Hajahaton na Diulahon Alani Sogo ni Roha—Aha do na Didok Bibel Taringot i?

Godang do halak na marsogo ni roha tu halak na berbeda suku, marga, agama, manang jenis kelaminna. I ma na mambahen nasida mangulahon na jahat tu halak na asing. Jala lam jotjot do masa i saonari. Akibatna gabe godang ma halak na mabiar, na tarlukka, manang na trauma. Bahkan adong do na sappe mate.

Nungnga dipaboa Bibel hian, di jamanta on lam godang do halak na “parmuruk-muruk, makkasogohon na denggan,” jala “dang marroha holong”. (2 Timoteus 3:1-5) Boi do dang adong be hajahaton na diulahon alani sogo ni roha? Aha do na didok Bibel taringot i?

Dang na lao adong be hajahaton

Dipaboa do di Bibel, boi do bahenon ni Debata asa dang adong be hajahaton di tano on, jala i do na lao ulahononna.

• “Na lao hancur do halak na jahat. . . Alai molo halak na lambok roha, dilehon do tano on gabe parbagianan ni nasida, marlas ni roha situtu ma nasida, ai dame do ngolu ni nasida.” (Psalmen 37:9-11) Dang pasombuon ni Debata adong halak na mangulahon na jahat salelengna.

• “Apusan ni Debata ma nasa ilu-ilu sian mata ni nasida. Dang adong be hamatean nang arsak ni roha, nang angguk-angguk, nang na haccit, dang disi be.” (Pangungkapon 21:4) Godang do halak na gabe tarlukka, marsahit mental, jala trauma alani hajahaton ni halak na asing. Alai na lao dipamalum Debata nama i satokkin nai.

• “Na lao dipahehe Debata do halak na [mate].” (Ulaon ni Apostel 24:15) Paheheon ni Debata nama sude halak na mate, termasuk na mate alani hajahaton ni halak na asing.

Boi do Bibel mangurupi hita

Dang holan janji ni Debata na dipaboa di Bibel. Dipaboa do tong disi boha carana mambolokkon sogo ni roha jala aha na ikkon taulahon tikki godang taida masa hajahaton. Las rohanami manjujui hamu mangalului alus ni sukkun-sukkun on sian Bibel:

• Boha ma carana asa unang sappe taulahon na jahat ala sogo rohatta tu halak na asing? Ida ma poda ni Bibel taringot i di majalah Joujou Paboahon na marjudul “Unang Be Marsogo ni Roha tu na Asing.”

• Boasa dipaloas Debata masa hasusaan sahat tu saonari? Ida ma alus ni Bibel taringot i di video Boasa Dipaloas Debata Masa Hasusaan?