Sukkun-Sukkun sian na Manjaha

Andigan do akka pamaretta pasahatton boa-boa “dame do sude jala dang adong be sihabiaran”?

Satokkin nai, lao disuanton Jahowa ma tu roha ni sude pamarettaon ni jolma (“na sappulu tanduk”) keinginan “lao mangulahon lomo ni rohana”. Songon na dipaboa di artikel “Sukkun-Sukkun sian na Manjaha” di Joujou Paboahon November 2025, dilehon “na sappulu tanduk” i ma huasona tu “binatang buas na merah songon api” (Perserikatan Bangsa-Bangsa manang PBB). Binatang buas on pe didok do tong “patung ni binatang buas”. (Pgk. 13:​14, 15; 17:​3, 16, 17) Dukkon i, dihancurhon “na sappulu tanduk” dohot binatang buas na baru mandapot huaso i ma sude agama na so sittong. Jadi, andigan do akka pamaretta pasahatton boa-boa “dame do sude jala dang adong be sihabiaran”?a (1 Tes. 5:3) Andorang so dihancurhon do sude agama na so sittong manang dukkon i?

Memang, dang takkas dope taboto andigan akka pamaretta pasahatton boa-boa “dame do sude jala dang adong be sihabiaran”. Molo nungnga taboto andigan jala songon dia i saut, gabe dang toktong be hita jaga. Hape jotjot do didok Jesus tu akka siseanna, “Sai jaga ma hamu.” (Mat. 24:42; 25:13; 26:41) Saonari, tabahas ma unggodang hatorangan taringot surirang na dipaboa Apostel Paulus di suratna tu halak Kristen na di Tessalonik.

Didok Apostel Paulus, “Tikki didok halak, ‘Dame do sude jala dang adong be sihabiaran!’ toppu ma dihancurhon nasida.” (1 Tes. 5:​2, 3) Saleleng on, songon on ma na didok publikasitta taringot ayat i: Dipasahat ma annon boa-boa “dame do sude jala dang adong be sihabiaran” dang leleng andorang so dimulai dope hasusaan bolon. Di tikki i, dihancurhon ma Babel na Balga, i ma sude agama na so sittong. Didok do muse di publikasitta, boa-boa i ma na gabe tanda na lao dimulai nama hasusaan bolon.

Alai dung lam bagas muse diparsiajari taringot on, dang boi dope tabahen kesimpulan molo boa-boa i lao dipasahat andorang so dihancurhon sude agama na so sittong. Olo do ra dipasahat annon boa-boa i dung hancur sude agama na so sittong. Boasa tadok songon i? Taparrohahon ma piga-piga alasan na mangihut.

Terlibat do agama na so sittong di akka porang na masa saleleng on. Didok di Bibel, “Adong do [di “boru-boru na so hasea” manang Babel na Balga] mudar ni . . . akka na tarbunu di tano on.” (Pgk. 17:​1, 5; 18:24) Saleleng on, sude agama na so sittong dang boi mambahen portibi on dame jala aman. Gariada didukung nasida do molo adong na marporang. Gabe lam godang ma kekerasan dohot terorisme. Jadi, olo do ra boa-boa i dipasahat akka pamaretta dukkon dihancurhon sude agama na so sittong. Alai memang, dang takkas dope taboto taringot on.

Na masa dung dipasahat boa-boa “dame do sude jala dang adong be sihabiaran”. Didok si Paulus, “Toppu ma dihancurhon nasida.” (1 Tes. 5:3) Molo boa-boa i dipasahat andorang so dihancurhon sude agama na so sittong, berarti sian na dipasahat boa-boa i sahat tu na dihancurhon sude pamarettaon, adong dope jarak waktuna. Hape didok si Paulus do tong, “toppu do i masa” jala “dang adong sian nasida na boi selamat”. Jadi, olo do ra boa-boa i dipasahat dukkon dihancurhon sude agama na so sittong.

Reaksi ni naposo ni Jahowa tikki dihancurhon sude pamarettaon ni jolma. Didok si Paulus, “Dang di bagasan haholomon hamu akka dongan. Alani i tikki ro ari i, dang na lao tarsonggot be hamu songon panakko na tarsonggot ala naung tiur ari.” (1 Tes. 5:4) Pikkirhon ma on: Molo boa-boa i dipasahat dukkon dihancurhon sude agama na so sittong, diboto akka naposo ni Jahowa ma na lao dihancurhon do sude pamarettaon ni jolma. Alai molo akka pamaretta, dang diboto nasida i. Jadi, pasti tarsonggot do nasida tikki toppu i masa tu nasida.

Taboto do satokkin nai, lao dihancurhon “na sappulu tanduk” dohot binatang buas na mandapot huaso i ma sude agama na so sittong. Dung masa i, dimulai ma hasusaan bolon. Taboto do muse, pasti dipasahat akka pamaretta do boa-boa “dame do sude jala dang adong be sihabiaran”. Alai andigan do i dipasahat nasida? Songon naung tabahas, adong dua kemungkinan. Na parjolo: Lao dipasahat ma boa-boa i andorang so dihancurhon sude agama na so sittong. Na paduahon: Lao dipasahat akka pamaretta ma boa-boa i dukkon dihancurhon nasida sude agama na so sittong. Alai asa taboto andigan sebenarna boa-boa i dipasahat, tapaima ma sahat tu na saut i. Alana biasana, ikkon jolo masa do sada surirang baru pe takkas taattusi taringot i.—Bandingkon tu Johannes 12:16.

Alai, unang ma sai tapikkirhon andigan boa-boa “dame do sude jala dang adong be sihabiaran” i dipasahat. Na uppetting, toktong ma setia hita tu Jahowa. Jala dang soal aha na lao masa, “sai dungo ma hita jala toktong ma sadar pikkiranta”.—1 Tes. 5:6.