Tiru ma Serep ni Roha ni Jahowa

1. Boasa luar biasa serep ni roha na dipatudu Jahowa?

MENURUT hamu, adong do pamimpin di portibi on na serep rohana? Didok hamu do ra dang adong. Alai berbeda do molo Jahowa. Nang pe massai balga huasona, alai serep do rohana. (Ps. 113:​5-8) Jahowa do na paling marserep ni roha di alam semesta on. Dang hea leas rohana mangida manang ise pe. Di artikel on lao tabahas ma opat cara ni Jahowa patuduhon serep ni rohana tikki maradoppon akka jolma. Tabahas ma muse songon dia Jesus maniru serep ni roha ni Jahowa. Molo taparsiajari i, gabe lam jonok ma hita tu Jahowa jala boi ma tatiru serep ni rohana i.

MURA DO JAHOWA DIJONOKI

2. Sian Psalmen 62:​8, aha do na taparsiajari taringot Jahowa? (Ida sampul.)

² Biasana halak siginjang roha, leas do rohana mangida halak na asing, jala dang denggan pambahenanna tu nasida. Akibatna dang olo halak jonok tu ibana. Alai molo Jahowa dang songon i! Serep do rohana. Alani i ma diundang Ibana hita asa jonok tu Ibana jala paboahon sude na di rohatta. (Jaha Psalmen 62:8.) Boi ma dipatudos Jahowa i songon sahalak bapak na burju, na rade manangihon akka gellengna. Songon i ma tong Jahowa. Lomo hian do rohana manangihon tangiang ni akka naposona. Buktina godang do disurat tangiang ni akka naposona i di Bibel. (Jos. 10:​12-14; 1 Sam. 1:​10-18) Alai boha do molo didok rohatta dang tama hita martangiang tu Jahowa?

3. Sian dia do taboto na lomo roha ni Jahowa manangihon tangiangta?

³ Molo didok rohamuna dang tama hamu martangiang tu Jahowa, toktong ma hamu martangiang tu Ibana. Boasa? Di tudosan ni Jesus taringot anak na mago, dipatudos do Jahowa songon bapak na burju. Godang do kesalahan na diulahon anakna. Gabe didok roha ni anakna i ma dang tama be ibana diampuni bapakna. Alai, boha do reaksi ni bapakna dung diida ibana anakna i mulak? Didok Jesus, dung diida ibana anakna sian na dao, pittor “marlojong ma ibana, dihaol, jala diumma ma anakna i”. (Luk. 15:​17-20) Dos songon bapak na di tudosan ni Jesus i, hira na pittor “marlojong” do Jahowa lao mangapuli hita jala paposson rohatta na holong do rohana tu hita. Memang olo do ra merasa bersalah hita manang khawatir. Alai molo toktong martangiang hita tu Jahowa, pasti tangihononna do hita. (Jes. 57:15; And. 3:​19, 20) Jala biasana dipatudu Jahowa do holongna tu hita marhite akka sintua, keluargatta na sahaporseaon, dohot akka dongan na asing. (Jak. 5:​14, 15) Jadi pos ma rohatta, lomo do roha ni Jahowa mangapuli hita alana asi do rohana tu hita, jala lomo rohana asa toktong jonok hita tu Ibana.

4. Sian dia do taboto na lomo roha ni akka halak jonok tu Jesus?

⁴ Songon dia do Jesus maniru Bapakna? Dos songon Jahowa, serep do tong roha ni Jesus. Aha ma buktina? Tikki di tano on ibana, lomo do roha ni akka halak jonok tu ibana. Jala dang mabiar nasida manukkun tu ibana. (Mrk. 4:​10, 11) Asing ni i, tikki disukkun Jesus pandapot ni nasida, barani do nasida paboahon na di rohana. (Mat. 16:​13-16) Tikki dibahen nasida pe kesalahan, dang mabiar nasida gabe muruk Jesus. Alana diboto nasida sai burju do Jesus, marasi ni roha, jala sabar. (Mat. 17:​24-27) Ala sempurna Jesus maniru Bapakna, gabe lam ditanda akka siseanna ma Jahowa. (Joh. 14:9) Gabe diboto nasida ma serep do roha ni Jahowa, jala lomo do rohana marale-ale dohot nasida. Beda hian do Jahowa tu akka pamimpin agama di tikki i, na ginjang rohana jala kasar.

