“Massai Dihaholongi Debata do Ho”!

1-2. Boha do carana asa pos rohatta na massai arga hita di Jahowa?

DI ADOPAN ni Jahowa, massai arga do sude naposona. Alai, adong do piga-piga sian nasida na merasa dang holong roha ni Jahowa tu nasida. Songon i do tong na dihilala hamu? Molo songon i, aha do na boi mangurupi hamu asa pos rohamuna na massai arga hamu di adopan ni Jahowa?

² Sada carana, jaha ma akka cerita na di Bibel na patuduhon songon dia Jahowa maradoppon akka jolma. Asing ni i, pikkirhon ma taringot cara ni Jesus maradoppon akka halak. Diargai Jesus do sude halak, jala burju do ibana tu nasida. On patuduhon massai holong do roha ni Jesus dohot Jahowa tu akka halak na merasa dirina dang mararga. (Joh. 5:19; Heb. 1:3) Di artikel on, lao tabahas ma: (1) aha do na diulahon Jesus lao paposson roha ni akka halak na massai arga nasida di Jahowa, jala (2) aha do na ikkon taulahon asa pos rohatta na massai arga hita di Jahowa.—Hag. 2:7.

DIPAPOS JESUS DO ROHA NI AKKA HALAK NA MASSAI ARGA DO NASIDA

3. Boha do perasaan ni Jesus mangida halak Galilea?

³ Tikki marbarita Jesus di Galilea, marroan do akka halak lao manangihon ibana jala asa dipamalum. Didok Jesus, “Disusai do nasida jala dang disarihon, dos songon biru-biru na so adong parmahanna.” (Mat. 9:36; ida ma hatorangan na adong di Alkitab Edisi Pelajaran Bahasa Indonesia.) Boasa didok Jesus songon i? Alana, lea do roha ni akka pamimpin agama mangida nasida. Bahkan didok akka pamimpin agama i, halak na “diburai Debata” do nasida. (Joh. 7:​47-49; ida ma hatorangan na adong di Alkitab Edisi Pelajaran Bahasa Indonesia.) Alai dang songon i molo Jesus. Burju jala diargai ibana do nasida. Aha ma buktina? Rade do Jesus mangajari jala pamaluppon nasida. (Mat. 9:35) Asing ni i, dilatik Jesus do akka apostelna asa boi marbarita na uli. Jala dilehon do huaso tu nasida asa boi pamaluppon na marsahit dohot na cacat.—Mat. 10:​5-8.

4. Aha do na boi taparsiajari sian cara ni Jesus maradoppon akka halak na olo marsiajar sian ibana?

⁴ Diargai Jesus do akka halak na olo marsiajar sian ibana. Massai burju do ibana tu nasida. On patuduhon nang pe sasahalak i dang diargai halak na asing, alai massai arga do ibana di Jesus dohot di Jahowa. Jadi molo ro tu pikkiranmuna dang mararga hamu, pikkirhon ma songon dia Jesus maradoppon akka halak na lomo rohana marsiajar sian ibana. Molo diulahon hamu i, gabe diboto hamu ma arga do hamu di Jahowa.

5. Songon dia do situasi ni sahalak borua na pajuppang dohot Jesus di Galilea?

⁵ Jesus dang holan mangajari akka halak. Alai, parduli do tong ibana tu ganup halak. Misalna tikki di Galilea, pajuppang ma ibana dohot sahalak borua naung 12 taon pendarahan. (Mrk. 5:25) Alani sahitna i, gabe dipasiding akka halak do ibana. Alana menurut Patik, ramun do borua i. Jala manang ise na manjama ibana, dohot do gabe ramun. Asing ni i, dang boi be ibana rap dohot halak na asing lao manomba Jahowa di sinagoga manang dohot tu akka perayaan. (3 Mus. 15:​19, 25) Jadi, pasti susa hian do borua i alani sahitna jala gabe merasa dang mararga.—Mrk. 5:26.

