Bukku Job Boi Mangurupi Hamu Tikki Mangalehon Nasehat

1-2. Boasa dang mura di tolu dongan ni si Job dohot di si Elihu lao mangapuli roha ni si Job?

SI JOB, i ma sahalak bawa na terkenal jala mamora hian do ibana. Alai, mago ma sude artana. Gabe tarsar ma barita i tu akka halak na tinggal di daerah Timur. Alani na masa i, ro ma tolu dongan ni si Job tu Us lao mangapuli rohana. Goar ni nasida, i ma si Elipas, si Bildad, dohot si Sopar. Dung pajuppang nasida dohot si Job, tarsonggot ma nasida.

² Bayakkon ma situasi ni si Job. Mago do sude na adong di ibana. Dang adong be biru-biruna, lombuna, untana, dohot halodena. Jala dibunu do akka hatobanna. Asing ni i, mate do sude gellengna tikki hancur jabu ni nasida dibahen haba-haba. Jala muse, marsahit na parah do si Job. Bisulon do sude dagingna, jala haccit hian dihilala ibana. Bayakkon ma sian na dao, diida tolu donganna i ma hundul si Job di orbuk jala lungun rohana. Aha do na diulahon nasida? Saleleng pitu ari, dang adong manang aha didokkon nasida tu si Job. (Job 2:​12, 13) Dukkon i, adong ma tong sahalak bawa na ro manjuppangi si Job, goarna si Elihu. Hundul ma ibana di labbung ni nasida. Ujungna, makkatai ma si Job. Didok rohana, tumagon do ibana mate jala dang ditubuhon. (Job 3:​1-3, 11) Takkas ma, porlu do si Job diurupi akka donganna i. Adong do kesempatan di nasida lao patoguhon roha ni si Job, jala patuduhon na tutu do nasida dongan na burju. Saonari, taida ma aha do na diulahon nasida.

3. Aha do na lao tabahas di artikel on?

³ Ditogu-togu Jahowa do si Musa lao manurat taringot aha na didokkon dohot na diulahon tolu dongan ni si Job dohot si Elihu. Taboto do sian Bibel, hata na dipasahat si Elihu tu si Job sesuai do tu lomo ni roha ni Jahowa. Alai molo si Elipas, suru-suruan na jahat do na mempengaruhi ibana paboahon hatana tu si Job. (Job 4:​12-16; 33:​24, 25) Alani i ma adong nasehat na denggan dohot na so denggan na tajaha di bukku Job. Molo taparsiajari bukku Job, gabe boi ma taboto songon dia cara na denggan lao mangalehon nasehat tu sasahalak. Saonari, tabahas ma akka contoh na so denggan na dipatudu tolu dongan ni si Job. Dung i, tabahas ma contoh na denggan na dipatudu si Elihu. Asing ni i, tabahas ma aha do na boi diparsiajari halak Israel sian bukku Job, jala aha do manfaatna tu hita saonari.

NASEHAT SIAN TOLU DONGAN NI SI JOB

4. Gabe dipatogu do roha ni si Job di haroro ni tolu donganna i? (Ida gambar.)

⁴ Didok di Bibel, sasittongna tujuan ni tolu donganna i ro tusi, i ma lao “mangapuli ibana”. (Job 2:11) Alai, haroro ni nasida i dang patoguhon roha ni si Job. Boasa? Adong ma tolu alasanna. Na parjolo, dang manat ditangihon nasida si Job, jala dang berupaya nasida mangattusi situasina. Misalna didok nasida, ala na dibahen si Job do kesalahan umbahen na susa ibana.a (Job 4:7; 11:14) Na paduahon, nang pe hira na sittong hata ni nasida, alai dang gabe dipatogu roha ni si Job. Gariada, gabe metmet do rohana. (Job 13:12) Bahkan, didok nasida do akka hata na so denggan tu si Job na mambahen haccit rohana. Misalna, dua hali ma didokkon si Bildad dang marlapatan hata ni si Job i. (Job 8:2; 18:2) Jala kasar do tong hata ni nasida tu si Job. Misalna, didok si Sopar do si Job i “halak na oto”. (Job 11:12) Na patoluhon, memang dang gogo soara ni nasida tikki makkatai tu si Job. Alai hata na didok nasida dohot carana pasahatton i mambahen si Job merasa bersalah jala dang dihaholongi. (Job 15:​7-11) Jadi, sai berupaya do nasida na tolu lao mambuktihon na sala do si Job, jala dang diapuli nasida rohana.

