Diattusi Sintua ni Malimta do Perasaanta

1-2. (a) Aha do tujuan ni Jahowa manuru Anakna ro tu tano on? (b) Aha do na lao tabahas di artikel on? (Heber 5:​7-9)

HIRA-HIRA 2.000 taon naung salpu, disuru Jahowa ma Anak haholonganna ro tu tano on. Aha do tujuanna? Lao paluahon jolma sian dosa dohot hamatean, jala lao menghapus sude sitaonon na dibahen Sibolis. (Joh. 3:16; 1 Joh. 3:8) Asing ni i, pengalaman ni Jesus saleleng di tano on boi do mempersiappon ibana gabe Sintua ni Malim na burju jala marasi ni roha. Dukkon tardidi Jesus taon 29 M, mulai ma ibana gabe Sintua ni Malim.a

² Di artikel on, lao tabahas ma songon dia pengalaman ni Jesus tikki di tano on mangurupi ibana gabe Sintua ni Malim na marasi ni roha. Molo taboto taringot on, gabe lam pos ma rohatta martangiang jala jonok tu Jahowa, tarlumobi tikki metmet rohatta alani kesalahan na hea tabahen.—Jaha Heber 5:​7-9.

RO DO ANAK HAHOLONGAN NI DEBATA TU TANO ON

3-4. Akka perubahan aha do na diadopi Jesus dung di tano on ibana?

³ Pasti hea do taadopi perubahan di ngolutta. Misalna, ikkon pinda hita tu inganan na asing jala maninggalhon keluarga dohot donganta. Memang, dang sai mura mangadopi perubahan sisongon i. Alai, dang hea taadopi perubahan songon na diadopi Jesus. Pikkirhon ma on: Ibana do suru-suruan na parjolo ditoppa Jahowa, jala ibana do suru-suruan na umgogo di surgo. Holong hian do roha ni Jahowa tu Jesus. Sai marlas ni roha do Jesus ala boi bekerja sama dohot Debata. (Ps. 16:11; Poda 8:30) Alai di Pilippi 2:7 didok, rade do ibana ‘manadikkon sude na di ibana’, ro tu tano on, jala rap tinggal dohot akka jolma na so sempurna.

⁴ Pikkirhon ma muse taringot situasi ni Jesus dung di tano on ibana. Pogos do natua-tuana. Sian dia taboto? Dung tubu Jesus, holan dua anak ni darapati do na boi dilehon natua-tuana gabe pelean di bagas joro. (3 Mus. 12:8; Luk. 2:24) Dung diboto Raja Herodes naung tubu Messias, marsitutu do ibana lao pamatehon Messias i. Asa selamat Jesus, ikkon lari do natua-tuana mamboan ibana tu Mesir. (Mat. 2:​13, 15) Jadi, beda hian do situasi ni Jesus tikki di tano on dohot di surgo.

5. Situasi na songon dia do na diida Jesus di tano on, jala songon dia do i mempersiappon ibana gabe Sintua ni Malim na marasi ni roha? (Ida gambar.)

⁵ Tikki di tano on Jesus, diida ibana do godang halak na marsitaonon. Jala ibana sandiri pe hea do mangadopi sitaonon, misalna tikki mate bapakna, si Josep. Jadi, diattusi ibana do songon dia perasaan ni akka halak tikki mate na dihaholongi nasida. Asing ni i tikki marbarita Jesus, hea do pajuppang ibana dohot halak na marsahit kusta, na mapitung, na lumpu, dohot na matean anak. Asi do rohana mangida nasida sude. (Mat. 9:​2, 6; 15:30; 20:34; Mrk. 1:​40, 41; Luk. 7:13) Memang tikki di surgo dope Jesus, nungnga diida ibana akka sitaonon na diadopi jolma. Alai dung di tano on, gabe takkas ma diattusi ibana perasaan ni akka halak na marsitaonon i. (Jes. 53:4) Pengalaman ni Jesus di tano on mangurupi ibana lao mangattusi perasaan, arsak ni roha, dohot akka na haccit na ditaon akka jolma. Bahkan ibana sandiri pe hea do loja, marsak, jala marlungun ni roha.

DIPATUDU JESUS DO ROHA SAPAKKILALAAN TU AKKA HALAK

6. Aha do na taparsiajari sian surirang ni si Jesaya taringot Jesus? (Jesaya 42:3)

⁶ Saleleng di tano on Jesus, godang do diida ibana akka halak na marsitaonon ala dibahen na so adil tu nasida. Jala asi do roha ni Jesus mangida nasida. Na diulahon Jesus on manggohi surirang na dipaboa Jahowa tu si Jesaya. Di Akka Bukku Heber, sipata dipatudos do halak na mamora jala na gogo songon taman na subur manang hau na balga. (Ps. 92:12; Jes. 61:3; Jer. 31:12) Alai molo halak na pogos jala na susa dipatudos do songon batang ni bulu naung maropuk dohot sumbu na mellep, na so adong be gunana. (Jaha Jesaya 42:3.) Ditogu-togu Jahowa do si Jesaya manurat i. Tujuanna lao paboahon taringot holong dohot asi ni roha na lao dipatudu Jesus tu akka halak na so diargai.

