Urupi ma Keluargamuna na So Saksi

1-2. Boha do tanggapan ni keluargatta ala marsiajar Bibel hita?

HEA do didok Jesus tu sahalak bawa na naeng gabe siseanna, “Mulak ma ho tu keluargam. Paboa ma sude na binahen ni Jahowa tu ho.” (Mrk. 5:19) Didok Jesus pe songon i, ala diboto ibana do lomo rohatta paboahon akka barita na denggan tu keluargatta.

² Boha do perasaanmuna tikki parjolo sahali diboto hamu hasittongan? Pittor semangat do ra hamu paboahon i tu keluargamuna. Alai, olo do ra dang lomo roha ni nasida mambege i. Manang caramuna pasahatton i mambahen nasida gabe muruk. Molo songon i situasimuna, boha do carana asa toktong hamu setia tu Jahowa jala denggan hubunganmuna tu nasida?

3. Aha do na lao tabahas di artikel on?

³ Di artikel on, adong opat na lao tabahas: (1) Asi ni roha boi mangonjar rohatta patuduhon holong tu keluargatta, nang pe dang olo nasida marsiajar Bibel. (2) Na ikkon taulahon molo haccit rohatta dibahen nasida. (3) Manfaatna molo sabar hita jala toktong berharap na olo do keluargatta marsiajar Bibel. (4) Caratta patuduhon holong tu nasida.

PATUDU MA ASI NI ROHA

4. Boha do Jesus maradoppon akka halak na so olo mambege barita na uli?

⁴ Marsitutu do Jesus mangurupi akka halak asa olo mambege barita na uli. Dipatudos Jesus do dirina tu sahalak parkarejo di porlak anggur. Berupaya do parkarejo i mambahen asa denggan tubu hau anggur i jala marparbue. (Luk. 13:​6-9) Tikki dipaboa Jesus tudosan i, nungnga berupaya ibana mangurupi halak Jahudi asa porsea tu ibana jala gabe siseanna. Lobi sian tolu taon ma Jesus mangulahon i. Boasa marsitutu Jesus mangulahon i? Ala asi rohana tu akka halak, jala i ma na mambahen sabar ibana mangurupi nasida.

5. Boasa asi roha ni Jesus tu halak Jahudi?

⁵ Boasa asi roha ni Jesus tu halak Jahudi? Alana, dang diurupi akka pamimpin agama nasida asa mananda Jahowa. Didok Jesus, dos “songon biru-biru na so adong parmahanna” do nasida. (Mrk. 6:34) Jala andorang so mate Jesus, diandungi ibana do kota Jerusalem. Alana diboto ibana, godang do annon halak na mate ala dang porsea nasida tu Jesus dohot tu Jahowa. (Luk. 19:​41-44) Tatiru ma Jesus. Molo asi rohatta tu keluargatta, gabe taronjar ma rohatta lao mangurupi nasida asa mananda Jahowa.

6. Boasa ikkon sabar hita mangurupi keluargatta na so Saksi? (Galatia 6:9)

⁶ Jaha Galatia 6:9. Nang pe dang pittor olo keluargatta mambege barita na uli, sabar ma hita jala “unang ma hita marnaloja mangulahon akka na denggan”. Boasa? Alana, porlu do tikki di nasida lao manguba cara marpikkirna jala marhaporseaon tu Jahowa. Hamu pe songon i do ra andorang so mananda hasittongan. “Dang ditanda hamu Debata jala dang adong janji ni Debata na lao paimaonmuna.” (Eps. 2:12) Alai, adong do sasahalak na sabar mangurupi hamu. Jadi, hamu pe ikkon sabar do mangurupi keluargamuna lao mananda Jahowa.

TIKKI DANG DENGGAN HATA MANANG PAMBAHENANNA TU HAMU

7. Aha do hira-hira na mambahen dang porsea akka anggi ni Jesus tu ibana?

⁷ Diboto akka anggi ni Jesus do ra mukjizat na dibahen ibana di Galilea. (Luk. 4:​14, 22-24) Alai, dang pittor porsea nasida molo Jesus i Messias. (Joh. 7:5) Boasa? Memang, dang dipaboa alusna di Bibel. Alai pinomatna, adong dua alasanna boasa piga-piga halak Jahudi dang olo gabe sisean ni Jesus. Ra, mabiar do nasida annon gabe dianiaya. (Joh. 9:​18-22) Na asing nungnga ditanda nasida Jesus mulai sian dakdanak dope ibana. Jala dang tarjalo ni nasida molo Jesus i Messias. (Mrk. 6:​1-4) Songon i do ra na dihilala akka anggi ni Jesus. Jala songon i do ra na dihilala keluargamuna.