5. Boha do perasaan ni si Job dung mambege nasehat ni si Elipas, si Bildad, dohot si Sopar?

⁵ Gabe malala do ate-ate ni si Job dung mambege hata ni si Elipas, si Bildad, dohot si Sopar. (Job 19:2) Jadi, boi ma dapot rohatta boasa sai berupaya si Job mambela dirina. Jala i ma na mambahen gabe asal dipandokkoni si Job hatana. (Job 6:​3, 26) Taboto do muse, aha na didokkon akka donganna i dang sesuai tu lomo ni roha ni Jahowa. Jala dang asi roha ni nasida tu si Job. Akibatna, gabe dipakke Sibolis ma nasida lao mambahen metmet roha ni si Job. (Job 2:​4, 6) Alai, aha do manfaat ni cerita on tu halak Israel najolo dohot tu hita saonari?

6. Aha do na porlu diingot akka pamimpin ni halak Israel sian tolu dongan ni si Job?

⁶ Manfaatna tu halak Israel. Tikki dilehon Jahowa patikna tu halak Israel, dipillit Ibana ma akka bawa na marbisuk dohot na marpengalaman gabe pamimpin ni nasida. Akka bawa i ditugasson lao mangadili bangso i jala mangurupi nasida mangihutton patik ni Jahowa. (5 Mus. 1:​15-18; 27:1) Ikkon rade do akka bawa i manangihon andorang so mangalehon nasehat manang mangadili bangso i. (2 Kron. 19:6) Asing ni i, porlu do nasida manukkun asa diboto nasida situasi na sasittongna. (5 Mus. 19:18) Jala ikkon burju do nasida tikki makkatai tu halak na mangido bantuan. Boasa? Alana molo dang burju nasida jala dang sabar, gabe dang olo be halak na mangalu-alu i paboahon sude na di rohana. (2 Mus. 22:​22-24) Jadi asa unang songon i, ikkon marsiajar do nasida sian pengalaman ni si Job.

7. Asing ni akka pamimpin ni halak Israel, ise do muse na boi mangalehon nasehat? Jala aha do na boi diparsiajari nasida sian pengalaman ni si Job? (Poda 27:9)

⁷ Dang holan akka pamimpin i na boi mangalehon nasehat. Sude do halak Israel boi mangalehon nasehat tu donganna. Ikkon rade do nasida mangurupi donganna asa lam jonok tu Jahowa, jala rade mamissang donganna molo nungnga diulahon na sala. (Ps. 141:5) Molo diulahon nasida songon i, on patuduhon dongan na burju do nasida. (Jaha Poda 27:9.) Molo dirimangi halak Israel songon dia cara ni si Elipas, si Bildad, dohot si Sopar tikki makkatai tu si Job, gabe diboto nasida ma aha na so boi didokkon dohot na so boi diulahon tikki mangalehon nasehat.

8. Aha do na ikkon taingot tikki mangalehon nasehat? (Ida gambar.)

⁸ Manfaatna tu hita. Tikki susa akka donganta, ikkon sai rade do hita mangurupi nasida. Alai, unang ma tatiru na diulahon tolu dongan ni si Job i. Jadi, aha ma na porlu taulahon? Na parjolo, unang ma hatop-hatop hita mambahen kesimpulan. Ikkon jolo taboto do sude faktana andorang so talehon nasehat. Na paduahon, ikkon sesuai do nasehat na talehon i tu Hata ni Debata. Unang ma talehon nasehat sian pikkiranta sandiri, songon na diulahon si Elipas. (Job 4:8; 5:​3, 27) Na patoluhon, unang ma kasar hatatta tikki mangalehon nasehat. Memang, adong do deba hata ni si Elipas dohot akka donganna i na sittong. Alana di pudian ni ari, dikutip Apostel Paulus do hata ni si Elipas. (Bandingkon Job 5:13 tu 1 Korint 3:19.) Alai godangan hata ni nasida i mambahen haccit roha ni si Job jala paboahon akka na so sittong taringot Debata. Alani i, gabe dianggap Jahowa ma sala sude hata ni nasida. (Job 42:​7, 8) Jadi taingot ma, tikki talehon nasehat tu sasahalak, unang ma tabahen ibana merasa kejam do Jahowa i jala dang makkaholongi ibana. Saonari, tabahas ma aha do na boi taparsiajari sian si Elihu.

