Barani do Ibana Lao tu Huta na Dao

ADONG ma sahalak anak boru na massai uli, goarna si Rebekka. Pekerja keras do ibana. Ganup botari sai lao do ibana tu sumur mambuat aek. Diboan ibana do gucci na balga inganan ni aek i. Di sada tikki, diida ibana ma sian na dao adong akka bawa na hundul jonok ni sumur i rap dohot akka unta ni nasida. Dang ditanda si Rebekka ise akka bawa i. Nang pe songon i, ditorusson ibana do lao tu sumur i mambuat aek. Dung i diisi ma guccina i sappe gok.

Tikki naeng mulak si Rebekka, adong ma sahalak sian akka bawa na hundul i mandok tu ibana, “Dia ma jo saotik aek na di guccimi lao inumokku.” Didok si Rebekka ma, “Na ma tuan, minum ma tuan.” Dipaturun ibana ma gucci i sian bahuna jala dilean ma minum bawa i sappe puas. Burju do si Rebekka tu ibana nang pe dang ditanda dope ise bawa i.

Dang holan i na diulahon si Rebekka. Ditawarhon ibana do muse asa dilehon minum sappulu unta ni nasida. Sai mulak-ulak do si Rebekka mambuat aek sian sumur i lao inumon ni akka unta i. Gabe heran ma bawa i mangida ringgas ni si Rebekka. Dung i, disukkun bawa i ma boru ni ise do ibana. Jala disukkun ma muse boi do manang na dang nasida manginap di jabu ni bapakna. Ditogihon si Rebekka ma nasida manginap di jabu ni bapakna jala diparade ibana do tong siallangon ni akka unta i. Takkas ma, halak na burju do si Rebekka on.

Tikki i, dang diboto si Rebekka dope Jahowa do na mambahen gabe pajuppang ibana dohot bawa na di sumur i. Sian huta na dao do ro bawa i. Ra, si Elieser do goarna. Nungnga matua ibana, jala ibana do parkarejo na paling dihaporseai si Abraham. Piga-piga minggu sebelumna, dipangido si Abraham do ibana lao tu sada huta na massai dao. Disuru si Abraham do ibana mangalului istri tu anakna, si Isak. Si Isak do na lao mewarisi arta ni si Abraham. Jala didok si Abraham, ikkon sisomba Jahowa do borua i dohot keluargana. Alani i, martangiang ma si Elieser mangido tanda sian Jahowa. Didok ibana ma, manang ise anak boru na patuduhon haburjuon tu ibana, i ma na dipillit Jahowa gabe istri ni si Isak. Si Rebekka do hape borua i!

Memang, berbeda do sifat ni jolma di jaman ni si Rebekka tu jamanta saonari. Molo saonari, godangan halak ‘parmuruk-muruk jala makkasogohon na denggan’. (2 Tim. 3:​1, 3) Molo najolo, godang dope halak na burju. Jadi dang pola mabiar halak patuduhon haburjuon tu halak na so ditanda dope. Alai nang pe songon i, luar biasa do haburjuon na dipatudu si Rebekka i. Alana ikkon adong do di ibana habaranion lao mangurupi akka bawa i. Aha dope na diulahon si Rebekka dukkon i?

Dung i sahat ma nasida di jabu ni bapak ni si Rebekka. Goar ni bapakna, si Betuel jala itona si Laban. Ditogihon nasida ma si Elieser dohot akka donganna i asa rap mangan dohot nasida. Alai sebelum mangan, didok si Elieser ikkon jolo dipaboa ibana do aha tujuan ni ibana ro tusi. Diceritahon ibana ma songon dia Jahowa mangurupi ibana boi pajuppang dohot si Rebekka. Dung i gabe didok si Betuel dohot si Laban ma, “Na ro sian Jahowa do on.” Ujungna, diboto si Rebekka ma boasa ro si Elieser tusi.