6. Aha do na diulahon borua i asa boi malum?

⁶ Lomo hian do roha ni borua i asa dipamalum Jesus. Alai, mabiar do ibana mangido i tu Jesus. Boasa? Ra, maila ibana alani sahitna i. Manang ala ramun ibana, mabiar do ra ibana dipalao Jesus sian tonga-tonga ni akka halak. Alani i ma holan abit luar ni Jesus do na dijama ibana. Pos rohana pasti malum do ibana nang pe holan mangulahon i. (Mrk. 5:​27, 28) Jala tutu do i, malum do ibana. Luar biasa do haporseaonna i. Tikki disukkun Jesus ise na maniop abit luarna, mangakku do ibana. Alai, boha do tanggapan ni Jesus?

7. Songon dia do Jesus maradoppon borua i? (Markus 5:34)

⁷ Diida Jesus, sappe “hitir-hitir” do borua i alani biarna. Gabe asi ma rohana jala dang dimuruki Jesus borua i. (Mrk. 5:33) Lambok do Jesus makkatai, bahkan didok ibana do tu borua i “ale borukku”. Di Bibel, holan tu borua on do hea didok Jesus songon i. Istilah on patuduhon na benar-benar burju jala holong roha ni Jesus tu borua i. (Jaha Markus 5:34.) Ra didok Jesus pe songon i, ala diida ibana do mabiar hian borua i. Pikkirhon ma songon dia perasaan ni borua i tikki mambege hata ni Jesus. Pasti las situtu do rohana ala lambok jala burju Jesus. Ala didok Jesus songon i, pasti gabe dang merasa bersalah be borua i. Ala sabotulna, dang boi borua i ro tu tonga-tonga ni akka halak jala manjama abit luar ni Jesus. Jadi, Jesus dang holan pamaluppon borua i. Alai dipapos Jesus do tong rohana, na massai arga do ibana di Jahowa.

8. Tantangan aha do na diadopi sahalak donganta borua na sian Brasil?

⁸ Saonari pe, adong do piga-piga naposo ni Debata na marsahit. Ala songon i situasi ni nasida, gabe marsak do nasida jala merasa dang mararga. I ma na dihilala donganta si Maria.a Sahalak perintis biasa do ibana di Brasil. Cacat do ibana mulai sian na tubu, dang adong patna duassa dohot tanganna sabola kiri. Didok ibana, “Tikki sikkola dope au, torus do au direhei akka donganku ala cacat au. Bahkan dibahen nasida do gelar-gelar na mangaleai au. Anggota keluargakku pe sipata mambahen au merasa dang mararga.”

9. Aha do na mangurupi si Maria asa pos rohana na massai arga ibana di Jahowa?

⁹ Aha do na mangurupi si Maria? Dung gabe Saksi Jahowa ibana, diapuli akka dongan do rohana. Diurupi do muse ibana mangida dirina songon cara ni Jahowa mangida ibana. Didok si Maria, “Molo husurat haburjuon ni akka dongan di sada bukku, dang siat i sude. Mandok mauliate do au tu Jahowa ala dilehon Ibana akka dongan na massai burju tu au.” Jadi diurupi akka dongan do si Maria asa pos rohana na massai arga ibana di Jahowa.

10. Aha do na masa tu si Maria Magdalena? (Ida gambar.)

¹⁰ Taida ma pengalaman na asing, i ma si Maria Magdalena. Disonggopi pitu suru-suruan na jahat do ibana. (Luk. 8:2) Alani akka suru-suruan na jahat i, olo do ra gabe asing pangalahona dohot carana makkatai. Akibatna, gabe dang olo akka halak jonok tu ibana. Pasti susa hian do dihilala ibana jala mabiar. Ra didok rohana, dang adong na makkaholongi ibana manang na olo mangurupi ibana. Aha do na diulahon Jesus lao mangurupi si Maria Magdalena? Dipalua Jesus ma ibana sian akka suru-suruan na jahat i. Jala ujungna, gabe sisean ni Jesus do ibana. Aha do muse na diulahon Jesus lao paposson roha ni si Maria Magdalena na arga ibana di Debata?

