Dioloi Ibana do Debata Nang pe Maol Mangulahon i

TORUS ma mardalan si Abraham tu inganan naung dipaboa Jahowa tu ibana. Sebenarna dang dao inganan i. Alai sian sude pardalanan na hea didalani si Abraham saleleng ngoluna, pardalanan on ma na ubborat.

Saleleng di pardalanan i sai diingot si Abraham do hata ni Jahowa na mandok, “Lao ma ho, boan ma si Isak anakmu na sasada i, haholongan ni rohami. Lao ma hamu tu Moria. Pelehon ma ibana gabe pelean situtungon di dolok na lao hupatudu tu ho.” Takkas do diboto Jahowa na holong hian roha ni si Abraham tu si Isak. Alai boasa ma disuru Jahowa ibana mangulahon i? Jala songon dia do si Abraham patuduhon habaranion dohot haporseaon na togu tikki mangulahon i?

Di Bibel, didok do si Abraham “ama ni sude halak na porsea”. (Rom 4:11) Sebelum disuru Jahowa pe si Abraham mamelehon anakna, nungnga dipatudu si Abraham na togu haporseaonna. Jala sai diurupi Jahowa do ibana patoguhon haporseaonna. Contohna, marpulu taon sebelumna dipaboa Jahowa do tu si Abraham na lao dihancurhon Kota Sodom dohot Gumora. Gabe marsak do roha ni si Abraham ala disi do si Lot tinggal. Disukkun ibana ma tu Jahowa, “Ate, naeng pamateonmu do halak na sittong rap dohot halak na jahat?” Didok Jahowa ma tu si Abraham, molo adong di kota i halak na sittong nang pe holan saotik, dang lao hancurhonon ni Jahowa i. (1 Mus. 18:​16-33) Sian i gabe diboto si Abraham ma, Debata na adil do Jahowa jala parasi roha. Pasti dang tarhalupahon si Abraham i.

Dang leleng dukkon i, dibahen Jahowa ma mukjizat na luar biasa tu si Abraham dohot si Sara. Gabe boi ma nasida marianakkon, jala tubu ma si Isak. Hape tikki i, nungnga hampir 90 taon umur ni si Sara jala hampir 100 taon umur ni si Abraham. (Rom 4:​18, 19) Sian peristiwa i dapot ni si Abraham ma parsiajaran na penting: Dang adong na so tarbahen ni Jahowa. Pasti torus do i diingot si Abraham.

Hira-hira 25 taon dukkon i, sai dirimang-rimangi si Abraham do muse akka peristiwa i saleleng di pardalanan tu Moria. Yakin do si Abraham, nang pe mate si Isak, sanggup do Jahowa pahehehon ibana. (Heb. 11:19) Alani i, gabe pos ma rohana jala barani ma ibana lao manorusson pardalanan i.

Dung diida si Abraham dolok na dipillit Jahowa i sian na dao, didok ibana ma tu akka hatobanna, “Dison ma hamu paimahon hami . . . mulak pe hami muse tuson.” Yakin do si Abraham pasti mulak do ibana dohot si Isak mandapotton akka hatobanna i. Dung i, ditorusson nasida ma pardalanan i jala sahat ma nasida di dolok i. Dapot ma tikkina naeng pelehonon ni si Abraham nama si Isak. Disusun si Abraham ma soban, diikkat ma pat dohot tangan ni si Isak, dung i dipeakkon ma si Isak tu atas ni soban i. Pasti dang hea tarpikkir si Abraham mangulahon i tu anak haholonganna. Nang pe upposo jala umgogo si Isak, alai dang dialo ibana bapakna. Rade do ibana mangulahon manang aha pe na didok bapakna i. Dukkon i dibuat si Abraham ma piso lao maneat anakna i. Alai ro ma sada suru-suruan manjou si Abraham jala didok ma, “Unang pamate dakdanak i.”

Las hian do roha ni Jahowa ala massai togu haporseaon ni si Abraham jala sai rade do ibana mangoloi Jahowa. Dipaingot Jahowa ma muse si Abraham tu janji na hea didok Ibana. Bahenon ni Jahowa ma massai godang pinopparna, jala dapotan pasu-pasu ma “sude bangso di tano on” alani haporseaonna. Sahat tu saonari, dipasaut Jahowa dope janjina i tu si Abraham. Dapotan pasu-pasu ma sude jolma, jala martahan do i saleleng ni lelengna.

Sian kisah ni si Abraham dohot si Isak, adong na boi taparsiajari taringot Jahowa. Songon si Abraham na rade mamelehon anak haholonganna, Jahowa pe olo do mangalehon Jesus Anak haholonganna asa boi hita sude mangolu saleleng ni lelengna. (Joh. 3:16) Tikki taparsiajari taringot pengorbanan ni si Abraham, gabe dipaingot ma hita na massai balga do holong ni Jahowa tu hita sude.

Songon si Abraham, molo torus tarimangi hata ni Jahowa dohot akka naung diulahon Ibana saleleng on, pasti gabe lam togu ma haporseaonta. Molo togu haporseaonta, gabe lam barani ma hita. Memang saonari, dang dipangido Jahowa be hita lao mamelehon anakta songon si Abraham. Alai molo togu haporseaotta, pasti rade jala barani do hita mangulahon manang aha pe na dipangido Jahowa. Molo taoloi Jahowa, lehononna ma tu hita pasu-pasu na massai balga, lobi sian na hea tabayakkon!

Jaha ma ceritana di:

• 1 Musa 22:​1-19

• Heber 11:​11, 12, 17-19

Na lao dibahas:

Sian peristiwa on, boha do cara ni si Abraham patuduhon habaranion?

Bagas ma Parsiajari

1. 1. Aha do buktina na tutu do hea mangolu si Abraham? (g 5/12 18, kotak-wcgr; it “Si Abraham” ¶22-23-wcgr) A

   Alusmuna

   

Pikkirhon ma Aha Parsiajaranna

• Boasa gabe barani si Abraham ala mangingot janji ni Jahowa? Boasa boi gabe barani hita molo torus taingot janji ni Jahowa? C

  Alusmuna

  

• Barani jala rade do si Abraham mangalehon pelean tu Jahowa. Boha do caratta maniru si Abraham . . .

  • tikki adong kesempatan lao marbarita? (Heb. 13:15)

    Alusmuna

  • tikki naeng mambahen keputusan taringot artatta? (Poda 3:9)

    Alusmuna

  • tikki adong dongan sahaporseaon na makkaporluhon bantuan? (Plp. 4:18)

    Alusmuna

• Songon dia do caramuna maniru habaranion na dipatudu si Abraham di kisah on?

  Alusmuna

Rimangi ma

• Sian kisah on, aha do na boi huparsiajari taringot Jahowa?

  Alusmuna

• Aha do hubungan ni kisah on tu janji ni Jahowa taringot Paradeiso?

  Alusmuna

• Aha do na lao husukkun annon tu si Abraham manang tu si Isak molo nungnga dipahehe nasida?

  Alusmuna

Ida ma Muse on

Tonton ma kisah on di video na mangihut.

Tiru ma Haporseaon ni Nasida—Abraham, Bagian 2 (11:10)

Boasa didok Jahowa sahabatna do si Abraham? Aha do na porlu diulahon hamu asa lam jonok hubunganmuna tu Jahowa?

“Digoari do Ibana ‘Aleale’ ni Jahowa” (w16.02 8-12)