NASEHAT SIAN SI ELIHU

9. Boasa porlu dipatogu roha ni si Job jala songon dia do Jahowa mangurupi ibana?

⁹ Sai berdebat do si Job dohot tolu donganna i. Sappe 28 bindu ma hata ni nasida disurat di Bibel. Jala sian hata ni nasida, tarida do na emosi nasida sude. Gabe taattusi ma boasa lam metmet roha ni si Job. Alani i, porlu do diapuli rohana jala dipasingot. Songon dia do Jahowa mangurupi si Job? Dipakke Ibana do si Elihu lao mangalehon nasehat tu si Job. Alai, boasa dang pittor makkatai si Elihu tikki na berdebat i halak si Job? Didok ibana, “Poso dope au alai anggo hamu, nungnga godang umurmuna. Alani i ma dang hudok manang aha, ala hupasangap do hamu.” (Job 32:​6, 7) Diboto si Elihu, biasana marbisuk do akka halak naung matua. Alana, nungnga godang pengalaman ni nasida dibandingkon akka na poso. Alai dung dibege si Elihu aha na dihatai si Job dohot tolu donganna i, makkatai ma ibana. Didok ibana, “Dang umur na manottuhon sasahalak marbisuk, jala dang holan na matua na mangattusi dia na sittong.” (Job 32:9) Dung i, aha ma muse na didokkon si Elihu jala songon dia carana paboahon i?

10. Aha do na diulahon si Elihu andorang so menasehati si Job? (Job 33:​6, 7)

¹⁰ Andorang so dilehon si Elihu nasehat tu si Job, diurupi ibana do si Job asa tenang jala asa olo si Job manangihon hatana. Aha do na diulahon si Elihu? Na parjolo, dikendalihon ibana do emosina. Boasa? Alana didok di Bibel, di mulana i pe muruk situtu do si Elihu. (Job 32:​2-5) Alai ala dikendalihon si Elihu dirina, gabe dang kasar hatana tu si Job. Jala dipatogu ibana do roha ni si Job. Misalna didokkon ibana do tu si Job, “Sarupa do hita di jolo ni Debata na sittong.” (Jaha Job 33:​6, 7.) Na paduahon, dipatudu si Elihu do na ditangihon ibana sude hata ni si Job. Buktina, andorang so dilehon ibana nasehat, diulangi ibana do akka na penting sian hata ni si Job. (Job 32:11; 33:​8-11) Jala diulahon ibana do muse songon i tikki menasehati si Job.—Job 34:​5, 6, 9; 35:​1-4.

11. Songon dia do cara ni si Elihu menasehati si Job? (Job 33:1)

¹¹ Tikki dilehon si Elihu nasehat tu si Job, dang dibahen ibana si Job merasa dang mararga. Diargai ibana do si Job. Buktina, sopan do si Elihu tikki makkatai tu si Job. Alai dang songon i donganna na tolu i. (Jaha Job 33:1.) Asing ni i, dilehon si Elihu do kesempatan tu si Job lao paboahon sude na di rohana. Boasa? Ra diingot si Elihu do tikki na berdebat i si Job dohot tolu donganna, sai naeng dialusi ibana do hata ni nasida. (Job 32:4; 33:32) Dung i, dipasingot si Elihu do si Job ala adong cara marpikkirna na sala. Dipaingot si Elihu ma si Job taringot akka sifat ni Jahowa, i ma bisukna, huasona, hatigoranna, dohot holongna na manoktong i. (Job 36:​18, 21-26; 37:​23, 24) Ala denggan nasehat na dilehon si Elihu, gabe rade ma si Job lao manangihon nasehat sian Jahowa. (Job 38:​1-3) Jadi sian na dibahen si Elihu, aha do na boi diparsiajari halak Israel najolo dohot hita saonari?

