BAGIAN 4
Perasaan Bersalah—“Paias ma Au sian Akka Dosakku”
“Dung dapottu karejo na baru, gabe lam denggan ma ngolu ni keluarganami. Alai mulai ma au dohot tu akka kegiatan na so sesuai tu prinsip ni Bibel. Dohot ma au mangarayahon akka ari raya dohot kegiatan politik, bahkan lao tu gareja. Saleleng 40 taon ma au dang aktif gabe Saksi Jahowa. Gabe didok rohakku ma, dang mungkin diampuni Jahowa au. Jala huhilala dang boi humaappon dirikku sandiri, alana sebelum huulahon i sude, nungnga hutanda hasittongan.”—Si Martha.
PERASAAN bersalah boi do gabe songon boban na massai borat. Didok Raja Daud, “Gabe lonong do au dibahen dosakki. Songon boban na borat do i, na so tolap boanokku.” (Psalmen 38:4) Adong do piga-piga halak Kristen na gabe lungun rohana ala dirippu dang olo be Jahowa mengampuni nasida. (2 Korint 2:7) Molo hea diulahon hamu dosa na balga, tutu do dang diampuni Jahowa dosamuna i? Dang tutu songon i.
‘Tapasae ma Akka Parsoalatta’
Dang hea ditinggalhon Jahowa akka halak na olo bertobat. Gariada, berupaya do Jahowa lao mangurupi nasida. Di ilustrasi taringot anak na mago, disarupahon Jesus do Jahowa i songon sahalak ama na parholong. Adong ma sada sian anak ni ama i na maninggalhon keluargana jala mangulahon akka ulaon na so suman. Ujungna, naeng mulak do anakna i tu bapakna. Tikki mulak ibana, didok di Bibel, “Sian na dao dope nungnga diida bapakna i ibana. Gabe asi ma roha ni bapakna i, marlojong ma ibana, dihaol, jala diumma ma anakna i.” (Lukas 15:11-20) Ra, lomo do rohamuna naeng mulak muse tu Jahowa. Alai didok rohamuna, nungnga dao hamu sian Jahowa. Songon ama na dipaboa di ilustrasi ni Jesus i, asi do roha ni Jahowa tu hamu. Jala sai dipaima do hamu asa mulak muse tu Ibana.
Boha do molo didok rohamuna dang olo Jahowa mengampuni hamu ala massai balga do dosamuna i manang massai godang? Pikkirhon ma undangan ni Jahowa na disurat di Jesaya 1:18. Didok, “‘Beta, ro ma hamu, asa tapasae akka parsoalatta,’ ninna Jahowa. ‘Nang pe songon merah ni mudar dosamuna, bottar do i bahenokku songon salju.’” Nang pe songon warna na merah di pakkean na bottar dosamuna i, alai boi do i bottar bahenon ni Jahowa. Olo do Jahowa mengampuni molo bertobat hamu.
Dang lomo roha ni Jahowa sai merasa bersalah hamu ala terganggu hati nuranimuna. Jadi songon dia do asa boi lubbang pakkilalaanmuna ala nungnga diampuni Jahowa dosamuna jala ias hati nuranimuna? Adong dua na diulahon Raja Daud. Na parjolo didok ibana, “Huakkui ma salakku tu Jahowa.” (Psalmen 32:5) Ingot ma, Jahowa sandiri do na mangundang hamu asa martangiang lao jonok tu Ibana, jala asa ‘dipasae hamu parsoalanmuna’ dohot Ibana. Alani i, jalo hamu ma undangan ni Jahowa i. Akkui hamu ma dosamuna, jala pasahat ma sude na di rohamuna tu Ibana. Nungnga diulahon si Daud songon i. Alani i ma pos do rohana mandok, “Paias ma au sian akka dosakku. . . . Dang dipalao Ho ale Debata, halak na marsak dohot na manolsoli.”—Psalmen 51:2, 17.
Na paduahon, olo do si Daud manjalo bantuan sian wakil na disuru Jahowa, i ma Panurirang Natan. (2 Samuel 12:13) Saonari pe dilatik Jahowa do akka sintua lao mangurupi akka halak na olo bertobat, asa jonok muse tu Jahowa. Molo makkatai hamu tu akka sintua, urupan ni nasida do hamu. Jahaon ni nasida ma ayat ni Bibel jala martangiang rap dohot hamu asa lubbang pakkilalaanmuna. Asing ni i, urupan ni akka sintua do muse hamu asa unang sai marpikkiran negatif jala jonok muse hubunganmuna tu Jahowa.—Jakobus 5:14-16.
Lomo do roha ni Jahowa asa ias muse hati nuranimuna
“Marlas ni Roha ma Halak na Disalpuhon Hasalaanna”
Olo do ra maol dihilala hamu lao mangakkui akka dosamuna i tu Jahowa jala makkatai tu akka sintua. Ra, songon i do na dihilala si Daud. Sanga do ditabunihon ibana akka dosana. (Psalmen 32:3) Alai dung diakkui ibana dosana jala bertobat, dihilala ibana ma godang manfaatna.
Sada manfaatna i ma, boi muse ibana marlas ni roha. Disurat si Daud do, “Marlas ni roha ma halak na disalpuhon hasalaanna, na disesa dosana.” (Psalmen 32:1) Didok do muse, “Ale Jahowa, bukka ma pamanganku, asa boi hupuji Ho.” (Psalmen 51:15) Mandok mauliate do si Daud tu Jahowa ala nungnga diampuni dosana jala dang sai merasa bersalah be. Gabe taronjar ma rohana paboahon taringot Jahowa tu akka halak.
Lomo do roha ni Jahowa asa unang sai merasa bersalah hamu jala ias hati nuranimuna. Lomo do muse rohana asa marlas ni roha hamu tikki paboahon taringot Ibana dohot akka janjina. (Psalmen 65:1-4) Ingot ma undangan ni Jahowa i. Lomo do rohana asa mulak muse hamu tu Ibana jala “asa disesa dosamuna. Molo diulahon hamu songon i, bahenon ni Jahowa ma hamu margogo”.—Ulaon ni Apostel 3:19.
Songon i ma na dihilala si Martha. Didok ibana, “Torus do dikirim anakku majalah Joujou Paboahon dohot Dungo ma! tu au. Ala torus hujaha i, lam leleng gabe jonok ma muse au tu Jahowa. Alai na ummaol huulahon, i ma mangido asa diampuni Jahowa sude dosakku. Ujungna martangiang ma au tu Jahowa mangido asa diampuni. Dang hurippu boi muse au mulak tu Jahowa dukkon 40 taon. Nungnga hurasahon sandiri be, nang pe naung marpulu taon hita dang aktif manomba Jahowa, alai dilehon dope kesempatan tu hita asa mulak tu Ibana jala makkilala holongna.”