Tajaga ma Hadameon Dohot Sada ni Roha na Dilehon Jahowa

DIDOK Apostel Paulus tu halak Kristen di Epesus, “Marsihaholongan ma hamu asa boi sabar tu na asing. Toktong ma hita rade ditogu-togu tondi parbadia asa torus hita marsada. Jala torus ma talului hadameon ala on do na mambahen hita marsada.”—Eps. 4:2, 3.

“Tondi parbadia” do na mambahen hita “marsada” dohot akka dongan. Alai songon na didok si Paulus, ikkon toktong do tajaga hadameon dohot sada ni roha di huria. Jala sude do hita martanggung jawab lao mangulahon i.

Taparrohahon ma tudosan on: Molo adong na mangalehon mobil baru tu hamu, ise do na ikkon mangarawat mobil i? Pasti hamu do kan? Molo sega mobil i ala dang dirawat hamu, hamu do na sala disi, dang na mangalehon i.

Dos songon i ma taringot hadameon dohot sada ni roha di huria. Jahowa do na mangalehon i. Alai hita do na ikkon martanggung jawab manjaga i. Jadi molo adong parsoalanmuna dohot dongan di huria, pikkirhon ma on: ‘Berupaya do au pasaehon parsoalannami i asa boi mardame jala marsada hami?’

“TOKTONG MA” TAJAGA SADA NI ROHA

Songon na didok si Paulus, memang dang sai mura manjaga hadameon dohot sada ni roha. Tarlumobi molo adong donganta na mambahen haccit rohatta. Molo songon i situasina, ikkon sai makkatai do hita tu donganta i lao pasaehon parsoalan i? Dang ikkon songon i. Pikkirhon ma on: ‘Molo huhatai taringot on tu ibana, gabe mardame do hami manang gabe lam balga do masalahna?’ Sipata, dumenggan do pittor tamaappon donganta i manang talupahon parsoalan i.—Poda 19:11; Mrk. 11:25.

Akka gambar: Sahalak donganta bawa memaappon pambahenan ni donganna tu ibana. 1. Dimuruki donganna do ibana. 2. Dipikkirhon ibana do boasa songon i pambahenan ni donganna i. 3. Dijaha ibana ma Bibel jala dirimangi ma i. — Pikkirhon ma on: ‘Molo huhatai taringot on tu ibana, gabe mardame do hami manang gabe lam balga do masalahna?’

Didok Apostel Paulus do muse, ikkon ‘marsihaholongan do hita asa boi sabar tu na asing’. (Eps. 4:2) Lapatanna, ikkon taingot do dang sempurna dope akka donganta dos songon hita. Memang, berupaya do hita asa boi mamakke “pangalaho na imbaru”. (Eps. 4:23, 24) Alai, dang adong nanggo sada pe sian hita na boi sempurna mangulahon i. (Rom 3:23) Jadi molo sai taingot on, gabe boi ma hita toktong sabar tu akka donganta, memaappon nasida, toktong mardame jala marsada.

Molo tamaappon jala talupahon hasalaan ni akka dongan, boi ma toktong tahilala ‘hadameon na mambahen hita marsada’. Di bahasa Junani, hata “na mambahen hita marsada” di Epesus 4:3 boi do tong diterjemahon gabe “jaringan ikat”. Jaringan ikat manang ligamen, i ma jaringan na pasadahon holi-holi tu holi-holi. Dos songon i ma hadameon dohot holong ni roha. On do na mambahen hita marsada jala jonok tu akka donganta, nang pe sipata dang sadalan pikkiranta dohot nasida.

Jadi, molo adong donganta na mambahen haccit rohatta, mangattusi ma hita, unang pittor kritis. (Kol. 3:12) Taingot ma, ala dang sempurna dope hita, pasti hea do tong tabahen haccit roha ni donganta. Molo sai taingot on, boi ma toktong tajaga hadameon dohot sada ni roha na dilehon Jahowa tu hita.