35 SI MANASSE
Barani do Ibana Bertobat
TIKKI marsahit na parah si Hiskia jala naeng mate, dibahen Jahowa ma mukjizat, dipamalum ma sahitna. Dang leleng dukkon i, tubu ma anak ni si Hiskia, goarna si Manasse. Raja na burju do si Hiskia jala setia tu Jahowa. Alai tikki marumur 12 taon si Manasse, mate ma si Hiskia. Dung i, si Manasse ma na gabe raja manggattihon ibana. Alai dang ditiru si Manasse bapakna si Hiskia, dang disomba ibana Jahowa.
Massai godang do hajahaton na diulahon si Manasse. Saleleng martaon-taon, disomba ibana do akka patung dohot debata na so sittong. Jala dijujui ibana do muse akka rakyatna asa mangulahon na sarupa. Mardatu do ibana jala ditutung ibana do akka anakna. Asing ni i, godang do muse halak na dipamate si Manasse. Alani hajahatonna i, gabe godang ma halak di Jerusalem na mangulahon akka na jahat, jala on mambahen Jahowa gabe muruk. Alani i, disuru Jahowa ma panurirangna lao pasingotton si Manasse. Alai dang olo ibana manangihon. Nang pe songon i, gabe teladan do ibana taringot patuduhon habaranion. Boasa? Taida ma ceritana.
Di sada tikki, toppu ma muba ngolu ni si Manasse. Ala dang olo ibana manangihon sipasingot na dipasahat panurirang ni Debata, gabe dipaloas Debata ma halak Asiria manaluhon Juda. Didok di Bibel, “Ditakkup ma si Manasse mamakke hait-hait, diikkat ma tanganna mamakke dua ratte na sian tombaga, jala diboan ma ibana tu Babel.” Pasti haccit hian do dihilala si Manasse saleleng di pardalanan tikki diboan ibana tu Babel gabe tawanan. Jala pasti maila hian do ibana di tikki i.
Massai jahat do di Manasse, alai dilehon Jahowa do kesempatan tu ibana lao bertobat
Tikki gabe tawanan si Manasse di Babel, dirimangi ibana ma sude akka na jahat na diulahon ibana saleleng on. Ra di tikki i merasa kesepian do si Manasse jala didok rohana dang na lao boi ibana bebas. Gabe disadari si Manasse ma, dang adong hape gunana na disomba ibana debata na so sittong saleleng on, alana dang boi ibana diurupi. Jala pasti menyesal do ibana ala hea dipelehon akka anakna tu akka debatana i. Ujungna, disadari si Manasse ma na ikkon muba do ibana. Na parjolo diulahon si Manasse, i ma martangiang tu Jahowa jala “sai dipatutoru ibana ma dirina di jolo ni Debata ni akka ompuna” i. Diida Jahowa do naung muba si Manasse jala ditangihon do tangiangna i. Ala diida Jahowa naung lam serep roha ni si Manasse, gabe lam jonok ma Jahowa tu ibana. (Ps. 138:6) Mangelek-elek ma si Manasse tu Jahowa, jala torus do ibana martangiang asa asi roha ni Jahowa tu ibana.
Songon dia do tanggapan ni Jahowa tu tangiang ni si Manasse i? Didok di Bibel, ‘Gabe asi ma roha ni Debata tu ibana jala ditangihon do pangidoanna i’. Luar biasa do cara ni Jahowa patuduhon asi ni rohana tu si Manasse. Dibebasson Jahowa ma si Manasse jala “dibahen ma muse ibana mamaretta di Jerusalem”. Gabe adong ma kesempatan di si Manasse lao patuduhon naung tutu ibana bertobat.