8. Boasa sipata dang denggan hata manang pambahenan ni keluargatta tu hita?

⁸ Pikkirhon ma boasa songon i hata dohot pambahenan ni nasida. Dohot do ra akka anggi ni Jesus mandok “nungnga rittik be [Jesus]”. (Mrk. 3:21) Boasa didok nasida songon i? Didok di Bibel, sibuk hian do Jesus marbarita dohot pamaluppon akka halak. Sappe dang adong be tikkina mangan. (Mrk. 3:20) Gabe didok akka keluargana ma ibana na fanatik. Olo do ra songon i tong pandangan ni keluargatta tu hita. Didok nasida, fanatik hita tu agamatta. Alani i, tapatudu ma sian hata dohot pambahenatta na masuk akkal do hita.

9. Aha do na porlu taulahon asa denggan pandangan ni keluargatta taringot Saksi Jahowa? (1 Petrus 3:​1, 2) (Ida gambar.)

⁹ Toktong ma burju jala tapatudu ma na masuk akkal hita. Molo denggan hata dohot pambahenatta, boi do i manguba pandangan ni keluargatta taringot Saksi Jahowa. (Jaha 1 Petrus 3:​1, 2.) Misalna, adong ma sahalak donganta borua na so Saksi suamina. Olo do ra gabe kesepian manang muruk suamina molo lao istrina marbarita manang marpungu. Asa unang songon i perasaan ni suamina, boi do disesuaihon ibana jadwalna lao marbarita asa godang tikkina rap dohot suamina. Ra, marbarita ma ibana tikki sibuk suamina manang tikki dang di jabu. Molo olo sahalak istri mambahen penyesuaian sisongon i, olo do ra gabe denggan pandangan ni suamina taringot Saksi Jahowa.

10. Aha do na tatiru sian Jesus?

¹⁰ Unang pola tatanggapi sude hata ni keluargatta. Adong do na mandok Jesus i simokkus jala sisobur anggur. Alai, dang gabe muruk Jesus manang berupaya lao mambuktihon na sala tuduhan i. Lomo do rohana asa diida akka halak songon dia ibana sasittongna. (Mat. 11:19) Dipatudu Jesus do muse na masuk akkal do ibana jala marlas ni roha. (Bandingkon tu Johannes 2:​2, 6-10.) Tatiru ma Jesus. Unang ma pola tatanggapi sude hata ni keluargatta. Alai, tapatudu ma sian tindakanta na masuk akkal do hita jala marlas ni roha. Molo diida nasida taulahon i, gabe diboto nasida ma sala do hape pandangan ni nasida taringot hita.

SABAR JALA TOKTONG BERHARAP

11. Songon dia do Jesus maradoppon akka anggina?

¹¹ Sian Injil, taboto ma toktong do Jesus sabar tu akka anggina. Misalna tikki dibahen Jesus mukjizat di Kana, dohot do ra akka anggina mangida i. (Joh. 2:​11, 12) Alai songon naung dipaboa nakkin, dang pittor porsea akka anggina i. Nang pe songon i, toktong do parduli Jesus tu nasida. Jala songon na dipaboa di Bibel, hira-hira tolu taon dukkon i toktong do lambok Jesus makkatai tu akka anggina.—Joh. 7:​5-8.

12. Aha do na porlu taingot asa toktong hita berharap na olo do keluargatta gabe Saksi?

¹² Sai taingot ma asi ni roha ni Jahowa asa torus hita berharap na olo do keluargatta gabe Saksi. Tikki dihancurhon annon sude agama na so sittong, olo do ra diingot keluargatta naung hea tapaboa i tu nasida.a (Pgk. 17:16) Alani i dung dimulai hasusaan bolon, olo do ra gabe taronjar roha ni nasida lao manomba Jahowa. Jadi mulai sian saonari, berupaya ma hita mangurupi nasida, tarlumobi di tikki susa nasida. Molo taulahon i, gabe diboto nasida ma na holong do rohatta tu nasida jala gabe tertarik ma nasida marsiajar Bibel.

PATUDU MA NA HOLONG ROHAMUNA TU NASIDA

13. Nang pe sibuk hita melayani Jahowa, aha do na porlu taingot?

¹³ Memang, sibuk do hita melayani Jahowa. Alai, unang ma sappe tabahen keluargatta merasa dang adong tikkitta tu nasida manang dang holong be rohatta tu nasida. (Mat. 7:12) Attong, aha do na porlu taulahon? Taparrohahon ma piga-piga carana.

14-15. Aha do na boi taulahon lao patuduhon na holong rohatta tu keluargatta? Bahen ma contoh.

¹⁴ Toktong ma berkomunikasi jala patudu ma na holong rohatta tu nasida. Misalna, boi do tapaboa aha na taulahon baru-baru on. Boi do takirim pesan dohot poto tikki mardalani hita manang tikki rap dohot akka dongan. Boi do muse talehon hadiah manang tabahen surat, asa diboto nasida na parduli do hita jala holong rohatta tu nasida.

