Tiru ma “Debata Sipangapul na Sumurung”

1. Boasa ikkon taapuli roha ni halak na asing?

SUDE do hita ‘marsitaonon alani marragam hasusaan’. Alani i, porlu do hita dipatogu jala diapuli. (1 Ptr. 1:6) Tottu las hian do rohatta molo adong na mangapuli hita tikki susa hita. Jala rade do tong hita patoguhon roha ni akka donganta na marsitaonon. (Mat. 7:12) Tatiru ma Jahowa tikki ‘patoguhon roha ni halak na asing’. Ibana do “Debata Sipangapul na sumurung”. Dipaboa Ibana do boha carana “mangurupi halak na asing asa margogo manaon sitaonon manang aha pe”. (1 Tes. 4:18; 2 Kor. 1:​3, 4) Tikki taapuli roha ni akka dongan, taulahon do i alani holongta tu nasida, dang holan ala kewajiban. Di artikel on, lao tabahas ma (1) aha do na didok Bibel taringot mangapuli, (2) boha do carana mangulahon i, jala (3) aha do na boi taulahon tikki porlu hita diapuli.

NA DIDOK BIBEL TARINGOT MANGAPULI

2. Di Bibel, aha do lapatan ni hata “mangapuli roha”?

² Di Bibel, marragam do lapatan ni hata Junani na diterjemahon gabe “mangapuli roha”. Boi do lapatanna “patoguhon”, “mamodai”, manang “manjujui”. (Rom 12:​8, surat na di toru.) Boi do tong lapatanna “sasahalak na pittor rade mangurupi halak na asing jala toktong di labbungna”. Jadi, bayakkon ma on: Tikki susa hita, adong ma donganta na pittor hatop mangurupi hita. Dang soal songon dia carana lao mangapuli rohatta, pasti dibahen ibana do lubbang pakkilalaatta jala dipatogu muse.

3. Aha do na taparsiajari sian si Barnabas? (Ida gambar.)

³ Taida ma contoh na dipaboa di Bibel. Adong sahalak naposo ni Jahowa na margoar si Josep. Jotjot do ibana patoguhon jala mangapuli halak na asing. Alani i, dibahen akka apostel ma goarna si Barnabas, lapatanna “Anak ni Pangapulion”. (Ul. 4:36) Didok di Bibel, sai rade do si Barnabas mangurupi akka dongan na susa. Misalna, diurupi ibana do si Saulus. Tikki baru gabe halak Kristen si Saulus, ro ma ibana tu Jerusalem jala lomo do rohana pajuppang tu akka sisean na asing. Alai, mabiar do akka sisean i tu si Saulus. Alana najolo, dianiaya ibana do halak Kristen. Alai molo si Barnabas, dang mabiar ibana tu si Saulus. Dijakkon do si Saulus jala dipatandahon tu akka apostel. (Ul. 9:​26-28) Ala cocok do sifat ni si Barnabas tu goar i, dang goar aslina i be na disuratton di Bibel.

NA PORLU TAULAHON LAO MANGAPULI NA ASING

4. Aha do na boi taulahon lao mangapuli roha ni na asing? (Rom 1:​11, 12)

⁴ Molo boi, ro ma hamu manjuppangi nasida. Boi do dipakke Jahowa manang ise pe lao mangapuli roha ni akka naposona. Misalna, disuru Jahowa do sada suru-suruan patoguhon roha ni Panurirang Elia. (1 Raj. 19:​4-7) Lomo do tong roha ni Apostel Paulus pajuppang dohot akka dongan asa boi masipatoguan nasida. (Jaha Rom 1:​11, 12.) Jadi molo ro hamu manjuppangi sasahalak, unang ma holan satokkin hamu disi. Lehon ma tikkimuna asa boi diapuli hamu rohana. (1 Kor. 16:7) Alai molo pe dang boi hamu manjuppangi ibana, boi do ditelepon hamu ibana, dibahen hamu surat, kartu ucapan, manang dikirim hamu pesan na patoguhon rohana. Molo diulahon hamu i, on patuduhon na rade do hamu dipakke Jahowa lao mangapuli roha ni na asing.