7-8. Songon dia do Jesus manggohi surirang ni si Jesaya?

⁷ Dipaboa si Mateus do songon dia Jesus manggohi surirang ni si Jesaya i. Didok ibana, “Dang ponggolhononna batang ni bulu naung maropuk, jala dang bahenonna mittop sumbu na mellep.” (Mat. 12:20) Godang do mukjizat na dibahen Jesus lao mangurupi halak na susa dohot na so diargai halak na asing. Misalna, hea do Jesus pajuppang dohot sahalak bawa na marsahit kusta. Pasti didok roha ni bawa i, dang na boi be ibana malum jala dang boi be ibana marsaor dohot keluargana manang akka donganna. (Luk. 5:​12, 13) Dung i, hea do muse pajuppang Jesus dohot sahalak bawa na nengel jala na hallang makkatai. Bayakkon ma songon dia perasaan ni bawa i tikki mangida akka halak makkata-hatai. Alai, dang diattusi ibana aha na didok nasida. (Mrk. 7:​32, 33) Alai dang holan i na mambahen lungun roha ni nasida.

⁸ Di tikki i, godang do halak Jahudi na porsea molo adong halak na marsahit manang na cacat, alani dosana do i manang alani dosa ni natua-tuana. (Joh. 9:2) Alani i, gabe jotjot ma dibahen halak Jahudi na so denggan tu nasida, jala gabe merasa dang berharga be nasida. Alai songon na disurirakkon si Jesaya, dipamalum Jesus do nasida jala diurupi do nasida mamboto na parduli do Debata tu nasida. Aha ma na taparsiajari sian on taringot Jesus?

9. Sian Heber 4:​15, 16, aha do na taboto taringot Sintua ni Malimta?

⁹ Jaha Heber 4:​15, 16. Di bahasa aslina, hata “diattusi” di ayat on lapatanna boi makkilala lungun ni roha dohot akka na haccit na ditaon sasahalak. Jadi pos ma rohatta, diattusi Jesus do perasaanta dohot akka sitaononta, jala asi do rohana tu hita. Tarida do i sian akka mukjizat na dibahen ibana najolo. Dipamalum ibana pe akka halak, dang holan ala na boi ibana mangulahon i. Alai ala parduli do ibana tu nasida jala lomo rohana mangurupi nasida. Misalna, tikki dipamalum ibana sahalak bawa na marsahit kusta. Sebenarna, boi do dipamalum Jesus bawa i sian na dao. Alai olo do Jesus manjama bawa i. Hape saleleng martaon-taon, dang adong na olo manjama bawa i. Asing ni i, tikki naeng dipamalum Jesus sahalak bawa na nengel, diboan ibana do bawa i dao sian akka halak. Pikkirhon ma muse taringot sahalak borua naung bertobat, na manucci pat ni Jesus mamakke iluna. Lea do roha ni sahalak Parise mangida borua i, alai dipasingot Jesus do ibana. (Mat. 8:3; Mrk. 7:33; Luk. 7:44) Jadi sian akka contoh on, taboto ma dang hea lea roha ni Jesus mangida akka na marsahit manang halak na hea mangulahon dosa na balga. Holong do roha ni Jesus tu nasida, jala diundang do nasida asa jonok tu ibana. Pos ma rohatta, songon i do tong bahenon ni Jesus tu hita.

TATIRU MA SINTUA NI MALIMTA

10. Aha do na diparade organisasi lao mangurupi akka halak na so boi marbinege dohot na so pola takkas marnida? (Ida gambar.)

¹⁰ Ala siihutton Jesus hita, tatiru ma ibana. Tapatudu ma holong, roha sapakkilalaan, dohot asi ni roha tu halak na asing. (1 Ptr. 2:21; 3:8) Memang, dang boi tapamalum akka halak na so boi marbinege dohot na so boi marnida. Alai, boi do taurupi nasida asa jonok tu Jahowa. I ma na diulahon organisasitta. Diparade do akka publikasi di lobi sian 100 bahasa isyarat. Adong do muse publikasi na mamakke huruf braille di lobi sian 60 bahasa. Jala dibahen do video na mamakke deskripsi audio di lobi sian 100 bahasa. Sudena on boi do mangurupi akka halak na so boi marbinege dohot na so pola takkas marnida asa jonok tu Jahowa dohot tu Jesus.