Marsogotna i, disukkun si Elieser ma tu keluarga ni si Rebekka boi do diboan ibana si Rebekka manang na dang. Dung i, disukkun keluargana ma si Rebekka jala dipaloas do ibana na mambahen keputusan. Sebenarna sanga do mabiar si Elieser dang olo si Rebekka diboan tu Kanaan. Alai tikki disukkun keluargana si Rebekka, didok ibana do, “Olo do au.” Olo do ibana maninggalhon keluargana jala lao tu huta na dao. Hape olo do ra dang boi be nasida pajuppang dukkon i. Boasa barani si Rebekka mambahen keputusan i? Ra, ala diboto ibana lomo ni roha ni Jahowa do on.

Dung piga-piga minggu nasida di pardalanan, sahat ma nasida di kemah ni si Abraham na adong di Kanaan. Nungnga botari tikki i. Diida si Rebekka ma adong sahalak bawa mardalan-dalan di ladang huhut mangarimangi. Si Isak do bawa i jala nungnga marumur 40 taon ibana tikki i. Sahalak na lambok roha do ibana jala parholong. Nungnga tolu taon mate si Sara omakna alai sai lungun dope rohana. Tikki diida si Rebekka si Isak, dibuat ibana ma kain panutup ni uluna lao manutupi bohina. On ma tanda na dijalo ibana do si Isak gabe suamina. Sebenarna balga do tanggung jawab ni si Rebekka molo gabe istri ni si Isak, jala pasti godang do tantanganna. Barani do si Rebekka mandalatton tanggung jawabna i? Bibel mandok, boi do diulahon ibana i sude. Gabe istri na parholong do ibana jala sai didukung do si Isak sebagai kepala keluarga. Alani i ma didok di Bibel, “Jatuh cinta do si Isak tu ibana jala dang lungun be roha ni si Isak ala naung mate i omakna.”

Jaha ma ceritana di:

• 1 Musa 24:​1-67; 25:20

Na lao dibahas:

Boha do cara ni si Rebekka patuduhon habaranion?

Bagas ma Parsiajari

1. 1. Aha do pengaruhna tu si Elieser dung tubu anak ni si Abraham? Alai aha do buktina na so kecewa si Elieser? (1 Mus. 15:​2-4; 24:12; w97 1/1 30 ¶2-wcgr)

   Alusmuna

2. 2. Boasa dipangido si Abraham asa si Rebekka na pinda tu Kanaan, dang si Isak na pinda tu huta ni si Rebekka? (w97 1/1 30 ¶3-wcgr)

   Alusmuna

3. 3. Aha do arti ni akka hadiah na dilehon tu si Rebekka dohot tu keluargana? (it “Si Rebekka” ¶4-wcgr)

   Alusmuna

4. 4. Songon dia do pardalanan ni si Rebekka sian Haran tu huta ni si Isak di Negeb? Patorang ma. (wp16.3 15 ¶1) A

   Alusmuna

   

   www.LifeintheHolyLand.com

Pikkirhon ma Aha Parsiajaranna

• Aha do na boi tatiru sian si Abraham, si Rebekka, dohot si Isak taringot mamillit pasangan hidup? (1 Mus. 24:​2, 3; 27:46–28:1)

  Alusmuna

• Halak na ringgas do si Rebekka, burju, jala respek tu suamina. Aha ma na boi ditiru akka donganta borua sian ibana? B

  Alusmuna

  

• Songon dia do caramuna maniru habaranion ni si Rebekka?

  Alusmuna

Rimangi ma

• Sian kisah on, aha do na boi huparsiajari taringot Jahowa?

  Alusmuna

• Aha do hubungan ni kisah on tu janji ni Jahowa taringot Paradeiso?

  Alusmuna

• Aha do na lao husukkun annon tu si Rebekka molo nungnga dipahehe ibana?

  Alusmuna

Ida ma Muse on

Parrohahon ma songon dia si Rebekka patuduhon habaranion gabe istri na setia dohot omak na burju.

“Si Rebekka—Sahalak Borua na Ringgas jala Makkabiari Debata” (w04 15/4 8-11-wcgr)

Aha do na boi diparsiajari akka dakdanak sian si Rebekka?

“Sifat-Sifat Baik Ribka” (“Permainan dengan Gambar” di jw.org/id)