5. Sipata, boasa dang sai mura mangapuli roha ni akka dongan?

⁵ Saonari, lam godang do hasusaan na taadopi di ari parpudi on. Alani i, dang sai mura manjuppangi akka dongan lao mangapuli roha ni nasida. Marsiajar ma hita sian si Onesiporus na di Epesus. Tikki dipenjara Apostel Paulus di Rom, lomo do roha ni si Onesiporus lao mangapuli rohana. Jadi, dilului si Onesiporus ma si Paulus. Hape di tikki i, bahaya do situasina. Boi do ibana gabe dipenjarahon manang dipamate. (2 Tim. 1:​16-18) Dos songon i ma akka donganta na di Rusia saonari. Rade do nasida lao mangapuli roha ni akka dongan na dianiaya. Misalna, tikki adong donganta na diboan tu pengadilan, ro do nasida patoguhon donganta i. Hape sasittongna, boi do nasida ditakkup molo ro tusi. Aha do na porlu diulahon hamu asa boi songon nasida? Parsiajari ma sitiruon na dibahen akka naposo ni Debata najolo dohot saonari. Rimangi ma aha do na diulahon nasida lao mangapuli roha ni na asing, jala boha do cara ni nasida toktong marlas ni roha tikki dianiaya.

6. Tikki mangapuli na asing, songon dia do hita maniru Jahowa? (Ida gambar.)

⁶ Tangihon ma nasida. Tikki mabiar Panurirang Elia ala naeng dipamate ibana, dipaboa ibana do perasaanna tu Jahowa. Sebenarna, diboto Jahowa do situasi ni si Elia. Diboto do tong na mabiar situtu ibana. Nang pe songon i, denggan do ditangihon Jahowa si Elia. Tikki na martangiang i, mulak-ulak do si Elia paboahon arsak ni rohana. Alai, toktong do sabar Jahowa manangihon si Elia jala dang muruk. (1 Raj. 19:​9, 10, 14) Songon i do tong dibahen Jahowa tu Panurirang Habakuk. Tikki dipaboa ibana perasaanna mangida akka hajahaton dohot hasusaan na masa di tikki i, denggan do ditangihon Jahowa ibana. Bahkan nang pe hira na disalahon si Habakuk Jahowa, dang muruk Jahowa tu ibana. (Hab. 1:​2, 3) Saonari pe, diboto Jahowa do akka na tahaporluhon. Alai tikki martangiang hita tu Ibana, ditangihon Ibana do i. Tatiru ma Jahowa. Tikki adong donganta na paboahon na di rohana tu hita, denggan ma i tatangihon. Nang pe mulak-ulak ibana paboahon arsak ni rohana jala asal dipandok hatana, unang ma tersinggung hita. Taingot ma na didok di Bibel, ‘Ikkon hatop do hita manangihon.’—Jak. 1:19; Pjm. 7:9.

7. Aha do na porlu taulahon asa taboto na dihaporluhon sasahalak?

⁷ Pikkirhon ma aha do na dihaporluhon ibana. Dang songon Jahowa hita. Dang taboto aha na adong di roha ni sasahalak. Alani i, ikkon manat do tatangihon halak na lao taapuli i. Olo do ra hea taadopi situasi na sarupa songon na diadopi ibana. Alai, unang ma didok rohatta nungnga taboto na dihaporluhon ibana. Alana di situasi sisongon i, dang sai sarupa na tahaporluhon dohot na dihaporluhon halak na asing. Jadi sabar ma hita manangihon ibana, jala tasukkun ma aha do na dihaporluhon ibana.—Poda 20:5.

8. Tikki mate si Lasarus, songon dia do Jesus mangapuli roha ni si Marta dohot si Maria? (Ida gambar.)

⁸ Taida ma songon dia Jesus mangapuli roha ni si Marta dohot si Maria tikki mate si Lasarus. Lungun hian do roha ni si Marta dohot si Maria tikki i. Alai, dang sarupa cara ni Jesus mangapuli roha ni nasida. Tikki dipaboa si Marta songon dia perasaanna, dipaboa Jesus ma taringot haheheon tu ibana. Jala dipapos ma rohana, pasti saut do i. Alai molo tu si Maria, dang songon i dibahen Jesus. Tikki tangis si Maria manjuppangi Jesus, dohot do Jesus tangis. Jala disukkun ibana ma didia dikubur si Lasarus. (Joh. 11:​20-35) Aha ma parsiajaranna tu hita? Taingot ma, dang sai sarupa na dihaporluhon ganup halak. Jadi, porlu do tasesuaihon caratta tikki mangapuli nasida.