¹⁵ Taida ma pengalaman ni sahalak donganta borua na margoar si Anna, na sian Armenia. Jotjot do nasida sakeluarga marpungu tikki adong na marulang tahun manang tikki ari libur. Alai dung gabe Saksi Jahowa si Anna, khawatir do keluargana dang olo be ibana bergaul dohot nasida. Jala khawatir do tong nasida gabe susa annon ngoluna dung gabe Saksi Jahowa. Songon dia do si Anna mangadopi i? Didok ibana, “Hulehon do tikkikku lao mengunjungi keluargakku. Huceritahon ma tu nasida aha na terjadi di ngolukku jala akka aha naung huulahon. Hutogihon do muse nasida ro tu jabukku, jala hupatandahon ma nasida tu akka dongan. Hasilna, gabe ditanda nasida ma akka donganku jala gabe akrab do nasida. Godang do tong keluargakku na mandok marlas ni roha do au. Alani i, dang khawatir be nasida mamikkiri au.”

16. Aha do na diulahon Jesus lao patuduhon na parduli ibana tu si Jakobus? (Ida surat na di toru.)

¹⁶ Patudu ma na parduli hita tu nasida. Dung hehe Jesus, dijuppangi ibana do anggina, si Jakobus, jala makkata-hatai ma nasida. On patuduhon na parduli do Jesus tu si Jakobus. (1 Kor. 15:7) Bayakkon ma songon dia perasaan ni si Jakobus tikki diboto ibana toktong do holong roha ni Jesus tu ibana. On do ra na mambahen pos roha ni si Jakobus molo Jesus i Messias. Dung i, diurupi si Jakobus do anggota keluargana na asing asa porsea nasida molo Jesus i Messias.b—Ul. 1:14.

17. Songon dia do caratta mangulahon poda na di Rom 12:15? (Ida gambar.)

¹⁷ Jaha Rom 12:15. Tapatudu ma na holong rohatta tu keluargatta tikki sonang manang susa nasida. Molo taulahon i, boi do gabe denggan pandangan ni nasida taringot hita.c Misalna tikki tubu gelleng ni nasida, ro ma hita jala talehon ma hadiah. Tikki adong keluargatta na marhabot ni roha, taapuli ma nasida, taurupi, jala boi do tabahen kartu ucapan na patoguhon rohana. Asing ni i, unang ma lupa hita manelepon, mangirim pesan, manang mengunjungi keluargatta, tarlumobi tikki marsitaonon nasida.

18. Songon dia do caratta maniru si Andreas?

¹⁸ Tapatandahon ma keluargatta tu akka dongan sahaporseaotta. Dung diboto si Andreas molo Jesus i Messias, pittor dipatandahon ibana ma si Petrus, donganna saama i tu Jesus. (Joh. 1:​40-42) Boi do tong taulahon songon i. Misalna, tatogihon ma keluargatta ro marpungu manang rap mangan dohot akka donganta. Molo tapatandahon nasida tu akka donganta, boi do diida nasida jolma biasa do tong Saksi Jahowa i.

19. Nang pe dang taihutton be akka perayaan dohot hasomalan ni keluargatta, alai aha do na porlu taulahon? (1 Petrus 3:15)

¹⁹ Jaha 1 Petrus 3:15. Olo do ra dang takkas diattusi keluargatta boasa dang dohot hita mangarayahon akka perayaan manang hasomalan ni nasida. Alai molo toktong burju hita jala taargai nasida, pasti sai diingot nasida do i. Memang, dang olo be hita terlibat tu akka perayaan manang hasomalan ni nasida. Alai di tikki na asing, boi do ro hita tu jabu ni nasida, rap mangan, jala mangalehon hadiah tu nasida. Molo taulahon i, pasti las do roha ni nasida.

UNANG MENYERAH MANGURUPI KELUARGAMUNA

20. Aha do na taparsiajari sian pengalaman ni si Jakobus?

²⁰ Tikki di tano on dope Jesus, dang dohot si Jakobus marbarita dohot ibana. Alai di pudian ni ari, gabe sisean ni Jesus do si Jakobus. (Gal. 1:​18, 19; 2:9) Pasti diparsiajari si Jakobus do akka na diajarhon Jesus. Buktina tikki dibahen ibana surat tu halak Kristen, dipaboa ibana do akka na diajarhon Jesus tikki Jamita di Dolok.d

21. Boasa dang olo hita menyerah mangurupi keluargatta na so Saksi Jahowa?

²¹ Nang pe nungnga berupaya hita patuduhon haburjuon jala parduli tu keluargatta, tetap do ra dang burju nasida tu hita jala dang olo marsiajar Bibel. Alai, unang ma menyerah hita. Toktong ma burju hita tu nasida. Molo taulahon i, berarti na tatiru do asi ni roha ni Jahowa dohot Jesus. (Luk. 6:​33, 36) Asing ni i, toktong ma tahaholongi nasida. Hasilna, olo do ra gabe muba pandangan ni nasida taringot hita. Jala diingot nasida do ra akka naung hea tapaboa taringot Jahowa dohot akka janjina. Jadi molo dang menyerah hita mangurupi keluargatta, olo do ra sada tikki taronjar roha ni nasida manomba Jahowa rap dohot hita.