11. Songon dia do Jesus paposson roha ni si Maria Magdalena na arga ibana di Jahowa? (Ida gambar.)

¹¹ Ditogihon Jesus do si Maria Magdalena asa mandongani ibana dohot akka apostelna di ulaon marbarita.b Pasti godang do manfaat na dihilala si Maria ala boi langsung manangihon Jesus mangajari. Dung hehe Jesus, dipataridahon ibana do dirina tu si Maria. Jala si Maria on do na parjolo sahali makkatai dohot Jesus di tikki i. Bahkan disuru Jesus do asa dipaboa si Maria tu akka apostelna taringot haheheonna. Na diulahon Jesus on paposson roha ni si Maria, na massai arga do ibana di Jahowa!—Joh. 20:​11-18.

12. Aha do na mambahen si Lidia merasa dang mararga?

¹² Saonari pe, godang do akka halak na merasa dang mararga songon si Maria Magdalena. Taida ma pengalaman ni sahalak donganta borua sian Spanyol na margoar si Lidia. Naeng digugurhon omakna hian do ibana. Tikki dakdanak dope ibana, dang diurus omakna ibana jala kasar do hata ni omakna tu ibana. Didok si Lidia, “Ala dang holong roha ni omakku tu au, sai berharap do au asa adong na makkaholongi au jala olo gabe donganku. Alai huhilala dang adong na olo makkaholongi au. Alana sai didok omakku do halak na so hasea au.”

13. Aha do na mambahen pos roha ni si Lidia na massai arga ibana di Jahowa?

¹³ Dung marsiajar Bibel si Lidia, gabe muba ma cara pandangna. Ala martangiang ibana tu Jahowa, manjaha Bibel, jala dipatudu akka dongan haburjuon, gabe pos ma rohana na massai arga ibana di Jahowa. Didok si Lidia, “Suamikku pe dohot do tong paposson rohakku. Sai didok ibana do na massai holong rohana tu au. Jotjot do dipaboa ibana akka na denggan sian au. Songon i do tong na diulahon akka dongan.” Jadi pikkirhon ma on: Adong do sasahalak di huriamuna na porlu dipapos rohana na arga ibana di Jahowa?

IDA HAMU MA DIRIMUNA SONGON CARA NI JAHOWA

14. Sian 1 Samuel 16:​7, aha do na taboto taringot cara ni Debata mangida jolma? (Ida kotak “Boasa Arga Akka Naposona di Jahowa?”)

¹⁴ Ingot ma, dang songon cara ni jolma cara ni Debata mangida hamu. (Jaha 1 Samuel 16:7.) Dang soal songon dia penampilan, status sosial, dohot pendidikanmuna, massai arga do hamu di Jahowa. (Jes. 55:​8, 9) Alani i, ida hamu ma dirimuna songon cara ni Jahowa, unang songon cara ni portibi on. Dipaboa do di Bibel taringot akka halak na sipata merasa dang mararga, songon si Elia, si Naomi, dohot si Hanna. Jaha ma taringot nasida. Jala parsiajari ma songon dia Jahowa patuduhon na massai holong rohana tu nasida. Asing ni i, boi do disurat hamu pengalamanmuna na patuduhon massai holong roha ni Jahowa tu hamu jala arga do hamu di Ibana. Boi do muse diriset hamu sian publikasitta taringot marmetmet ni roha.c

15. Boasa ‘massai holong’ roha ni Jahowa tu si Daniel? (Daniel 9:23)

¹⁵ Ingot ma molo toktong hamu setia, massai arga do hamu di Jahowa. Dung marumur 90-an si Daniel, hea ma sada tikki metmet rohana jala “loja hian” dihilala ibana. (Dan. 9:​20, 21) Aha do na diulahon Jahowa lao patoguhon rohana? Disuru Jahowa ma suru-suruan na margoar si Gabriel lao paboahon na “massai dihaholongi Debata” do ibana jala ditangihon Debata do sude tangiangna. (Jaha Daniel 9:23.) Boasa massai holong roha ni Jahowa tu si Daniel? Alana diulahon si Daniel do na sittong jala toktong ibana setia. (Hes. 14:14) Dipastihon Jahowa do asa disurat taringot si Daniel di Bibel lao patoguhon hita. (Rom 15:4) Alani i, molo diulahon hamu na sittong jala setia hamu tu Jahowa, massai arga do hamu di Ibana. Pasti ditangihon Ibana do akka tangiangmuna, songon na dibahen Ibana najolo tu si Daniel.—Mik. 6:​8, surat na di toru; Heb. 6:10.