9. Songon dia do hita boi mamakke Bibel tikki mangapuli na asing? (Rom 15:​4, 5)

⁹ Pakke ma Bibel. Molo tapakke Bibel tikki mangapuli roha ni sasahalak, boi do i paposson rohana tu akka janji ni Jahowa. (Jaha Rom 15:​4, 5.) Janji ni Jahowa i boi mangapuli jala patoguhon rohana. (Jes. 40:31) Alai, songon dia ma carana asa taboto ayat na cocok tu ibana? Bahen ma daftar ni akka ayat na boi dipakke hamu. Misalna, lului ma i di bukku Akka Ayat na Mangurupi Halak Kristen di topik “Mangapuli; Menghibur”. Asing ni i, pangido ma bantuan ni Jahowa asa denggan caramuna mamakke Bibel tikki mangapuli sasahalak. Pasti dilehon Ibana do tondi parbadia asa diurupi hamu mangingot akka ayat na cocok.—Joh. 14:26.

10. Tikki taapuli roha ni sasahalak, boasa ikkon lambok hita makkatai?

¹⁰ Lambok ma tikki makkatai. Songon naung tabahas, hata Junani na diterjemahon gabe “mangapuli roha” boi do lapatanna “mamodai” manang “manjujui”. Tikki taapuli roha ni sasahalak, sipata porlu do talehon nasehat tu ibana. Tujuanna, lao mangurupi ibana paubahon cara marpikkirna. Alai, ikkon manat do tapikkirhon hata na lao tadokkon. Alana molo dang manat, boi do hatatta i pahaccitton rohana, dang pamaluppon. (Poda 12:18) Taida ma sitiruon na dibahen Jahowa tikki mangurupi si Elia. Sanga do sala cara marpikkir ni si Elia. Tikki i, didok roha ni si Elia nungnga gagal ibana mangulahon tugasna. Jala dirippu ibana dang adong be halak Israel na manomba Jahowa. Alai, dang pittor disalahon Jahowa si Elia. Lambok do Ibana mangurupi si Elia paubahon cara marpikkirna. (1 Raj. 19:​15-18) Tiru ma Jahowa. Burju ma hamu jala manat ma andorang so makkatai. Asing ni i tikki marjamita manang markomentar, pastihon ma hatamuna i patoguhon akka dongan di huria, dang na lao manembaki.

11. Aha do muse na dihaporluhon akka donganta na marsitaonon? (1 Johannes 3:18)

¹¹ Lehon ma bantuan. Sipata lao mangapuli roha ni sasahalak, dang cukkup holan mandok hata na patoguhon roha. Ikkon talehon do tong bantuan tu ibana. (Jaha 1 Johannes 3:18.) I ma na diulahon si Barnabas. Dijual ibana do ladangna jala dilehon do tuhorna tu akka apostel lao mangurupi akka dongan na pogos. (Ul. 4:​36, 37) Saonari, godang do donganta na maniru si Barnabas. Rade do nasida mangurupi akka donganta na susa. Taida ma pengalaman ni si Gabriela na sian Polandia. Tikki ro banjir, gabe sega ma jabu ni nasida. Didok ibana, “Tikki i, mabiar hian do au dohot natua-tuakku jala khawatir do hami. Dang huboto aha na ikkon diulahon hami. Alai, ro ma akka dongan sian piga-piga huria na jonok tu jabunami. Diurupi ma hami jala dipadenggan nasida jabunami holan di bagasan sadari. Sian on, gabe lam pos ma rohakku boi do dipakke Jahowa akka naposona lao mangapuli akka na susa.”