5. Boasa lomo rohatta jonok tu halak na serep marroha?

⁵ Songon dia do hita maniru Jahowa? Halak na serep marroha i, burju, sabar, jala olo memaappon. Molo serep rohatta, lomo ma roha ni akka halak jonok tu hita. (Kol. 3:​12-14) Alai akka halak siginjang roha biasana marlate ni roha do tu halak na asing, merasa dirina na unjago, jala dang olo memaappon. Akibatna dang adong na olo mardongan tu halak sisongon i. Hamu akka sintua, berupaya ma asa lomo roha ni akka halak jonok tu hamu. Aha ma na boi diulahon hamu? Ikkon jotjot do hamu bergaul dohot akka dongan. Berupaya ma hamu asa ro marpungu tu Bale Harajaon. Jala rap marbarita ma hamu sian jabu tu jabu. Molo diulahon hamu i, gabe lam ditanda akka dongan ma hamu, jala dang mabiar nasida lao mangido bantuan sian hamu.

MASUK AKKAL DO JAHOWA

6-7. Paboa ma piga-piga contoh na patuduhon na masuk akkal do Jahowa.

⁶ Biasana kaku do halak na ginjang rohana jala parhata sada. Alai dang songon i molo Jahowa. Serep do rohana jala masuk akkal do Ibana. Olo do Ibana manangihon pandapot ni na asing, bahkan olo do Ibana manguba keputusanna. Hape dao do untimbo pikkiran ni Jahowa sian pikkiran ni manang ise pe. Taparrohahon ma songon dia cara ni Jahowa maradoppon si Miryam, ito ni si Musa. Diprotes si Miryam dohot si Aron do si Musa. Hape di tikki i, wakil ni Jahowa do si Musa. Tindakan ni si Miryam on patuduhon dang diargai ibana Jahowa. Akibatna muruk situtu ma Jahowa tu si Miryam jala dibahen ma ibana marsahit kusta. Alai dipangido si Aron ma bantuan tu si Musa. Dung i dipangido si Musa ma tu Jahowa asa dipamalum si Miryam. Aha do na diulahon Jahowa? Ala serep roha ni Jahowa, olo do Ibana manguba keputusanna jala dipamalum ma si Miryam.—4 Mus. 12:​1-15.

⁷ Taida ma contoh na asing. Marhite sahalak panurirang, dipaboa Jahowa ma tu Raja Hiskia na lao mate ibana. Alani i, dipangido si Hiskia ma asa dipamalum Jahowa ibana. Sappe tangis do ibana mangido i. Boha do tanggapan ni Jahowa? Ditangihon Jahowa do tangiang ni si Hiskia i, jala ditambai Jahowa ma umurna sappe 15 taon nai. (2 Raj. 20:​1, 5, 6) Sian on taboto ma, parduli do Jahowa tu hita jolma. Jala alani serep ni rohana, olo do Ibana manangihon hita.

8. Sian dia do taboto na masuk akkal Jesus? (Mrk. 3:​1-6)

⁸ Songon dia do Jesus maniru Bapakna? Masuk akkal do Jesus. Saleleng di tano on, sai berupaya do ibana mangurupi halak na asing. Misalna, dipamalum Jesus do sahalak bawa di ari Sabbat. Hape di tikki i, didok akka pamimpin agama dang boi i diulahon. (Jaha Markus 3:​1-6.) Sahat tu saonari pe masuk akkal do Jesus. Tarida do i sian carana manguluhon akka huria. Misalna, molo adong sasahalak na mangulahon dosa na balga, sabar do Jesus. Dilehon ibana do tikki asa muba na mangulahon dosa i.—Pgk. 2:​2-5.

9. Boha do caratta patuduhon na masuk akkal hita? (Ida gambar.)

⁹ Songon dia do hita maniru Jahowa? Ikkon serep do rohatta. Jala songon Jahowa, masuk akkal ma hita. (Jak. 3:17) Hamu akka natua-tua, tiru ma Jahowa. Unang ma diharappon hamu asa diulahon gellengmuna lobi sian na tolap ni nasida. Boi do ditiru hamu teladan ni si Jakkob na disurat di 1 Musa 33:​12-14. Unang ma banding-bandingkon hamu akka gellengmuna. Asing ni i hamu akka sintua, tiru hamu ma sikap masuk akkal ni Jahowa. Misalna, olo do ra dang setuju hamu tu keputusan naung dibahen punguan ni akka sintua. Alai molo dang maralo i tu prinsip ni Bibel, ikkon olo do hamu mengalah jala mendukung keputusan i. (1 Tim. 3:​2, 3) Jala sasittongna ikkon berupaya do hita sude ‘patuduhon tu saluhut halak na masuk akkal hita’. (Plp. 4:5) Misalna, molo adong pandapot ni sasahalak na berbeda sian pandapotta, ikkon taargai do pandapotna i. Jala berupaya ma hita mangattusi cara marpikkirna.—Rom 14:1.

