Diurupi Ibana do Bangsona asa Mulak Muse Manomba Jahowa

MARUMUR onom taon ma si Josia tikki mate oppungna Raja Manasse. Ra diboto si Josia do godang akka na jahat na diulahon oppungna i. Alai ujungna, bertobat do oppungna i jala setia manomba Jahowa. Pasti balga hian do pengaruh ni pertobatan ni oppungna i di ngolu ni si Josia. Alai dung mate oppungna i, bapakna ma na gabe raja, i ma si Amon. Jahat do si Amon, dijujui ibana do bangsona asa manomba debata na so sittong, akka patung, jala mangulahon akka na jahat. Holan dua taon do si Amon mamaretta, dung i mate ma ibana. Ujungna gabe raja ma si Josia tikki marumur ualu taon.

Ra marsiajar do si Josia taringot Jahowa sian Panurirang Sepania, Panurirang Jeremia, Panurirang Borua Hulda, dohot Sintua Malim Hilkia. Didok di Bibel, “Mulai ma disomba [si Josia] Debata ni si Daud ompuna i. Tikki i poso dope ibana [hira-hira marumur 16 taon].” Dung marumur hira-hira 20 taon si Josia, disuru Jahowa do ibana mangurupi halak Juda asa mulak muse manomba Ibana. Ikkon diurupi si Josia do bangsona i asa unang be mangulahon na jahat dohot manomba debata na so sittong. Pasti porlu do habaranion di si Josia lao mangulahon i, alana poso dope ibana di tikki i.

Dang holan i, lao do muse si Josia tu akka luat na hea diingani harajaon na sappulu marga di Israel. Godangan sian akka halak na tinggal di luat i dang halak Israel, alana nungnga diboan halak Israel gabe tawanan tu Asiria. Alai nang pe songon i, tetap do dihancurhon si Josia akka mezbah na dipakke lao manomba debata na so sittong dohot akka patung na adong dope disi.

Hira-hira lima taon dukkon i, disuru si Josia do akka bawa lao padenggatton bagas joro ni Jahowa. Di tikki i, dapot ni Sintua Malim Hilkia ma sada bukku na marisi Patik ni si Musa. Nungnga leleng hian bukku on, jala si Musa sandiri do ra na manurat bukku on. Diboan sekretaris ni si Josia ma bukku on tu si Josia, jala dijahahon ma i di jolona. Manat do ditangihon si Josia isi ni Patik i, jala massai lungun ma rohana dung mambege i. Gabe lam takkas ma diboto ibana, nga dao hian hape manimbil bangso i sian Patik ni Debata. Jala disadari si Josia ma, na muruk situtu do Jahowa tu bangsona. Aha do na diulahon si Josia dukkon i? Songon dia do ibana patuduhon habaranion?

Pittor disuru si Josia ma lima bawa lao mangalului petunjuk sian Jahowa. Lao ma nasida manjuppangi Panurirang Borua Hulda. Dipaboa si Hulda ma na muruk situtu do Jahowa tu bangsona, ala nungnga leleng nasida dang mangoloi Ibana. Jala na lao paroon ni Jahowa nama jea tu Juda dohot Jerusalem. Alai didok si Hulda do muse na diida Jahowa do sude na diulahon si Josia. Dioloi si Josia do Jahowa, jala marsitutu do ibana mangurupi bangsona asa mulak muse manomba Jahowa. Alani i didok Jahowa do, dang lao masa jea i saleleng mangolu si Josia.

Alai nang pe songon i, torus do diurupi si Josia bangsona asa mulak muse manomba Jahowa. Dibahen ibana dohot bangso i do sada parjanjian tu Jahowa. Marjanji do nasida lao mangulahon sude na tarsurat di Patik ni Debata. Jala lam marsitutu do si Josia manghancurhon sude patung dohot ibadat na so sittong na adong di luat i. Dukkon i, dibahen ibana ma perayaan Paska na balga. Dilehon ibana dohot akka pejabatna do massai godang binatang lao dipelehon tu Jahowa. Jala di perayaan i, adong do akka parende na pasahatton ende puji-pujian tu Jahowa. On ma sada sian perayaan Paska na umbalga na hea dirayahon naposo ni Debata.