12. Molo dang menyerah hamu tikki mangadopi sitaonon, aha do pengaruh ni i tu akka dongan?

¹² Unang ma menyerah tikki marsitaonon. Tikki dibege si Paulus na toktong setia halak Kristen na di Tessalonik nang pe dianiaya, gabe dipatogu ma rohana. Nungnga bekerja keras ibana mangurupi nasida. Jadi, las hian do rohana tikki mamboto na toktong nasida setia manomba Jahowa. (1 Tes. 3:​5-8) Diboto si Paulus do muse molo toktong ibana setia manomba Jahowa, gabe dipatogu ma akka dongan, termasuk ma na so hea dope pajuppang dohot ibana. (Kol. 2:​1, 2) Dos songon i ma hita. Molo toktong hita setia manomba Jahowa nang pe susa, gabe dipatogu ma akka donganta. Gabe pos ma roha ni nasida pasti urupan ni Jahowa do tong nasida.

13. Aha do muse na ikkon taulahon tikki mangapuli roha ni akka donganta?

¹³ Sabar ma hamu. Tikki taapuli roha ni akka donganta, olo do ra dang sai denggan tanggapan ni nasida. Alai didok di Bibel, toktong ma ‘patogu na asing’. Lapatanna, ikkon mulak-ulak do i taulahon, dang cukkup holan sahali. (1 Tes. 5:11) Jadi, sabar ma hamu tikki mangapuli akka dongan. (1 Tes. 5:14) Alai, boha do molo hamu na porlu diapuli? Aha do na ikkon diulahon hamu?

NA BOI TAULAHON MOLO PORLU HITA DIAPULI

14-15. Aha do na ikkon diulahon hamu tikki adong masalahmuna?

¹⁴ Martangiang ma tu Jahowa. Tikki marsak manang holsoan hamu, pangido ma tu Jahowa asa diapuli rohamuna. (Ps. 94:19) Paboa ma sude na di rohamuna tu Ibana. (Ps. 62:8) Memang, boi do diboto Jahowa perasaanmuna andorang so martangiang hamu. Alai molo dipaboa hamu i tu Jahowa, on patuduhon na porsea do hamu tu Ibana. Pos ma rohamuna, pasti dialusi Jahowa do tangiangmuna i. (Mrk. 11:24) Pilippi 4:​6, 7 mandok, “Pangido hamu ma saluhutna tu Debata marhite tangiang dohot elek-elek mardongan hamauliateon. Asa marhite Kristus Jesus, lehonon ni Debata ma tu hamu hadameon na so boi diattusi jolma, na boi manjaga roha dohot pikkiranmuna.”

¹⁵ Pangido ma bantuan sian halak na asing. Boi do akka dongan mangapuli rohamuna. Alani i tikki adong masalahmuna, boi do i dipaboa hamu tu akka donganta manang sintua. Alai ingot ma, sipata dang sai diboto nasida songon dia perasaanmuna manang aha na dihaporluhon hamu. Jadi, ikkon hamu do na paboahon i tu nasida. (Poda 14:10) Tikki dipaboa hamu perasaanmuna tu nasida, boi do dipangido hamu asa sabar nasida manangihon hamu. Manang asa dilehon ayat dohot artikel na boi mangapuli rohamuna.

16. (a) Tikki adong donganta na mangapuli rohamuna, aha do sipata na diulahon nasida? (b) Aha do na ikkon diingot hamu?

¹⁶ Sabar jala rade ma manalpuhon hasalaan. Tikki diapuli akka dongan rohamuna, olo do ra dang denggan hata manang pambahenan ni nasida. Boi do on mambahen gabe metmet rohamuna. Tikki masa i, sabar ma hamu tu nasida. (1 Kor. 13:​4, 7) Ingot ma na dipaboa di Jakobus 3:​2, “Molo adong halak na so hea sala di pakkataion, halak na so mardosa do i.” Jadi, pikkirhon ma upaya na dibahen akka dongan lao mangapuli rohamuna. Jala ingot ma dos songon hamu, sasittongna lomo do roha ni nasida mangulahon na sittong. Alai sipata, olo do tong sala nasida.—Mat. 26:41.

17. Aha do na ikkon torus taulahon?

¹⁷ Sude do hita porlu diapuli. Boasa? Alana, lam tu susana nama ngolutta di ari parpudi on. Jala lam marsitutu do akka musu ni Debata mangalo hita. Alani i, torus ma hita masipatoguan jala masiapulan.