SABAR DO JAHOWA

10. Songon dia do Jahowa patuduhon na sabar Ibana?

¹⁰ Molo siginjang roha i dang sabar jala dang lomo rohana paimahon. Alai molo Jahowa dang songon i. Sabar hian do Jahowa! Buktina di jaman ni si Noak, sabar do Ibana paimahon saleleng 120 taon andorang so diripasson Ibana halak na jahat. (1 Mus. 6:3) Gabe boi ma dipagodang-godang si Noak akka gellengna jala dibangun ibana bahtera rap dohot keluargana. Contoh na asing, tikki dibahen Jahowa keputusan lao mangaripasson kota Sodom dohot Gumora, godang hian do sukkun-sukkun ni si Abraham. Alai sabar do Jahowa manangihon i. Molo ginjang roha ni Jahowa, pasti didok Ibana do, ‘Dang adong hakmu manukkun i!’ Alai ala serep roha ni Jahowa, sabar do Ibana tu si Abraham.—1 Mus. 18:​20-33.

11. Songon na dipaboa di 2 Petrus 3:​9, boasa sabar dope Jahowa sahat tu saonari?

¹¹ Sahat tu saonari pe sabar do Jahowa. Buktina dipaima Ibana dope tikki na pas lao mangaripasson portibi na jahat on. Boasa? Alana “dang lomo rohana diripasson manang ise pe, alai naeng ma sude jolma marhamubaon”. (Jaha 2 Petrus 3:9.) Rimangi ma on: Ala sabar Jahowa, boi ma marjuta halak gabe ale-alena. Jala berharap do tong hita asa unggodang muse na manomba Jahowa. Alai nang pe songon i, adong do batas kesabaran ni Jahowa. Memang holong do roha ni Jahowa tu sude jolma. Alai dang pasombuonna torus diulahon nasida lomo-lomo ni nasida. Jala sada tikki, pasti diripasson Jahowa do sude halak na jahat.—Hab. 2:3.

12. Songon dia do Jesus maniru kesabaran ni Jahowa?

¹² Songon dia do Jesus maniru Bapakna? Saleleng marribu taon, sabar do Jesus songon Jahowa. Diida Jesus do songon dia Sibolis memfitnah Jahowa dohot akka naposona na setia. (1 Mus. 3:​4, 5; Job 1:11; Pgk. 12:10) Diida Jesus do muse godang halak marsitaonon. Mangida sudena i pasti naeng pittor ‘diripasson ibana do akka ulaon ni Sibolis’! (1 Joh. 3:8) Alai aha do na mambahen sabar Jesus paimahon i? Sada alasanna i ma ala serep rohana. Diboto Jesus do, holan Jahowa do na marhak manottuhon andigan tikki na pas lao mangulahon i.—Ul. 1:7.

13. Boasa sabar Jesus tu akka apostelna, jala boha do ibana patuduhon i?

¹³ Tikki di tano on Jesus, sabar do ibana tu akka apostelna. Misalna jotjot do marsoal akka apostelna taringot ise na ussangap sian nasida. Alai sai sabar do Jesus jala diurupi do nasida asa muba. (Luk. 9:46; 22:​24-27) Pos do roha ni Jesus, pasti boi do muba akka apostelna i. Boha do molo hamu? Hea do mulak-ulak hamu mangulahon kesalahan na sarupa? Molo i do, pasti mandok mauliate do hamu ala Jesus Rajatta. Raja na sabar do ibana jala diattusi do perasaanta.

14. Boha do carana asa lam sabar hita?

¹⁴ Songon dia do hita maniru Jahowa? Asa boi cara marpikkirta dohot tindakanta songon Jahowa, ikkon adong do di hita “pikkiran ni Kristus”. (1 Kor. 2:16) Boha ma carana? Ikkon tajaha do bukku Injil. Dung i tarimangi ma aha na diulahon Jesus jala boasa diulahon ibana i. Asing ni i, tapangido ma bantuan ni Jahowa asa diurupi Ibana hita lam marserep ni roha jala sabar songon Jesus. Molo berupaya hita maniru pikkiran ni Jesus, gabe boi ma tatiru Jahowa jala gabe lam sabar ma hita tu halak na asing dohot tu diritta sandiri.—Mat. 18:​26-30, 35.