Barani do si Josia pasohon ibadat na so sittong jala manghancurhon akka patung. Upayana i patuduhon na togu do haporseaonna tu Jahowa. Tikki ditutung ibana holi-holi na dipakke lao tu ibadat na so sittong, gabe saut ma surirang na dipaboa 300 taon sebelumna. (1 Raj. 13:2) Di Juda, dihancurhon ibana do inganan lao manomba debata na so sittong na dibahen di jaman ni si Salomo. Alai di sada tikki, dibahen si Josia do sada keputusan na sala. Lao do ibana marporang mangalo Firaun na sian Mesir na margoar si Neko. Hape nungnga didok si Neko asa unang ro si Josia mangalo ibana, alana boi do gabe mate si Josia. Jala didok si Neko, paretta sian Jahowa do i. Alai dang ditangihon si Josia hata ni si Neko i. Tetap do dialo ibana si Neko. Memang sian keputusanna i tarida do molo si Josia i halak na barani, alai sebenarna keputusan na sala do i jala dang marbisuk. Ujungna gabe mate ma ibana di parporangan i tikki marumur 39 taon.

Gabe dilupahon Jahowa do sude akka na denggan naung diulahon si Josia? Daong! Buktina, disurat si Jeremia do sada ende taringot lungun ni rohana alani parmate ni Raja Josia. Jala saleleng martaon-taon sai diendehon naposo ni Jahowa do ende i. Molo dipahehe haduan si Josia, boi ma dijaha ibana kisah taringot akka na diulahon ibana na disurat di Bibel dohot ende na dibahen si Jeremia i. Takkas ma, massai holong do roha ni Jahowa tu si Josia, jala dang dilupahon Jahowa haporseaon dohot habaranion naung dipatudu ibana.

Jaha ma ceritana di:

• 2 Raja-Raja 22:1–23:30

• 2 Kronika 33:21–35:27

Na lao dibahas:

Boha do cara ni si Josia patuduhon habaranion?

StockStudio/Alamy Stock Photo

1. 4. Nungnga didok si Hulda hian na lao dikuburhon do si Josia “di bagasan dame”. Songon dia do surirang on dipasaut, hape mate di parporangan do si Josia? (2 Raj. 22:20; w00 15/9 30 ¶2-3-wcgr)

   Alusmuna

Pikkirhon ma Aha Parsiajaranna

• Adong do piga-piga naposo ni Jahowa na so manomba Jahowa natua-tuana. Aha do na boi diparsiajari nasida sian kisah ni si Josia na toktong setia, nang pe dang setia bapakna tu Jahowa?

  Alusmuna

• Dipangido si Josia do bantuan lao mangattusi lapatan ni Patik na dijahahon tu ibana. (2 Kron. 34:21) Aha do na boi tatiru sian ibana? B

  Alusmuna

  

• Songon dia do muse caramuna maniru habaranion ni si Josia?

  Alusmuna

Rimangi ma

• Sian kisah on, aha do na boi huparsiajari taringot Jahowa?

  Alusmuna

• Aha do hubungan ni kisah on tu janji ni Jahowa taringot Paradeiso?

  Alusmuna

• Aha do na lao husukkun annon tu si Josia molo nungnga dipahehe ibana?

  Alusmuna

Ida ma Muse on

Ida ma aha na boi diparsiajari hamu sian keputusan na dibahen si Josia dohot dua halak na asing na gabe raja di Juda tikki poso dope.

“Akka na Poso, Keputusan na Songon dia do na lao Dibahen Hamu?” (w23.09 8-13)

Alani gogona sandiri do umbahen na marhasil si Josia paulakkon ibadat na sittong? Ida ma alusna di video drama na mangihut.

Taringot si Josia: Mangkaholongi Jahowa jala Mangkasogohon na Jahat​—Bagian II—Cuplikan (3:43)