12. (a) Aha do na diulahon Jahowa lao mangurupi akka naposona? (b) Aha do na boi diparsiajari halak Israel sian si Elihu?

¹² Manfaatna tu halak Israel. Di jaman ni halak Israel, dipillit Jahowa do akka panurirang lao mangajari jala mamissang bangso i. Misalna di jaman ni akka panguhum, disuru Jahowa do Panurirang Debora lao paboahon tudu-tudu tu bangso i. Jala dipakke Jahowa do tong si Samuel. Nang pe poso dope ibana, disuru Jahowa do ibana paboahon hatana tu halak Israel. (Pangh. 4:​4-7; 5:7; 1 Sam. 3:​19, 20) Asing ni i di jaman ni akka raja di Israel, disuru Jahowa do akka panurirang lao mangurupi bangso i asa toktong setia tu Jahowa. Jala molo dialo nasida Jahowa, disuru Jahowa ma muse akka panurirangna lao mamissang nasida. (2 Sam. 12:​1-4; Ul. 3:24) Jadi, bermanfaat do tu nasida sitiruon na dibahen si Elihu na disurat di bukku Job. Gabe boi ma diattusi nasida aha na boi didokkon tikki mangalehon nasehat jala boha carana paboahon i.

13. Aha do na boi taparsiajari sian si Elihu?

¹³ Manfaatna tu hita. Songon akka panurirang i, lomo do rohatta asa diboto akka halak taringot Jahowa. Jala songon akka panurirang i, lomo do rohatta patoguhon roha ni dongan sahaporseaotta. (1 Kor. 14:3) Alani i, tatiru ma si Elihu. Hamu akka sintua, ikkon rade do hamu ‘patoguhon’ roha ni akka dongan. Alai ikkon manat do hamu tikki makkatai, tarlumobi tu akka dongan na marsak alani sitaononna. Alana, olo do ra gabe ‘asal dipandokkoni nasida hatana’.—1 Tes. 5:14; Job 6:3.

14-15. Songon dia do sahalak sintua maniru si Elihu tikki patoguhon na asing? Paboa ma contohna.

¹⁴ Bayakkon ma situasi on. Adong ma sahalak donganta borua na marmetmet ni roha. Dung i, ro ma sahalak sintua dohot sahalak donganta bawa manjuppangi donganta i lao patoguhon rohana. Dipaboa donganta borua i ma, nang pe marbarita jala marpungu ibana, alai dang las rohana. Aha do na ikkon diulahon nasida lao mangurupi donganta borua i?

¹⁵ Na parjolo, ikkon berupaya do nasida mangattusi perasaan ni donganta borua i. Boha carana? Ikkon sabar do nasida manangihon donganta i. Ra songon i pe perasaan ni donganta borua i, ala didok rohana dang holong roha ni Jahowa tu ibana. Manang marsak situtu ibana ‘mamikkiri akka na porlu di ngoluna’. (Luk. 21:34) Na paduahon, ikkon dipuji nasida do akka na denggan na diulahon donganta borua i. Alana toktong do donganta i marpungu jala marbarita na uli, nang pe dang sai mura situasina. Na patoluhon, dung diattusi nasida situasi dohot perasaan ni donganta borua i, baru ma dijahahon nasida ayat na paposson rohana na holong do roha ni Jahowa tu ibana.—Gal. 2:20.

TORUS MA PARSIAJARI BUKKU JOB

16. Aha do na ikkon taulahon asa dapotta manfaat sian bukku Job?

¹⁶ Jadi, godang hian do parsiajaran na tadapot sian bukku Job. Songon naung taparsiajari di artikel na sebelumna, sian bukku Job gabe taboto do boasa diloas Debata masa hasusaan jala songon dia caratta mangadopi i. Asing ni i, songon naung tabahas di artikel on, taboto ma boi do hita sude mangalehon nasehat na denggan. Boha carana? Tatiru ma si Elihu. Unang tatiru tolu dongan ni si Job i. Alani i, andorang so dilehon hamu nasehat tu sasahalak, denggan do molo diparsiajari hamu bukku Job. Jala molo nungnga leleng dang dijaha hamu bukku on, bahen ma rencana lao manjaha i muse. Pos ma rohamuna, pasti godang do manfaat na dapotmuna sian bukku Job.