DIARGAI JAHOWA DO AKKA HALAK NA LEA

15. Paboa ma piga-piga contoh na patuduhon diparrohahon Jahowa do akka na lea dohot na pogos. (1 Samuel 2:8)

¹⁵ Jaha 1 Samuel 2:8. Rimangi ma on: Nang pe Jahowa i Debata Natumimbul, alai diparrohahon Ibana do akka na lea dohot na pogos! Godang do akka halak na dianggap lea, alai diargai Jahowa do nasida. Jala piga-piga sian nasida, disuratton do di Bibel. Memang olo do ra dang godang na taboto taringot nasida. Contohna si Debora. Sahalak parorot do ibana, na karejo di keluarga ni si Isak dohot si Jakkob hira-hira 125 taon! Dang pola godang na taboto taringot si Debora on. Alai dipastihon Jahowa do asa disurat si Musa taringot ibana jala paboahon na massai dihaholongi do ibana. (1 Mus. 24:59; 35:​8, surat na di toru.) Contoh na asing, dipillit Jahowa do si Daud gabe raja di Israel. Hape di tikki i poso hian dope si Daud jala sahalak parmahan do ibana. (2 Sam. 22:​1, 36) Dung tubu Jesus, disuru Jahowa ma sada suru-suruan lao manjuppangi piga-piga parmahan. Nasida ma na parjolo sahali mamboto naung tubu Messias di Betlehem. Pasti sada hasangapon do on di nasida. (Luk. 2:​8-11) Jala tikki ro si Josep dohot si Maria mamboan Jesus tu bagas joro, pajuppang ma nasida dohot si Simeon dohot si Hanna. Nungnga matua be si Simeon dohot si Hanna. Alai, dilehon Jahowa do kesempatan na istimewa tu nasida boi mangida Anakna na sasada i. (Luk. 2:​25-30, 36-38) Jadi sian on takkas ma, nang pe Jahowa i Debata Natumimbul, alai ‘diangkat Ibana do akka na lea asa sangap nasida’!

16. Boha do Jesus maniru Jahowa tikki maradoppon halak na asing?

¹⁶ Songon dia do Jesus maniru Bapakna? Dos songon Jahowa, diparrohahon Jesus do akka na lea jala diargai do nasida. Misalna diajarhon ibana do taringot Harajaon ni Debata tu akka ‘na so marsikkola’. (Ul. 4:13; Mat. 11:25) Dipamalum ibana do akka na marsahit. Jala tikki mangulahon i, dibahen ibana do nasida merasa dihaholongi jala diargai. (Luk. 5:13) Asing ni i, di borngin andorang so mate Jesus, disussi ibana do pat ni akka apostelna. Hape biasana ulaon ni sahalak hatoban do i. (Joh. 13:5) Jala andorang so nakkok ibana tu surgo, dilehon ibana do tugas na massai penting tu sude siseanna termasuk hita. Aha ma i? Mangurupi akka halak asa mandapot hangoluan na salelengna.—Mat. 28:​19, 20.

17. Aha do na porlu taulahon lao patuduhon na tahaholongi jala tapasangap akka halak? (Ida gambar.)

¹⁷ Songon dia do hita maniru Jahowa? Tahaholongi ma sude halak. Carana, tapaboa ma barita na uli tu nasida jala taargai ma nasida dang soal suku aha nasida, songon dia warna kulitna, jala aha sikkolana. Nang pe adong keterampilan manang tugasta di huria, ikkon tahaholongi jala tapasangap do sude akka donganta. (Plp. 2:3) Asing ni i, godang dope cara na asing lao patuduhon na tapasangap akka halak. Molo serep rohatta jala sai berupaya hita mangulahon i, pasti las hian do roha ni Jahowa.—Rom 12:10; Sep. 3:12.

18. Boasa lomo rohamuna maniru serep ni roha ni Jahowa?

¹⁸ Molo berupaya hita maniru serep ni roha ni Jahowa, pasti gabe lomo ma roha ni akka halak jonok tu hita, gabe lam sabar ma hita, jala masuk akkal. Songon Jahowa, taargai ma sude halak dang soal songon dia latar belakang ni nasida. Pos ma rohatta, molo berupaya hita maniru Jahowa, pasti gabe lam arga do hita di adopanna!—Jes. 43:4.