11. Songon dia do organisasi ni Jahowa maniru asi ni roha ni Jesus? (Ulaon ni Apostel 2:​5-7, 33) (Ida gambar.)

¹¹ Najolo dung hehe Jesus, dilehon ibana do tondi parbadia tu akka siseanna. Tujuanna, asa boi akka na ro tu perayaan Pentakosta mambege barita na uli “di bagasan bahasa ni nasida”. (Jaha Ulaon ni Apostel 2:​5-7, 33.) Saonari pe, diurupi Jesus do organisasi asa paradehon publikasi tu lobi sian 1.000 bahasa, termasuk ma akka bahasa na so dipakke godang halak. Misalna, piga-piga bahasa na dipakke penduduk asli ni Amerika. Holan otik do halak na mamakke bahasa i di Amerika Utara dohot Selatan. Alai, diterjemahon do publikasitta tu lobi sian 160 bahasa ni nasida. Asing ni i, diterjemahon do tong publikasitta tu lobi sian 20 bahasa Romani. Hape otik do halak na mamakke bahasa i di Eropa. Hasilna, boi ma marribu halak na mamakke bahasa i marsiajar hasittongan. Sian on taboto ma, marsitutu do organisasi mangurupi sude halak asa mananda Jahowa.

12. Bantuan aha do muse na diparade organisasi ni Jahowa?

¹² Asing ni mangurupi akka halak mamboto barita na uli, diurupi organisasi do akka korban bencana alam. Marribu do akka donganta na rade mangurupi akka korban bencana i. Asing ni i, dibangun organisasi do akka inganan parpunguan asa boi akka halak marpungu disi lao marsiajar taringot Jahowa.

URUPAN NI SINTUA NI MALIMTA DO HAMU

13. Songon dia do Jesus mangurupi hita saonari?

¹³ Parmahan na burju do Jesus. Alani i, sai diurupi ibana do hita asa toktong jonok tu Jahowa. (Joh. 10:14; Eps. 4:7) Alai sipata, alani borat ni sitaononta, olo do tahilala gabe songon batang ni bulu na maropuk manang songon sumbu na mellep hita. Misalna, ala marsahit na parah, ala tabahen kesalahan, manang ala dang denggan hubungatta dohot donganta di huria. Akibatna, gabe dang taingot be pakkirimonta di ari na naeng ro, ala holan masalahta i na sai tapikkiri. Alai ingot ma, diboto Jesus do situasitta jala diattusi ibana do perasaanta. Asi do rohana tu hita jala olo do ibana mangurupi hita. Dilehon ibana do tondi parbadia asa margogo hita. (Joh. 16:7; Tit. 3:6) Asing ni i, dilehon ibana do akka sintua dohot akka dongan di huria lao patoguhon jala mangurupi hita.—Eps. 4:8.

14. Aha do na porlu taulahon molo metmet rohatta?

¹⁴ Molo metmet rohamuna, pikkirhon ma taringot Sintua ni Malimta Jesus. Ingot ma, disuru Jahowa pe ibana ro tu tano on dang holan lao manobus hita. Alai asa boi do takkas diattusi ibana songon dia situasi ni akka jolma na marsitaonon. Jadi molo metmet rohamuna alani kesalahan manang hagaleonmuna, rade do Jesus mangurupi hamu ‘di tikki na dihaporluhon hamu’.—Heb. 4:​15, 16.

15. Aha do na mangurupi donganta si Stefano mulak muse tu huria?

¹⁵ Diurupi Jesus do tong hita mangalului jala mangurupi akka biru-biru ni Jahowa na mago. (Mat. 18:​12, 13) Taparrohahon ma pengalaman ni si Stefano.b Dukkon 12 taon ibana dipakaluar sian huria, ro ma ibana marpungu. Didok ibana, “Tikki na ro i au marpungu, maila do au. Alai lomo do rohakku mulak muse tu Jahowa jala boi rap muse dohot akka dongan.” Dung i, didok ibana, “Lambok do akka sintua mangurupi au. Memang sipata, olo do au merasa dang berharga ala hutinggalhon Jahowa. Alai, dipaingot akka sintua do na lomo roha ni Jahowa dohot Jesus asa unang menyerah au. Jadi tikki dijakkon muse au di huria, sude do akka dongan menyambut au dohot keluargakku. Dung i, marsiajar Bibel ma istrikku. Jala saonari, rap ma hami melayani Jahowa.” Jadi molo taurupi akka halak na bertobat mulak muse tu huria, pasti las situtu do roha ni Sintua ni Malimta!

16. Boha do perasaanta ala Jesus do na gabe Sintua ni Malimta?

¹⁶ Tikki di tano on Jesus, dilehon ibana do bantuan tu godang halak di tikki na pas. Pos ma rohatta, saonari pe bahenonna do tong songon i tu hita. Jala haduan di tano na imbaru, diurupi ibana ma hita asa benar-benar malua sian dosa jala gabe sempurna. Jadi, mandok mauliate do hita tu Jahowa ala nungnga dilantik Ibana Anakna gabe Sintua ni Malim na mangattusi perasaanta. On pe patuduhon na massai holong do roha ni Jahowa tu hita jala asi do rohana mangida hita.