Saleleng martaon-taon, godang do halak di Jerusalem na gabe mangulahon na jahat ala dipengaruhi si Manasse. Jadi dung mulak si Manasse tu Jerusalem, ikkon benar-benar diandalhon ibana do Jahowa lao mangurupi akka rakyatna i asa bertobat. Ra mabiar do si Manasse atik boha dang olo nasida manangihon ibana, manang gabe muruk ala naung muba ibana. Alai nang pe songon i, tetap do barani si Manasse lao mangulahon na sittong. Dibangun si Manasse ma akka tembok lao melindungi Jerusalem. Dung i, dihancurhon ibana ma akka patung na adong di kota i dohot na adong di bagas joro. Dipajongjong ibana ma muse inganan mangalehon pelean tu Jahowa, jala dilehon ibana ma akka pelean disi. Alai na uppetting, dijujui ibana do asa ‘disomba akka rakyatna muse Jahowa Debata ni Israel’. On ma na ummaol diulahon si Manasse. Alana sebelumna, ibana do na manjujui akka rakyatna asa manomba debata na so sittong. Alai dipatudu si Manasse do na benar-benar ibana bertobat. Sian on, gabe taboto ma akka sifat ni Jahowa na luar biasa. ‘Burju do Ibana jala rade manalpuhon hasalaan’.—Ps. 86:5.
Nang pe naung bertobat si Manasse, alai dang boi dipadenggan ibana sude masalah na terjadi alani dosana najolo i. Memang diampuni Jahowa do si Manasse. Alai dihukum Jahowa do rakyat ni si Manasse na mangulahon akka na jahat dohot na mambunu di tikki pamarettaon ni si Manasse. Dang ditiru rakyatna i si Manasse, dang olo nasida muba. Haru si Ammon anak ni si Manasse dang olo muba, jala toktong do diulahon ibana akka na jahat. Nang pe songon i diurupi si Manasse do pahoppuna, i ma si Josia, asa makkaholongi Jahowa. Pasti torus do diingot si Josia na dipatudu oppungna do habaranion asa boi patuduhon serep ni roha jala muba. Nang pe jahat si Manasse saleleng martaon-taon, alai ujungna muba do ibana. Jala sahat tu ujung ni ngoluna, pos do rohana na holong roha ni Jahowa tu ibana jala diampuni do ibana.
Jaha ma ceritana di:
Na lao dibahas:
Boha do cara ni si Manasse patuduhon habaranion?
Bagas ma Parsiajari
1. Didok di Bibel, “unjahat do [si Manasse] sian sude halak Amori na mangolu andorang so ibana” na tinggal di Kanaan. Sian on, aha do na boi taboto taringot si Manasse? (2 Raj. 21:11; w00 15/10 16 ¶5-6-wcgr; gl 10 ¶5, surat na di toru-wcgr)
2. Aha do na dapot ni akka arkeolog na patuduhon na tutu do hea mangolu si Manasse jala halak Asiria do na marhuaso di tikki i? (it “Si Manasse” No. 4 ¶2-wcgr) A
© The Trustees of the British Museum. Licensed under CC BY-NC-SA 4.0. Source
Gambar A: Tarsurat do goar ni “si Manasse, raja ni Juda,” di Prisma Esar-hadon
3. Aha do na mambuktihon na tutu do halak Asiria mambahen hait-hait tu tawanan ni nasida? (2 Kron. 33:11; it “Hait-Hait” ¶4-wcgr) B
Gambar B: Gambar ni sada ukiran ni halak Asiria sian abad ualu SM
4. Songon dia do Jahowa mamakke “bonang pangukkur” dohot “batu lot” lao mamareso Jerusalem? (2 Raj. 21:13; it “Batu Lot” ¶2-wcgr)
Pikkirhon ma Aha Parsiajaranna
Sian kisah on aha do na boi taparsiajari taringot pertobatan?
Sian kisah ni si Manasse, aha do bukti na patuduhon nang pe diampuni Jahowa halak na bertobat, alai tetap do ikkon ditaon ibana akibat ni dosana? (Jer. 15:3-5) C
Gambar C
Songon dia do caramuna maniru habaranion ni si Manasse?
Rimangi ma
Sian kisah on, aha do na boi huparsiajari taringot Jahowa?
Aha do hubungan ni kisah on tu janji ni Jahowa taringot Paradeiso?
Aha do na lao husukkun annon tu si Manasse molo nungnga dipahehe ibana?
Ida ma Muse on
Songon dia do teladan ni si Manasse boi mangurupi sahalak donganta asa mulak muse tu Jahowa?
Molo didok rohamuna dang mararga be ngolumuna ala hea mangulahon dosa na balga, songon dia do kisah ni si Manasse boi mangurupi hamu?
“Asi Roha ni Debata tu Ibana” (w11 1/1 18-wcgr)