godang hepeng na habis tusi, alai dang menyerah nasida padenggatton i. Boasa? Alana, massai arga do bangunan manang lukisan i di nasida. Dos songon i ma, massai arga do perkawinan. Alai nang pe kompak situtu suami dohot istri, pasti sai adong do masalah dohot sitaonon na diadopi nasida. Dos songon bangunan manang lukisan na boi dipadenggan i, perkawinan na gok masalah pe boi do dipadenggan. Memang, porlu do godang tikki jala ikkon bekerja keras do suami istri lao mangulahon i. Alai molo berupaya nasida, pasti las hian do roha ni Jahowa. (Mal. 2:16) Jadi, molo dipartahatton suami dohot istri perkawinan ni nasida jala toktong kompak, on patuduhon na marsihaholongan do nasida. Jala dang holan i. Diargai nasida do tong Jahowa, Debata na mambahen perkawinan.

16. Songon na dipaboa di 1 Korint 13:​4-8a, aha do na porlu diulahon suami dohot istri tikki adong masalah di perkawinan ni nasida? (Ida gambar dohot kotak “Akka Bantuan tu Naung Menikah”.)

¹⁶ Molo adong masalah di perkawinanmuna, unang ma pittor naeng marsirang hamu. (1 Kor. 7:​10, 11) Pikkirhon ma sukkun-sukkun on, ‘Aha do na ikkon huulahon asa denggan muse hubungannami?’ Parsiajari ma aha na didok Bibel taringot patuduhon holong. Jala berupaya ma hamu patuduhon akka sifat na dipaboa di 1 Korint 13:​4-8a. (Jaha.) Unang ma pittor naeng padao-dao hamu. Alai, berupaya ma hamu asa kompak muse dohot pasanganmuna. Pikkirhon ma aha na porlu dipadenggan hamu sian dirimuna, asa marlas ni roha muse hamu dohot pasanganmuna. Asing ni i, pangido ma bantuan ni Jahowa. Bahen ma riset sian publikasitta dohot akka video sian organisasi. Jala boi do tong dipangido hamu nasehat sian akka sintua dohot akka dongan na togu haporseaonna. Molo toktong diandalhon hamu Jahowa, gabe songon “tolu tali na dipudun” ma perkawinanmuna i, jala “dang mura digotap”.—Pjm. 4:12.

17. Asa marlas ni roha akka halak na naeng menikah dohot naung menikah, aha do na ikkon diulahon nasida?

¹⁷ Lomo do roha ni Jahowa asa marlas ni roha sude naposona, termasuk ma akka halak na lajang dohot naung menikah. Jadi, molo lajang dope hamu jala adong rencanamuna naeng menikah, manat ma hamu mamillit ise na lao gabe dongan saripemuna. Jala molo nungnga menikah hamu, torus ma berupaya hamu asa lam kompak dohot pasanganmuna. Molo adong masalah di perkawinanmuna, unang ma pittor menyerah. Torus ma pangido bantuan ni Jahowa. Molo diulahon hamu i, marlas ni roha ma hamu!—Pjm. 9:9.