16. Boasa pos rohamuna Ama parholong do Jahowa i?

¹⁶ Ingot ma, Ama parholong do Jahowa i. Nang pe adong hasalaanmuna, dang i na diparrohahon Jahowa. Gariada, lomo do rohana mangurupi hamu. (Ps. 130:3; Mat. 7:11; Luk. 12:​6, 7) Molo sai dirimangi hamu on, gabe pos ma rohamuna na arga do hamu di Jahowa. Taida ma pengalaman ni si Eliana, sahalak donganta borua sian Spanyol. Ala torus kasar suamina tu ibana, gabe merasa dang mararga ibana jala merasa dang dihaholongi. Didok ibana, “Molo ro perasaan sisongon i tu rohakku, pittor hubayakkon do diabing Jahowa au, dihaholongi, jala dilinggomi.” (Ps. 28:9) Pengalaman na asing, i ma si Lauren, sahalak donganta borua sian Afrika Selatan. Sai didok ibana do tu dirina, “Jahowa do na manarik au marhite holongna na dos songon tali. Gabe boi ma au marale-ale tu Ibana sahat tu saonari. Bahkan dipakke Ibana do au mangajari halak na asing. Sian on huboto ma, holong do rohana tu au jala arga do au di Ibana.”—Hos. 11:4.

17. Boasa pos rohamuna na lomo roha ni Jahowa mangida hamu? (Psalmen 5:12) (Ida gambar.)

¹⁷ Pos ma rohamuna, lomo do roha ni Jahowa mangida hamu. (Jaha Psalmen 5:12.) Didok si Daud, lomo do roha ni Jahowa mangida halak na tigor marroha. Gabe songon “perisai na balga” do Ibana na mangalinggomi nasida. Ingot ma, lomo do roha ni Jahowa tu hamu jala linggomanna do hamu. Molo sai diingot hamu on, gabe songon perisai na balga ma i na boi mangalinggomi hamu tikki ro pikkiran na negatif taringot dirimuna. Sian dia ma diboto hamu na lomo roha ni Jahowa mangida hamu? Songon naung tabahas, dilehon Jahowa do Bibel lao paboahon songon dia perasaanna tu hamu. Asing ni i, dipakke Ibana do akka sintua, ale-alemuna, dohot na asing lao paboahon na massai arga do hamu di Ibana. Jadi boha do perasaanmuna tikki adong na patoguhon hamu?

18. Boasa ikkon olo hamu manjalo hata pujian?

¹⁸ Tikki adong na mamuji hamu, jalo ma i. Boasa? Alana, olo do ra nasida dipakke Jahowa lao paboahon na massai arga hamu di Ibana. Si Eliana naung dipaboa nakkin mandok, “Molo adong halak na mamuji au, sebenarna maol do i tarjalo au. Alai huboto ma dang sesuai i tu na dihalomohon roha ni Jahowa. Jadi berupaya ma au asa manjalo i.” Dihilala si Eliana do tong bantuan sian akka sintua. Saonari, merintis do ibana jala mangurupi gabe komuter jarak jauh di Betel.

19. Boasa pos rohamuna na massai arga hamu di Jahowa?

¹⁹ Nungnga dipapos Jesus rohatta na massai arga do hita di Jahowa. (Luk. 12:24) Jadi sai taingot ma, memang arga do hita di Jahowa. Jala berupaya ma hita mangurupi halak na asing, asa pos roha ni nasida na arga do tong nasida di Jahowa!